Livitikɔs

13 Jiova kɔntinyu fɔ tɔk to Mozis ɛn Erɔn, i se: 2 “‘If pɔsin in skin swɛl, i gɛt sofut kanda, ɔ brayt spɔt we kin tɔn to lɛprɔsi*+ na di skin, dɛn fɔ kɛr am go to Erɔn we na di prist ɔ to wan pan in bɔypikin dɛn we na prist.+ 3 Di prist go wach di infɛkshɔn na di skin gud gud wan. If di ia na di infɛkshɔn dɔn wayt ɛn i luk lɛk di infɛkshɔn dɔn go dip insay di skin, dat min se na lɛprɔsi. Di prist go wach am gud gud wan ɛn tɔk se i nɔ klin. 4 Bɔt if di brayt spɔt nain skin na wayt ɛn i luk lɛk se i nɔ go dip insay di skin, dɔn di ia nɔ tɔn to wayt, di prist fɔ kwarantin di pɔsin we sik fɔ sɛvin dez.+ 5 Di prist go chɛk am gud gud wan di de we mek sɛvin, ɛn if i luk lɛk se di infɛkshɔn dɔn stɔp ɛn i nɔ prɛd na di skin, di prist go kwarantin am bak fɔ sɛvin dez.

6 “Di prist go chɛk am bak gud gud wan di de we mek sɛvin, ɛn if di infɛkshɔn dɔn fed ɛn i nɔ prɛd na di skin, di prist go tɔk se i klin;+ na jɔs sofut kanda. Di pɔsin go was in klos dɛn ɛn i go klin. 7 Bɔt if di sofut kanda* dɔn prɛd na di skin afta i tinap bifo di prist fɔ lɛ i tɔk se i dɔn klin, i go tinap bak* bifo di prist. 8 Di prist go chɛk am gud gud wan, ɛn if di sofut kanda dɔn prɛd na di skin, di prist go tɔk se i nɔ klin. Na lɛprɔsi.+

9 “If pɔsin gɛt lɛprɔsi, dɛn fɔ kɛr am go to di prist, 10 ɛn di prist fɔ chɛk am+ gud gud wan. If di swɛlin nain skin wayt ɛn i dɔn mek di ia wayt ɛn if di swɛlin opin lɛk wund,+ 11 na kronik lɛprɔsi de nain skin, ɛn di prist go tɔk se i nɔ klin. I nɔ fɔ kwarantin am,+ bikɔs i nɔ klin. 12 If di lɛprɔsi kɔmɔt ɔlsay nain skin ɛn di lɛprɔsi kɔba di pɔsin frɔm in ed to in fut, na ɔl di say dɛn we di prist de si, 13 ɛn di prist dɔn chɛk am gud gud wan ɛn si se di lɛprɔsi dɔn kɔba ɔlsay nain skin, i go tɔk se di pɔsin we gɛt di lɛprɔsi klin.* Ɔltin dɔn tɔn wayt, ɛn i klin. 14 Bɔt ɛnitɛm sofut we opin kɔmɔt de, i nɔ go klin. 15 We di prist si di sofut we opin, i go tɔk se di pɔsin nɔ klin.+ Di sofut we opin nɔ klin. Na lɛprɔsi.+ 16 Bɔt if di sofut we opin tɔn wayt bak, i fɔ go to di prist. 17 Di prist go chɛk am+ gud gud wan, ɛn if di infɛkshɔn dɔn tɔn wayt, di prist go tɔk se di pɔsin klin. I klin.

18 “If pɔsin pul bwɛl nain skin ɛn i wɛl, 19 bɔt wayt swɛlin ɔ rɛd ɛn wayt spɔt kɔmɔt usay di bwɛl bin de, i fɔ go sho insɛf to di prist. 20 Di prist go chɛk am+ gud gud wan, ɛn if i luk lɛk i go dip insay di skin ɛn di ia dɔn wayt, di prist go tɔk se i nɔ klin. Na lɛprɔsi dɔn kɔmɔt insay di bwɛl. 21 Bɔt if di prist chɛk am gud gud wan ɛn si se no wayt ia nɔ de de ɛn i nɔ go dip insay di skin ɛn i luk fed, di prist go kwarantin am fɔ sɛvin dez.+ 22 Ɛn if i dɔn rili prɛd na di skin, di prist go tɔk se i nɔ klin. Na sik. 23 Bɔt if di brayt spɔt nɔ prɛd, i jɔs de wan ples, ɛn na jɔs swɛlin bikɔs ɔf di bwɛl, di prist go tɔk se di pɔsin klin.+

