Di Apɔsul Dɛn Wok
1 Tiofilɔs, insay di fɔs buk, a rayt bɔt ɔl di tin dɛn we Jizɔs bigin fɔ du ɛn tich+ 2 te di de we Gɔd es am ɔp,+ afta we i yuz oli spirit fɔ tɛl di apɔsul dɛn we i dɔn pik,+ di tin dɛn we dɛn fɔ du. 3 Afta we i dɔn sɔfa, i sho insɛf bɔku tɛm to dɛn di we we de pruv klia wan se i de alayv.+ Dɛn bin si am fɔ 40 dez, ɛn i bin de tɔk bɔt Gɔd in Kiŋdɔm.+ 4 We i bin de wit dɛn, i tɛl dɛn se: “Una nɔ kɔmɔt na Jerusɛlɛm;+ una kɔntinyu fɔ wet fɔ di tin we di Papa dɔn prɔmis una,+ we a bin tɛl una bɔt. 5 Jɔn bin de baptayz wit wata, bɔt i nɔ go te igen, a go baptayz una wit oli spirit.”+
6 So we dɛn dɔn gɛda, dɛn aks am se: “Masta, na naw yu de kam bak wit di kiŋdɔm na Izrɛl?”+ 7 I tɛl dɛn se: “Una nɔ nid fɔ no di tɛm ɔ sizin bikɔs na di Papa nɔmɔ gɛt di rayt fɔ disayd.+ 8 Bɔt una go gɛt pawa we di oli spirit kam pan una,+ ɛn una go tɔk+ bɔt mi na Jerusɛlɛm,+ ɛn ɔlsay na Judia ɛn Sameria,+ ɛn na di say we fa pas ɔl* na di wɔl.”+ 9 We i dɔn fɔ tɔk dɛn tin ya, as dɛn bin de wach am, Gɔd es am ɔp. Dɔn klawd kɔba am, ɛn dɛn nɔ bin ebul fɔ si am igen.+ 10 Ɛn we dɛn kɔntinyu fɔ luk na di skay as i de go, tu man dɛn we wɛr wayt klos+ jɔs kam tinap nia dɛn 11 ɛn tɛl dɛn se: “Man dɛn we kɔmɔt na Galili, wetin mek una tinap de luk ɔp di skay? Dis Jizɔs, we bin de wit una, we Gɔd dɔn kɛr go ɔp na di skay go kam bak di sem we aw una si am de go ɔp na di skay.”
12 Dɔn dɛn kɔmɔt na wan mawntin we de nia Jerusɛlɛm we dɛn de kɔl Mawnt Ɔliv, ɛn dɛn go bak na Jerusɛlɛm.+ Di distans frɔm di mawntin to Jerusɛlɛm na bin di distans we dɛn de alaw pɔsin fɔ travul di Sabat de. 13 We dɛn rich, dɛn go ɔp na di rum usay dɛn bin de. Pita, Jɔn, Jems, Andru, Filip, Tɔmɔs, Batalomi, Matyu, Jems we na Alfiɔs in pikin, Saymɔn di wan we gɛt zil, ɛn Judas we na Jems in pikin,+ dɛn ɔl bin de de. 14 Dɛn ɔl wit Jizɔs in mama, we na Meri, Jizɔs in brɔda+ dɛn, ɛn sɔm uman+ dɛn bin de pre wit wanwɔd, ɛn dɛn nɔ bin de taya fɔ pre.
15 Insay da tɛm de, Pita tinap midul di brɔda dɛn (na bin lɛk 120 pipul dɛn so bin de de) ɛn tɔk se: 16 “Mi pipul dɛn, mi brɔda dɛn, di skripchɔ usay di oli spirit mek Devid tɔk bɔt Judas,+ we ɛp pipul dɛn fɔ arɛst Jizɔs,+ bin nid fɔ apin 17 bikɔs in na bin wan pan wi,+ ɛn dɛn bin pik am fɔ du dis wok. 18 (Dis sem man bay land wit di mɔni we dɛn pe am fɔ we i du tin we nɔ rayt;+ i fɔdɔm wit in ed ɛn in bɛlɛ bɔs ɛn ɔl wetin de insay in bɛlɛ kɔmɔt na do.+ 19 Ɔlman na Jerusɛlɛm kam no bɔt dis, so dɛn bin de kɔl di land insay dɛn langwej Akɛldɛma, we min, “Blɔd Land.”) 20 Dɛn rayt na di Sam buk se, ‘Lɛ di say we i de ɛmti ɛn mek nɔbɔdi nɔ de de’+ ɛn ‘Lɛ ɔda pɔsin tek in wok.’*+ 21 So wi nid fɔ pik wan pan di man dɛn we bin de wit wi ɔl di tɛm we Masta Jizɔs bin de du in wok* we i bin de wit wi; 22 dat na, frɔm di tɛm we Jɔn baptayz+ am te di de we Gɔd es am ɔp,+ ɛn da man de fɔ dɔn si Jizɔs we i gɛt layf bak,+ jɔs lɛk wi.”
23 So dɛn pik tu man dɛn, Josɛf, we dɛn de kɔl Basabas ɛn we dɛn bin de kɔl bak Jɔstɔs, ɛn Matayas. 24 Dɔn dɛn pre se: “E Jiova,* na yu no wetin de na ɔlman in at,+ sho wi uswan pan dɛn tu man dɛn ya yu dɔn pik 25 fɔ tek dis oli wok ɛn di apɔsul wok we Judas lɛf fɔ go in yon we.”+ 26 So dɛn balɔt+ ɛn na Matayas in nem kɔmɔt, ɛn dɛn tek am di sem we lɛk di 11 apɔsul dɛn.