Livitikɔs

19 Jiova kɔntinyu fɔ tɔk to Mozis, i se: 2 “Tɔk to ɔl di Izrɛlayt dɛn ɛn tɛl dɛn se, ‘Una fɔ oli, bikɔs mi, Jiova una Gɔd, a oli.+

3 “‘Ich wan pan una fɔ rɛspɛkt* in mama ɛn in papa,+ ɛn una fɔ kip mi sabat+ dɛn. Mi na Jiova una Gɔd. 4 Una nɔ fɔ tɔn to gɔd dɛn we nɔ gɛt wan valyu+ ɔ yuz mɛtal fɔ mek gɔd+ dɛn fɔ unasɛf. Mi na Jiova una Gɔd.

5 “‘We una de mek pis sakrifays to Jiova,+ una fɔ sakrifays am di we we go mek i gladi fɔ una.+ 6 Una fɔ it am di de we una mek di sakrifays ɛn di nɛks de, bɔt di wan we lɛf te di tɔd de, una fɔ bɔn am na faya.+ 7 If una it ɛniwan di tɔd de, na tin we go ɔfɛn Gɔd ɛn i nɔ go gladi. 8 Di wan we it am go ansa fɔ in sin bikɔs i dɔn dɔti sɔntin we oli to Jiova, ɛn dɛn fɔ kil da pɔsin de.

9 “‘We una de avɛst na una land, una nɔ fɔ avɛst ɔltin we de na di ɛj pat na una fam, ɛn una nɔ fɔ pik wetin lɛf we una dɔn avɛst.+ 10 Dɔn bak, una nɔ fɔ gɛda wetin lɛf na una vayn gadin ɔ pik di greps dɛn we dɔn skata na una vayn gadin. Una fɔ lɛf dɛn fɔ di wan dɛn we po*+ ɛn di fɔrina dɛn. Mi na Jiova una Gɔd.

11 “‘Una nɔ fɔ tif,+ una nɔ fɔ ful ɔda pɔsin,+ ɛn una nɔ fɔ kruk ɔda pɔsin. 12 Una nɔ fɔ yuz mi nem fɔ swɛ pan tin we na lay+ ɛn dɔti una Gɔd in nem. Mi na Jiova. 13 Yu nɔ fɔ kruk yu kɔmpin,+ ɛn yu nɔ fɔ tif.+ Yu nɔ fɔ ol wokman we yu aya in mɔni ol nɛt te na mɔnin.+

14 “‘Yu nɔ fɔ swɛ pɔsin we dɛf ɔ put sɔntin bifo pɔsin we blayn,+ ɛn yu fɔ fred yu Gɔd.+ Mi na Jiova.

15 “‘Una fɔ jɔj fia wan. Una nɔ fɔ tek pɔsin we jɛntri bɛtɛ pas pɔsin we po.+ Una fɔ jɔj una kɔmpin dɛn fia wan.

16 “‘Yu nɔ fɔ de go ɛn pwɛl yu kɔmpin in nem.+ Yu nɔ fɔ du ɛnitin we go mek yu kɔmpin in layf*+ de pan denja.* Mi na Jiova.

17 “‘Yu nɔ fɔ et yu brɔda na yu at.+ Yu fɔ du ɔl wetin yu ebul fɔ kɔrɛkt yu kɔmpin,+ so dat yu nɔ go sin lɛk am.

18 “‘Yu nɔ fɔ tɔn-am-gi+ ɔ kip grɔj fɔ yu kɔmpin, ɛn yu fɔ lɛk yu kɔmpin lɛk aw yu lɛk yusɛf.+ Mi na Jiova.

