Efuh Kuh Oakwuck In Sisilac Liki Congregation uh Ahkkahlwemye Luhngse?

JULIAN el fahk: “Ke nga lohng mwe fahkwack se lah tuhlihk mukul se nuhtihk ah sisilac liki congregation, nga puhla muh pa inge sahflahiyen ma nuhkewa. El pa mahtuhoh emeet nuhtihk, kuht arlacna fototo nuh sin sie sin sie ac puhs ma kuht kwacna tuhkweni oruh. Ke lusen pacl na loes el tuhlihk na wowo se, ac ke kihtin pacl na el muhtwacwack oruh kain in elah ac ohiyac suhfal. Muhtwacn kiyuck ah tuhng pacl puhs, ac nga nihkihn lah nga ac ahkwoyacl fuhkah. Kuht sikaleni in nuhnkuh kuht fin oraclah wo ma kunacsr oacna pahpah ac ninac.”

Efuh kuh fwack muh oakwuck in sisilac luhn sie mwet lili ahkkahlwemye luhngse, fin ma inge mwe ahktoasr na yohk? Meac srihpac luhn Bible in oruh oakwuck in sang mwe kai upac inge? Ac meac na pwacye oruh sie mwet in sisilac liki congregation uh?

MA LUO SUC KOL NUH KE SISILAC LUHN SIE MWET

Oasr ma luo suc enenuh in tuhkweni sikyak na fah sie mwet el sisilac ac tilac sie sin Mwet Loh luhn Jeova. Ma se meet pa ke sie Mwet Loh suc bacptais tari el oraclah ma kuluk na upac se. Ma se ahkluo pa el fin tiac auliyak ke ma kuluk suc el oraclah.

Jeova el tiac siyuck kuht in mwet suwohswohs, finne ouinge oasr oakwuck fuhlwact lal ke ohiyacn moul nwacsnwacs suc mwet kuhlwacnsap lal uh enenuh in moulkihn. Ke sie mwe puhpuhlyuck, Jeova el kwacfe kuht in fahsr liki kuhtwena orekma kuluk upac oacna orekma luhn kosro, alu nuh ke ma sruhloaclah, pihsrapasr, kuhtasrihk, ahkmas, ac inutnut.​—Sie Corinth 6:9, 10; Fwackyuk 21:8.

Yac kom tiac insese kac lah oakwuck fuhlwact luhn Jeova ke moul nwacsnwacs uh fal ac oreklac in karihngihn kuht? Wacngihn sie mwet sruhnga muhta inmahsrlon mwet wo ac mislac, suc kuh in luhlahlfongiyuck. Kuht kuh in konwacack kain in ohiyac inge inmahsrlon mwet lili wiyacsr uh, ke srihpen wuhlelah se kuht tuh oraclah nuh sin God in moul fal nuh ke masap lal in Bible.

Tuhsruhktuh, ac fuhkah fin sie mwet Christian suc bacptais tari el oraclah sie ma kuluk upac ke srihpen mwe muhnahs lal sifacna? Mwet kuhlwacnsap oaru luhn Jeova in pacl meet ah eltahl oruh pac kain in tahfonglac pucspucs, tuhsruhktuh, God el tiac pihlacsracltahllah. Tohkohsrah David pa sie mwe puhpuhlyuck ke ma inge. David el oruh orekma luhn kosro ac el ahkmas, tuhsruhktuh, mwet pahluh Nathan el fahk nuh sel: “LEUM GOD El nuhnak muhnahs nuh sum.”​—Luo Samuel 12:13.

God el nuhnak muhnahs nuh sel David ke srihpen el auliyak na pwacye. (Psalm 32:1-5) In oacpacna, sie mwet kuhlwacnsap luhn Jeova ke pacl inge el kuh in sisilac el fin tiac auliyak kuh el tahfwelah in oruh ma kuluk. (Orekma 3:19; 26:20) Fin tiac kahlwem auliyak na pwacye luhn mwet se sin un mwet elder suc oruh sulaclah pucspucs ke congregation uh, enenuh in sisilac mwet ingacn liki congregation uh.

