Ɛksodɔs

23 “Yu nɔ fɔ skata nyuz we nɔto tru.+ Nɔ sɔpɔt wikɛd pɔsin bay we yu bi witnɛs we want fɔ du bad to ɔda pɔsin.+ 2 Yu nɔ fɔ fala pipul dɛn fɔ du bad, ɛn yu fɔ du tin fia wan bay we yu nɔ de gi witnɛs jɔs fɔ pliz pipul dɛn. 3 Yu nɔ fɔ tek wan pɔsin bɛtɛ pas di ɔda pɔsin we po pɔsin gɛt kes.+

4 “If yu mit-ɔp yu ɛnimi in kaw ɔ in dɔnki de go di rɔng we, yu fɔ kɛr am go bak to am.+ 5 If yu si pɔsin we et yu in dɔnki fɔdɔm ɛn in lod de pantap am, yu nɔ fɔ mek lɛk se yu nɔ si am ɛn lɛf am de. Yu fɔ ɛp am fɔ pul di animal ɔnda di lod.+

6 “Yu nɔ fɔ jɔj di po wan we de wit yu di rɔng we we i gɛt kes.+

7 “Yu nɔ fɔ gɛt natin fɔ du wit lay lay tɔk,* ɛn nɔ kil pɔsin we inosɛnt ɛn di wan we de du wetin rayt, bikɔs a nɔ go tɔk se di wan we wikɛd de du wetin rayt.*+

8 “Yu nɔ fɔ tek brayb, bikɔs brayb de mek di wan dɛn we de si fa blayn, ɛn i de mek di wan dɛn we de du wetin rayt tɔk di rɔng tin.+

9 “Yu nɔ fɔ sɔprɛs fɔrina we de wit yu. Una no aw i tan lɛk fɔ bi fɔrina,* bikɔs una na bin fɔrina dɛn na Ijipt.+

10 “Yu fɔ plant sid na yu land ɛn gɛda wetin i de bia fɔ siks ia.+ 11 Bɔt di ia we mek sɛvin, yu nɔ fɔ plant natin na di land, yu fɔ alaw am fɔ rɛst. Da tɛm de, mi pipul dɛn we po go gɛt sɔntin fɔ it ɛn di wayl animal dɛn go it wetin dɛn lɛf biɛn. Na dis yu fɔ du to yu vayn gadin dɛn ɛn yu ɔliv gadin dɛn.

12 “Yu fɔ wok fɔ siks dez, bɔt di de we mek sɛvin yu nɔ fɔ wok, so dat yu kaw ɛn yu dɔnki go rɛst ɛn yu savant gal in bɔypikin ɛn di fɔrina we de wit yu, dɛnsɛf go rɛst ɛn gɛt trɛnk bak.+

13 “Yu fɔ tek tɛm du ɔl wetin a dɔn tɛl yu,+ ɛn yu nɔ fɔ kɔl ɔda gɔd dɛn nem dɛn; dɛn nɔ fɔ yɛri am na yu mɔt.+

14 “Yu fɔ sɛlibret fɛstival to mi tri tɛm insay di ia.+ 15 Yu fɔ sɛlibret di Bred we Nɔ Gɛt Yist Fɛstival.+ Yu fɔ it bred we nɔ gɛt yist fɔ sɛvin dez, jɔs lɛk aw a dɔn kɔmand yu, we di rayt tɛm rich insay di mɔnt we na Ebib,*+ bikɔs na da tɛm de yu bin kɔmɔt na Ijipt. Nɔbɔdi nɔ fɔ kam bifo mi wit ɛmti-an.+ 16 Dɔn bak, yu fɔ sɛlibret di Avɛst Fɛstival* fɔ di fɔs frut dɛn we dɔn rɛp we yu avɛst na yu fam; dat na, wetin yu plant na yu fam.+ Dɔn bak, yu fɔ sɛlibret di Fɛstival fɔ Gɛda Wetin Yu Plant* we di ia dɔn we yu gɛda frɔm yu fam, di tin dɛn we yu wok tranga wan fɔ.+ 17 Ɔl di man dɛn fɔ go bifo Jiova we na di tru tru Masta tri tɛm insay di ia.+

18 “Yu nɔ fɔ sakrifays animal blɔd to mi wit ɛnitin we gɛt yist. Ɛn di animal fat dɛn we una de sakrifays na mi fɛstival dɛn nɔ fɔ slip te na mɔnin.

