SIFAC KE KOLO | YAC KOM LUHNGSE IN LUTLUT KE BIBLE?

Sie Oakwuck In Lutlut Bible Nuh Sin Mwet Nuhkewa

Etweyuck Mwet Loh luhn Jeova uh ke srihpen orekma laltahl in luti ke yen nuhkewa. Tuhsruhktuh, yac kom etuh lah fin facluh nohfohn kuht oacyacpac oruh oakwuck in lutlut ke Bible?

Ke yac 2014, million 8 kuhtuh sin Mwet Loh ke acn 240 eltahl oruh oakwuck in lutlut inge. Ke kais sie mahlwem eltahl oruh lutlut inge nuh sin mwet 9,500,000.a Pwacye lah, puhs pihsen mwet ma lutlut Bible yohrohsr liki pihsen mwet ke acn 140!

In ahkfahsryelah orekma in luti se inge, Mwet Loh luhn Jeova eltahl oraclah billion sie tahfuh ke Bible, puk, magasin, ac kuhtuh pac mwe lutlut ke kais sie yac nuh ke kahs 700 kuhtuh! Orekma in oraclah kain in mwe rit pucspucs inge, suc wacngihn ma oacna, sang kahsruh nuh sin mwet uh in lutlutkihn Bible ke kahs ma eltahl luhngse.

“Nga tiac pwacr ke lutlut luhk ke lohm lutlut ac, tuhsruhktuh ke kain in lutlut se inge nga arlacna pwacr kac. Ac puhs ma nga lotwelah ma arlacna ahkkweyeyuc!”—Katlego, South Africa.

“Oakwuck ke lutlut inge tohpohklah kewa kihsen siyuck luhk ac kuhtuh pac sahyac.”—Bertha, Mexico.

“Lutlut Bible luhk ah orek ke lohm sihk ac ke pacl ma wo nuh sihk. Wacngihn ma sahyac nga kuh in siyuck!”—Eziquiel, Brazil.

“Kuhtuh pacl uh lusen lutlut luhk uh orek ke minit 15 nuh ke 30, kuhtuh pacl uh loes liki, wiwi na ma fal nuh sihk.”—Viniana, Australia.

“Lutlut sac tiac moul, arlacna wo na pwacye!”—Aimé, Benin.

“Mwet se ma lutiyuc ke Bible uh arlacna mongfihsracsr ac kuhlwacng. Inmahsrlosr fototoeni.”—Karen, Northern Ireland.

“Puhs mwet ma lutlut ke Bible eltahl finne tiac ahkoo in eklac Mwet Loh.”—Denton, England.

TOP NUH KE KIHSEN SIYUCK MA KWACNA SIYUCKYUCK KE OAKWUCK LASR IN LUTLUT BIBLE

Oakwuck fuhkah orekmakihnyuck ke lutlut se inge?

Kuht eis kain in sihfac ke Bible ac tuni fuhs in Bible ma kuhpahsr nuh ke sihfac ingacn. Ke sie mwe puhpuhlyuck, nuhnkuh ke sihfac se inge, God. Bible uh topuk kihsen siyuck pucspucs, oacna: Suc God? El mwet fuhkah se? Yac oasr inel? El muhta oyac? Yac kuht kuh in fototo nuh sel? Ma upac uh pa in etuh lah kom kuh in konwacack oyac top ingacn ke Bible.

In kahsruh mwet uh in konwacack top uh, kuht kwacna orekmakihn puk se inge, Mea Baibel el Luti Na Paye?b Oreklac puk se inge yohk na in kahsruh mwet uh in kahlwem ke mwe luti yohk srihpac in Bible. Ma inge wekuhnacng mwe luti ke God, Jesus, mwe kweok luhn mwet uh, oakwuck in sifwil moulyak, puhruhe, ac ke ma pucspucs pac sahyac.

Piyac pacl ac acn ma lutlut inge uh kuh in orek we an?

Lutlut se inge kuh in orek ke pacl ac acn ma wo sum uh.

Lusackah kais sie lutlut?

