Livitikɔs

11 Dɔn Jiova tɛl Mozis ɛn Erɔn se: 2 “Una tɛl di Izrɛlayt dɛn se, ‘Na dɛn tin dɛn we gɛt layf na di wɔl* una kin it:+ 3 Una kin it ɛni animal we in to dɛn plit, we gɛt big spes midul in to dɛn, ɛn we de cham bak wetin i bin dɔn swɛla.

4 “‘Bɔt una nɔ fɔ it dɛn animal dɛn ya we de cham bak wetin dɛn dɔn swɛla ɔ we dɛn to dɛn plit: dat na, kamɛl, we de cham bak wetin i bin dɔn swɛla bɔt in to dɛn nɔ plit. I nɔ klin fɔ una.+ 5 Una nɔ fɔ it rɔk baja,+ bikɔs i de cham bak wetin i dɔn swɛla bɔt in to dɛn nɔ plit. I nɔ klin fɔ una. 6 Una nɔ fɔ it rabit,* bikɔs i de cham bak wetin i dɔn swɛla bɔt in to dɛn nɔ plit. I nɔ klin fɔ una. 7 Una nɔ fɔ it ɔg,+ bikɔs in to dɛn plit ɛn i gɛt big spes midul in to dɛn, bɔt i nɔ de cham bak wetin i dɔn swɛla. I nɔ klin fɔ una. 8 Una nɔ fɔ it ɛniwan pan dɛn animal dɛn ya dɛn bif ɔ tɔch dɛn dedebɔdi. Dɛn nɔ klin fɔ una.+

9 “‘Pan ɔl di tin dɛn we de na wata, na dɛn wan dɛn ya una fɔ it: Una fɔ it+ ɛnitin we de na wata we gɛt fin ɛn skel, ilɛksɛf i de na si ɔ i de na riva. 10 Bɔt ɛnitin we de na si ɔ na riva we nɔ gɛt fin ɛn skel, we na animal dɛn we de muv togɛda bay grup ɛn ɛni ɔda tin we gɛt layf* we de na wata, fɔ bi sɔntin we una et. 11 Fɔ tru, una fɔ et dɛn, una fɔ et dɛn dedebɔdi ɛn una nɔ fɔ it ɛniwan pan dɛn flɛsh.+ 12 Una fɔ et ɛnitin we de na wata we nɔ gɛt fin ɛn skel.

13 “‘Na dɛn tin dɛn ya we gɛt layf we de flay una fɔ et; una nɔ fɔ it dɛn, bikɔs una fɔ et dɛn: dat na, igul,+ ɔspre bɔd, blak yuba,+ 14 rɛd kayt bɔd, ɛn ɔlkayn blak kayt bɔd, 15 ɔlkayn revin bɔd, 16 ɔstrich bɔd, awl bɔd, gɔl bɔd, ɔlkayn falkɔn bɔd, 17 smɔl awl bɔd, kɔmɔrant bɔd, awl bɔd we gɛt lɔng yes, 18 swan bɔd, pɛlikan bɔd, yuba, 19 stɔk bɔd, ɔlkayn irɔn bɔd, upo bɔd, ɛn bat. 20 Una fɔ et ɛnitin we de muv togɛda bay grup* we gɛt wiŋ ɛn we de waka wit 4 fut.

21 “‘Pan di animal dɛn we de muv togɛda bay grup we gɛt wiŋ ɛn we de waka wit 4 fut, na di wan dɛn nɔmɔ we gɛt lɛg dɛn ɔp dɛn fut we dɛn de yuz fɔ jomp nain una fɔ it. 22 Pan dɛn wan dɛn ya una kin it: di difrɛn kayn lokɔs dɛn we de flay, ɔda kayn lokɔs dɛn we dɛn de it,+ krikit dɛn, ɛn grasɔpa* dɛn. 23 Una fɔ et ɔl ɔda tin dɛn we de muv togɛda bay grup we gɛt wiŋ dɛn ɛn we de waka wit 4 fut. 24 Na dɛn tin dɛn ya de mek una nɔ klin. Ɛnibɔdi we tɔch dɛn dedebɔdi nɔ go klin te ivintɛm.+ 25 Ɛnibɔdi we tek dɛn dedebɔdi fɔ was in klos+ dɛn; di pɔsin nɔ go klin te ivintɛm.

