2 Samiɛl
7 We di kiŋ dɔn sɛtul nain yon os*+ ɛn Jiova dɔn mek i gɛt kolat bikɔs ɔl in ɛnimi dɛn we bin de arawnd am nɔ bin de ambɔg am igen, 2 di kiŋ tɛl Netan+ we na prɔfɛt se: “A de na os we a bil wit sida,+ bɔt di tru Gɔd in Agrimɛnt Bɔks* de na tɛnt.”+ 3 Netan tɛl di kiŋ se: “Go du ɛnitin we de na yu at, bikɔs Jiova de wit yu.”+
4 Da sem nɛt de, Jiova tɛl Netan se: 5 “Go tɛl mi savant Devid se, ‘Na dis Jiova se: “Yu tink se yu fɔ bil os fɔ mi fɔ lɛ a de insay?+ 6 Bikɔs a nɔ wande de na os frɔm di de we a pul di Izrɛlayt dɛn kɔmɔt na Ijipt te to dis de,+ bɔt a dɔn de muv* na difrɛn ples dɛn insay tɛnt ɛn tabanakul.+ 7 Ɔl di tɛm we a bin de go wit ɔl di Izrɛlayt dɛn, a dɔn ɛva aks ɛniwan pan di lida dɛn fɔ di trayb dɛn na Izrɛl we a dɔn pik fɔ shɛpad mi pipul dɛn se, ‘Wetin mek una nɔ bil os wit sida fɔ mi?’”’ 8 So tɛl mi savant Devid se, ‘Na dis Jiova we gɛt bɔku bɔku sojaman dɛn se: “A pul yu kɔmɔt usay gras de fɔ animal dɛn, a mek yu lɛf fɔ mɛn ship+ dɛn so dat yu go bi lida fɔ mi pipul dɛn we na di Izrɛlayt+ dɛn. 9 A go de wit yu ɛnisay yu go,+ ɛn a go kil ɔl yu ɛnimi dɛn bifo yu;+ a go mek yu nem gret+ jɔs lɛk di gret man dɛn nem dɛn na di wɔl. 10 A go fɛn ples fɔ mi pipul dɛn we na di Izrɛlayt dɛn ɛn mek dɛn sɛtul de. Dɛn go de de ɛn natin nɔ go ambɔg dɛn igen; ɛn wikɛd man dɛn nɔ go sɔprɛs dɛn igen lɛk aw dɛn bin de du trade,+ 11 frɔm di de we a put jɔj+ dɛn oba mi pipul dɛn we na di Izrɛlayt dɛn. Ɛn a go mek yu gɛt kolat bikɔs ɔl yu ɛnimi+ dɛn nɔ go ambɔg yu igen.
“‘“Dɔn bak, Jiova dɔn tɛl yu se Jiova go mek os* fɔ yu.+ 12 We yu layf dɔn+ ɛn yu day jɔs lɛk yu gret gret granpa dɛn, a go mek yu pikin, yu yon bɔypikin, bi kiŋ, ɛn a go mek in kiŋdɔm tinap tranga wan.+ 13 Nain go bil os we go ɔnɔ mi nem,+ ɛn a go mek in kiŋdɔm tinap tranga wan sote go.+ 14 A go bi in papa, ɛn i go bi mi bɔypikin.+ We i du bad, a go kɔrɛkt am wit di ken we mɔtalman dɛn de yuz, ɛn a go bit am lɛk aw mɔtalman* dɛn kin du.+ 15 A nɔ go lɛf fɔ sho am mi lɔv we nɔ de chenj lɛk aw a lɛf fɔ sho am to Sɔl+ we a pul kɔmɔt bifo yu. 16 Yu famili ɛn yu kiŋdɔm go de sote go; yu tron go tinap tranga wan sote go.”’”+
17 Netan tɛl Devid ɔl dɛn wɔd dɛn ya ɛn ɔl wetin i si na di vishɔn.+
18 Na de Kiŋ Devid kam sidɔm bifo Jiova ɛn tɔk se: “E Jiova, di Masta We De Rul Ɔlman, udat na mi? Ɛn udat na mi famili we yu dɔn du bɔku bɔku tin fɔ mi?+ 19 Lɛk se dat nɔ du, E Jiova, di Masta We De Rul Ɔlman, yu dɔn tɔk bak se yu savant in pikin dɛn go de te tumara bambay; ɛn dis dɔn bi lɔ fɔ ɔl mɔtalman, E Jiova di Masta We De Rul Ɔlman. 20 E Jiova, di Masta We De Rul Ɔlman, wetin igen mi we na yu savant Devid go tɛl yu we yu no mi gud gud wan?+ 21 Yu dɔn du ɔl dɛn wɔndaful tin dɛn ya, ɛn yu dɔn tɛl yu savant+ bɔt dɛn bikɔs ɔf yu wɔd ɛn bikɔs ɔf wetin yu want. 22 E Jiova, di Masta We De Rul Ɔlman, na dat mek yu rili gret.+ Nɔbɔdi nɔ de we tan lɛk yu,+ ɛn no ɔda Gɔd nɔ de pas yu;+ ɔl wetin wi dɔn yɛri wit wi yes sho se dis na tru. 23 Ɛn us ɔda neshɔn de na di wɔl we tan lɛk yu pipul dɛn we na di Izrɛlayt+ dɛn? Gɔd go fri dɛn so dat dɛn go bi in pipul+ dɛn, i mek nem fɔ insɛf+ bay we i du gret ɛn wɔndaful tin dɛn fɔ dɛn.+ Yu drɛb neshɔn dɛn ɛn dɛn gɔd dɛn fɔ yu pipul dɛn we yu sev frɔm Ijipt fɔ yu yon sek. 24 Yu mek yu pipul dɛn we na di Izrɛlayt dɛn bi yu yon pipul dɛn sote go,+ ɛn yu, E Jiova, dɔn bi dɛn Gɔd.+
25 “So naw, E Jiova Gɔd, lɛ yu du wetin yu dɔn prɔmis yu savant ɛn in kiŋdɔm sote go, ɛn lɛ yu du jɔs lɛk aw yu dɔn prɔmis.+ 26 Lɛ dɛn ɔnɔ yu nem sote go,+ so dat pipul dɛn go tɔk se, ‘Jiova we gɛt bɔku bɔku sojaman dɛn nain na Izrɛl in Gɔd,’ ɛn lɛ mi, we na yu savant Devid in kiŋdɔm tinap tranga wan bifo yu.+ 27 Yu, Jiova we gɛt bɔku bɔku sojaman dɛn, we na di Gɔd na Izrɛl dɔn mek yu savant no wetin yu gɛt fɔ du bay we yu tɛl am se, ‘A go mek kiŋdɔm fɔ yu.’+ Na dat mek yu savant gɛt maynd fɔ pre dis prea to yu. 28 E Jiova, di Masta We De Rul Ɔlman, yu na di tru Gɔd ɛn wetin yu kin tɔk na tru.+ Yu dɔn prɔmis yu savant dɛn gud tin dɛn ya. 29 So duya, gladi fɔ blɛs yu savant in kiŋdɔm ɛn lɛ i kɔntinyu fɔ de sote go bifo yu;+ na yu, E Jiova we na di Masta We De Rul Ɔlman, dɔn prɔmis ɛn lɛ yu blɛsin mek yu savant in kiŋdɔm gɛt blɛsin sote go.”+