19 “‘Una fɔ kip mi lɔ dɛn: Una nɔ fɔ mek tu difrɛn animal we una de mɛn bɔn pikin togɛda. Una nɔ fɔ plant tu difrɛn sid+ na una fam, ɛn una nɔ fɔ wɛr klos we dɛn yuz tu difrɛn trɛd dɛn we dɛn miks togɛda fɔ mek.+

20 “‘If man ledɔm wit uman ɛn du mami ɛn dadi biznɛs wit am ɛn di uman na savant we dɛn dɔn pik fɔ ɔda man, bɔt dɛn nɔ bay di uman yet ɔ fri am, dɛn fɔ gɛt pɔnishmɛnt. Bɔt dɛn nɔ fɔ kil dɛn, bikɔs di uman nɔ fri yet. 21 Di man fɔ kam wit di ɔfrin we de sho se i dɔn du bad to Jiova na di say fɔ ɛnta na di mitin tɛnt. I fɔ kam wit wan man ship fɔ ɔfrin we de sho se i dɔn du bad.+ 22 Di prist go yuz di man ship fɔ di ɔfrin we de sho se i dɔn du bad ɛn mek ɔfrin fɔ am bifo Jiova fɔ mek Gɔd fɔgiv am fɔ di sin we i dɔn kɔmit, ɛn Gɔd go fɔgiv am fɔ di sin we i dɔn kɔmit.

23 “‘We una go na di land ɛn una plant ɛni stik fɔ fud, una fɔ tek di frut we i de bia as sɔntin we nɔ klin ɛn una fɔ avɔyd am.* Una fɔ avɔyd am* fɔ tri ia. Una nɔ fɔ it am. 24 Bɔt insay di ia we mek 4, ɔl in frut dɛn go oli ɛn i go bi tɛm fɔ gladi bifo Jiova.+ 25 Dɔn insay di ia we mek fayv, una kin it di frut so dat una go ad am pan di tin dɛn we una de avɛst. Mi na Jiova una Gɔd.

26 “‘Una nɔ fɔ it ɛnitin we gɛt blɔd.+

“‘Una nɔ fɔ luk fɔ sayn dɛn ɔ ple majik.+

27 “‘Una nɔ fɔ shev* di ia we de na di sayd pat na una ed, ɛn una nɔ fɔ pwɛl di ɛj pat na una biabia.+

28 “‘Una nɔ wund wund unasɛf fɔ pɔsin* we dɔn day,+ ɛn una nɔ tatu unasɛf. Mi na Jiova.

29 “‘Nɔ mek yu galpikin nɔ gɛt ɔnɔ bay we yu mek i bi raregal,+ so dat rare layf nɔ go dɔti di land ɛn di land nɔ go ful-ɔp wit pipul dɛn we de liv fri layf.+

30 “‘Una fɔ kip mi sabat+ dɛn, ɛn una fɔ sho se una rɛspɛkt* mi oli ples. Mi na Jiova.

31 “‘Una nɔ fɔ go to di wan dɛn we de tɔk to dayman+ ɛn to di wan dɛn we de tɔk bɔt wetin gɛt fɔ apin,+ so dat dɛn nɔ go mek una nɔ klin. Mi na Jiova una Gɔd.

32 “‘Yu fɔ grap bifo pɔsin we gɛt wet ia,+ yu fɔ ɔnɔ pɔsin we dɔn ol,+ ɛn yu fɔ fred yu Gɔd.+ Mi na Jiova.

33 “‘If fɔrina de wit una na una land, una nɔ fɔ trit am bad.+ 34 Di fɔrina we de wit una fɔ fiba lɛk Izrɛlayt to una;+ ɛn una fɔ lɛk am lɛk aw una lɛk unasɛf, bikɔs una na bin fɔrina dɛn na Ijipt.+ Mi na Jiova una Gɔd.

35 “‘We una de chɛk aw lɔng sɔntin bi, we una de chɛk sɔntin in wet, ɔ we una de mɛzhɔ ɛni ɔda tin,+ una fɔ du am ɔnɛs wan. 36 Una fɔ yuz skel dɛn we kɔrɛkt, di tin we una de yuz fɔ mɛzhɔ wet fɔ kɔrɛkt, di tin we una de yuz fɔ mɛzhɔ dray tin* fɔ kɔrɛkt, ɛn di tin we una de yuz fɔ mɛzhɔ likwid* fɔ kɔrɛkt.+ Mi na Jiova una Gɔd, we pul una na Ijipt. 37 So una fɔ kip ɔl mi lɔ dɛn ɛn du ɔl di tin dɛn we a dɔn disayd, ɛn una fɔ fala dɛn.+ Mi na Jiova.’”