Ɛksodɔs
8 Dɔn Jiova tɛl Mozis se: “Go to Fɛro ɛn tɛl am se, ‘Dis na wetin Jiova se: “Alaw mi pipul dɛn fɔ go so dat dɛn go wɔship mi.+ 2 If yu kɔntinyu fɔ mek trangayes ɛn nɔ alaw dɛn fɔ go, a go mek frɔg dɛn kam ɔlsay na yu land.+ 3 Di Nayl Riva go ful-ɔp wit frɔg dɛn, ɛn dɛn go kam ɛn ɛnta na yu os, na yu rum, na yu bed, na yu savant dɛn os dɛn ɛn pan yu pipul dɛn, na yu ovin dɛn, ɛn na di say dɛn usay yu de nid do.*+ 4 Di frɔg dɛn go kam pan yu, yu pipul dɛn, ɛn pan ɔl yu savant dɛn.”’”
5 Leta, Jiova tɛl Mozis se: “Tɛl Erɔn se, ‘Strɛch di stik we de na yu an oba di riva dɛn, di Nayl wata dɛn, ɛn di swamp dɛn ɛn mek di frɔg dɛn kam ɔlsay na Ijipt.’” 6 So Erɔn strɛch in an oba di wata dɛn na Ijipt ɛn di frɔg dɛn bigin fɔ kɔmɔt de ɛn kam ɔlsay na Ijipt. 7 Bɔt di prist dɛn we de pafɔm majik du di sem tin wit dɛn sikrit majik, ɛn dɛnsɛf mek frɔg dɛn kam na Ijipt.+ 8 Na de Fɛro kɔl Mozis ɛn Erɔn ɛn tɛl dɛn se: “Una beg Jiova fɔ pul di frɔg dɛn kɔmɔt pan mi ɛn mi pipul+ dɛn, bikɔs a want fɔ alaw di pipul dɛn fɔ go so dat dɛn go mek sakrifays to Jiova.” 9 Na de Mozis tɛl Fɛro se: “A want fɔ gi yu di ɔnɔ fɔ tɛl mi ustɛm a fɔ beg fɔ lɛ di frɔg dɛn kɔmɔt pan yu, yu savant dɛn, yu pipul dɛn, ɛn yu os dɛn. Na di Nayl Riva nɔmɔ dɛn go lɛf.” 10 Na de i tɔk se: “Tumara.” So Mozis tɛl am se: “I go apin jɔs lɛk aw yu dɔn tɔk so dat yu go kam fɔ no se nɔbɔdi nɔ de we tan lɛk wi Gɔd, Jiova.+ 11 Di frɔg dɛn go kɔmɔt pan yu, yu os dɛn, yu savant dɛn, ɛn yu pipul dɛn. Na di Nayl Riva nɔmɔ dɛn go lɛf.”+
12 So Mozis ɛn Erɔn kɔmɔt to Fɛro ɛn Mozis beg Jiova fɔ pul di frɔg dɛn we I bin dɔn briŋ kam pan Fɛro.+ 13 Dɔn, Jiova du wetin Mozis aks am fɔ du ɛn di frɔg dɛn bigin fɔ day na di os dɛn, di kɔmpawn dɛn, ɛn na di opin ples dɛn. 14 Dɛn bin de payl dɛn bay ip bɔku bɔku wan ɛn di land bigin fɔ smɛl. 15 We Fɛro si se tin dɔn bɛtɛ, i mek strɔngat+ bak ɛn nɔ gri fɔ lisin to dɛn jɔs lɛk aw Jiova bin dɔn tɔk.
