Rɛvɛleshɔn to Jɔn

4 Afta dis a si wan domɔt na ɛvin we opin, ɛn di fɔs vɔys we a yɛri de tɔk to mi tan lɛk trɔmpɛt. I bin de se: “Kam ɔp ya, ɛn a go sho yu di tin dɛn we gɛt fɔ apin.” 2 Afta dis di spirit bigin fɔ wok insay mi wantɛm wantɛm, ɛn a si wan tron we bin de nain ples na ɛvin, ɛn sɔmbɔdi bin sidɔm na di tron.+ 3 Ɛn di Wan we bin sidɔm de bin de shayn lɛk jaspa ston+ ɛn lɛk sadiɔs ston,* ɛn renbo we tan lɛk ɛmirald ston bin de rayt rawnd di tron.+

4 Na 24 tron dɛn bin de rayt rawnd di tron, ɛn a si 24 ɛlda+ dɛn we wɛr wayt klos sidɔm na di tron dɛn, ɛn gold krawn bin de na dɛn ed. 5 Laytnin,+ vɔys dɛn, ɛn tɛnda+ bin de kɔmɔt na di tron, ɛn sɛvin lamp dɛn we gɛt faya bin de bɔn bifo di tron, ɛn dɛn min Gɔd in sɛvin spirit+ dɛn. 6 Sɔntin bin de bifo di tron we fiba si+ we tan lɛk glas, lɛk kristal.

Midul di tron* ɛn rawnd di tron, 4 chɛrɔb+ dɛn we bin gɛt yay ɔlsay bifo dɛn ɛn biɛn dɛn, bin de de. 7 Di fɔs chɛrɔb bin tan lɛk layɔn,+ di sɛkɔn chɛrɔb bin tan lɛk yɔŋ man kaw,+ di tɔd chɛrɔb+ bin gɛt fes we tan lɛk mɔtalman fes, ɛn di nɔmba 4 chɛrɔb+ bin tan lɛk igul we de flay.+ 8 Di 4 chɛrɔb dɛn ɔl bin gɛt siks-siks wiŋ dɛn; yay dɛn bin de rayt rawnd di wiŋ dɛn ɛn ɔnda di wiŋ+ dɛn. Ɛn de ɛn nɛt, dɛn de kɔntinyu fɔ se: “Jiova* Gɔd, di Ɔlmayti, we bin de, we de naw, ɛn we de kam,+ i oli, i oli, ɛn i oli.”+

9 Ɛnitɛm we di chɛrɔb dɛn de gi glori, ɔnɔ, ɛn tɛl tɛnki to di Wan we sidɔm na di tron, di Wan we de liv sote go,+ 10 di 24 ɛlda+ dɛn de fɔdɔm bifo di Wan we sidɔm na di tron ɛn wɔship di Wan we de liv sote go, ɛn dɛn put dɛn krawn dɛn bifo di tron ɛn se: 11 “Jiova* wi Gɔd, yu fit fɔ gɛt di glori,+ di ɔnɔ,+ ɛn di pawa,+ bikɔs na yu mek ɔltin,+ ɛn yu mek dɛn bikɔs na dat yu want.”