2 Samiɛl
2 Afta dat, Devid aks Jiova+ se: “Lɛ a go ɔp na wan pan di siti dɛn na Juda?” Jiova tɛl am se: “Go ɔp.” Na de Devid aks se: “Usay a fɔ go?” I tɛl am se: “Go na Ibrɔn.”+ 2 So Devid go ɔp wit in tu wɛf dɛn, dat na, Ainoam+ we kɔmɔt Jɛzriɛl ɛn Abigɛl+ we kɔmɔt Kamɛl, we na Nebal we bin dɔn day in wɛf. 3 Devid go bak wit in man dɛn we bin de wit am;+ dɛn ɔl go wit dɛn famili dɛn, ɛn dɛn liv na di siti dɛn we de arawnd Ibrɔn. 4 Dɔn di man dɛn na Juda kam, ɛn dɛn anɔynt Devid de as kiŋ oba di pipul dɛn na Juda.+
Dɛn tɛl Devid se: “Na di man dɛn na Jebɛsh-giliad bɛr Sɔl.” 5 So Devid sɛn mɛsenja dɛn to di man dɛn na Jebɛsh-giliad ɛn tɛl dɛn se: “Lɛ Jiova blɛs una bikɔs una sho lɔv we nɔ de chenj to una masta Sɔl bay we una bɛr am.+ 6 Lɛ Jiova sho una lɔv we nɔ de chenj ɔltɛm. Misɛf go du gud to una bikɔs ɔf wetin una dɔn du.+ 7 So una tek at ɛn sho se una gɛt maynd bikɔs una masta Sɔl dɔn day, ɛn di pipul dɛn na Juda dɔn anɔynt mi as kiŋ oba dɛn.”
8 Bɔt Abna+ we na Nar in bɔypikin ɛn di lida fɔ Sɔl in ami bin dɔn tek Sɔl in bɔypikin we na Ish-boshɛt+ ɛn krɔs wit am go Meaneim,+ 9 ɛn i mek am kiŋ oba Giliad,+ di Ashurayt dɛn, di pipul dɛn na Jɛzriɛl,+ Ifrem,+ Bɛnjamin, ɛn oba ɔl di Izrɛlayt dɛn. 10 Sɔl in pikin we na Ish-boshɛt bin ol 40 ia we i bi kiŋ oba di Izrɛlayt dɛn, ɛn i rul fɔ tu ia. Bɔt di pipul dɛn na Juda bin de sɔpɔt Devid.+ 11 Devid bin rul as kiŋ na Ibrɔn oba di pipul dɛn na Juda fɔ sɛvin ia, siks mɔnt.+
12 Afta sɔm tɛm, Abna we na Nar in bɔypikin ɛn Sɔl in bɔypikin Ish-boshɛt in savant dɛn kɔmɔt na Meaneim+ ɛn go na Gibyɔn.+ 13 Joab+ we na Zɛruya+ in bɔypikin ɛn Devid in savant dɛn, dɛnsɛf kɔmɔt usay dɛn de ɛn mit dɛn na di pul* na Gibyɔn; wan grup bin sidɔm na wan pat na di pul,* ɛn di ɔda grup bin sidɔm na di ɔda pat na di pul.* 14 Faynali, Abna tɛl Joab se: “Lɛ di yɔŋman dɛn grap ɛn fɛt bifo wi.” Na de Joab se: “Lɛ dɛn grap.” 15 So dɛn grap go frɔnt ɛn dɛn kɔnt dɛn, 12 fɔ Bɛnjamin ɛn Sɔl in bɔypikin Ish-boshɛt in grup ɛn 12 frɔm Devid in savant dɛn grup. 16 Dɛn grip dɛnsɛf bay dɛn ed dɛn ɛn dɛn chuk chuk dɛnsɛf na dɛn sayd dɛn wit dɛn sɔd, ɛn dɛn ɔl fɔdɔm ɛn day togɛda. So dɛn kɔl da ples we de na Gibyɔn, Ɛlkat-azurim.
17 Di fɛt we apin afta dat bin rili siriɔs da de de ɛn faynali, Devid in savant dɛn win Abna ɛn di pipul dɛn na Izrɛl. 18 Zɛruya+ in tri bɔypikin dɛn we na Joab,+ Abishay,+ ɛn Asaɛl+ bin de de; Asaɛl bin fast fɔ rɔn lɛk aw gezɛl* de rɔn na opin ples. 19 Asaɛl bin rɔnafta Abna ɛn we i bin de rɔnafta am, i nɔ tɔn lɛft ɔ rayt. 20 We Abna tɔn luk biɛn, i aks se, “Asaɛl na yu?” I ansa am se: “Yɛs, na mi.” 21 Na de Abna tɛl am se: “Tɔn to yu lɛft ɔ to yu rayt ɛn kech wan pan di yɔŋman dɛn ɛn tek ɛnitin we i gɛt we yu want.” Bɔt Asaɛl nɔ bin want fɔ stɔp fɔ rɔnafta Abna. 22 So Abna tɛl Asaɛl bak se: “Lɛf fɔ rɔnafta mi. Wetin mek a fɔ kil yu? A nɔ go ebul fɔ wach yu brɔda Joab nain fes.” 23 Bɔt i nɔ gri fɔ stɔp, so Abna chuk am nain bɛlɛ wit di pat pan di spia we nɔ shap+ ɛn di spia kɔmɔt nain bak, ɛn i fɔdɔm de ɛn day wantɛm wantɛm. Ɛnibɔdi we kam na di ples usay Asaɛl fɔdɔm ɛn day kin stɔp ɛn tinap de smɔl.
24 Na de Joab ɛn Abishay rɔnafta Abna. As di san de go dɔŋ, dɛn kam na di il na Ama, we fesin Gaya na di rod fɔ go na di wildanɛs* na Gibyɔn. 25 Ɛn di Bɛnjaminayt dɛn gɛda togɛda biɛn Abna, ɛn dɛn mek wan grup ɛn tinap pantap wan il. 26 Na de Abna ala lawd wan to Joab se: “Aw lɔng una go de fɛt una kɔmpin dɛn wit di sɔd? Yu nɔ no se na siriɔs prɔblɛm nɔmɔ dat go kam wit? So aw lɔng i go tek bifo yu tɛl di pipul dɛn fɔ lɛf fɔ rɔnafta dɛn brɔda dɛn?” 27 Na de Joab tɔk se: “As lɔng as di tru Gɔd de alayv, if yu nɔ bin tɔk, di pipul dɛn bin fɔ dɔn rɔnafta dɛn brɔda dɛn te doklin.” 28 So Joab blo di ɔn, ɛn in man dɛn lɛf fɔ rɔnafta di Izrɛlayt dɛn, dɔn dɛn lɛf fɔ fɛt.
29 Ol nɛt Abna ɛn in man dɛn waka na di Araba+ ɛn krɔs di Jɔdan, dɔn dɛn waka na di wan ol vali* ɛn faynali kam na Meaneim.+ 30 Afta Joab lɛf fɔ rɔnafta Abna, i gɛda ɔl di pipul dɛn togɛda. Na 19 pipul dɛn apat frɔm Asaɛl bin day pan Devid in savant dɛn. 31 Bɔt Devid in savant dɛn win di Bɛnjaminayt dɛn ɛn Abna in man dɛn, ɛn na 360 pan dɛn man dɛn bin day. 32 Dɛn tek Asaɛl+ ɛn bɛr am nain papa in grev we de na Bɛtliɛm.+ Dɔn Joab ɛn in man dɛn waka ol nɛt ɛn rich na Ibrɔn+ we doklin.