Dyutɔrɔnɔmi
2 “Dɔn wi tɔn ɛn lɛf fɔ go na di wildanɛs* we de bay di rod fɔ go na di Rɛd Si, jɔs lɛk aw Jiova bin dɔn tɛl mi,+ ɛn wi travul fɔ sɔm tɛm rawnd Mawnt Sia. 2 Faynali, Jiova tɛl mi se, 3 ‘Una dɔn go rawnd dis mawntin fɔ lɔng tɛm. Naw una go na di nɔt 4 ɛn tɛl di pipul dɛn se: “Una go pas bay di bɔda usay una brɔda dɛn de, dat na, Isɔ+ in pikin dɛn, we de na Sia.+ Dɛn go fred una,+ ɛn una fɔ rili tek tɛm. 5 Una nɔ mek plaba wit* dɛn, bikɔs a nɔ go gi una ɛniwan pan dɛn land, a nɔ go ivin gi una say we wan fut de tinap, bikɔs a dɔn gi Mawnt Sia to Isɔ as in prɔpati.+ 6 Una fɔ gi dɛn mɔni fɔ di fud we una go it, ɛn una fɔ pe fɔ di wata we una go drink.+ 7 Bikɔs Jiova una Gɔd dɔn blɛs una pan ɔl wetin una dɔn du. I rili no di waka we una de waka na dis big wildanɛs.* Insay dis 40 ia, Jiova una Gɔd dɔn de wit una, ɛn una gɛt ɔl wetin una nid.”’+ 8 So wi pas nia wi brɔda dɛn, dat na, Isɔ in pikin+ dɛn, we de na Sia; wi nɔ pas na di rod fɔ go Araba, fɔ go Ilat, ɛn fɔ go Iziɔn-giba.+
“Dɔn wi tɔn ɛn go na di wildanɛs* na Moab.+ 9 Nain Jiova tɛl mi se, ‘Una nɔ mek plaba ɔ fɛt wɔ wit di Moabayt dɛn, a nɔ go gi una ɛniwan pan dɛn land as prɔpati bikɔs a dɔn gi A as prɔpati to Lɔt in pikin+ dɛn. 10 (Na di Imim+ dɛn bin de de, dɛn na pipul dɛn we strɔng, dɛn bɔku, ɛn dɛn tɔl lɛk di Anakim dɛn. 11 Dɛn bin de si di Rɛfeim+ dɛn lɛk di Anakim+ dɛn, ɛn di Moabayt dɛn bin de kɔl dɛn Imim. 12 Trade, na di Ɔrayt+ dɛn bin de liv na Sia, bɔt Isɔ in pikin dɛn tek dɛn prɔpati, dɔnawe wit dɛn, ɛn sɛtul na dɛn ples,+ jɔs lɛk aw di Izrɛlayt dɛn go du na di land we na dɛn yon, we Jiova go mɔs gi dɛn.) 13 Naw una go krɔs oba di Vali na Zirɛd.’ So wi krɔs oba di Vali na Zirɛd.+ 14 Wi tek 38 ia fɔ waka frɔm Kedɛsh-bania te wi krɔs di Vali na Zirɛd, te ɔl di man dɛn we de fɛt wɔ dɛn jɛnɛreshɔn day na di kamp, jɔs lɛk aw Jiova bin dɔn swɛ to dɛn.+ 15 Jiova bin de agens dɛn fɔ dɔnawe wit dɛn na di kamp.+
16 “We ɔl di man dɛn we de fɛt wɔ day,+ 17 Jiova tɔk to mi bak, i se, 18 ‘Tide una go pas nia Moab, dat na, A. 19 We una rich nia di Amɔnayt dɛn, una nɔ aras ɔ provok dɛn, bikɔs a nɔ go gi una ɛniwan pan di Amɔnayt dɛn land as prɔpati, bikɔs a dɔn gi am to Lɔt in pikin dɛn as dɛn prɔpati.+ 20 Dɛn bin de si dis land bak as di Rɛfeim+ dɛn land. (Na di Rɛfeim dɛn bin de de trade, ɛn di Amɔnayt dɛn bin de kɔl dɛn Zamzɔmim. 21 Di pipul dɛn bin strɔng, dɛn bin bɔku, ɛn dɛn bin tɔl lɛk di Anakim+ dɛn, bɔt Jiova dɔnawe wit dɛn bifo di Amɔnayt dɛn, ɛn di Amɔnayt dɛn drɛb dɛn ɛn sɛtul na dɛn ples. 22 Na dat i bin du fɔ Isɔ in pikin dɛn, we de naw na Sia,+ we i bin dɔnawe wit di Ɔrayt+ dɛn bifo dɛn, so dat dɛn go tek dɛn prɔpati ɛn de na dɛn ples te tide. 23 As fɔ di Avim dɛn, dɛn bin de na dɛn vilej dɛn te go na Gaza+ te di Kaftɔrim+ dɛn, we kɔmɔt na Kaftɔ,* dɔnawe wit dɛn ɛn sɛtul na dɛn ples.)
