Fuhkah tuh Bible uh In Oan Na Ne Mihsenge?

Bible uh oan na ne mihsenge ac wacngihn na ma sikyak nuh kac. Ke srihpac se inge, kom kuh in eis ac riti sie copy kac ke pacl inge. Ac ke pacl ma kom sulaclah sie lweng wo ke ma suhmuhslah uh, kom kuh in luhlahlfongi lah kom riti sie copy ke ma suhmuhslah ma fal nuh ke ma sihmlac in pacl meet ah.a Tuhsruhktuh, fuhkah tuh Bible uh in oan na ne mihsenge finne ke ma pucspucs ma kuht lut in lohng muh sikyak nuh kac, oacna ke apkuhran in kuhlawi, mwe lain upac ma orek nuh kac ac oasr mwet suc srihke in ekuhllah kahs kac uh? Meac se tuh oruh in arlacna sacohk puk se inge?

Mwet pucspucs suc lutlut Bible eltahl puhla oacna ma mwet sap Paul el fahk inge: “Ma suhmuhslah nuhkewa ituckuh ke Nguhn luhn God.” (Luo Timothy 3:16) Eltahl luhlahlfongi lah Bible uh oan na ne mihsenge ke srihpen pa inge kahs sacohk luhn God ac God pa karuhnguhnwacng in oan na ne mihsenge uh. Faizal, suc kuht sramsramkihn ke muhtwacwaciyen mwe rit se inge ah el sulaclah in sifacna tuni ma inge ke el lutlut Bible. El arlacna fwefwelac ke ma el konwacack kac inge. Tiac paht tohkoh, el konwacack lah puhkantwen mwe luti luhn alu ma wacngihn in Bible. Sahyacn ma inge, ma el lotwelah ke Bible nuh ke oakwuck luhn God nuh sin mwet ac nuh ke facluh arlacna sun insiacl.

Faizal el fahk, “Ingena, nga luhlahlfongi na pwacye lah Bible uh mwe sang se sin God me. Sahyac pacna, fin God el kuh in oraclah facluh ac kuhsrao, yac tiac oasr kuh lal in use puk se inge nuh sesr ac in karuhnguhnwacng? Nga fin tiac insese nuh kac, ac oacpacna nga in srihkkihn kuh luhn God ma kuh liki nuhkewa! Ac suc nga uh in srihkkihn kuh luhn God?”​—Isaiah 40:8.