Jehova säin Engel beschützt den Hiskia

D’assyresch Weltmuecht huet d’Kinnekräich Israel, dat aus 10 Stämm besteet, erobert. Elo wëll de Sanherib, de Kinnek vun Assyrien, och d’Kinnekräich Juda, dat aus 2 Stämm besteet, eroberen. Hie fänkt un, d’Stied vu Juda anzehuelen, eng no der anerer. Awer virun allem wëll hie Jerusalem hunn. De Sanherib weess awer net, datt Jehova Jerusalem beschützt.

Den Hiskia, de Kinnek vu Juda, gëtt dem Sanherib vill Suen, fir datt hie Jerusalem mat Rou léisst. De Sanherib hëlt d’Suen un, schéckt awer trotzdeem seng staark Arméi, fir Jerusalem unzegräifen. D’Mënschen an der Stad hu vill Angscht, well d’Assyrer ëmmer méi no kommen. Den Hiskia seet hinnen: »Fäert net. D’Assyrer si staark, awer mat Jehova si mir méi staark.«

De Sanherib schéckt de Rabschake mat enger Noriicht op Jerusalem, fir de Geck mat hinnen ze maachen. De Rabschake steet virun der Stad a jäizt: »Jehova kann iech net hëllefen. Loosst iech net vum Hiskia uschmieren. Kee Gott kann iech virun eis beschützen!«

Den Hiskia freet Jehova, wat hie maache soll. Jehova äntwert: »Fäert net wéinst deem, wat de Rabschake seet. De Sanherib wäert Jerusalem net anhuelen.« Da kritt den Hiskia Bréiwer vum Sanherib, an deene steet: »Gëff dach einfach op! Jehova kann dech net retten.« Doropshi biet den Hiskia: »Jehova, rett eis wannechgelift, fir datt jidderee gesäit, datt s du den eenzeg richtege Gott bass.« Jehova seet zu him: »De Kinnek vun Assyrie kritt Jerusalem net, well ech beschütze meng Stad.«

De Sanherib ass sech sécher, datt Jerusalem geschwënn him gehéiert. An där Nuecht schéckt Jehova säin Engel an d’Lager vun den Assyrer. Den Engel mécht 185 000 Zaldoten dout! De Kinnek Sanherib verléiert seng bescht Zaldoten. Elo bleift him näischt anescht iwwereg, wéi heemzegoen. Jehova huet Jerusalem an den Hiskia beschützt, esou wéi hien et versprach hat. Wann s du deemools zu Jerusalem gewiescht wiers, häss du op Jehova vertraut?