Dyutɔrɔnɔmi

21 “If una si dedebɔdi na di land we Jiova una Gɔd de gi una as prɔpati ɛn nɔbɔdi nɔ no udat kil di pɔsin, 2 una bigman dɛn ɛn jɔj+ dɛn fɔ go mɛzhɔ di distans frɔm di say usay di dedebɔdi de te to di siti dɛn we de rawnd am. 3 Dɔn di bigman dɛn na di siti we de nia di dedebɔdi fɔ tek wan yɔŋ kaw we dɛn nɔ ɛva yuz fɔ wok ɛn we dɛn nɔ wande put yok* pan, 4 dɔn di bigman dɛn na di siti fɔ go wit di kaw dɔŋ wan vali we gɛt wata we de rɔn usay dɛn nɔ wande dig ɔ plant sid, ɛn dɛn fɔ brok di yɔŋ kaw in nɛk na di vali.+

5 “Di prist dɛn, dat na, di Livayt dɛn go kam bikɔs na dɛn Jiova una Gɔd dɔn pik fɔ wok fɔ am,+ fɔ yuz Jiova in nem fɔ gi blɛsin.+ Na dɛn fɔ sho aw fɔ sɔlv ɔl di kes dɛn we gɛt fɔ du wit we dɛn kil pɔsin.+ 6 Dɔn ɔl di bigman dɛn na di siti we de nia di dedebɔdi fɔ was dɛn an+ dɛn oba di yɔŋ kaw we dɛn dɔn brok in nɛk na di vali, 7 ɛn dɛn fɔ tɔk se, ‘Nɔto wi kil dis pɔsin, ɛn wi nɔ si we dɛn kil am. 8 E Jiova, duya, nɔ blem yu pipul dɛn we na di Izrɛlayt dɛn we yu dɔn fri+ ɛn nɔ alaw yu pipul dɛn we na di Izrɛlayt dɛn fɔ gilti fɔ inosɛnt blɔd.’+ Da tɛm de, yu nɔ go blem dɛn fɔ di pɔsin in blɔd. 9 Da we de, una nɔ go gilti igen bikɔs dɛn kil inosɛnt pɔsin bay we una du wetin rayt na Jiova in yay.

10 “If una go fɛt wɔ agens una ɛnimi dɛn ɛn Jiova una Gɔd win dɛn fɔ una, dɔn una kapchɔ dɛn,+ 11 ɛn frɔm di pipul dɛn we una kapchɔ, pɔsin si uman we fayn we i lɛk ɛn i want fɔ tek am as in wɛf, 12 i fɔ briŋ am kam nain os. Dɔn di uman fɔ krep in ed, kɔt kɔt in nel dɛn, 13 ɛn pul di klos we bin de pan am we dɛn kapchɔ am, ɛn i fɔ de nain os. I fɔ kray fɔ in mama ɛn in papa fɔ wan mɔnt,+ dɔn afta dat, di pɔsin fɔ ledɔm wit am; di pɔsin go bi in man ɛn i go bi in wɛf. 14 Bɔt if i nɔ gladi wit di uman, i fɔ mek i go+ ɛnisay we i want fɔ go. I nɔ fɔ sɛl am fɔ mɔni ɔ trit am bad bikɔs i dɔn disgres am.

15 “If man gɛt tu wɛf dɛn, ɛn i lɛk di wan pas di ɔda wan,* dɔn dɛn ɔl tu bɔn bɔypikin dɛn fɔ am ɛn di uman we i nɔ lɛk nain bɔn di fɔs bɔypikin,+ 16 di de we i de sheb in prɔpati to in bɔypikin dɛn, i nɔ go tek di uman we i lɛk in yon pikin as di fɔs pikin we i bi se na di uman we i nɔ lɛk nain yon bɔypikin na di fɔs pikin. 17 I fɔ tek di fɔs uman we i nɔ lɛk in yon pikin as di fɔs bɔypikin bay we i gi am dɔbul pan ɔl wetin i gɛt, bikɔs nain fɔs pikin. Nain gɛt di rayt as fɔs pikin.+

18 “If man gɛt bɔypikin we stɔbɔn ɛn trangayes, ɛn i nɔ de obe in mama ɛn papa,+ ɛn dɛn dɔn tray fɔ kɔrɛkt am bɔt i nɔ de gri fɔ lisin to dɛn,+ 19 in mama ɛn in papa fɔ tek am ɛn kɛr am go to di bigman dɛn nain siti get. 20 Dɔn dɛn fɔ tɛl di bigman dɛn nain siti se, ‘Dis wi bɔypikin stɔbɔn ɛn trangayes, ɛn i nɔ de gri fɔ lisin to wi. I bigyay,+ ɛn i de drink te i chak.’+ 21 Dɔn ɔl di man dɛn nain siti fɔ ston am te i day. Da we de, una go pul wetin bad kɔmɔt usay una de, dɔn ɔlman na Izrɛl go yɛri ɛn fred.+

22 “If pɔsin kɔmit sin we mek i fit fɔ day,+ ɛn una kil am ɛn ɛng am pan stik,+ 23 in dedebɔdi nɔ fɔ de na di stik ol nɛt.+ Bifo dat, una fɔ mek shɔ se una bɛr am da de de, bikɔs di wan we dɛn ɛng na pɔsin we Gɔd dɔn swɛ+ ɛn una nɔ fɔ dɔti una land we Jiova una Gɔd de gi una as prɔpati.+