Jɔjis
12 Dɔn di man dɛn na Ifrem in trayb gɛda, ɛn dɛn krɔs oba go Zefɔn* ɛn tɛl Jɛfta se: “Wetin mek yu nɔ kɔl wi fɔ go wit yu we yu krɔs fɔ go fɛt di Amɔnayt+ dɛn? Wi go bɔn yu insay yu os.” 2 Bɔt Jɛfta tɛl dɛn se: “Mi ɛn mi pipul dɛn bin de pan big big fɛt wit di Amɔnayt dɛn. A kɔl una fɔ ɛp wi, bɔt una nɔ sev mi na dɛn an. 3 We a si se una nɔ go sev mi, a disayd fɔ put mi layf pan denja ɛn go fɛt di Amɔnayt+ dɛn, ɛn Jiova mek a win dɛn. So wetin mek una dɔn kam tide fɔ fɛt mi?”
4 Jɛfta gɛda ɔl di man dɛn na Giliad,+ ɛn dɛn fɛt Ifrem; di man dɛn na Giliad win di man dɛn na Ifrem we bin dɔn tɔk se: “Una dɛn Giliadayt dɛn na Ifrem ɛn Manasɛ, una na pipul dɛn we rɔnawe na Ifrem.” 5 Di man dɛn na Giliad kapchɔ di say dɛn na di Jɔdan+ we nɔ dip bifo di man dɛn na Ifrem; ɛn we di man dɛn na Ifrem bin de tray fɔ rɔnawe, dɛn bin de se, “Lɛ a krɔs go oba”; dɔn di man dɛn na Giliad go aks dɛn se, “Yu na Ifremayt?” We di pɔsin se, “Nɔ!” 6 dɛn go tɛl am se, “Duya se Shibolɛt.” Bɔt i go se, “Sibolɛt,” bikɔs i nɔ ebul kɔl di wɔd fayn. Dɔn dɛn go ol am ɛn kil am na di say dɛn we di wata nɔ dip na di Jɔdan. So 42,000 Ifremayt dɛn day da tɛm de.
7 Jɛfta jɔj Izrɛl fɔ siks ia, afta dat Jɛfta we na Giliadayt day ɛn dɛn bɛr am nain siti na Giliad.
8 Afta am,+ Ibzan we kɔmɔt Bɛtliɛm jɔj Izrɛl. 9 I bin gɛt 30 bɔypikin dɛn ɛn 30 galpikin dɛn. I mek in galpikin dɛn mared man dɛn we de na ɔda famili dɛn, ɛn i kam wit 30 uman dɛn fɔ mared in bɔypikin dɛn. I jɔj Izrɛl fɔ sɛvin ia. 10 Dɔn Ibzan day ɛn dɛn bɛr am na Bɛtliɛm.
11 Afta am, Ilɔn we na Zɛbyulɔnayt jɔj Izrɛl; i jɔj Izrɛl fɔ tɛn ia. 12 Dɔn Ilɔn we na Zɛbyulɔnayt day ɛn dɛn bɛr am na Ayjalɔn na Zɛbyulɔn.
13 Afta am, Abdɔn we na Ilɛl di Piratɔnayt in bɔypikin jɔj Izrɛl. 14 I bin gɛt 40 bɔypikin dɛn ɛn 30 granpikin dɛn we na bɔypikin dɛn; dɛn ɔl bin de rayd 70 dɔnki dɛn. I jɔj Izrɛl fɔ et ia. 15 Dɔn Abdɔn we na Ilɛl di Piratɔnayt in bɔypikin day, ɛn dɛn bɛr am na Piratɔn na Ifrem na di Amalɛkayt+ dɛn mawntin.