Ɛksodɔs

1 Dɛn wan ya na Izrɛl, dat na, Jekɔp in bɔypikin dɛn we bin go wit am na Ijipt. Dɛn ɔl bin go togɛda wit dɛn famili dɛn. Dɛn nem dɛn na:+ 2 Rubɛn, Simiɔn, Livay, ɛn Juda;+ 3 Isaka, Zɛbyulɔn, ɛn Bɛnjamin; 4 Dan ɛn Naftalay; Gad ɛn Asha.+ 5 Ɛn ɔl di wan* dɛn we dɛn bɔn na Jekɔp in famili na bin 70 pipul* dɛn, bɔt Josɛf bin ɔlrɛdi de na Ijipt.+ 6 As tɛm de go, Josɛf, ɔl in brɔda dɛn, ɛn ɔl da jɛnɛreshɔn de bin day.+ 7 Dɔn di Izrɛlayt* dɛn bigin fɔ bɔn, ɛn dɛn bigin fɔ bɔku pasmak. Dɛn kɔntinyu fɔ pawaful ɛn bɔku kwik kwik wan, so dat bin mek dɛn de ɔlsay na di land.+

8 As tɛm de go, Ijipt bin gɛt wan nyu kiŋ we nɔ bin sabi Josɛf. 9 So i tɛl in pipul dɛn se: “Una luk! Di Izrɛlayt dɛn bɔku ɛn pawaful pas wi.+ 10 Lɛ wi tek tɛm dil wit dɛn. If nɔto dat, dɛn go kɔntinyu fɔ bɔku ɛn if wɔ kam, dɛn go jɔyn wi ɛnimi dɛn ɛn fɛt agens wi, dɔn dɛn go kɔmɔt na di kɔntri.”

11 So dɛn pik lida dɛn we de fos pipul dɛn fɔ wok fɔ sɔprɛs dɛn wit tranga wok,+ ɛn dɛn bil siti dɛn fɔ Fɛro fɔ kip tin dɛn. Di siti dɛn nem dɛn na Paytɔm ɛn Ramesis.+ 12 Bɔt di mɔ we dɛn de sɔprɛs dɛn, na di mɔ dɛn de bɔku ɛn na di mɔ dɛn de skata ɔlsay, so di Ijipshian dɛn fred bikɔs ɔf di Izrɛlayt+ dɛn. 13 Ɛn di Ijipshian dɛn fos di Izrɛlayt dɛn fɔ wok tranga wan as slev.+ 14 Dɛn bin mek layf tranga fɔ dɛn bay we dɛn bin de mek dɛn wok tranga wan. Dɛn bin de wok wit kle mɔta ɛn blɔk dɛn, ɛn dɛn bin de du ɔlkayn slev wok na di land. Fɔ tru, dɛn bin de wikɛd dɛn ɛn fos dɛn fɔ du ɔlkayn slev wok.+

15 Leta di kiŋ na Ijipt tɔk to di Ibru midwayf dɛn we nem Shifra ɛn Pua, 16 ɛn i tɛl dɛn se: “We una de ɛp di Ibru uman dɛn fɔ bɔn,+ una fɔ pe atɛnshɔn we dɛn de bɔn; if na bɔypikin dɛn bɔn, una fɔ kil am, bɔt if na galpikin dɛn bɔn una fɔ mek lɛ i liv.” 17 Bɔt di midwayf dɛn bin de fred di tru Gɔd. Dɛn nɔ bin de du wetin di kiŋ na Ijipt tɛl dɛn fɔ du. Bifo dat, dɛn bin kɔntinyu fɔ alaw di bɔypikin dɛn fɔ liv.+ 18 As tɛm de go, di kiŋ na Ijipt kɔl di midwayf dɛn ɛn aks dɛn se: “Wetin mek una de alaw di bɔypikin dɛn fɔ liv?” 19 Di midwayf dɛn ansa Fɛro se: “Di Ibru uman dɛn nɔ tan lɛk di Ijipshian uman dɛn. Dɛn strɔng ɛn dɛn kin dɔn ɔlrɛdi bɔn bifo di midwayf de kam to dɛn.”

20 So Gɔd trit di midwayf dɛn fayn, ɛn di pipul dɛn kɔntinyu fɔ bɔku ɛn rili pawaful. 21 Ɛn bikɔs di midwayf dɛn bin fred di tru Gɔd, leta i bin gi dɛn dɛn yon famili dɛn. 22 Faynali, Fɛro kɔmand ɔl in pipul dɛn se: “Una fɔ trowe ɔl di Ibru bɔypikin dɛn we dɛn jɔs bɔn na di Nayl Riva bɔt una fɔ alaw ɔl di galpikin dɛn fɔ liv.”+