24 “Ɔ if sɔmbɔdi gɛt mak bikɔs ɔf faya ɛn di rɔ flɛsh pan di mak tɔn to brayt spɔt we na rɛd ɛn wayt ɔ wayt, 25 di prist go chɛk am gud gud wan. If di ia na di brayt spɔt dɔn tɔn wayt ɛn i luk lɛk i go dip insay di skin, na lɛprɔsi dɔn kɔmɔt na di mak, ɛn di prist go tɔk se i nɔ klin. Na lɛprɔsi. 26 Bɔt if di prist chɛk am gud gud wan ɛn i si se no ia nɔ de na di brayt spɔt, i nɔ go dip insay di skin, ɛn i nɔ fed, di prist go kwarantin am fɔ sɛvin dez.+ 27 Di prist go chɛk am gud gud wan di de we mek sɛvin, ɛn if i dɔn rili prɛd na di skin, di prist go tɔk se i nɔ klin. Na lɛprɔsi. 28 Bɔt if di brayt spɔt de wansay, i nɔ prɛd na di skin, ɛn i nɔ fed, na jɔs di mak swɛl, di prist go tɔk se i klin, bikɔs na di mak nain swɛl.

29 “We man ɔ uman gɛt infɛkshɔn nain ed ɔ nain chin, 30 di prist go chɛk di infɛkshɔn+ gud gud wan. If i luk lɛk i go dip insay di skin ɛn di ia yɛlo ɛn i nɔ bɛtɛ, di prist go tɔk se di pɔsin nɔ klin; i gɛt infɛkshɔn nain ed ɔ in biabia. Na lɛprɔsi de na di ed ɔ di chin. 31 Bɔt if di prist si se di infɛkshɔn nɔ luk lɛk i go dip insay di skin ɛn no blak ia nɔ de de, di prist fɔ kwarantin di pɔsin we gɛt di infɛkshɔn fɔ sɛvin dez.+ 32 Di prist go chɛk di infɛkshɔn gud gud wan di de we mek sɛvin, ɛn if di say we di infɛkshɔn de nɔ prɛd, no yɛlo ia nɔ de de, ɛn i luk lɛk di say we di infɛkshɔn de nɔ go dip insay di skin, 33 di pɔsin fɔ shev, bɔt i nɔ fɔ shev di say we di infɛkshɔn de. Dɔn di prist go kwarantin di pɔsin we gɛt di infɛkshɔn fɔ sɛvin dez.

34 “Di prist fɔ chɛk di say we di infɛkshɔn de bak gud gud wan di de we mek sɛvin, ɛn if di infɛkshɔn na di ed ɛn di biabia nɔ prɛd na di skin ɛn i nɔ luk lɛk i go dip insay di skin, di prist fɔ tɔk se di pɔsin klin, ɛn di pɔsin fɔ was in klos dɛn ɛn i go klin. 35 Bɔt if di infɛkshɔn rili prɛd na di skin afta di prist dɔn tɔk se i klin, 36 di prist go chɛk am gud gud wan, ɛn if di infɛkshɔn dɔn prɛd na di skin, di prist nɔ nid fɔ luk fɔ yɛlo ia, da pɔsin de nɔ klin. 37 Bɔt if we di prist de chɛk am, i si se di infɛkshɔn nɔ prɛd ɛn blak ia dɔn gro de, di infɛkshɔn dɔn wɛl. I klin ɛn di prist go tɔk se di pɔsin klin.+

38 “If man ɔ uman gɛt brayt spɔt dɛn na di skin ɛn di brayt spɔt dɛn wayt, 39 di prist go chɛk dɛn+ gud gud wan. If di brayt spɔt dɛn na di skin, na wayt we dɔn fed, nɔto bad rash kɔmɔt na di skin. Da pɔsin de klin.

