Jɛrimaya

7 Na dis Jiova tɛl Jɛrimaya. I se: 2 “Tinap na di get na Jiova in os ɛn anawns dis mɛsej, ‘Ɔl di pipul dɛn na Juda we de ɛnta dɛn get dɛn ya fɔ butu bifo Jiova, una yɛri Jiova in wɔd. 3 Dis na wetin Jiova we gɛt bɔku bɔku sojaman dɛn ɛn we na Izrɛl in Gɔd se: “Una chenj di we aw una de biev ɛn di tin dɛn we una de du ɛn a go mek una kɔntinyu fɔ de na dis ples.+ 4 Una nɔ abop pan lay lay tɔk dɛn ɛn se, ‘Dis na* Jiova in tɛmpul, Jiova in tɛmpul, Jiova in tɛmpul!’+ 5 If una rili chenj di we aw una de biev ɛn du tin; if una rili du tin fia wan bitwin pɔsin ɛn in neba;+ 6 if una nɔ sɔprɛs fɔrina dɛn we de wit una, pikin dɛn we nɔ gɛt mama ɛn papa,* ɛn uman dɛn we dɛn man dɛn dɔn day;+ if una nɔ kil inosɛnt pipul dɛn na dis ples; ɛn if una nɔ fala ɔda gɔd dɛn we go mek bad tin apin to una;+ 7 da tɛm de, a go mek una kɔntinyu fɔ de na dis ples, na di land we a bin dɔn gi una gret gret granpa dɛn fɔ de sote go.”’”

8 “Bɔt una de abop pan lay lay tɔk+ dɛn—i nɔ go bɛnifit una atɔl. 9 Fɔ se una go tif,+ kil, lɛf una man ɔ wɛf ɛn go du mami ɛn dadi biznɛs wit ɔda pɔsin, swɛ lay lay swɛ,+ mek sakrifays dɛn to Beal,+ ɛn fala gɔd dɛn we una nɔ bin sabi, 10 dɔn una kam tinap bifo mi na dis os we gɛt mi nem ɛn tɔk se, ‘Wi go sev,’ pan ɔl we una de du dɛn dɔti dɔti tin dɛn de? 11 Fɔ se dis os we gɛt mi nem dɔn bi ples we tifman dɛn de ayd fɔ una?+ A dɔn si ɔltin fɔ misɛf.” Na dat Jiova se.

12 “‘Bɔt una go na Shaylɔ+ usay a bin put mi nem fɔs+ ɛn si wetin a du to am bikɔs ɔf di bad tin dɛn we Izrɛl, we na mi pipul dɛn bin de du.+ 13 Bɔt una kɔntinyu fɔ du ɔl dɛn tin dɛn ya ɛn pan ɔl we a bin de tɔk to una bɔku tɛm, una nɔ lisin.+ A kɔntinyu fɔ kɔl una, bɔt una nɔ ansa.’+ Na dat Jiova se. 14 ‘So wetin a du to Shaylɔ+ nain a go du to di os we gɛt mi nem,+ we una de abop pan,+ ɛn to dis ples we a dɔn gi to una ɛn una gret gret granpa dɛn. 15 A go pul una bifo mi jɔs lɛk aw a du to ɔl una brɔda dɛn we na Ifrem in pikin+ dɛn.’

16 “As fɔ yu, nɔ pre fɔ dɛn pipul dɛn ya. Nɔ kray fɔ dɛn ɔ pre fɔ dɛn ɔ beg fɔ dɛn,+ bikɔs a nɔ go lisin to yu.+ 17 Yu nɔ de si wetin dɛn de du na di siti dɛn na Juda ɛn na di strit dɛn na Jerusɛlɛm? 18 Di bɔypikin dɛn de gɛda wud, di papa dɛn de layt di faya, ɛn di wɛf dɛn de mek do fɔ mek kek we dɛn go sakrifays to di Kwin na Ɛvin,*+ ɛn dɛn de tɔn drink ɔfrin dɛn to ɔda gɔd dɛn fɔ ɔfɛn mi.+ 19 Jiova aks se, ‘Fɔ se na mi dɛn de ɔfɛn?* Fɔ se nɔto dɛnsɛf dɛn de ambɔg we go mek dɛn shem?’+ 20 Na dis Jiova, we na di Masta We De Rul Ɔlman, se ‘Luk! A go mek mi wamat kam pan dis ples,+ pan mɔtalman ɛn animal, pan di stik dɛn na di land, ɛn di tin dɛn we di grɔn de bia; i go bɔn ɛn dɛn nɔ go ebul ɔt am.’+

