Rut
3 Rut in mɔdɛnlɔ Naomi tɛl am se: “Mi pikin, yu nɔ tink se a fɔ fɛn man fɔ yu+ we go mared yu so dat yu go gɛt kolat? 2 Boaz na wi fambul,+ nɔto so? Nain yɔŋuman dɛn yu bin de wit. Dis nɛt, i de go pul chafchaf pan di bali* na di say we dɛn kin pul sid pan plant. 3 So was ɛn rɔb sɔm pafyum ɔyl, drɛs fayn ɛn go dɔŋ na di ples usay dɛn de pul sid pan plant. Nɔ mek lɛ di man si yu te i dɔn fɔ it ɛn drink. 4 We i ledɔm, wach usay i ledɔm, dɔn go pul di kɔba klos nain fut ɛn ledɔm. I go tɛl yu wetin yu fɔ du.”
5 Na de Rut tɛl am se: “A go du ɔl wetin yu dɔn tɛl mi.” 6 So i go dɔŋ na di ples usay dɛn de pul sid pan plant ɛn du ɔl wetin in mɔdɛnlɔ dɔn tɛl am fɔ du. 7 Boaz it ɛn drink, ɛn i bin gladi. Dɔn i go ledɔm nia di bali* we dɛn payl. Afta dat, Rut kam kwayɛt wan ɛn pul di kɔba klos nain fut ɛn ledɔm. 8 Midulnɛt, di man bigin fɔ trimbul ɛn we i grap sidɔm, i si wan uman ledɔm nia in fut. 9 I aks am se: “Udat na yu?” I ansa se: “Na mi Rut, yu savant. Protɛkt yu savant* bikɔs yu gɛt di rayt fɔ bay mi famili bak.”+ 10 Boaz tɛl am se: “Mi pikin, mek Jiova blɛs yu. Di tin dɛn we yu bin dɔn du+ sho se yu rili gɛt lɔv we nɔ de chenj, bɔt di tin we yu dɔn du naw dɔn sho dat klia wan bikɔs yu nɔ luk fɔ yɔŋman fɔ mared yu, ilɛksɛf i po ɔ i jɛntri. 11 Mi pikin nɔ fred. A go du ɔl wetin yu dɔn se+ bikɔs ɔlman na di siti no se yu na gud uman. 12 Na tru se a gɛt di rayt fɔ bay yu bak,+ bɔt ɔda pɔsin de we gɛt rayt mɔ pas mi+ bikɔs in na Ɛlimilɛk in kloz fambul. 13 Slip ya dis nɛt, ɛn if i go bay yu bak na mɔnin, fayn! Lɛ i bay yu bak.+ Bɔt if i nɔ want fɔ bay yu bak, mi go bay yu bak, as lɔng as Jiova de alayv. Ledɔm ya te na mɔnin.”
14 So i ledɔm nia in fut te na mɔnin, ɛn i grap we di ples stil dak bifo ɛnibɔdi ebul fɔ si in kɔmpin fayn. Dɔn Boaz tɔk se: “Nɔ mek ɛnibɔdi no se uman kam na di ples usay dɛn de pul sid pan plant.” 15 Dɔn i tɛl am se: “Briŋ di klos we yu rap wit ɛn opin am.” So i opin am, ɛn i put bɔku bɔku* bali* de, dɔn i es am ɛn gi am. Afta dat, Boaz go bak na di siti.
16 Rut go to in mɔdɛnlɔ ɛn in mɔdɛnlɔ aks am se: “Mi pikin, aw yu pas?” Rut tɛl am ɔl wetin di man du fɔ am. 17 Dɔn i tɔk bak se: “Di man gi mi bɔku bɔku bali* ɛn tɔk se, ‘Nɔ go ɛmti-an to yu mɔdɛnlɔ.’” 18 Na de Naomi tɛl am se: “Sidɔm wet mi pikin, te yu si wetin go apin, bikɔs di man nɔ go blo pas te i sɛtul ɔltin tide.”