Jɔjis
10 Afta Abimilɛk, Tola we na Pua in bɔypikin, we na Dodo in granpikin, ɛn we na wan man frɔm Isaka in trayb, tinap fɔ sev Izrɛl.+ I bin de na Shemia na di eria we mawntin dɛn de na Ifrem. 2 I jɔj Izrɛl fɔ 23 ia. Dɔn i day ɛn dɛn bɛr am na Shemia.
3 Afta am, Jea we na Giliadayt tinap ɛn jɔj Izrɛl fɔ 22 ia. 4 I bin gɛt 30 bɔypikin dɛn we bin de rayd 30 dɔnki dɛn, ɛn dɛn bin gɛt 30 siti dɛn, we te tide dɛn de kɔl di siti dɛn Avɔt-jea;+ dɛn bin de na Giliad. 5 We Jea day, dɛn bɛr am na Kemɔn.
6 Di Izrɛlayt dɛn bigin bak fɔ du wetin bad na Jiova+ in yay, ɛn dɛn bigin fɔ wɔship di Beal+ dɛn, di Ashtorɛt imej dɛn, di gɔd dɛn na Eram,* di gɔd dɛn na Saydɔn, di gɔd dɛn na Moab,+ di Amɔnayt+ dɛn gɔd dɛn, ɛn di Filistin+ dɛn gɔd dɛn. Dɛn lɛf Jiova ɛn dɛn nɔ wɔship am. 7 Dɔn Jiova in at wam bad bad wan pan di Izrɛlayt dɛn, ɛn i an ova dɛn to di Filistin dɛn ɛn di Amɔnayt+ dɛn. 8 So dɛn aras ɛn rili sɔprɛs di Izrɛlayt dɛn da ia de—fɔ 18 ia dɛn sɔprɛs ɔl di Izrɛlayt dɛn na di ɔdasay na di Jɔdan usay di Amɔrayt dɛn bin de na Giliad. 9 Di Amɔnayt dɛn bin de krɔs di Jɔdan fɔ kam fɛt Juda, Bɛnjamin, ɛn Ifrem dɛn trayb; ɛn di Izrɛlayt dɛn at bin rili pwɛl. 10 Dɔn di Izrɛlayt dɛn beg Jiova fɔ ɛp+ dɛn. Dɛn tɔk se: “Wi dɔn sin agens yu, bikɔs wi dɔn lɛf wi Gɔd ɛn wɔship di Beal+ dɛn.”
11 Bɔt Jiova tɛl di Izrɛlayt dɛn se: “A nɔ bin sev una frɔm di Ijipshian+ dɛn, frɔm di Amɔrayt+ dɛn, di Amɔnayt dɛn, di Filistin+ dɛn, 12 di Saydonian dɛn, di Amalɛkayt dɛn, ɛn di Midianayt dɛn we dɛn bin de sɔprɛs una? We una kray to mi, a pul una kɔmɔt na dɛn an. 13 Bɔt una lɛf mi ɛn wɔship ɔda gɔd+ dɛn. Na dat mek a nɔ go sev una igen.+ 14 Una go to di gɔd dɛn we una bin dɔn pik ɛn beg dɛn fɔ ɛp una.+ Lɛ dɛn sev una di tɛm we una gɛt prɔblɛm.”+ 15 Bɔt di Izrɛlayt dɛn tɛl Jiova se: “Wi dɔn sin. Du to wi ɛnitin we gud na yu yay. Duya, jɔs sev wi tide.” 16 Ɛn di Izrɛlayt dɛn pul di ɔda gɔd dɛn ɛn bigin wɔship Jiova,+ so i nɔ bin ebul fɔ bia fɔ wach we di Izrɛlayt dɛn de sɔfa.+
17 Leta, di Amɔnayt+ dɛn kam togɛda, ɛn dɛn mek kamp na Giliad. So di Izrɛlayt dɛn kam togɛda ɛn mek kamp na Mizpa. 18 Di pipul dɛn ɛn di prins dɛn na Giliad bin de tɔk to dɛn kɔmpin dɛn se: “Udat go de bifo fɔ fɛt di Amɔnayt+ dɛn? Lɛ i bi di chif fɔ ɔl di pipul dɛn na Giliad.”