Dyutɔrɔnɔmi

28 “If una mek shɔ se una lisin to wetin Jiova una Gɔd de se bay we una tek tɛm du ɔl wetin i dɔn kɔmand we a de tɛl una tide, Jiova una Gɔd go mɔs mek una de oba ɔl di ɔda neshɔn dɛn na di wɔl.+ 2 Una go gɛt ɔl dɛn blɛsin dɛn ya, ɛn i go pasmak+ bikɔs una kɔntinyu fɔ lisin to Jiova we na una Gɔd:

3 “I go blɛs una we una de na di siti ɛn we una de na di opin ples.+

4 “I go blɛs una pikin+ dɛn, di frut dɛn we bia na una land, ɛn di pikin dɛn we una animal dɛn bɔn, dat na, una yɔŋ kaw ɛn ship+ dɛn.

5 “I go blɛs una baskɛt+ ɛn di kɔntena usay una de nid do.+

6 “I go blɛs una we una kam insay, ɛn i go blɛs una we una go na do.

7 “Jiova go mek una win una ɛnimi dɛn we go fɛt agens una.+ Dɛn go atak una frɔm wansay, bɔt dɛn go pas na sɛvin difrɛn say dɛn we dɛn de rɔnawe pan una.+ 8 Jiova go blɛs una stɔ+ dɛn ɛn ɔl wetin una de du, ɛn i go mɔs blɛs una na di land we in, Jiova we na una Gɔd, de gi una. 9 Jiova go mek una bi oli pipul dɛn to am+ jɔs lɛk aw i bin dɔn swɛ to una,+ bikɔs una kɔntinyu fɔ obe Jiova we na una Gɔd in kɔmandmɛnt dɛn ɛn una du ɔl wetin i se. 10 Ɔl di pipul dɛn na di wɔl go si se Jiova in nem de pan una,+ ɛn dɛn go fred una.+

11 “Jiova go mek una bɔn bɔku bɔku pikin dɛn, una go gɛt bɔku animal dɛn, ɛn bɔku frut dɛn go bia na di land+ we Jiova bin dɔn swɛ to una gret gret granpa dɛn fɔ gi una.+ 12 Jiova go opin fɔ una in stɔ we gɛt bɔku gud tin dɛn, dat na, ɛvin, fɔ mek ren kam na una land we in tɛm rich+ ɛn fɔ blɛs ɔl wetin una de du. Bɔku neshɔn dɛn go lɛnt to una bɔt una nɔ go nid fɔ lɛnt sɔntin.+ 13 Jiova go mek una de bifo, una nɔ go de biɛn;* una go de ɔp,+ una nɔ go de dɔŋ, if una kɔntinyu fɔ obe ɛn fala Jiova una Gɔd in kɔmandmɛnt dɛn we a de tɛl una tide. 14 Una fɔ tek tɛm fala ɔl wetin a de tɛl una tide,+ ɛn una nɔ fɔ fala ɔda gɔd dɛn fɔ wɔship dɛn.+

15 “Bɔt if una nɔ obe wetin Jiova una Gɔd de tɛl una bay we una tek tɛm du ɔl wetin i dɔn kɔmand una ɛn obe in lɔ dɛn we a de tɛl una tide, ɔl dɛn swɛ dɛn ya go fɔdɔm pan una, ɛn i go pasmak:+

16 “Swɛ go de pan una na di siti, ɛn swɛ go de pan una na di opin ples.+

17 “Swɛ go de pan una baskɛt+ ɛn di kɔntena usay una de nid do.+

18 “Swɛ go de pan una pikin+ dɛn, di frut dɛn we bia na una land, ɛn pan una yɔŋ kaw ɛn ship+ dɛn.

19 “Swɛ go de pan una we una kam insay, ɛn swɛ go de pan una we una go na do.