24 “‘Una grap, ɛn krɔs oba di Anɔn Vali.+ Luk, a dɔn an ova Sayɔn+ we na Amɔrayt, ɛn we na di kiŋ na Ɛshbɔn na una an. So una bigin fɔ tek in land ɛn fɛt am. 25 Tide, a go bigin mek ɔl di pipul dɛn na di wɔl rili fred we dɛn yɛri bɔt una. Dɛn go tɔmɛnt ɛn dɛn go trimbul* bikɔs ɔf una.’+
26 “Dɔn a sɛn mɛsenja dɛn frɔm di wildanɛs* na Kɛdimɔt+ to Kiŋ Sayɔn na Ɛshbɔn, a tɛl dɛn fɔ tɔk saful wan se,+ 27 ‘Mek lɛ a pas na yu land. A nɔ go kɔmɔt na di rod ɛn a nɔ go tɔn lɛft ɔ tɔn rayt.+ 28 Na di fud ɛn wata nɔmɔ we yu sɛl gi mi nain a go it ɛn drink. Jɔs alaw mi fɔ pas bay fut 29 —na dat Isɔ in pikin dɛn we de na Sia ɛn di Moabayt dɛn we de na A bin du fɔ mi—te a krɔs di Jɔdan ɛn go na di land we Jiova wi Gɔd de gi wi.’ 30 Bɔt Kiŋ Sayɔn na Ɛshbɔn nɔ mek lɛ wi pas, bikɔs Jiova una Gɔd alaw am fɔ gɛt strɔngat ɛn fɔ mek trangayes,+ so dat i go an ova am to una jɔs lɛk aw i dɔn bi tide.+
31 “Dɔn Jiova tɛl mi se, ‘Luk, a dɔn ɔlrɛdi bigin fɔ gi yu Sayɔn ɛn in land. Bigin fɔ tek in land.’+ 32 We Sayɔn kam wit ɔl in pipul dɛn fɔ kam mit wi na Jeaz fɔ fɛt,+ 33 Jiova wi Gɔd an ova am to wi, we mek wi win in, in bɔypikin dɛn, ɛn ɔl in pipul dɛn. 34 Da tɛm de, wi kapchɔ ɔl in siti dɛn ɛn pwɛl pwɛl dɛn, wi kil di man dɛn, di uman dɛn, ɛn di pikin dɛn. No wan nɔ sev.+ 35 Na di animal dɛn nɔmɔ wi tek fɔ wisɛf wit di tin dɛn we wi tek na di siti dɛn we wi bin dɔn kapchɔ. 36 Frɔm Aroa,+ we de na di ɛj pat na di Anɔn Vali (wit di siti we de na di vali), te go na Giliad, no tɔŋ nɔ de we wi nɔ bin ebul kapchɔ. Jiova wi Gɔd an ova dɛn ɔl to wi.+ 37 Bɔt una nɔ go na di Amɔnayt+ dɛn land, nia di Jabɔk+ Vali ɛn di siti dɛn we de na di eria usay mawntin dɛn de, ɔ ɛni ɔda ples we Jiova wi Gɔd se wi nɔ fɔ go.