Orekmakihn Mwe Srihkasrak luhn Mwet Pahluh Oacna Habakkuk
1. Efuh kuh kuht kuh in kahlwem ke puhlakihn lal Habakkuk uh?
1 Ke yohkwelihk ac upaclah ma kuluk ma kuht sun ke facl se kuht muhta kac inge, sahp kuht puhla oacna Habakkuk ke el siyuck sin Jeova: “Efuh kuh kom oruh ngan liye kain in mwe lokoalok inge? Efuh kuh kom kuh in muhtweng kain in orekma suhfal inge?” (Habakkuk 1:3; Luo Timothy 3:1, 13) Kuht fin nuhnkuh yohk ke kahs lal Habakkuk ac ke mwe srihkasrak na wo ke luhlahlfongi ac oaru lal uh, ma inge ac kuh in kahsre kuht in muhtweng ke kuht sano lwen in nuhnuhnkuh luhn Jeova.—Luo Peter 3:7.
2. Kuht ac ahkkahlwemye fuhkah lah kuht moulkihn ohiyen oaru ke pacl inge?
2 Moulkihn Ohiyen Ohiyen Oaru ac Inse Pwacye: Habakkuk el tiac lwelah ma kuluk ma sikyak nuh sel uh in ahkmuhnahsyacl, a el moniyuck ac kahfofo ke orekma in kuhlwacnsap lal uh. (Habakkuk 2:1) Jeova el ahkkweye mwet pahluh se lal inge in luhlahlfongi lah kahs lal uh ac ahkpwacyeyuck ke pacl se na el fahk uh ac lah “elos suc suwohsna fah moul mweyen elos inse pwacye nuh sin God.” (Habakkuk 2:2-4) Meac kalmen ma inge nuh sin mwet Christian suc moul ke lwen sahflah inge? Tiac arlac yohk srihpac in etuh lah ngac lwen sahflah uh ac fah tuhkuh a ma yohk srihpac uh pa kuht in luhlahlfongi na pwacye lah ac fah tuhkuh. Luhlahlfongi pa ac mokle kuht in taran ac soano uh ac oacyacpac in ahkkahlwemye lah orekma in luti uh pa yohk srihpac emeet ke moul lasr uh.—Hebrew 10:38, 39.
3. Efuh kuh kuht enenuh in sruokyacna engan lasr in kuhlwacnsuhpuh Jeova?
3 Sruokyacna Engan Lom in Kuhlwacnsuhpuh Jeova: Ke pacl se ma Gog luhn Magog lain mwet luhn Jeova uh, luhlahlfongi lasr uh ac srihfeyuck na pwacye. (Ezekiel 38:2, 10-12) Mwe lain inge ac oruh arlacna upac moul lasr uh, kuht finne etuh lah kuht ac fah kuhtanglah. Sahp mongo in pacl sacn ac suhfal, ma pucspucs lasr ac kuh in wacngihnlac ac moul wo luhn mwet uh ac kuh in upaclah. Meac kuht ac oruh fin ma upac inge sikyak? Habakkuk el etuh lah oasr ma upac ac sikyak, tuhsruhktuh el tiacna lwelah ma upac inge in eislah engan lal in kuhlwacnsuhpuh Jeova. (Habakkuk 3:16-19) ‘Inse engan suc LEUM GOD El use nuh sesr’ ac fah oacyacpac kahsre kuht in muhtwacnglah ke kuhtwena ma upac ke pacl fahsruh uh.—Nehemiah 8:10; Hebrew 12:2.
4. Mwe insewowo fuhkah kuht kuh in engankihn ke pacl inge ac ke pacl fahsruh uh?
4 Mwet suc Jeova el molwelah ke lwen in nuhnuhnkuh lal uh ac fah tahfwelah in lutiyuck ke inkacnek luhn God ke moul. (Habakkuk 2:14) Mwet suc ac ahkmoulyeyuckyak ke pacl fahsruh uh ac fah lutlut pac kacl Jeova. Finne ke pacl inge, kuht kuh in orekmakihn pacl nuhkewa ma kuht kuh in sruhmuhn kacl Jeova ac ke orekma wolacna nuhkewa lal uh!—Psalm 34:1; 71:17.