Efuh Kom in Lutlut Bible?

Yac oasr pacl kom nuh muhta nuhnkuh ke kihsen siyuck inge kewa? Fin ahok, tiac kom muhkwena. Puhs mwet fin facluh nohfohn suc nuhnkuh ke kihsen siyuck yohk srihpac ke moul inge. Yac kom kuh in konwacack top nuh kac uh?

Million sin mwet eltahl ac fahk “ahok!” Efuh? Mweyen eltahl konwacack top na wowo nuh ke kihsen siyuck nuhkewa laltahl uh ke Bible. Yac kom luhngse in etuh lah meac Bible uh fahk? Kahlwem lah kom ac luhngse wi engankihn sie oakwuck in lutlut Bible luhn Mwet Loh luhn Jeova ma wacngihn molo.a

Pwacye lah ke pacl se sramsramkihnyuck Bible uh, kuhtuh mwet uh fahk: “Nga kahfofo.” “Arlac upac.” “Nga sensen in orek wuhlelah.” Tuhsruhktuh, kuhtuh sin mwet uh siena nuhnkuh la. Eltahl arlac engankihn pacl wo inge in lutlut ke ma Bible luti uh. Nuhnkuh ke mwe puhpuhlyuck ekahsr inge:

• “Nga tuh som lohng mwe luti luhn alu Catholic, Protestant, Sikh, Buddhist, ac ke sie university, nga tuh lutlut ke God ac ke luhlahlfongi pucspucs luhn alu. Tuhsruhktuh inkaiyen kihsen siyuck luhk ke God ah tiacna topukyucklac. Na tok sie sin mwet Loh luhn Jeova el tuhkuh nuh lohm sihk ah. Nga fwefwelac ke srihpen top pucspucs lal suc tuhkuh ke Bible, pwacnacng nga insese in lutlut ke Bible.”​—Gill, England.

• “Puhs kihsen siyuck luhk ke moul, tuhsruhktuh top luhn pahstuh ke alu luhk ah tiacna sun insiuck. Tuhsruhktuh, sie sin Mwet Loh luhn Jeova el orekmakihn Bible muhkwena ac tohpohklah kihsen siyuck nuhkewa luhk inge. Ke el siyuck sihk lah nga luhngse in ahkyohkye etwacack luhk uh, nga enganwack ac insese nuh kac.”​—Koffi, Benin.

• “Nga ke etuh lah meac sikyak mwet uh misac. Meet nga luhlahlfongi muh mwet misac uh kuh in ahkkulukye mwet moul, tuhsruhktuh nga ke etuh lah meac Bible uh fahk kac. Pwacnacng nga muhtwacwack lutlut Bible yurin kawuck se luhk suc el sie sin Mwet Loh.”​—José, Brazil.

• “Nga tuh srihke riti Bible tuhsruhktuh nga tiacna kahlwem kac. Na Mwet Loh luhn Jeova tuhkuh nuh yuruk ac ahkuhtweyac nuh sihk ke kuhtuh kahs pahluh in Bible. Nga ke etuh lah meac pac sahyac nga kuh in lotwelah.”​—Dennize, Mexico.

• “Nga muhta nuhnkuh lah fin God el nuhnkuh keik na pwacye. Pwacnacng nga sulaclah in puhruhe nuh sin God se ma ahkkahlwemyeyuck in Bible uh. Lwen tohkoh ah, oasr Mwet Loh tongtong ke sruhnguhl luhk ah, ac nga muhtwacwack in lutlut ke Bible.”​—Anju, Nepal.

Ma nuhkewa suc sikyak nuh sin mwet inge ahkacsmakihnye kuht ke kahs lal Jesus inge: “Insewowo elos suc masrinsracl ac maluhkihn ma suwohswohs, tuh elos fah kihp!” (Matthew 5:6) Ahok, mwet uh puhla muh eltahl enenuh in etuh God. God muhkwena pakuh in ahkfalye enenuh se inge, ac el oruh ma inge ke inkacnek luhn Bible.

Pwacnacng, meac enenweyuck ke sie lutlut Bible? Ma wo fuhkah ma inge ac usot nuh sum? Kihsen siyuck inge ac fah topukyucklac ke mwe lutlut se tok uh.