Sahp ke muhtwacwackiyac kuht puhla muh arlac upaclaclac kuh tiac ahkkahlwemye pahkomuhta sulaclah in sislah mwet se ma oraclah ma kuluk liki congregation uh. Yohk na kuht fin arlacna fototo nuh sin mwet se ingacn. Tuhsruhktuh, Kahs luhn Jeova uh use nuh sesr srihpac na wowo ma pwacnacng kuht luhlahlfongi lah sulaclah inge ahkkahlwemye luhngse.

MA WO SUC TUHKUH KE OAKWUCK IN SISILAC LIKI CONGREGATION

Jesus el tuh fahk lah inkacnek lahlmwetmwet uh kahlwem ke fahko kac. (Matthew 11:19) Oasr ma wo suc tuhkuh ke oreklac sie sulaclah in sislah mwet suc oruh ma kuluk liki congregation. Nuhnkuh ke ma tolu inge:

Oakwuck in sislah mwet suc oruh ma kuluk uh ahkfuhlwactye inen Jeova. Ke srihpen kuht us inen Jeova, ohiyacsr ahkkahlwemye inel. (Isaiah 43:10) Oacna ke ohiyacn wen se ahkfuhlwactye kuh ahkkulukye pahpah ac ninac kiyacl, puhlakihn luhn mwet nuh sin Jeova uh kahlwem ke mwe srihkasrak wo kuh mwe srihkasrak kuluk luhn mwet lal suc us inel. Ine wolacna luhn God ahkfuhlwactyeyuck fin mwet ma us inel uh sifacna moulkihn oakwuck fuhlwact lal ke moul nwacsnwacs. Ma inge apkuhran nuh ke pacl lal Ezekiel ke mwet in muhtuhnfacl sahyac ah kwacna kapsruh inen Jeova nuh sin mwet Jew.​—Ezekiel 36:19-23.

Kuht fin oruh ma kuluk, kuht ahkkulukye ine muhtahl luhn God. Mwet sap Peter el fahk kahs in kai inge nuh sin mwet Christian: “Kowos in ahkos God, ac tiac lwelah moul lowos an in sifwil forlah nuh ke luhngse lowos oacna ke pacl se kowos srackna nihkihn. A kowos in muhtahl in ma nuhkewa kowos oruh an, oacna ke God suc pahngon kowos El muhtahl. Ma Suhmuhslah uh fahk, “Kowos in muhtahl, mweyen nga muhtahl.” (Sie Peter 1:14-16) Moul nwacsnwacs ac muhtahl sang kaksak ke inen God.

Tuhsruhktuh, fin sie Mwet Loh luhn Jeova el oruh sie ma kuluk, inkaiyen pacl uh kawuck ac mwet lal uh ac etwacack ke pacl na sa. Oakwuck in sislah mwet suc oruh ma kuluk liki congregation uh ahkkahlwemye lah mwet luhn Jeova uh nwacsnwacs. Ma inge ahkkahlwemye pac lah eltahl ahkos masap pucspucs in Bible uh tuh eltahl in sruokyac na ohiyac muhtahl inge. Sie pacl ah mwet se utyak nuh ke sie miting ke Lohm in Toeni se fin acn Switzerland ac fahk muh el ke eklac sie mwet ke congregation inge. Muhtwacn se wiyacl sisilac ke srihpen orekma kuluk ma el oraclah. El fahk muh el ke welah sie u ma “tiac pihlesruh ohiyac kuluk uh.”

