De Josia huet Gott säi Gesetz gär

De Josia ass 8 Joer al, wéi hien de Kinnek vu Juda gëtt. Zu där Zäit beschäftegt d’Vollek sech vill mat Magie a biet Gëtzen un. Am Alter vu 16 Joer versicht de Josia erauszefannen, wéi hie Jehova op déi richteg Aart a Weis ubiede kann. Wéi hien 20 ass, fänkt hien un, am ganze Land alles ze zerstéieren, wat mat der falscher Ubiedung ze dinn huet. Mat 26 setzt hien alles drun, fir datt den Tempel vu Jehova erëm an d’Rei gemaach gëtt.

Am Tempel fënnt den Ieweschte Priister Hilkija d’Buch vum Gesetz. Warscheinlech ass et esouguer déi Schrëftrull, déi de Moses selwer geschriwwen huet. Dem Kinnek säi Sekretär, de Schaphan, bréngt dem Josia d’Gesetz a liest him et haart vir. Dobäi gëtt dem Josia bewosst, datt d’Vollek scho jorelaang net méi op Jehova lauschtert. De Kinnek Josia seet dem Hilkija: »Jehova ass immens rose mat eis. Gitt a frot hien, wat mir maache sollen. Hie wäert eis et matdeelen.« Jehova äntwert duerch d’Prophéitin Hulda: »D’Vollek vu Juda huet mech verlooss. Ech bestrofe si, awer net esoulaang de Josia Kinnek ass. Hien huet mat Demut reagéiert, well hien dat gemaach huet, wat richteg ass.«

Wéi de Kinnek Josia dëst héiert, rifft hien d’Vollek vu Juda zesummen a geet bei den Tempel. Hie liest hinnen d’Gesetz vu Jehova vir. De Josia an d’Vollek verspriechen, Jehova vu ganzem Häerzen ze follegen.

A Juda gouf d’Passah scho jorelaang net méi gefeiert. Wéi de Josia am Gesetz liest, datt d’Passah all Joer gefeiert soll ginn, seet hien zum Vollek: »Mir feieren d’Fest vum Passah fir Jehova.« De Josia mécht alles prett, fir vill Affer duerzebréngen. Hie suergt och dofir, datt et am Tempel e Chouer vu Sänger gëtt. D’Vollek feiert dann d’Passah. Direkt dono feiere si 7 Deeg laang d’Fest vum Brout ouni Sauerdeeg. Esou ass d’Passah zënter dem Samuel senger Zäit net méi gefeiert ginn. De Josia huet Gott säi Gesetz wierklech gär. Fënns du et och schéin, eppes iwwer Jehova ze léieren?