20 “Jiova go sɛn dɛn swɛ dɛn ya pan una, i go mek una kɔnfyuz, ɛn i go pɔnish una pan ɔl wetin una de du te i dɔnawe wit una ɛn una day kwik kwik wan bikɔs ɔf di bad bad tin dɛn we una de du ɛn fɔ we una kɔmɔt biɛn am.+ 21 Jiova go mek di sik fasin pan una sote i dɔn fɔ dɔnawe wit una kɔmɔt na di land we una de go tek as prɔpati.+ 22 Jiova go mek una gɛt tubakyulosis, ay fiva,+ una go swɛl swɛl, una bɔdi go wam, i go kil una wit sɔd,+ di briz go wam, ɛn una plant dɛn go sik,+ ɛn dɛn go mɔna una te una day. 23 Di skay oba una ed go bi kɔpa, ɛn di grɔn go bi ayɛn.+ 24 Jiova go mek di ren we de kɔmɔt na di skay fɔ kam na una land tɔn pawda ɛn dɔst te i dɔnawe wit una. 25 Jiova go mek una ɛnimi dɛn win una.+ Una go atak dɛn frɔm wansay bɔt una go pas na sɛvin difrɛn say dɛn fɔ rɔnawe pan dɛn; dɔn una go bi sɔntin we go mek pipul dɛn fred na ɔl di kiŋdɔm dɛn na di wɔl.+ 26 Una dedebɔdi dɛn go bi fud fɔ ɔl di bɔd dɛn we de flay na di skay ɛn fɔ ɔl di animal dɛn na bush, ɛn nɔbɔdi nɔ go mek dɛn fred ɛn rɔnawe.+

27 “Jiova go mek una gɛt di sem kayn bwɛl dɛn we di Ijipshian dɛn bin gɛt, una go gɛt payl, krɔkrɔ, ɛn rash dɛn we nɔ go ɛva mɛn. 28 Jiova go mek una kres, una go blayn,+ ɛn una go kɔnfyuz. 29 Una go de luk luk fɔ sɔntin santɛm jɔs lɛk we blaynman de luk luk fɔ sɔntin we ples dak,+ ɛn bɛtɛ nɔ go fala una pan ɛnitin we una de du; dɛn go de kruk ɛn tif una ɔltɛm, ɛn nɔbɔdi nɔ go de fɔ sev una.+ 30 Yu go ɛngej uman bɔt ɔda man go rep am. Yu go bil os, bɔt yu nɔ go de de.+ Yu go plant vayn gadin, bɔt yu nɔ go it wetin yu plant.+ 31 Dɛn go kil yu kaw bifo yu, bɔt yu nɔ go it am. Dɛn go tif yu dɔnki rayt bifo yu, bɔt dɛn nɔ go gi yu bak. Dɛn go gi yu ship to yu ɛnimi dɛn, bɔt yu nɔ go gɛt nɔbɔdi fɔ sev yu. 32 Yu go de wach as dɛn de gi yu bɔypikin dɛn ɛn yu galpikin dɛn to ɔda pipul+ dɛn, yu go rili want fɔ si dɛn ɔltɛm bɔt yu nɔ go ebul fɔ du natin. 33 Na ɔda pipul dɛn we yu nɔ sabi go it wetin bia na yu land ɛn ɔl wetin yu plant,+ ɛn dɛn go de kruk yu ɛn sɔprɛs yu ɔltɛm. 34 Di tin dɛn we yu go si go mek yu kres.

