ESSOMO 11

Okwogera n’Ebbugumu

Abaruumi 12:11

MU BUFUNZE: Yogera n’ebbugumu kiyambe abakuwuliriza okussaayo omwoyo n’okubaako kye bakolawo.

Omutima gwo gusse ku ebyo by’ogenda okwogerako. Bw’oba otegeka emboozi yo, lowooza ku muganyulo oguli mu ebyo by’ogenda okuyigiriza. Tegeera bulungi by’ogenda okwogerako osobole okubyogera nga biviira ddala ku mutima.
Lowooza ku banaakuwuliriza. Fumiitiriza ku ngeri ebyo by’ogenda okusoma oba okuyigiriza abalala gye binaabaganyulamu. Lowooza ku ngeri ez’enjawulo z’oyinza okuyigirizaamu, osobole okuyamba abanaakuwuliriza okwongera okusiima by’onoobayigiriza.
Yoleka ebbugumu ng’oyogera. Yogera n’ebbugumu. Kozesa ebitundu byo eby’omubiri n’endabika yo ey’oku maaso mu ngeri eyoleka enneewulira gy’olina ku kintu ky’oyogerako.

Towugula bakuwuliriza ng’okozesa ekitundu ekimu eky’omubiri gwo mu ngeri y’emu enfunda n’enfunda. Kozesa ebitundu byo eby’omubiri n’endabika yo ey’oku maaso mu ngeri etuukirawo. Yogera n’ebbugumu, naddala ng’onnyonnyola ensonga enkulu oba ng’okubiriza abakuwuliriza okubaako kye bakolawo. Weewale okwogera n’ebbugumu ku buli nsonga, kubanga ekyo kiyinza okuviirako abakuwuliriza okwetamwa.