21 “Na dis Jiova we gɛt bɔku bɔku sojaman dɛn ɛn we na Izrɛl in Gɔd se, ‘Una go bifo, una ad una wan ol bɔn ɔfrin dɛn to una ɔda sakrifays dɛn, ɛn unasɛf sɛf fɔ it di flɛsh.+ 22 Di de we a pul una gret gret granpa dɛn na Ijipt, a nɔ tɔk to dɛn bɔt wan ol bɔn ɔfrin ɛn sakrifays dɛn ɔ kɔmand dɛn fɔ du dat.+ 23 Bɔt a tɛl dɛn se: “Una obe mi vɔys, ɛn a go bi una Gɔd ɛn una go bi mi pipul+ dɛn. Una fɔ du ɔl wetin a tɛl una so dat tin go fayn fɔ una.”’+ 24 Bɔt dɛn nɔ lisin ɔ pe atɛnshɔn,+ bifo dat, dɛn du wetin dɛn dɔn plan. Dɛn mek trangayes bay we dɛn fala di wikɛd tin dɛn we de na dɛn at,+ ɛn dɛn go biɛn, dɛn nɔ go bifo 25 frɔm di de we una gret gret granpa dɛn kɔmɔt na Ijipt te to dis de.+ So a kɔntinyu fɔ sɛn ɔl mi savant dɛn we na prɔfɛt dɛn to una; a bin de sɛn dɛn ɛvride, bɔku bɔku tɛm.+ 26 Bɔt dɛn nɔ gri fɔ lisin to mi ɛn pe atɛnshɔn to mi.+ Bifo dat, dɛn mek trangayes,* ɛn dɛn bin du tin dɛn we wɔs pas wetin dɛn gret gret granpa dɛn bin du!

27 “Yu go tɛl dɛn ɔl dɛn tin dɛn ya,+ bɔt dɛn nɔ go lisin to yu; yu go kɔl dɛn, bɔt dɛn nɔ go ansa yu. 28 Ɛn yu go tɛl dɛn se, ‘Dis na di neshɔn we nɔ gri fɔ obe Jiova we na dɛn Gɔd, ɛn dɛn nɔ gri fɔ tek in kɔrɛkshɔn. Dɛn nɔ fetful igen, ɛn dɛn nɔ de ivin tɔk bɔt am igen.’*+

29 “Kɔt yu ia we yu nɔ bin de kɔt* ɛn trowe am, siŋ sɔri siŋ na di ɛmti il dɛn, bikɔs Jiova dɔn pul an pan dis jɛnɛreshɔn we dɔn mek i vɛks, ɛn i go kɔmɔt biɛn dɛn. 30 ‘Bikɔs di pipul dɛn na Juda dɔn du wetin bad na mi yay.’ Na dat Jiova se. ‘Dɛn dɔn put dɛn dɔti dɔti aydɔl dɛn na di os we gɛt mi nem so dat dɛn go dɔti am.+ 31 Dɛn dɔn bil ay ples dɛn na Tofɛt, we de na Inɔm in Bɔypikin in Vali,*+ so dat dɛn go bɔn dɛn bɔypikin dɛn ɛn dɛn galpikin dɛn na faya.+ Dis na sɔntin we a nɔ tɛl dɛn fɔ du, ɛn a nɔ ɛva tink bɔt am na mi at.’*+

32 Jiova se: “‘Luk! Tɛm go kam we dɛn nɔ go kɔl am Tofɛt ɔ Inɔm in Bɔypikin in Vali,* bɔt dɛn go kɔl am Vali Usay Dɛn De Kil. Dɛn go bɛr na Tofɛt te ples nɔ lɛf igen.+ 33 Ɛn di pipul dɛn dedebɔdi go bi fud to bɔd dɛn we de na di skay ɛn di animal dɛn we de na di wɔl; nɔbɔdi nɔ go mek dɛn fred ɛn rɔnawe.+ 34 A go mek gladi-gladi ɛn ɛnjɔymɛnt nɔ de igen, dɛn nɔ go yɛri ɔkɔ ɛn yawo dɛn vɔys igen+ na di siti dɛn na Juda ɛn na di strit dɛn na Jerusɛlɛm, bikɔs dɛn go dɔn dɔnawe wit di land.’”+