19 “Yu fɔ briŋ kam na Jiova we na yu Gɔd in os di bɛst fɔs frut dɛn we dɔn rɛp na yu fam.+

“Yu nɔ fɔ bwɛl yɔŋ got insay in mama in milk.+

20 “A de sɛn wan enjɛl fɔ go bifo yu+ fɔ gayd yu we yu de go ɛn fɔ briŋ yu na di ples we a dɔn pripia.+ 21 Pe atɛnshɔn to am ɛn obe am. Nɔ mek trangayes pan am bikɔs i nɔ go fɔgiv yu sin+ dɛn, bikɔs mi nem de pan am. 22 Bɔt if yu obe ɔl wetin a de tɛl yu ɛn du ɔl wetin a se, a go trit yu ɛnimi dɛn bad, ɛn a go sɔprɛs di wan dɛn we de sɔprɛs yu. 23 Mi enjɛl go go bifo yu, ɛn i go briŋ yu kam to di Amɔrayt dɛn, di Itayt dɛn, di Pɛrizayt dɛn, di Kenanayt dɛn, di Ayvayt dɛn, ɛn di Jɛbyusayt dɛn, dɔn a go dɔnawe wit dɛn.+ 24 Yu nɔ fɔ butu to dɛn gɔd dɛn ɔ gri fɔ wɔship dɛn, ɛn yu nɔ fɔ falamakata di tin dɛn we dɛn de du.+ Bifo dat, yu fɔ brok brok dɛn ɛn smash dɛn oli pila+ dɛn. 25 Una fɔ wɔship mi, Jiova, una Gɔd,+ ɛn a go blɛs di tin we una de it ɛn una wata we una de drink.+ A go mek siknɛs nɔ de igen na una land.+ 26 Di uman dɛn na yu land dɛn bɛlɛ nɔ go west ɔ dɛn nɔ go bi uman dɛn we nɔ bɔn,+ ɛn a go mek yu gɛt lɔng layf.

27 “A go mek dɛn fred mi ivin bifo yu rich de,+ ɛn a go mek ɔl di pipul dɛn we yu mit-ɔp kɔnfyuz, dɔn a go mek ɔl yu ɛnimi dɛn rɔnawe pan yu.*+ 28 Bifo yu rich, a go mek yu ɛnimi dɛn at pwɛl*+ ɛn a go drɛb di Ayvayt dɛn, di Kenanayt dɛn, ɛn di Itayt dɛn kɔmɔt bifo yu.+ 29 A nɔ go drɛb dɛn kɔmɔt bifo yu insay wan ia, so dat di land nɔ go ɛmti ɛn wayl animal dɛn we de na bush nɔ go bɔku arawnd yu.+ 30 A go drɛb dɛn kɔmɔt bifo yu smɔl smɔl te yu bɔn bɔku pikin dɛn, dɔn una tek di land.+

31 “A go mek bawndri fɔ yu frɔm di Rɛd Si te to di Filistin dɛn si ɛn frɔm di wildanɛs* te to di Riva,*+ bikɔs a go an ova di pipul dɛn we de na di land to yu ɛn yu go drɛb dɛn kɔmɔt bifo yu.+ 32 Yu nɔ fɔ mek agrimɛnt wit dɛn ɔ dɛn gɔd+ dɛn. 33 Dɛn nɔ fɔ de na yu land so dat dɛn nɔ go mek yu sin agens mi. If yu wɔship dɛn gɔd dɛn, i go mɔs bi trap fɔ yu.”+