Jɔjis
14 Dɔn Samsin go dɔŋ na Timna, ɛn i si wan Filistin uman de. 2 So i go ɔp ɛn tɛl in mama ɛn papa se: “A dɔn si wan Filistin uman na Timna we a lɛk, a want lɛ una go mared am fɔ mi.” 3 Bɔt in mama ɛn papa aks am se: “Yu nɔ ebul fɔ fɛn uman frɔm yu fambul dɛn ɛn frɔm ɔl wi pipul+ dɛn? Pas yu go fɛn uman frɔm di Filistin dɛn we nɔ sakɔmsayz?” Bɔt Samsin tɛl in papa se: “Una mared am fɔ mi, bikɔs nain na di rayt wan fɔ mi.” 4 In mama ɛn in papa nɔ bin no se na Jiova de mek i du dat, bikɔs I bin de luk fɔ we fɔ fɛt di Filistin dɛn. Na di Filistin dɛn bin de rul di Izrɛlayt dɛn da tɛm de.+
5 So Samsin go dɔŋ wit in mama ɛn papa na Timna. We i rich usay di vayn gadin dɛn de na Timna, wan layɔn kam mit am, de kam ɛn ala pan am. 6 Na de Jiova in spirit mek i gɛt pawa,+ ɛn i chɛr di layɔn to tu, jɔs lɛk we sɔmbɔdi go chɛr yɔŋ got to tu wit in ɛmti-an. Bɔt i nɔ tɛl in mama ɛn papa wetin i dɔn du. 7 Dɔn Samsin go dɔŋ ɛn tɔk to di uman, ɛn i bin stil de si di uman as di rayt wan fɔ am.+
8 Leta, we Samsin de go bak fɔ go tek di uman ɛn kɛr am go nain os,+ i go luk di layɔn in dedebɔdi, ɛn bɔku bɔku ɔni dɛn we gɛt ɔni na dɛn os bin de pan di layɔn in dedebɔdi. 9 So i tek di ɔni ɛn put am nain an, ɛn i bin de go ɛn lik am as i de waka. We i jɔyn in mama ɛn in papa bak, i gi dɛn sɔm ɔni fɔ lik. Bɔt i nɔ tɛl dɛn se i pul di ɔni pan layɔn in dedebɔdi.
10 In papa go dɔŋ usay di uman de, ɛn Samsin mek pati de, bikɔs na dat di yɔŋman dɛn dɔn yus fɔ du. 11 We dɛn si am, dɛn briŋ 30 grumsman dɛn fɔ de wit am. 12 Dɔn Samsin tɛl dɛn se: “Duya lɛ a tɛl una wan parebul. If una ebul fɔ tɛl mi di ansa insay di sɛvin dez pati, a go gi una 30 linin klos dɛn ɛn 30 ɔda kayn klos dɛn. 13 Bɔt if una nɔ ebul fɔ tɛl mi di ansa, una fɔ gi mi 30 linin klos dɛn ɛn 30 ɔda kayn klos dɛn.” Dɛn tɛl am se: “Tɛl wi yu parebul; wi want fɔ yɛri am.” 14 So i tɛl dɛn se:
“Tin fɔ it kɔmɔt frɔm sɔntin we kin it,
Ɛn sɔntin we swit+ kɔmɔt frɔm sɔntin we strɔng.”
Dɛn nɔ bin ebul fɔ tɛl am wetin in parebul min fɔ tri dez. 15 Di de we mek 4, dɛn tɛl Samsin in wɛf se: “Ful yu man+ so dat i go tɛl wi wetin di parebul min. If nɔto dat, wi go bɔn yu ɛn di wan dɛn we de na yu papa in os. Yu invayt wi na ya fɔ kam tek wi prɔpati dɛn?” 16 So Samsin in wɛf kray pan am ɛn tɛl am se: “Yu et mi; yu nɔ lɛk mi.+ Yu tɛl mi pipul dɛn parebul, bɔt yu nɔ tɛl mi wetin i min.” Na de Samsin tɛl am se: “A nɔ ivin tɛl mi yon mama ɛn papa! A fɔ tɛl yu?” 17 Bɔt i kɔntinyu fɔ kray pan am ɔl di balans dez dɛn fɔ di sɛvin dez pati. Faynali, i tɛl am di de we mek sɛvin, bikɔs i bin dɔn mɔna am. Dɔn di uman tɛl in pipul dɛn wetin di parebul min.+ 18 So bifo di san go dɔŋ* di de we mek sɛvin, di man dɛn na di siti tɛl Samsin se:
“Wetin swit pas ɔni,
Ɛn wetin strɔng pas layɔn?”+
Samsin tɛl dɛn se:
“If una nɔ bin yuz mi yɔŋ kaw fɔ dig,+
Una nɔ fɔ dɔn no wetin mi parebul min.”
19 Na de Jiova in spirit mek i gɛt pawa,+ ɛn i go dɔŋ na Ashkɛlɔn+ ɛn kil 30 man dɛn ɛn tek dɛn klos dɛn ɛn gi di klos dɛn to di wan dɛn we sho wetin di parebul min.+ I bin rili vɛks we i de go ɔp bak nain papa in os.
20 Dɛn gi Samsin in wɛf+ to wan pan in grumsman dɛn we bin de wit am.+