1 Kiŋ
3 Sɔlɔmɔn mek padi biznɛs wit Fɛro we na di kiŋ na Ijipt bay we i mared sɔmbɔdi nain famili. I mared* Fɛro in galpikin+ ɛn briŋ am kam na Devid in Siti+ te i dɔn fɔ bil in yon os,+ Jiova in os,+ ɛn di wɔl rawnd Jerusɛlɛm.+ 2 Bɔt di pipul dɛn bin stil de sakrifays na di ay ples+ dɛn, bikɔs dɛn nɔ bin dɔn bil os yet fɔ ɔnɔ Jiova in nem.+ 3 Sɔlɔmɔn kɔntinyu fɔ lɛk Jiova bay we i bin de fala di lɔ dɛn we in papa Devid gi am, bɔt jɔs dat i bin de mek sakrifays dɛn ɛn mek smok kɔmɔt pan in ɔfrin dɛn na di ay ples dɛn.+
4 Di kiŋ go na Gibyɔn fɔ mek sakrifays de, bikɔs dat na bin di ay ples we impɔtant pas ɔl.+ Sɔlɔmɔn mek 1,000 bɔn sakrifays na da ɔlta de.+ 5 We Sɔlɔmɔn bin de na Gibyɔn, Jiova apia to am na drim na nɛt, ɛn i tɛl am se: “Tɛl mi wetin yu want lɛ a gi yu.”+ 6 Na de Sɔlɔmɔn tɔk se: “Yu dɔn rili sho lɔv we nɔ de chenj to yu savant we na Devid mi papa we i bin de sav yu fetful wan, we i bin de du wetin rayt, ɛn we i bin de waka tret bifo yu. Yu dɔn kɔntinyu fɔ rili sho am dis lɔv we nɔ de chenj te to dis de bay we yu gi am bɔypikin fɔ sidɔm nain tron.+ 7 Ɛn Jiova mi Gɔd, yu dɔn mek mi we na yu savant bi kiŋ ɛn tek mi papa Devid in ples, pan ɔl we a yɔŋ* ɛn a nɔ gɛt ɛkspiriɛns.*+ 8 Yu savant de wit yu pipul dɛn we yu dɔn pik,+ ɛn yu pipul dɛn so bɔku dat pɔsin nɔ go ebul fɔ kɔnt dɛn. 9 So ɛp yu savant fɔ obe wit ɔl in at we i de jɔj yu pipul dɛn+ ɛn fɔ no wetin gud ɛn bad,+ bikɔs udat ebul fɔ jɔj dɛn yu bɔku bɔku pipul dɛn ya?”*
10 Jiova bin gladi we Sɔlɔmɔn aks fɔ dis.+ 11 Gɔd tɛl am se: “Bikɔs yu aks fɔ dis, yu nɔ aks fɔ mek a gi yu lɔng layf, fɔ jɛntri ɔ fɔ mek yu ɛnimi dɛn day, bɔt yu aks mi fɔ ɛp yu fɔ ɔndastand aw fɔ jɔj kes+ dɛn, 12 a go du wetin yu aks mi fɔ.+ A go gi yu sɛns ɛn mek yu ebul fɔ ɔndastand,+ so dat jɔs lɛk aw trade nɔbɔdi nɔ bin de we tan lɛk yu, na so nɔbɔdi nɔ go de afta yu we go tan lɛk yu.+ 13 Dɔn a go gi yu wetin yu nɔ aks fɔ,+ a go gi yu jɛntri ɛn glori,+ so dat no ɔda kiŋ nɔ go tan lɛk yu we yu de alayv.+ 14 Pantap dat, if yu du wetin a want bay we yu de obe mi lɔ dɛn ɛn mi kɔmandmɛnt dɛn, jɔs lɛk aw yu papa Devid bin du,+ a go gi yu lɔng layf.”+
15 We Sɔlɔmɔn wek, i kam no se na drim i bin de drim. Dɔn i go na Jerusɛlɛm, ɛn i tinap bifo Jiova in agrimɛnt bɔks* ɛn mek bɔn sakrifays dɛn ɛn pis ɔfrin+ dɛn, ɛn i mek pati fɔ ɔl in savant dɛn.
16 Na de tu raregal dɛn kam to di kiŋ ɛn tinap bifo am. 17 Di fɔs uman tɔk se: “Duya, mi masta, mi ɛn dis uman de na di sem os, ɛn a bɔn mi pikin we i bin de na di os. 18 Di tɔd de afta a bɔn, dis uman insɛf bɔn. Na wi tu nɔmɔ bin de togɛda; nɔbɔdi nɔ bin de wit wi na di os. 19 Na nɛt dis uman in bɔypikin day, bikɔs i ledɔm pan am. 20 So i grap midulnɛt ɛn tek mi bɔypikin nia mi, we na yu savant gal, we a de slip, ɛn i le am nain an.* Dɔn i tek in yon bɔypikin we dɔn day ɛn le am na mi yon an. 21 We a grap na mɔnin fɔ gi mi bɔypikin bɔbi, a si se i dɔn day. So we doklin a tek tɛm luk am gud ɛn a si se nɔto mi pikin we a bɔn.” 22 Bɔt di ɔda uman se: “Nɔ, na mi pikin de alayv, ɛn na yu gɛt di pikin we dɔn day!” Bɔt di fɔs uman bin de tɔk se: “Nɔ, na yu gɛt di pikin we dɔn day, ɛn na mi gɛt di pikin we de alayv.” Na so dɛn bin de agyu bifo di kiŋ.
23 Faynali, di kiŋ tɔk se: “Dis wan de se, ‘Na mi gɛt di pikin we de alayv ɛn na yu gɛt di pikin we dɔn day!’ ɛn da wan de de tɔk se, ‘Nɔ, na yu gɛt di pikin we dɔn day, ɛn na mi gɛt di pikin we de alayv!’” 24 So di kiŋ se: “Una kam wit sɔd fɔ mi.” Na de dɛn kam wit sɔd fɔ di kiŋ. 25 Di kiŋ tɔk se: “Kɔt di pikin we de alayv midul, ɛn gi af to di wan uman ɛn di ɔda af to di ɔda uman.” 26 Wantɛm wantɛm, na de di mama we gɛt di pikin we de alayv beg di kiŋ, bikɔs i rili sɔri fɔ in bɔypikin. I tɔk se: “Duya, mi masta! Gi am di pikin we de alayv! Nɔ kil am!” Bɔt di ɔda uman bin de tɔk se: “I nɔ go bi mi yon ɛn i nɔ go bi yu yon! Lɛ dɛn kɔt am midul!” 27 Na de di kiŋ se: “Gi di pikin we de alayv to di fɔs uman! Bikɔs nain na di pikin in mama, nɔ kil am.”
28 So we ɔl di pipul dɛn na Izrɛl yɛri bɔt aw di kiŋ jɔj di kes, dɛn kɔle* di kiŋ,+ bikɔs dɛn si se Gɔd gi am sɛns fɔ jɔj fia wan.+