16 Na de Jiova tɛl Mozis se: “Tɛl Erɔn se, ‘Strɛch yu stik ɛn nak di dɔst na grɔn, ɛn i go tɔn to natflay* dɛn ɔlsay na Ijipt.’” 17 Dɔn dɛn du am. Erɔn strɛch di stik we bin de nain an ɛn nak di dɔst na grɔn, ɛn di natflay* dɛn kam pan mɔtalman ɛn animal. Ɔl di dɔst na grɔn tɔn to natflay* dɛn ɔlsay na Ijipt.+ 18 Di prist dɛn we de pafɔm majik tray fɔ du di sem tin. Dɛn tray fɔ mek natflay* dɛn kam wit dɛn sikrit majik,+ bɔt dɛn nɔ bin ebul. Dɔn di natflay* dɛn kam pan mɔtalman ɛn animal. 19 So di prist dɛn we de pafɔm majik tɛl Fɛro se: “Gɔd in finga de de!”+ Bɔt Fɛro kɔntinyu fɔ mek strɔngat, ɛn i nɔ lisin to dɛn jɔs lɛk aw Jiova bin dɔn tɔk.
20 Dɔn Jiova tɛl Mozis se: “Grap ali mɔnin ɛn tinap bifo Fɛro. Luk! I de go na di watasay! Yu fɔ tɛl am se, ‘Dis na wetin Jiova se: “Alaw mi pipul dɛn fɔ go so dat dɛn go wɔship mi. 21 Bɔt if yu nɔ alaw mi pipul dɛn fɔ go, a go sɛn gadflay dɛn pan yu, yu savant dɛn, yu pipul dɛn, ɛn na yu os dɛn; gadflay* dɛn go ful-ɔp di os dɛn na Ijipt, ɛn dɛn go de ɔlsay na di grɔn we dɛn* tinap. 22 Da de de, a go mɔs sɛpret Goshɛn usay mi pipul dɛn de. No gadflay nɔ go de de+ ɛn dis go mek yu no se mi, Jiova, de na di land.+ 23 Ɛn a go mek difrɛns de bitwin mi pipul dɛn ɛn yu pipul dɛn. Tumara, dis sayn go apin.”’”
24 Ɛn na dat Jiova du. I mek bɔku bɔku gadflay dɛn bigin fɔ kam na Fɛro in os, nain savant dɛn os, ɛn ɔlsay na Ijipt.+ Di gadflay dɛn pwɛl ɔltin na di land.+ 25 Faynali, Fɛro kɔl Mozis ɛn Erɔn ɛn tɛl dɛn se: “Una go. Una go mek sakrifays to una Gɔd na di land.” 26 Bɔt Mozis tɛl am se: “I nɔ go fayn fɔ du dat bikɔs wetin wi go sakrifays to Jiova wi Gɔd na tin we di Ijipshian dɛn rili et.+ If wi go sakrifays wetin di Ijipshian dɛn rili et rayt bifo dɛn yay, yu nɔ tink se dɛn go ston wi? 27 Wi de go tri dez patrol na di wildanɛs* ɛn na de wi go sakrifays to Jiova wi Gɔd jɔs lɛk aw i dɔn tɔk.”+
28 Na de Fɛro tɔk se: “A go alaw una fɔ go mek sakrifays to Jiova una Gɔd na di wildanɛs.* Bɔt una nɔ fɔ go fa. Beg fɔ mi.”+ 29 Dɔn Mozis tɔk se: “A de go, ɛn a go beg Jiova fɔ yu. Dɔn tumara, di gadflay dɛn go kɔmɔt usay yu, yu savant dɛn, ɛn yu pipul dɛn de. Bɔt yu, Fɛro, fɔ stɔp fɔ de jok* wit wi bay we yu nɔ de alaw di pipul dɛn fɔ go mek sakrifays to Jiova.”+ 30 Dɔn Mozis kɔmɔt to Fɛro ɛn go beg Jiova.+ 31 So Jiova du wetin Mozis tɛl am ɛn di gadflay dɛn kɔmɔt pan Fɛro, in savant dɛn, ɛn in pipul dɛn. Wan sɛf nɔ bin lɛf. 32 Bɔt Fɛro mek strɔngat bak, ɛn i nɔ alaw di pipul dɛn fɔ go.