40 “If man in ia dɔn nain ed ɛn i gɛt moled, i klin. 41 If di ia bifo in ed dɔn ɛn i gɛt moled de, i klin. 42 Bɔt if rɛd ɛn wayt sofut kɔmɔt na di moled ɔ nain fɔɛd, na lɛprɔsi dɔn kɔmɔt nain ed ɔ nain fɔɛd. 43 Di prist go chɛk am gud gud wan, ɛn if di swɛlin na di infɛkshɔn na rɛd ɛn wayt na di say we di moled de nain ed ɔ nain fɔɛd ɛn i luk lɛk lɛprɔsi nain skin, 44 i gɛt lɛprɔsi. I nɔ klin, ɛn di prist fɔ tɔk se i nɔ klin bikɔs ɔf di sik we de nain ed. 45 As fɔ di pɔsin we gɛt di lɛprɔsi, i fɔ chɛr in klos dɛn, i nɔ fɔ tek kia ɔf di ia nain ed, i fɔ kɔba in mustach, ɛn i fɔ tɔk se, ‘A nɔ klin, a nɔ klin!’ 46 I nɔ go klin ɔl di tɛm we i gɛt di sik. Bikɔs i nɔ klin, i fɔ de bay insɛf. I nɔ fɔ de insay di kamp.+

47 “If lɛprɔsi go pan klos, ilɛksɛf di klos na wul ɔ na linin, 48 ilɛksɛf na di trɛd we dɛn de yuz fɔ wiv linin ɔ wul, ɔ pan lɛda ɔ pan ɛnitin we dɛn mek wit kanda, 49 ɛn yɛlo ɛn grin ɔ rɛd sten frɔm di sik go pan klos, pan kanda, pan di trɛd dɛn we de pan klos we dɛn dɔn wiv, ɔ ɛnitin we dɛn mek wit kanda, na lɛprɔsi, dɛn fɔ sho am to di prist. 50 Di prist go chɛk di tin dɛn gud gud wan, ɛn i fɔ kwarantin di tin dɛn we di sik de pan fɔ sɛvin dez.+ 51 We di prist chɛk di tin dɛn we di sik de pan gud gud wan di de we mek sɛvin ɛn i si se i dɔn prɛd na di klos, di trɛd dɛn we de pan klos we dɛn dɔn wiv, ɔ pan di kanda (ilɛk wetin dɛn de yuz di kanda fɔ), na lɛprɔsi we de prɛd, ɛn i nɔ klin.+ 52 I fɔ bɔn di klos ɔ di trɛd dɛn we de pan wul ɔ linin ɔ ɛnitin we dɛn mek wit kanda we di sik de pan, na lɛprɔsi we de prɛd. I fɔ bɔn am na faya.

53 “Bɔt if di prist chɛk am gud gud wan ɛn di sik nɔ prɛd pan di klos ɔ di trɛd dɛn we de pan klos we dɛn wiv, ɔ ɛnitin we dɛn mek wit kanda, 54 di prist go se mek dɛn was di tin we di sik de pan, ɛn i go kwarantin am bak fɔ sɛvin dez. 55 Di prist go chɛk di tin we gɛt di sik gud gud wan afta dɛn dɔn was am fayn. If di say we di sik de nɔ chenj, ivin if di sik nɔ prɛd, i nɔ klin. I fɔ bɔn am na faya bikɔs sɔnsay dɔn pwɛl, ilɛksɛf na bifo ɔ biɛn.

56 “Bɔt if di prist dɔn chɛk am gud gud wan ɛn di say we di sik de, fed afta dɛn dɔn was am fayn fayn wan, di prist fɔ chɛr di say we di sik de pan di klos, pan di kanda, ɔ di trɛd dɛn we de pan klos we dɛn dɔn wiv. 57 Bɔt if i kɔmɔt na ɔda pat na di klos, di trɛd dɛn we de pan klos we dɛn dɔn wiv, ɔ ɛnitin we dɛn mek wit kanda, i sho se i de prɛd, yu fɔ bɔn ɛnitin we di sik de pan na faya.+ 58 Bɔt if di sik lɔs na di klos, di trɛd dɛn we de pan klos we dɛn dɔn wiv, ɔ ɛnitin we dɛn mek wit kanda afta yu dɔn was am, yu fɔ was am bak, ɛn i go klin.

59 “Dis na di lɔ fɔ lɛprɔsi we de pan wul ɔ linin klos, ɔ di trɛd dɛn we de pan klos we dɛn dɔn wiv, ɔ ɛnitin we dɛn mek wit kanda, fɔ tɔk se i klin ɔ i nɔ klin.”