Jɔjis
3 Dis na di neshɔn dɛn we Jiova alaw fɔ lɛf so dat dɛn go tɛst ɔl di Izrɛlayt dɛn we nɔ bin dɔn tek pat yet pan ɛni ɔf di wɔ dɛn na Kenan+ 2 (dis na fɔ mek di Izrɛlayt jɛnɛreshɔn dɛn we de kam go tek pat pan wɔ, dat na, di wan dɛn we nɔ bin dɔn tek pat pan dɛn kayn tin dɛn ya): 3 di pipul dɛn we lɛf na di fayv rula dɛn fɔ di Filistin+ dɛn, ɔl di Kenanayt dɛn, di Saydonian+ dɛn, ɛn di Ayvayt+ dɛn we de na Mawnt Libanɔn+ frɔm Mawnt Beal-amɔn te go na Libo-emat.*+ 4 Dɛn neshɔn dɛn ya na bin tɛst fɔ di Izrɛlayt dɛn fɔ no if dɛn go obe Jiova in kɔmandmɛnt dɛn we i bin gi dɛn papa dɛn tru Mozis.+ 5 So di Izrɛlayt dɛn bin de liv wit di Kenanayt+ dɛn, di Itayt dɛn, di Amɔrayt dɛn, di Pɛrizayt dɛn, di Ayvayt dɛn, ɛn di Jɛbyusayt dɛn. 6 Dɛn bin de mared dɛn galpikin dɛn, ɛn dɛn bin de gi dɛn yon galpikin dɛn to dɛn bɔypikin dɛn fɔ mared, ɛn dɛn bigin fɔ wɔship dɛn gɔd+ dɛn.
7 So di Izrɛlayt dɛn du wetin bad na Jiova in yay, ɛn dɛn fɔgɛt Jiova we na dɛn Gɔd, ɛn dɛn bin de wɔship di Beal+ dɛn ɛn di oli pol*+ dɛn. 8 Nain Jiova vɛks bad bad wan pan di Izrɛlayt dɛn, ɛn i an ova dɛn to Kushan-rishateim we na di kiŋ na Mɛsopotemia.* Di Izrɛlayt dɛn wok fɔ Kushan-rishateim fɔ et ia. 9 We di Izrɛlayt dɛn beg Jiova fɔ ɛp dɛn,+ Jiova pik sɔmbɔdi fɔ sev dɛn,+ dat na, Ɔtniɛl,+ Kenaz in bɔypikin, we na Kelɛb in smɔl brɔda. 10 Jiova in spirit kam pan am,+ ɛn i bi di jɔj na Izrɛl. We i go fɔ fɛt, Jiova an ova Kushan-rishateim we na di kiŋ na Mɛsopotemia* to am ɛn i win am. 11 Afta dat, pis* de na di land fɔ 40 ia. Dɔn Ɔtniɛl we na Kinaz in bɔypikin day.
12 Na de di Izrɛlayt dɛn bigin du wetin bad na Jiova in yay bak.+ So Jiova mek Ɛglɔn, di kiŋ na Moab,+ gɛt pawa pas di Izrɛlayt dɛn, bikɔs dɛn bin de du wetin bad na Jiova in yay. 13 Pantap dat, i mek di Amɔnayt+ dɛn ɛn di Amalɛkayt+ dɛn fɛt di Izrɛlayt dɛn. Dɛn atak dɛn ɛn kapchɔ di pam stik siti.+ 14 Di Izrɛlayt dɛn wok fɔ Ɛglɔn we na di kiŋ na Moab fɔ 18 ia.+ 15 Dɔn di Izrɛlayt dɛn beg Jiova fɔ ɛp dɛn,+ so Jiova pik sɔmbɔdi fɔ sev dɛn,+ dat na, Iud+ we na Gira in bɔypikin. Iud na bin Bɛnjaminayt+ ɛn na bin lɛftan man.+ Afta sɔm tɛm, di Izrɛlayt dɛn sɛn am fɔ kɛr go di pemɛnt we dɛn kin gi to Ɛglɔn we na di kiŋ na Moab. 16 Iud bin dɔn mek fɔ insɛf wan sɔd we gɛt tu ɛj, di sɔd na bin wan kyubit* lɔng, ɛn i tay am na di rayt say nain wesbon ɔnda in klos. 17 Na de i gi di pemɛnt to Ɛglɔn we na di kiŋ na Moab. Ɛglɔn na man we bin rili fat.
18 We Iud dɔn fɔ gi di pemɛnt, i tɛl di wan dɛn we kam wit di pemɛnt fɔ go bak. 19 Bɔt afta Iud rich Gilgal+ usay di kav imej* dɛn de, i tɔn bak ɛn tɔk se: “Mi kiŋ, a gɛt sikrit mɛsej fɔ yu.” So di kiŋ se: “Una sɛt una mɔt!” Na de ɔl in savant dɛn go. 20 So Iud go to am we in wangren bin sidɔm na di rum we de ɔp in ruf we kol. Dɔn Iud se: “A gɛt mɛsej fɔ yu frɔm Gɔd.” So i grap nain tron.* 21 Na de Iud drɔ di sɔd na di rayt say nain wesbon ɛn chuk am nain bɛlɛ. 22 Di sɔd in andul go insay wit di bled, ɛn di fat kɔba di bled, bikɔs i nɔ drɔ di sɔd kɔmɔt nain bɛlɛ, ɛn tɔylɛt kɔmɔt na do. 23 Iud pas na di viranda;* i lɔk di rum we de ɔp di ruf in domɔt dɛn. 24 Afta i go, di savant dɛn kam bak ɛn si se di rum we de ɔp di ruf in domɔt dɛn lɔk. So dɛn se: “I go de na tɔylɛt* insay di rum we kol.” 25 Dɛn kɔntinyu fɔ wet te dɛn bigin wɔri, bɔt we dɛn si se i stil nɔ de opin di rum we de ɔp in domɔt dɛn, dɛn tek di ki ɛn opin dɛn, ɛn dɛn si se dɛn masta ledɔm na grɔn in day wan!
26 Iud rɔnawe we dɛn bin de dile, ɛn i pas usay di kav imej*+ dɛn de ɛn rich sef wan na Sɛayra. 27 We i rich, i blo di ɔn+ na di eria usay mawntin dɛn de na Ifrem,+ ɛn di Izrɛlayt dɛn kɔmɔt na di eria usay mawntin dɛn de ɛn go dɔŋ; nain bin de lid dɛn. 28 Dɔn i tɛl dɛn se: “Una fala mi, bikɔs Jiova dɔn gi una di Moabayt dɛn we na una ɛnimi dɛn.” So dɛn fala am ɛn kapchɔ di say dɛn na di Jɔdan we nɔ dip so dat di Moabayt dɛn nɔ go rɔnawe, ɛn dɛn nɔ alaw ɛnibɔdi fɔ krɔs. 29 Dɛn kil lɛk 10,000 Moabayt+ dɛn, dɛn ɔl na man dɛn we bin strɔng ɛn gɛt maynd; wan sɛf nɔ ɛskep.+ 30 So di Izrɛlayt dɛn win di Moabayt dɛn da de de; ɛn pis* bin de na di land fɔ 80 ia.+
31 Afta Iud na Shamga,+ we na Enat in bɔypikin. I kil 600 Filistin man+ dɛn wit wan lɔng shap stik we dɛn bin de yuz fɔ kɔntrol kaw+ dɛn, ɛn insɛf bin sev Izrɛl.