Jɛnɛsis
6 We pipul dɛn bigin fɔ bɔku na di wɔl ɛn dɛn bɔn galpikin dɛn, 2 di tru Gɔd in bɔypikin*+ dɛn bigin fɔ notis se di uman* dɛn fayn. So dɛn bigin fɔ tek ɛni uman we dɛn want as wɛf. 3 Dɔn Jiova tɔk se: “A nɔ go kɔntinyu fɔ peshɛnt wit mɔtalman sote go,+ bikɔs i de sin. Bikɔs ɔf dat, na 120 ia nɔmɔ i go liv fɔ.”+
4 Di Nɛfilim* dɛn bin de na di wɔl dɛn tɛm dɛn de ɛn afta dat. Insay dɛn tɛm dɛn de, di tru Gɔd in bɔypikin dɛn kɔntinyu fɔ du mami ɛn dadi biznɛs wit di uman dɛn, ɛn dɛn bɔn bɔypikin dɛn fɔ dɛn. Dɛn na bin di pawaful wan dɛn we bin de dɛn tɛm dɛn de, ɛn dɛn bin femɔs.
5 So Jiova si se mɔtalman in wikɛdnɛs dɔn pasmak na di wɔl ɛn na bad tin nɔmɔ dɛn de tink bɔt ɔltɛm na dɛn at.+ 6 Jiova rigrɛt we i mek mɔtalman na di wɔl, ɛn in at pwɛl.*+ 7 So Jiova tɔk se: “A de dɔnawe wit mɔtalman we a dɔn mek na di wɔl, a de dɔnawe wit dɛn ɛn di animal dɛn we dɛn de mɛn, di animal dɛn we de drɛg na grɔn, ɛn di tin dɛn we gɛt layf we de flay na di skay, bikɔs a rigrɛt we a dɔn mek dɛn.” 8 Bɔt Jiova bin gladi fɔ Noa.
9 Dis na Noa in istri.
Noa na man we bin de du wetin rayt.+ I nɔ bin tan lɛk di pipul dɛn we dɛn ɔl bin de liv insay di sem tɛm;* i bin sho se i nɔ gɛt wan fɔlt.* Noa bin waka wit di tru Gɔd.+ 10 Afta sɔm tɛm Noa bɔn tri bɔypikin dɛn, dat na, Shɛm, Am, ɛn Jefɛt.+ 11 Bɔt di wɔl bin dɔn pwɛl na di tru Gɔd in yay, ɛn na soso fɛt-fɛt bin ful-ɔp na di wɔl. 12 Fɔ tru, we Gɔd luk di wɔl, i si se i dɔn pwɛl;+ ɔlman* de du tin dɛn we rili bad na di wɔl.+
13 Afta dat, Gɔd tɛl Noa se: “A dɔn disayd fɔ dɔnawe wit ɔlman, bikɔs di wɔl ful-ɔp wit fɛt-fɛt bikɔs ɔf dɛn, so a de dɔnawe wit dɛn ɛn ɔltin we de na di wɔl.+ 14 Yuz bod dɛn frɔm strɔng stik fɔ mek ak* fɔ yusɛf.+ Yu go mek rum dɛn na di ak ɛn kɔba am wit ta+ insay ɛn na do. 15 Na so yu fɔ bil am: Di ak fɔ bi 300 kyubit* lɔng, 50 kyubit wayd, ɛn in ayt fɔ bi 30 kyubit. 16 Yu go mek winda na di ak fɔ layt,* wan kyubit frɔm ɔntɔp. Yu fɔ put di ak in domɔt na di sayd+ ɛn yu fɔ mek di ak tri stori, wan stori go de dɔŋ ɛn di tu go de ɔp.
17 “As fɔ mi, a de kam wit flɔd+ na di wɔl we go dɔnawe wit ɔltin we gɛt layf na di wɔl. Ɔltin na di wɔl go day.+ 18 Ɛn a de mek agrimɛnt wit yu, ɛn yu fɔ go insay di ak wit yu wɛf, yu bɔypikin dɛn ɛn dɛn wɛf+ dɛn. 19 Ɛn tek tu-tu pan ɔl di tin dɛn we gɛt layf+ ɛn kɛr dɛn go insay di ak so dat dɛn nɔ go day, tek wan man ɛn wan uman;+ 20 tek tu-tu pan di tin dɛn we gɛt layf we de flay akɔdin to dɛn kayn, tu-tu pan di animal dɛn we dɛn de mɛn akɔdin to dɛn kayn, ɛn tu-tu pan di animal dɛn we de drɛg na grɔn akɔdin to dɛn kayn so dat dɛn nɔ go day.+ 21 As fɔ yu, na fɔ gɛda ɔlkayn fud fɔ it,+ yu fɔ gɛda fud fɔ yusɛf ɛn fɔ di animal dɛn.”
22 Ɛn Noa du ɔl wetin Gɔd tɛl am fɔ du. I du ɔltin.+