1 Kiŋ
9 As Sɔlɔmɔn dɔn fɔ bil Jiova in os, in yon os,+ ɛn ɔltin we i want fɔ mek,+ 2 Jiova apia to am di sɛkɔn tɛm, jɔs lɛk aw i bin apia to am na Gibyɔn.+ 3 Jiova tɛl am se: “A dɔn yɛri yu prea ɛn di beg we yu bin de beg mi we yu de bifo mi. A dɔn mek dis os we yu bil oli bay we a go mek mi nem de de sote go,+ mi yay ɛn mi at go de de ɔltɛm.+ 4 Ɛn if yu du wetin a want, jɔs lɛk aw yu papa Devid du wetin a want,+ wit ɔl yu at+ ɛn yu du tin tret,+ bay we yu du ɔl wetin a dɔn tɛl yu,+ ɛn yu obe mi lɔ dɛn ɛn di tin dɛn we a dɔn disayd,+ 5 a go mek yu kiŋdɔm tinap tranga wan na Izrɛl sote go, jɔs lɛk aw a bin prɔmis yu papa Devid we a bin tɛl am se, ‘Pɔsin go ɔlwez de frɔm yu famili we go sidɔm na di tron na Izrɛl.’+ 6 Bɔt if una ɛn una bɔypikin dɛn lɛf fɔ du wetin a dɔn tɛl una ɛn una lɛf fɔ kip mi kɔmandmɛnt dɛn ɛn mi lɔ dɛn we a dɔn gi una ɛn go sav ɔda gɔd dɛn ɛn butu to dɛn,+ 7 a go drɛb di Izrɛlayt dɛn kɔmɔt na di land we a bin dɔn gi dɛn,+ ɛn di os we a dɔn mek oli fɔ ɔnɔ mi nem a go pul am kɔmɔt bifo mi,+ ɛn dɛn go bi sɔntin we ɔl di pipul dɛn go de laf ɛn provok.+ 8 Ɛn dis os go tan lɛk ples we pwɛl pwɛl tin dɛn payl.+ Ɛnibɔdi we de pas go wach ɛn wɔnda, ɛn i go wisul ɛn aks se, ‘Wetin mek Jiova du dis to dis land ɛn dis os?’+ 9 Dɛn go se, ‘Na bikɔs dɛn lɛf Jiova dɛn Gɔd, we pul dɛn gret gret granpa dɛn na Ijipt, dɛn fala ɔda gɔd dɛn, butu to dɛn, ɛn sav dɛn. Na dat mek Jiova briŋ ɔl dis prɔblɛm pan dɛn.’”+
10 Afta 20 ia, Sɔlɔmɔn dɔn fɔ bil di tu os dɛn, dat na, Jiova in os ɛn in yon os.*+ 11 Ayram+ we na di kiŋ na Taya bin dɔn de sɔplay Sɔlɔmɔn sida ɛn junipa bod wit bɔku gold akɔdin to wetin Sɔlɔmɔn want,+ so i gi Ayram 20 siti dɛn na Galili. 12 So Ayram kɔmɔt na Taya fɔ go si di siti dɛn we Sɔlɔmɔn bin dɔn gi am, bɔt i nɔ bin lɛk di siti dɛn.* 13 So Ayram aks am se: “Uskayn siti dɛn yu gi mi so, mi brɔda?” So dɛn bigin kɔl di ples Kebul Land* te to dis de. 14 Dyurin dis tɛm, Ayram sɛn 120 gold talɛnt*+ to di kiŋ.
15 Kiŋ Sɔlɔmɔn fos sɔm pipul dɛn fɔ wok+ fɔ bil Jiova in os,+ in yon os,* di Il,*+ di wɔl na Jerusɛlɛm, Ezɔ,+ Mɛgido,+ ɛn Giza.+ 16 (Fɛro di kiŋ na Ijipt kam kapchɔ Giza ɛn bɔn am wit faya, dɔn i kil di Kenanayt+ dɛn we de na di siti. So i gi di siti as gift* to in galpikin,+ we na Sɔlɔmɔn in wɛf.) 17 Sɔlɔmɔn mek dɛn siti dɛn ya strɔng, dat na, Giza, Dɔŋ Bɛt-orɔn,+ 18 Bealat,+ Tema na di wildanɛs,* we de na di land, 19 wit ɔl Sɔlɔmɔn in siti dɛn usay i de kip tin dɛn, di siti dɛn usay di chariɔt dɛn de,+ di siti dɛn usay di man dɛn we de rayd ɔs de, ɛn ɛnitin we Sɔlɔmɔn want fɔ bil na Jerusɛlɛm, na Libanɔn, ɛn na ɔl di say dɛn we i de rul. 20 As fɔ ɔl di pipul dɛn we bin lɛf pan di Amɔrayt dɛn, di Itayt dɛn, di Pɛrizayt dɛn, di Ayvayt dɛn, ɛn di Jɛbyusayt+ dɛn, we nɔ bin de pat pan di pipul dɛn na Izrɛl,+ 21 dɛn pikin dɛn we lɛf na di land, dat na, di wan dɛn we di Izrɛlayt dɛn nɔ bin ebul fɔ dɔnawe wit, Sɔlɔmɔn bin fos dɛn fɔ wok as slev te to dis de.+ 22 Bɔt Sɔlɔmɔn nɔ mek ɛniwan pan di Izrɛlayt dɛn slev,+ bifo dat, dɛn na bin in fɛtman dɛn, in savant dɛn, in prins dɛn, in ɔfisa dɛn, ɛn di wan dɛn we de oba di wan dɛn we de rayd in chariɔt dɛn ɛn in ɔs dɛn. 23 Na 550 lida dɛn bin de oba di dɛpiti dɛn we bin de bifo pan Sɔlɔmɔn in wok, we na di edman dɛn we bin de oba di pipul dɛn we bin de du di wok.+
24 Bɔt Fɛro in galpikin+ kɔmɔt na Devid in Siti+ ɛn kam nain os we Sɔlɔmɔn dɔn bil fɔ am; dɔn Sɔlɔmɔn bil di Il.*+
25 Tri tɛm ɛni ia,+ Sɔlɔmɔn bin de mek bɔn sakrifays dɛn ɛn pis sakrifays dɛn na di ɔlta we i dɔn bil fɔ Jiova;+ i bin de mek smok go ɔp frɔm di ɔlta we bin de bifo Jiova; so i dɔn fɔ bil di os.+
26 Kiŋ Sɔlɔmɔn mek bak bɔku bɔku ship dɛn na Iziɔn-giba,+ we de bay Ilɔt, na di bich na di Rɛd Si na Idɔm.+ 27 Ayram sɛn in yon savant dɛn we bin gɛt ɛkspiriɛns na si wit di bɔku bɔku ship+ dɛn; i sɛn dɛn fɔ wok wit Sɔlɔmɔn in savant dɛn. 28 Dɛn go na Ofia+ ɛn tek 420 gold talɛnt ɛn kam wit am to Kiŋ Sɔlɔmɔn.