Eng béis Kinnigin kritt hir Strof

De Kinnek Ahab wunnt an engem Palais zu Jesreel. Aus senger Fënster gesäit hien de Wéngert, deen dem Naboth gehéiert. Den Ahab wëll dëse Wéngert hunn, awer den Naboth wëll him en net verkafen. Jehova säi Gesetz seet nämlech, datt een e Land, dat ee gierft huet, net verkafen dierf. Den Naboth wëll also dat maachen, wat richteg ass. Fënnt den Ahab dat gutt? Nee! Hie gëtt esou rosen, datt hien einfach am Bett bleift an näischt méi iesse wëll.

Dem Ahab seng Fra, déi béis Kinnigin Isebel, seet him: »Du bass de Kinnek vun Israel. Du kanns alles hunn, wat s du wëlls! Ech këmmere mech drëm, datt s du de Wéngert kriss.« Hatt schreift Bréiwer un déi wichteg Männer aus der Stad. Si sollen den Naboth beschëllegen, hien hätt Gott verflucht an dofir soll hie gestengegt ginn. Dës Männer maachen dat, wat d’Isebel vun hinne verlaangt. D’Isebel seet zum Ahab: »Den Naboth ass dout! Elo gehéiert de Wéngert dir.«

D’Isebel bréngt vill onschëlleg Mënschen ëm, déi Jehova gär hunn, esou wéi den Naboth. Hatt biet Gëtzen un a mécht nach vill aner béis Saachen. Awer Jehova gesäit dat alles. Wat wäert hie mam Isebel maachen?

Den Ahab stierft a méi spéit gëtt säi Jong, de Joram, Kinnek. Jehova schéckt e Mann, dee Jehu heescht, fir d’Isebel an seng Famill ze bestrofen.

De Jehu fiert mat sengem Krichswon op Jesreel, wou d’Isebel lieft. De Kinnek Joram kënnt him mat sengem Won entgéint a freet: „Kënns du am Fridden?“ De Jehu seet: »Et ka kee Fridde ginn esoulaang deng Mamm, d’Isebel, all déi schlecht Saache mécht.« De Joram probéiert säi Won ëmzedréinen a fortzekommen. Awer de Jehu hëlt Feil a Bou an erschéisst de Joram.

De Jehu mécht sech elo op de Wee bei de Palais vum Isebel. Wéi hatt héiert, datt hien ënnerwee ass, mécht hatt sech prett. Hatt schminkt sech, mécht seng Hoer a waart uewe bei senger Fënster. Wéi de Jehu ukënnt, begréisst d’Isebel hien op eng frech Manéier. D’Dénger, déi niewent dem Isebel stinn, kréie vum Jehu zougeruff: „Geheit et erof!“ Si geheien d’Isebel aus der Fënster an hatt stierft.

Dono léisst de Jehu dem Ahab seng 70 Jongen ëmbréngen a mécht dem Baalskult am ganze Land en Enn. Ass dir opgefall, datt Jehova alles gesäit an déi béis Mënschen zum richtegen Zäitpunkt bestrooft?