35 “Jiova go mek bad bad bwɛl dɛn we nɔ de mɛn kɔmɔt na una ni dɛn ɛn na una lɛg dɛn, frɔm ɔnda una fut te go na una ed. 36 Jiova go drɛb una ɛn di kiŋ we una pik fɔ unasɛf, ɛn una go go na neshɔn we una ɛn una gret gret granpa dɛn nɔ bin sabi,+ ɛn na de una go wɔship ɔda gɔd dɛn, dat na, gɔd dɛn we dɛn mek wit wud ɛn ston.+ 37 Ɛn una go bi sɔntin we pipul dɛn de fred ɛn laf* to ɔl di pipul dɛn usay Jiova de drɛb una go, ɛn dɛn go de provok una.+

38 “Una go plant bɔku sid dɛn na una fam, bɔt na smɔl una go avɛst,+ bikɔs grasɔpa* dɛn go it am. 39 Una go plant vayn gadin dɛn ɛn kia fɔ dɛn bɔt una nɔ go drink no wayn ɛn una nɔ go gɛt natin,+ bikɔs tumbu dɛn go it am. 40 Una go gɛt ɔliv stik dɛn ɔlsay na una land, bɔt una nɔ go rɔb ɔyl na una bɔdi, bikɔs una ɔliv dɛn go fɔdɔm fɔdɔm. 41 Una go bɔn bɔypikin dɛn ɛn galpikin dɛn bɔt dɛn nɔ go kɔntinyu fɔ de wit una, bikɔs dɛn go kapchɔ dɛn ɛn kɛr dɛn go.+ 42 Bɔku bɔku insɛkt dɛn* go ful-ɔp ɔl una stik dɛn ɛn di frut dɛn we de bia na una land. 43 Di fɔrina dɛn we de wit una go de strɔng mɔ ɛn mɔ ɛn una go de wik mɔ ɛn mɔ. 44 Una go lɛnt to am, bɔt i nɔ go lɛnt to una.+ I go de bifo, bɔt una go de biɛn.+

45 “Ɔl dɛn swɛ dɛn ya+ go de pan una sote una day+ bikɔs una nɔ lisin to wetin Jiova una Gɔd se bay we una nɔ obe in kɔmandmɛnt dɛn ɛn in lɔ dɛn we i dɔn gi una.+ 46 Ɛn dɛn go kɔntinyu fɔ apin to una ɛn una pikin dɛn as sayn ɛn wɔnin we go de sote go,+ 47 bikɔs una nɔ bin wɔship Jiova una Gɔd wit gladi-at we una bin gɛt ɔltin bɔku bɔku wan.+ 48 Jiova go sɛn una ɛnimi dɛn pan una, ɛn una go wok fɔ dɛn+ pan ɔl we una angri,+ una tɔsti, una nɔ gɛt bɛtɛ klos, ɛn una nɔ gɛt natin. I go put ayɛn yok* na una nɛk sote i dɔnawe wit una.

49 “Jiova go mek wan neshɔn we de fa fa say+ na di wɔl kam atak una, dat na, neshɔn we una nɔ ɔndastand di langwej we dɛn de tɔk;+ dɛn go fɔdɔm pan una lɛk igul,+ 50 i go bi neshɔn we fiaful, we nɔ de sho wan rɛspɛkt to pipul dɛn we ol ɛn we nɔ de sɔri fɔ pipul dɛn we yɔŋ.+ 51 Dɛn go it una animal dɛn pikin dɛn ɛn di frut dɛn we bia na una land sote dɛn dɔnawe wit una. Dɛn nɔ go lɛf ɛni fud, nyu wayn ɔ ɔyl, yɔŋ kaw ɔ ship fɔ una sote dɛn dɔnawe wit una.+ 52 Dɛn go sɔrawnd una ɛn lɔk una insay ɔl una siti dɛn we de ɔlsay na una land sote una ay ɛn strɔng wɔl dɛn we una abop pan fɔdɔm. Fɔ tru, dɛn go mɔs atak una insay ɔl una siti dɛn we de ɔlsay na una land we Jiova una Gɔd dɔn gi una.+ 53 Dɔn una go it una yon pikin dɛn flɛsh, dat na, una bɔypikin dɛn ɛn una galpikin+ dɛn we Jiova una Gɔd dɔn gi una, bikɔs ɔf di we aw una ɛnimi dɛn go atak una ɛn di pwɛlat we dɛn go put pan una.