Oakwuck in sisilac uh karihngihn congregation luhn mwet Christian in nwacsnwacs. Mwet sap Paul el sensenkihn mwet Corinth ke ma ac kuh in sikyak eltahl fin lwelah mwet ma oruh ma kuluk in muhta inmahsrloltahl. El puhpuhlyuckkihn ohiyac kuluk luhn kain in mwet inge nuh ke mwe ahkpulohl suc oruh fuhlao uh in pulohlwack. El fahk muh: “Kihtin mwe ahkpulohl na srihsrihk, oruh kar nohfohn se in pulohlwack.” Tohkoh el sang kahs in kahsruh inge nuh seltahl: “Luhslah mwet kuluk sac liki inmahsrlowos.”​—Sie Corinth 5:6, 11-13.

“Mwet kuluk” se ma Paul el sramsramkihn inge el tiac okanlah orekma luhn kosro suc el oruh. Ac kuhtuh mwet ke congregation ah muhtwacwack in nuhnkuh muh wacngihn na ma kuluk ke ohiyac lal inge. (Sie Corinth 5:1, 2) Kain in moul fohkfohk inge fin lweyucklac, sahp kuhtuh mwet Christian sahyac ah ac ke ukwe orekma kuluk luhn mwet ke acn eltahl muhta kac inge. Fin pihlesreyuck orekma kuluk uh, ma inge oruh wacngihn suhnak nuh ke oakwuck fuhlwact luhn God ke ma wo ac suwohs. (Ecclesiastes 8:11) Ac upac liki na inge, mwet ma oruh ma kuluk ac tiac auliyak, a eklac oacna “yot in tikuclkucl inkof uh” ac eltahl kuhnauslah luhlahlfongi luhn mwet sahyac ke congregation uh.​—Jude 4, 12, BMK.

Oakwuck in sisilac uh sahp kuh in kahsruh mwet orekma kuluk se in ahksuwohsye nuhnak lal. Jesus el tuh sruhmuhn ke sie mukul fuhsr suc som liki lohm sin pahpah tuhmwacl, suhnuhntei ma nuhkewa lal ac moulkihn sie moul kuluk. Tukun el sun ma upac, wen se inge lotwelah ke el tiac muhta yurin pahpah tuhmwacl lah wacngihn srihpen moul sac ac wacngihn pahkomuhta luhn mwet uh. Wen se inge akihlenack nuhnak tahfonglac lal, auliyak, ac oruh ma enenweyuck tuh el in fohlohk nuh yurin sucu lal. (Luke 15:11-24) Ahkuhtweyac lal Jesus ke pahpah na luhngse se inge suc enganwack ke eklac luhn wen se nahtuhl inge kahsre kuht in etuh na pwacye puhlakihn luhn Jeova uh. El fahk nuh sesr: “Nga tiac engankihn in liye ke sie mwet kuluk el misac. Nga kena liye elan tui liki orekma kuluk lal, tuh elan moul.”​—Ezekiel 33:11.

In oacpacna, ke mwet sisilac uh tilac wi congregation luhn mwet Christian uh, sahp eltahl ac kuh in akihlenack ma wo eltahl sislah inge. Ma kuluk suc tuhkuh ke orekma kuluk laltahl uh, wi mwe acsmakihn ke pacl wowo ma eltahl engankihn fototo wowo yurin Jeova ac mwet lal uh, ac kuh in ahksuwohsye nuhnak laltahl.

Enenuh in ahkkahlwemyeyuck ohiyacn luhngse ac tu na kuh in sun finsrak lasr ke sahflahiyac uh. David, mwet sihm luhn Psalm el fahk ma inge: “Lwelah mwet suwohswohs in srihngihlyuc, ac fah mwe kuhlwacng; ac lwelah lan kai yuc, ac fah oacna oil fin sihfuck.” (Psalm 141:5, BMK) In puhpuhlyuckkihn: Srihke luhmahlah ke nuhnak lom ke sie mwet el mongo ac fohnwacni ke ipin ikoac se. El koflah in momong wo, ac el muhnahslah. El tiac pac kuh in kahskahs. Fin mwet se tiac sa in kahsrel el ac misac. Pwacnacng kawuck se lal puokyac fintohkohl el in kuhsracack ikoac se inge. Sahp puohpoh luhn kawuck se lal inge ngal, tuhsruhktuh ac kuh in molwelah moul lal uh. In oacpacna, David el akihlen lah sie mwet suwohswohs enenuh in sang mwe kai upac nuh sel ma ac kahsrel.