26 “‘Ɛni animal we in to dɛn plit bɔt we nɔ gɛt big spes midul in to dɛn ɛn we nɔ de cham bak wetin i dɔn swɛla nɔ klin fɔ una. Ɛnibɔdi we tɔch dɛn nɔ go klin.+ 27 Ɛnitin we gɛt layf we de waka wit di flat pat pan dɛn fut na animal we nɔ klin fɔ una. Ɛnibɔdi we tɔch dɛn dedebɔdi nɔ go klin te ivintɛm. 28 Di wan we tek dɛn dedebɔdi fɔ was in klos+ dɛn, ɛn di pɔsin nɔ go klin te ivintɛm.+ Dɛn nɔ klin fɔ una.

29 “‘Na dɛn animal dɛn ya we de muv togɛda bay grup na di wɔl nɔ klin fɔ una: mol arata, arata,+ ɔlkayn kondo, 30 gɛko kondo, big kondo, nyut kondo, sansan kondo, ɛn kɔmiɛl. 31 Dɛn animal dɛn ya we de muv togɛda bay grup nɔ klin fɔ una.+ Ɛnibɔdi we tɔch dɛn dedebɔdi nɔ go klin te ivintɛm.+

32 “‘Ɛnitin we dɛn fɔdɔm pan we dɛn dɔn day nɔ go klin, ilɛk na tin we dɛn mek wit wud, na klos, na animal kanda, ɔ di klos we pɔsin kin wɛr we in at pwɛl ɛn ɛni ɔda tin ilɛk wetin dɛn de yuz am fɔ. Dɛn fɔ put am insay wata, ɛn i nɔ go klin te ivintɛm; afta dat, i go klin. 33 If dɛn fɔdɔm insay kɔntri pɔt, una fɔ brok am, ɛn ɛnitin we bin de insay de nɔ go klin.+ 34 Ɛni fud we tɔch di wata we bin de na da kɔntena de nɔ go klin, ɛn ɛnitin we na fɔ drink we de na da kɔntena de nɔ go klin. 35 Ɛnitin we dɛn dedebɔdi fɔdɔm pan nɔ go klin. Ilɛk na ovin ɔ smɔl kle stov, dɛn fɔ brok am. Dɛn nɔ klin, ɛn dɛn go kɔntinyu fɔ dɔti to una. 36 Na spriŋ* ɛn sistɛn* we dɛn kin yuz fɔ kip wata nɔmɔ go kɔntinyu fɔ klin, bɔt ɛnibɔdi we tɔch dɛn dedebɔdi nɔ go klin. 37 If dɛn dedebɔdi fɔdɔm pan sid we dɛn fɔ plant, i klin. 38 Bɔt if dɛn put wata pan di sid ɛn pat pan dɛn dedebɔdi fɔdɔm pan am, di sid nɔ klin fɔ una.

39 “‘If animal we una de it day, ɛnibɔdi we tɔch in dedebɔdi nɔ go klin te ivintɛm.+ 40 Ɛnibɔdi we it ɛni pat pan in dedebɔdi fɔ was in klos dɛn, ɛn i nɔ go klin te ivintɛm.+ Ɛnibɔdi we tek in dedebɔdi fɔ was in klos dɛn, ɛn i nɔ go klin te ivintɛm. 41 Una fɔ et+ ɛni animal we de muv togɛda bay grup na di wɔl. Una nɔ fɔ it am. 42 Una nɔ fɔ it ɛni animal we de drɛg wit in bɛlɛ, ɛni animal we de waka wit 4 fut, ɔ ɛniwan pan di animal dɛn we de muv togɛda bay grup we gɛt bɔku fut dɛn, bikɔs na tin dɛn we una fɔ et.+ 43 Una nɔ mek ɛni animal we de muv togɛda bay grup mek a et una, ɛn una nɔ dɔti unasɛf ɛn mek dɛn mek una nɔ klin.+ 44 Bikɔs mi na Jiova una Gɔd,+ ɛn una fɔ klin unasɛf ɛn mek unasɛf oli,+ bikɔs a oli.+ So una nɔ fɔ dɔti unasɛf* wit ɛni animal we de muv togɛda bay grup na di wɔl. 45 Mi na Jiova, we de pul una kɔmɔt na Ijipt fɔ pruv to una se mi na Gɔd,+ ɛn una fɔ oli,+ bikɔs a oli.+

46 “‘Dis na di lɔ bɔt di animal dɛn, di animal dɛn we de flay, ɔltin we gɛt layf we de muv na wata, ɛn ɔl di animal* dɛn we de muv togɛda bay grup na di wɔl, 47 fɔ mek difrɛns de bitwin di tin dɛn we klin ɛn di tin dɛn we nɔ klin ɛn bitwin di tin dɛn we gɛt layf we una fɔ it ɛn di wan dɛn we una nɔ fɔ it.’”+