54 “Ivin di man we de liv pɔsh layf ɛn we gɛt sɔri-at pas una ɔl nɔ go sɔri fɔ in brɔda ɔ in wɛf we i lɛk ɔ in bɔypikin dɛn we lɛf, 55 ɛn i nɔ go gi in bɔypikin dɛn flɛsh dɛn we i de it to ɛnibɔdi, bikɔs i nɔ gɛt ɛni ɔda tin, bikɔs ɔf di we aw una ɛnimi dɛn atak una ɛn di pwɛlat we i put pan una siti+ dɛn. 56 Di uman we de liv pɔsh layf ɛn we gɛt sɔri-at we de wit una ɛn we nɔ de ivin tink fɔ mas na grɔn wit in fut bikɔs i de liv pɔsh layf+ nɔ go sɔri fɔ in man we i lɛk, in bɔypikin ɔ in galpikin, 57 ɛn i go ivin it di aftabat we de kɔmɔt midul in lɛg dɛn ɛn di bɔypikin dɛn we i go bɔn sikrit wan bikɔs ɔf aw una ɛnimi atak una ɛn di pwɛlat we i put pan una siti dɛn.

58 “If una nɔ tek tɛm obe ɔl wetin de na dis Lɔ we a dɔn rayt na dis buk+ ɛn una nɔ fred dis nem we pipul dɛn kin fred ɛn rɛspɛkt ɛn we gɛt glori,+ dat na, Jiova+ una Gɔd, 59 Jiova go mek bad bad sik dɛn kam pan una ɛn una pikin+ dɛn, dat na, bad bad sik dɛn we nɔ de mɛn. 60 I go mek una gɛt ɔl di sik dɛn na Ijipt we una bin de fred, ɛn dɛn go kɔntinyu fɔ de pan una. 61 Pantap dat, Jiova go mek una gɛt ɔl di sik dɛn we dɛn nɔ rayt insay dis buk we gɛt di Lɔ sote una day. 62 Pan ɔl we una dɔn bɔku lɛk di sta dɛn na di skay,+ di wan dɛn we go lɛf go rili smɔl+ bikɔs una nɔ lisin to wetin Jiova una Gɔd se.

63 “Ɛn jɔs lɛk aw Jiova bin gladi trade fɔ mek tin kɔmɔt fayn fɔ una ɛn fɔ mek una bɔku, na so bak Jiova go gladi fɔ dɔnawe wit una ɛn mek una day; ɛn dɛn go pul una kɔmɔt na di land we una de go tek as prɔpati.

64 “Jiova go skata una na ɔl di neshɔn dɛn frɔm wan pat na di wɔl to di ɔda pat na di wɔl,+ ɛn na de una go wɔship gɔd dɛn we dɛn mek wit wud ɛn ston, we una ɛn una gret gret granpa dɛn nɔ bin sabi.+ 65 Una nɔ go gɛt pis na dɛn neshɔn dɛn de+ ɛn una nɔ go gɛt say fɔ rɛst una fut dɛn. Bifo dat, Jiova go mek una wɔri,+ una nɔ go si fayn, ɛn una at go pwɛl.+ 66 Una layf go de pan denja, ɛn una go de fred de ɛn nɛt; ɛn una nɔ go no if una go sɔvayv ɔ una nɔ go sɔvayv. 67 Mɔnintɛm una go tɔk se, ‘If nɔmɔ ivintɛm dɔn kam!’ ɛn ivintɛm una go tɔk se, ‘If nɔmɔ do dɔn klin!’ bikɔs ɔf di kayn we aw una go fred ɛn bikɔs ɔf wetin una yay go si. 68 Ɛn Jiova go mɔs yuz ship fɔ kɛr una go bak na Ijipt bay di rod we a bin dɔn tɛl una se, ‘Una nɔ go ɛva si igen,’ ɛn na de una go sɛl unasɛf to una ɛnimi dɛn as man ɛn uman slev dɛn, bɔt nɔbɔdi nɔ go bay una.”