2 Samiɛl
21 Bad bad angri+ bin de fɔ tri ia di tɛm we Devid bin de rul. So Devid aks Jiova, ɛn Jiova tɛl am se: “Blɔd de na Sɔl ɛn in famili dɛn ed, bikɔs Sɔl kil+ di Gibyɔnayt dɛn.” 2 So di kiŋ kɔl di Gibyɔnayt+ dɛn ɛn tɔk to dɛn. (I kam bi se di Gibyɔnayt dɛn nɔto Izrɛlayt dɛn bɔt na Amɔrayt+ dɛn we bin lɛf, ɛn di Izrɛlayt dɛn bin dɔn swɛ se dɛn nɔ go kil dɛn,+ bɔt Sɔl disayd fɔ kil dɛn bikɔs i bin gɛt zil fɔ ɛp di pipul dɛn na Izrɛl ɛn Juda.) 3 Devid aks di Gibyɔnayt dɛn se: “Wetin a go du fɔ una, ɛn aw a go pul dis sin so dat una go blɛs Jiova in prɔpati?” 4 Di Gibyɔnayt dɛn tɛl am se: “Wetin Sɔl ɛn di wan dɛn we de nain famili du to wi nɔ gɛt natin fɔ du wit silva ɔ gold,+ ɛn wi nɔ go kil ɛni man na Izrɛl fɔ dat.” Na de Devid tɔk se: “Ɛnitin we una se, nain a go du.” 5 Dɛn tɛl di kiŋ se: “Di man we kil wi fambul dɛn ɛn we bin plan fɔ dɔnawe wit wi so dat wi nɔ go de ɛnisay na Izrɛl+— 6 gi wi sɛvin pan in bɔypikin dɛn. Wi go ɛng dɛn dedebɔdi+ dɛn bifo Jiova na Gibia+ usay Sɔl we na di wan we Jiova bin pik+ bin de.” Di kiŋ tɛl dɛn se: “A go an ova dɛn to una.”
7 Bɔt di kiŋ sɔri fɔ Mɛfiboshɛt+ we na Jonɛtan in bɔypikin ɛn we na Sɔl in granpikin bikɔs ɔf di swɛ we in ɛn Jonɛtan+ we na Sɔl in pikin swɛ to Jiova. 8 So di kiŋ tek Amonay ɛn Mɛfiboshɛt we na Rizpa in tu bɔypikin+ dɛn we i bɔn fɔ Sɔl. Rizpa na Eya in galpikin. Dɔn i tek Maykal+ in fayv bɔypikin dɛn we i bɔn fɔ Edriɛl+ we na Bazilay di Mɛolatayt in bɔypikin. Maykal na Sɔl in galpikin. 9 Dɔn i an ova dɛn to di Gibyɔnayt dɛn, ɛn dɛn ɛng dɛn dedebɔdi dɛn na di mawntin bifo Jiova.+ Dɛn ɔl sɛvin day togɛda; dɛn kil dɛn di tɛm we dɛn bigin fɔ avɛst, dat na, we dɛn bigin fɔ avɛst bali.* 10 Rizpa+ we na Eya in galpikin tek klos we pipul dɛn de wɛr we dɛn at pwɛl ɛn prɛd am pan di rɔk frɔm di tɛm we di avɛst bigin te ren fɔdɔm pan di dedebɔdi dɛn. Santɛm, i nɔ alaw di bɔd dɛn fɔ sidɔm pan dɛn, ɛn na nɛt, i nɔ alaw di wayl animal dɛn na bush fɔ kam nia dɛn.
11 Dɛn tɛl Devid wetin Rizpa we na Sɔl in ɔda wɛf we na Eya in galpikin dɔn du. 12 So Devid go tek Sɔl ɛn Jonɛtan we na Sɔl in bɔypikin dɛn bon dɛn frɔm di lida dɛn na Jebɛsh-giliad,+ we bin tif dɛn frɔm di pɔblik ples* na Bɛt-shan, usay di Filistin dɛn bin ɛng dɛn di de we di Filistin dɛn bin kil Sɔl na Gilboa.+ 13 I pul Sɔl ɛn in pikin Jonɛtan dɛn bon dɛn de ɛn mek dɛn gɛda di man dɛn we dɛn kil+ dɛn bon dɛn. 14 Dɔn dɛn bɛr Sɔl ɛn in bɔypikin Jonɛtan dɛn bon dɛn na Kish in grev na Zila+ we de na Bɛnjamin in land. Kish+ na Sɔl in papa. Afta dɛn dɔn du ɔl wetin di kiŋ tɛl dɛn fɔ du, Gɔd lisin to di beg we dɛn beg am fɔ di land.+
15 Leta, wɔ bin de bitwin di Filistin dɛn ɛn di Izrɛlayt+ dɛn. So Devid ɛn in savant dɛn go dɔŋ fɔ fɛt di Filistin dɛn, bɔt Devid bin rili taya. 16 Wan pan di Rɛfeim+ dɛn we nem Ishbay-binɔb, we in kɔpa spia bin we 300 shɛkɛl*+ ɛn we bin gɛt nyu sɔd, bin want fɔ kil Devid. 17 Wantɛm wantɛm, Abishay+ we na Zɛruya in bɔypikin kam ɛp Devid+ ɛn kil di Filistin. Na de Devid in man dɛn tawa* se: “Yu nɔ fɔ ɛva go fɛt wɔ wit wi igen!+ Yu nɔ fɔ ɔt di lamp na Izrɛl!”+
18 Afta dat, wɔ bin de bak bitwin di Izrɛlayt dɛn ɛn di Filistin+ dɛn na Gɔb. Na de Sibikay,+ di Ushatayt, kil Saf we na Rɛfeim.+
19 Afta dat, wɔ bin de bak bitwin di Izrɛlayt dɛn ɛn di Filistin+ dɛn na Gɔb. Ɛn Ɛlenan, we na Jeɛrɛ-ɔrigim di Bɛtliɛmayt in bɔypikin, kil Golayat di Gitayt, we di andul pan in spia tan lɛk di stik we dɛn de yuz fɔ wiv kɔntri klos.+
20 Wɔ bin de bak na Gat, usay wan man bin de we rili big ɛn ay. I bin gɛt 6 finga dɛn na ɔl tu in an dɛn ɛn 6 to dɛn na ɔl tu in fut dɛn, ɔl in ɔl na 24, ɛn insɛf na bin Rɛfeim.+ 21 I bin de provok di Izrɛlayt+ dɛn. So Jonɛtan we na Shimiay+ in bɔypikin, kil am. Shimiay na Devid in brɔda.
22 Dɛn 4 man dɛn ya na di Rɛfeim dɛn pikin dɛn, dat na, di Rɛfeim dɛn we bin de na Gat, ɛn na Devid ɛn in savant+ dɛn kil dɛn.