Ke kain in ohiyac puhs, oakwuck in sislah sie mwet suc oruh ma kuluk sang mwe kai suc mwet sacn enenuh. Tukun yac singucul kuhtuh, tuhlihk mukul se nahtuhl Julian suc sruhmuhnyuck ke muhtwacwackiyac ah el ahknwacsnwacsye moul lal, fohlohk nuh ke congregation uh, ac ingena el sie mwet elder. El fahk: “Ke nga sisilac ah, ma inge oruh nga sifacna liye ac puhla ma kuluk suc tuhkuh ke ohiyacn moul se luhk ah. Nga enenuh mwe kai sac.”​—Hebrew 12:7-11.

INKACNEK WO SUC AHKKAHLWEMYE LUHNGSE NUH SIN MWET SISILAC UH

Pwacye, ma na upac se ke sisilac sie mwet, tuhsruhktuh ma upac se inge tiac enenuh in mwe ahkmuhnahsye kuht na pwacye. Oasr ma kunacsr nuhkewa in karihngihn oakwuck nuh ke sisilac luhn sie mwet tuh in oasr srihpac.

Mwet elder ma oruh kunohkohn na upac se inge in fahk sulaclah suc oreklac ke sisilac luhn sie mwet, eltahl kwacfeacng in etahi ohiyacn luhngse luhn Jeova. Ke pacl se eltahl fahk nuh sin sie mwet sulaclah laltahl uh, eltahl ahkuhtweyac in kahlwem ac ke inkacnek kuhlwacng lah meac mwet sacn enenuh in oruh tuh el in sifwil fohlohk nuh ke congregation uh. Ke kais kuhtuh pacl, mwet elder uh som ohsun nuh sin mwet sisilac suc ahkkahlwemye lah eltahl eklac ac auliyak, tuh in ahkacsmakihnyacltahl lah meac enenweyuck eltahl in fohlohk nuh yurin Jeova.a

Mwet in sucu uh eltahl kuh in ahkkahlwemye luhngse nuh sin congregation ac mwet se ma oruh ma kuluk ke eltahl suhnakihn sulaclah ma oreklac ke sisilac luhn sie mwet. Julian el fahk: “El srackna tuhlihk mukul se nuhtihk, tuhsruhktuh ohiyacn moul lal ah oruh upac kuht in fototo.”

Mwet nuhkewa ke congregation uh kuh in ahkkahlwemye luhngse pwacye ke eltahl tiac suk in ohsun kuh sramsram nuh sin mwet sisilac uh. (Sie Corinth 5:11; Luo John 10, 11) Ke inkacnek inge, eltahl sang kahsruh in ahkkweye mwe kai suc Jeova el sang nuh sel ke inkacnek luhn mwet elder. In wekuhnacng, eltahl kuh in sang luhngse yohk laltahl ac kahsruh sucu luhn mwet sisilac se ke ahsor ma eltahl puhla. Ac tiac lwelah eltahl in puhla pac muh eltahl tiac kuh in asruoki nuh sin mwet lili ke luhlahlfongi uh.—Rome 12:13, 15.

Julian el oacyacpac fahk: “Kuht enenuh oakwuck in sislah mwet suc oruh ma kuluk liki congregation uh. Oakwuck se inge kahsre kuht in moul fal nuh ke oakwuck fuhlwact luhn Jeova ke moul nwacsnwacs. Ma sikyak ke sahflahiyac uh ma ac wo nuh sesr, finne kuht kweok kac. Nga fuhnuh pihlesruh orekma kuluk luhn tuhlihk mukul se nuhtihk ah, el luhkuhn tiac na wo lac.”