Mwet puhs sackuhnlah ao se ke kais sie wik in lutlut ke Bible. Tuhsruhktuh lusen lutlut se inge kuh in orek, wiwi na pacl ma fal. Kuht kuh in oruh in fal nuh ke pacl ma kom mwesahs an. Kuhtuh lutlut uh orek ke lusen minit na 10 kuh 15 ke kais sie wik.

Yac oasr molin lutlut se inge?

Tiac na moul lutlut se inge wi kuhfwen mwe lutlut kac uh. Ma inge fal nuh ke kahs in kahsruh lal Jesus nuh sin mwet tuhma lutlut lal ah: ‘Kowos eis ke wacngihn molo, sang ke wacngihn molo.’—Matthew 10:8, BMK.

Lusackah lutlut se inge?

Kom kuh in tahfwelah na in lutlut ke lusen pacl na kom luhngse. Ke puk se inge, Mea Baibel el Luti Na Paye? oasr sihfac 19 nohfohn na kac. Kom kuh in lutlutkihn kuhtuh na kuh nohfohn na mwe lutlut kac uh ke pacl ac luhpan mwe lutlut ma fal nuh sum an.

Yac nga enenuh in eklac sie Mwet Loh luhn Jeova?

Moh. Kuht suhnakihn ac akihlen suwohs luhn kais sie mwet in oruh sulaclah nuh ke ma el luhngse in luhlahlfongi. Tuhsruhktuh mwet ma eis etwacack yohk srihpac ke Bible uh eltahl kuh in oruh sulaclah laltahl ma oasr etwacack kac.

Nga kuh in eis pac oyac kuhtuh mwe ahkuhtweyac ke ma inge?

Ke Web site se inge, jw.org oasr mwe ahkuhtweyac wo ac pwacye ke luhlahlfongi ac orekma luhn Mwet Loh luhn Jeova uh.

Nga ac siyuck fuhkah ke sie lutlut ke Bible?

Kom kuh in oraclah request lom online ke www.jw.org.
Kom kuh in sihm nuh ke sie sin address ma oan apkuhran nuh yurum ma tahklac ke sra ahkluo ke magasin se inge.
Kom kuh in ohsun kuh pahngon sie Mwet Loh luhn Jeova suc oasr ke acn sum an.

a Lutlut Bible uh kuh in orek nuh sin mwet se mwet se kuh u srihsrihk.

b Oreklac sin Mwet Loh luhn Jeova. Puhs liki million 230 ke puk se inge printiyucklac, ac ahluhkwelah kahs 260 ma inge oreklac nuh kac.

MWE KAHSRUH NUH SIN SUCU

“Ke muhtwacn kiyuck ah muhtwacwack in lutlut Bible, nga akihlen lah moul lal ah eklac. Wolac moul in sucu lasr ah. Nga ke etuh pac ke ma el lotwelah ah, pwacnacng nga muhtwacwack in lutlut pac. Ma nga lotwelah ah oruh nga eklac sie mwet wo. Lutlut Bible uh oruh sucu lasr uh in fototoeni nuh sie.”—Eziquiel.

“Tukun nga muhtwacwack lutlut ke Bible, nga tui ke orekmakihnyen ono kuluk, nihmnihm ahluhkwelah ma fal, ac etwaclah pac in kutong kasrkuhsrak luhk. Lohm sihk ah nwacsnwacslah ac tilac okahrkahr. Nga etwaclah pac ngan ahksacohkye sucu luhk uh liki meet ah ac in oruh ma ac ahkenganyacltahl. Pwacnacng ingena nga engan liki na meet ah.”—Karen.

“Kuhtuh mwet uh ahkkulukyeyuc ke lutlut Bible luhk. Tuhsruhktuh mukul tuhmuhk inge el ahkkweye sulaclah luhk ah. El fahk: ‘Nga tiacna elyah ke ma mwet sahyac fahk uh. Ke nga liye kom wolac uh, pa inge ma yohk srihpac nuh sihk uh. Kampare na oruh ma kom oruh an.’ Wolac na pwacye moul in sucu lasr uh, liki na meet ah!”—Viniana.