ESSOMO 10

Okukyusakyusa mu Ddoboozi

Engero 8:4, 7

MU BUFUNZE: Fuba okuggyayo ensonga n’okwoleka enneewulira etuukirawo ng’okyusakyusa mu ddoboozi lyo ne sipiidi gy’oyogererako.

Kyusakyusa mu ddoboozi. Yongeza oba kendeeza ku ddoboozi lyo ng’oggumiza ensonga enkulu era ng’okubiriza abakuwuliriza okubaako kye bakolawo. Yongeza eddoboozi ng’osoma ekyawandiikibwa ekirimu obubaka obw’omusango. Kendeeza ku ddoboozi okuleetera abakuwuliriza okwesunga ky’ogenda okuzzaako, oba okwoleka okutya oba okweraliikirira.

Toyongeza ddoboozi lyo buli kiseera, n’owulikika ng’akabuwalidde abakuwuliriza. Weegendereze engeri gy’okyusakyusaamu eddoboozi lyo oleme kuwulikika ng’omuntu eyeeraga.
Kyusakyusa mu ngeri eddoboozi lyo gye liwulikikamu. Ng’osinziira ku mateeka agafuga olulimi lwo, yongeza eddoboozi lyo okwoleka ebbugumu oba okulaga obunene bw’ekintu oba okulaga nti kiri wala. Kkakkanya ku ddoboozi lyo okwoleka ennaku oba okweraliikirira.
Kyusakyusa mu sipiidi gy’oyogererako. Yongeza ku sipiidi gy’oyogererako okusobola okwoleka essanyu. Kendeeza ku sipiidi gy’oyogererako ng’otuuse ku nsonga enkulu.

Sipiidi gy’oyogererako togikyusa mbagirawo, kubanga ekyo kijja kuwugula abakuwuliriza. Toyogerera kumukumu kubanga by’oyogera biyinza obutategeerekeka.