1 Kronikul
5 Rubɛn+ we na Izrɛl in fɔs pikin nain yon bɔypikin dɛn dis. Nain na bin di fɔs bɔypikin, bɔt bikɔs i ledɔm wit in papa in ɔda wɛf,*+ i lɔs in rayt as fɔs bɔypikin. So we dɛn kin rayt dɛn ɔl nem bay aw dɛn bɔn nɔto in nem kin de fɔs, na Josɛf in pikin dɛn+ bin gɛt da rayt de naw. Josɛf na Izrɛl in ɔda pikin. 2 Pan ɔl we Juda+ bin pas in brɔda dɛn fawe ɛn na frɔm am di wan we bi lida kɔmɔt,+ na Josɛf bin gɛt di rayt as fɔs pikin. 3 Izrɛl in fɔs bɔypikin we na Rubɛn in bɔypikin dɛn na Enɔk, Palu, Ɛzrɔn, ɛn Kamay.+ 4 Joɛl in bɔypikin dɛn na bin Shimaya, Shimaya bɔn Gɔg, Gɔg bɔn Shimiay, 5 Shimiay bɔn Mayka, Mayka bɔn Riea, Riea bɔn Beal, 6 ɛn Beal bɔn Biɛra, we Kiŋ Tilgat-pilniza+ na Asiria bin kapchɔ ɛn kɛr go ɔdasay. In na bin bigman pan di Rubɛnayt dɛn. 7 In brɔda dɛn nem dɛn akɔdin to aw dɛn bɔn dɛn na dɛn famili ɛn dɛn pikin dɛn na: Jeaɛl di edman, Zakaraya, 8 ɛn Bila we na Ezaz in bɔypikin. Ezaz na Shima in bɔypikin, Shima na Joɛl in bɔypikin, Bila in famili bin de na Aroa+ te go na Nibo ɛn Beal-miɔn.+ 9 Dɛn bin de na di ist te go usay di wildanɛs* bigin na di Yufretis Riva+ bikɔs dɛn animal dɛn bin dɔn bɔku na Giliad.+ 10 Insay di tɛm we Sɔl de rul, dɛn fɛt di Agrayt dɛn ɛn win dɛn. So dɛn de na di Agrayt dɛn tɛnt dɛn ɔlsay na di ist pat na Giliad.
11 Gad in pikin dɛn bin de nia dɛn na Beshan te go Salɛka.+ 12 Joɛl na bin di edman, Shefam bin de sɛkɔn to am, ɛn Jenay ɛn Shefat dɛnsɛf na bin edman dɛn na Beshan. 13 Ɛn dɛn brɔda dɛn na dɛn papa say na bin Maykɛl, Mɛshulam, Shiba, Joray, Jekan, Zaya, ɛn Iba, na dɛn sɛvin. 14 Dɛn wan ya na Abiel in bɔypikin dɛn. Abiel na Uray in bɔypikin, Uray na Jeroa in bɔypikin, Jeroa na Giliad in bɔypikin, Giliad na Maykɛl in bɔypikin, Maykɛl na Jeshishay in bɔypikin, Jeshishay na Jado in bɔypikin, Jado na Bɔz in bɔypikin. 15 Di edman na dɛn papa say na Eay. Eay na Abdiɛl in bɔypikin, Abdiɛl na Gunay in bɔypikin. 16 Dɛn bin de na Giliad,+ Beshan+ ɛn di tɔŋ dɛn we de nia de ɛn ɔl di say dɛn usay gras dɛn de fɔ animal dɛn na Sharɔn te to usay di gras dɛn stɔp. 17 Dɛn rayt dɛn ɔl nem dɛn lɛk aw dɛn bɔn dɛn di tɛm we Kiŋ Jotam+ bin de rul na Juda ɛn di tɛm we Kiŋ Jɛroboam*+ bin de rul na Izrɛl.
18 Di Rubɛnayt dɛn, di Gadayt dɛn, ɛn af pan Manasɛ in trayb bin gɛt 44,760 pawaful fɛtman dɛn na dɛn ami we bin gɛt shild, sɔd, ɛn bo,* ɛn dɛn bin tren fɔ fɛt. 19 Dɛn fɛt di Agrayt+ dɛn, Jitɔ in pikin dɛn, Nefish+ in pikin dɛn, ɛn Nodab in pikin dɛn. 20 Ɛn Gɔd bin ɛp dɛn we dɛn bin de fɛt. So dɛn win di Agrayt dɛn ɛn ɔl di wan dɛn we bin de wit dɛn bikɔs dɛn pre to Gɔd fɔ ɛp dɛn we dɛn de fɛt, ɛn i ansa dɛn prea bikɔs dɛn bin abop pan am.+ 21 Dɛn kapchɔ 100,000 pipul dɛn ɛn dɛn animal dɛn, 50,000 kamɛl dɛn, 250,000 ship dɛn, ɛn 2,000 dɔnki dɛn. 22 Bɔku pan dɛn ɛnimi dɛn bin day bikɔs na di tru Gɔd fɛt di wɔ.+ Ɛn dɛn bin de na di Agrayt dɛn ples te di tɛm we dɛn kapchɔ dɛn ɛn kɛr dɛn go ɔdasay.+
23 Di pipul dɛn na af pan Manasɛ in trayb+ bin de na di land frɔm Beshan te to Beal-amɔn ɛn Sini ɛn Mawnt Amɔn.+ Dɛn bin bɔku pasmak. 24 Na dɛn wan dɛn ya bin de bifo na dɛn papa say: Ifa, Ishay, Iliɛl, Azriɛl, Jɛrimaya, Ɔdavaya, ɛn Jadiɛl; dɛn na bin pawaful fɛtman dɛn we bin femɔs, ɛn na dɛn bin de bifo na dɛn papa say. 25 Bɔt dɛn nɔ bin fetful to dɛn gret gret granpa dɛn Gɔd, ɛn dɛn bin de wɔship di gɔd dɛn we di pipul dɛn na di land bin de wɔship+ we Gɔd bin dɔn dɔnawe wit. 26 So Izrɛl in Gɔd mek Kiŋ Pul na Asiria+ (dat na, Kiŋ Tilgat-pilniza+ na Asiria) kam kapchɔ di Rubɛnayt dɛn, di Gadayt dɛn, ɛn af pan Manasɛ in trayb ɛn kɛr dɛn go na Ela, Ebɔ, Era, ɛn Riva Gozan+ usay dɛn de te to dis de.