Kisoboka Abantu Bonna mu Nsi Okuba Obumu?

ENSI yaffe eyolekedde kuba mu mirembe oba katyabaga? Waliwo ensonga eziyinza okuwagira buli ludda.

Abakulembeze b’amawanga abamu bagamba nti wasobola okubaawo emirembe mu nsi yonna​—oboolyawo olw’okukiraba nti bwe kitaba kityo ensi eba eyolekedde akatyabaga. Ate abalala beeraliikirira bwe balowooza ku bibuuzo nga bino: Mawanga ki agalina eby’okulwanyisa nnamuzisa? Gayinza okubikozesa? Kiki ekiyinza okubaawo singa gabikozesa?

Ebyafaayo biraga nti okuva edda n’edda ensi zonna ziremeddwa okuba obumu olw’okuvuganya n’obukyayi, era nti amadiini gongedde embeera eno okuba embi. Munnamawulire James A. Haught yawandiika nti: “Ekintu kyonna ekyawukanya abantu kisobola okuleetawo obukyayi, era eddiini kye kimu ku bisinze okwawukanya abantu. Wadde ng’abantu bonna okutwalira awamu balowooza nti eddiini eyamba abantu okuba ‘abalungi,’ kyeyoleka kaati nti ereetera abamu okukola ebintu ebibi ennyo.” Omuwandiisi Steven Weinberg naye bw’atyo bw’alowooza. Agamba nti: “Ddiini yokka y’esobola okuleetera abantu abalungi okukola ebintu ebibi ennyo.”

Waliwo essuubi lyonna nti ekiseera kijja kutuuka ensi yaffe ebeere bumu? Yee! Naye nga bwe tugenda okulaba, ekyo tekijja kuva ku nteekateeka z’abantu oba eddiini ze bateekawo.

[Ebigambo ebisimbuddwa mu kitundu ekiri ku lupapula 3]

Ensi eringa bbomu eneetera okubwatuka?