Nɔmbaz
24 We Belam si se Jiova gladi we i blɛs Izrɛl, i nɔ go bak fɔ luk fɔ bad bad sayn+ dɛn, bɔt i tɔn in atɛnshɔn to di wildanɛs.* 2 We Belam es in ed ɛn si di Izrɛlayt dɛn na dɛn kamp dɛn bay dɛn trayb+ dɛn, Gɔd in spirit kam pan am.+ 3 Dɔn i gi dis mɛsej:+
“Na dis Belam we na Biɔ in bɔypikin se,
Ɛn na dis wan man we in yay dɔn opin se,
4 Na dis di wan we de yɛri Gɔd in wɔd se,
We bin dɔn si di Ɔlmayti in vishɔn,
We dɔn butu we in yay dɛn nɔ kɔba:+
5 E Jekɔp, yu tɛnt dɛn fayn!
E Izrɛl, yu tabanakul dɛn fayn!+
6 Dɛn lɔng+ ɛn wayd lɛk vali dɛn,
Lɛk gadin dɛn we de nia riva,
Lɛk alo* plant dɛn we Jiova dɔn plant,
Lɛk sida stik dɛn we de nia wata.
7 Wata de drɔp drɔp frɔm in tu bɔkɛt dɛn we dɛn mek wit lɛda,
Ɛn dɛn plant in sid nia bɔku wata.+
8 Gɔd de pul dɛn na Ijipt;
Fɔ dɛn, i tan lɛk man kaw we de na bush in ɔn dɛn.
I go dɔnawe wit di neshɔn dɛn, di wan dɛn we de sɔprɛs dɛn,+
I go cham cham dɛn bon dɛn, ɛn i go yuz in aro fɔ dɔnawe wit dɛn.
9 I dɔn butu, i dɔn ledɔm lɛk layɔn,
Ɛn lɛk layɔn, udat gɛt maynd fɔ ambɔg am?
Di wan dɛn we de blɛs yu gɛt blɛsin,
Ɛn di wan dɛn we de swɛ yu gɛt swɛ.”+
10 Dɔn Belak vɛks bad bad wan pan Belam. Belak klap da fityay we ɛn tɛl Belam se: “A kɔl yu fɔ swɛ mi ɛnimi dɛn,+ bɔt yu nɔ du natin, bifo dat, yu dɔn blɛs dɛn tri tɛm. 11 So go na os wantɛm wantɛm. A bin want fɔ rili ɔnɔ yu,+ bɔt Jiova dɔn mek yu nɔ gɛt ɔnɔ.”
12 Belam ansa Belak se: “A bin tɛl di mɛsenja dɛn we yu sɛn se, 13 ‘If Belak gi mi in os we ful-ɔp wit silva ɛn gold, a nɔ go du ɛnitin bay misɛf we nɔto dat Jiova want ilɛksɛf i gud ɔ bad. Na wetin Jiova tɛl mi nɔmɔ nain a go tɔk.’+ 14 Naw, a de go to mi pipul dɛn. Kam lɛ a tɛl yu wetin dɛn pipul dɛn ya go du to yu pipul dɛn tumara bambay.” 15 So i tɛl am dis mɛsej:+
“Na dis Belam we na Biɔ in bɔypikin se,
Ɛn na dis wan man we in yay dɔn opin se,+
16 Na dis di wan we de yɛri Gɔd in wɔd se,
Di wan we no bɔt di Wan We De Pantap Ɔlman,
Di wan we dɔn si di Ɔlmayti in vishɔn
We butu we in yay nɔ kɔba:
17 A go si am, bɔt nɔto naw.
A go si am, bɔt nɔto jisnɔ.
Ɛn i go mɔs brok Moab in fɔɛd+
Ɛn skata di bɔypikin dɛn we lɛk fɛt-fɛt dɛn skɔl dɛn.
18 Ɛn Idɔm go bi prɔpati,+
Fɔ tru, Sia+ go bi prɔpati to in ɛnimi+ dɛn,
We Izrɛl go de sho se i gɛt maynd.
19 Ɛn pɔsin go kɔmɔt frɔm Jekɔp we go kɔntrol ɔda pipul+ dɛn,
Ɛn i go dɔnawe wit di wan dɛn we sev na di siti.”
20 We i si Amalɛk, i kɔntinyu fɔ gi dis mɛsej, i se:
21 We i si di Kɛnayt+ dɛn, i kɔntinyu fɔ gi dis mɛsej, i se:
“Di say we una de sef, ɛn una dɔn mek di say usay una de pantap rɔk.
22 Bɔt sɔmbɔdi go bɔn Kein wit faya,
Ɛn i nɔ go te igen, di Asirian dɛn go kapchɔ una ɛn kɛr una go.”
23 Ɛn i kɔntinyu fɔ gi dis mɛsej, i se:
“Bad tin go apin! Udat go sev we Gɔd du dis?
24 Ship dɛn go kɔmɔt na di bich na Kitim,+
Dɛn go mek di pipul dɛn na Asiria sɔfa,+
Ɛn dɛn go mek di pipul dɛn na Iba sɔfa.
Bɔt dɛn go dɔnawe wit dɛn bak kpatakpata.”
25 Dɔn Belam+ grap ɛn go nain ples. Na de Belak insɛf go in yon we.