Kihsen Siyuck Luhn Mwet Rit

Ke aruhruhma lal Ezekiel, suc mukul se ma us mwe neinyuck ink luhn mwet sihm ac mukul ohnkohsr ma us kuhfwen mwe mweun uh luhmweyuck nuh kac?

Eltahl luhmweyuck nuh ke un lipufacn inkuhsrao ma kol ke kuhnanuclac lun Jerusalem ac eltahl ac fah wi pac ke kuhnanuclac luhn facl kuluk se lal Satan inge ke Armageddon. Mwe ahkuhtweyac kac inge ahksasucyeyucklac. Efuh ma inge enenweyuck?

Meet liki yac 607 B.C.E, Jeova el ahkkahlwemye nuh sel Ezekiel sie aruhruhma ke ma ac fah sikyak nuh in acn Jerusalem meet liki kuhnanuclac acn we. Ke aruhruhma se inge, Ezekiel el liye ma kuluk pucspucs ma sikyak we. El liye pac mukul ohnkohsr suc “kais sie selos us kuhfwen mwe mweun” in paholos. Oasr sie pac mukul weluhlos ac el “nukum nuknuk linen” suc us mwe neinyuck ink luhn sie mwet sihm. (Ezekiel 8:6-12; 9:2, 3) Sapkihnyuck mukul se inge in som nuh in siti uh nohfohn “ac akihlenyac motonsron mwet nuhkewa suc inse toasr ac ahsor ke srihpen ohiyac kuluk nuhkewa ma orek in siti uh.” Na, sapkihnyuck nuh sin mukul ohnkohsr inge ma oasr kuhfwen mwe mweun yohroh, eltahl in uniyac nohfohn mwet in siti uh suc wacngihn akucl ke motonsrolos. (Ezekiel 9:4-7) Meac kuht kuh in lotwelah ke aruhruhma se inge, ac suc mukul se ma us mwe neinyuck ink luhn sie mwet sihm?

Ezekiel el liye aruhruhma se inge in yac 612 meet liki pacl luhn Christ. Ke pacl se meet, kahs pahluh inge tuh ahkpwacyeyuck tukun yac lihmekohsr ke pacl se Jeova el lwelah un mwet mweun lun Babylon in kuhnahoslah acn Jerusalem. Ke inkacnek se inge, Jeova el orekmakihn mwet Babylon in sang kai upac nuh sin mwet kuhlwacnsap lal suc seahkos. (Jeremiah 25:9, 15-18) Tuhsruhktuh, meac sikyak nuh sin mwet Jew suc oaru ac tiac engan ke ma kuluk nuhkewa ma sikyak ke siti uh? Jeova el molweltahllah.

Ke aruhruhma se inge, Ezekiel el tiac sang mwe akucl na pwacye se nuh ke motonsron mwet uh kuh in wi kuhnahoslah siti sac. A, lipufacn uh pa kol kuhnanuclac luhn acn Jerusalem. Ke ma inge, kahs pahluh inge acse pacl wo nuh sesr in liye kuh kahlwem ke ma sikyak inkuhsrao inge. Jeova el fahk nuh sin lipufacn lal uh in oraclah oakwuck in kuhnahoslah mwet kuluk ac in ahkpwacyeye lah mwet suwohs ac fah moullac.a

Kahs in pahluh se inge ac fah oacyacpac ahkpwacyeyuck ke pacl fahsruh uh. Kuht tuh fahk meet muh mukul se ma us mwe neinyuck ink luhn mwet sihm sac luhmweyuck nuh ke mwet akmuhsralah luhlah suc srackna moul fin facluh ke pacl inge. Kuht oacyacpac fahk lah ke pacl se mwet uh luhngse in lohng ac eis pweng wo, e tuhfah akihlenyucki elos in wi moullac. Tuhsruhktuh ke kuhtuh pacl somlah, kuht enenuh in ekuhllah ahkuhtweyac lasr ke kahs pahluh inge ke srihpen ma kuht lotwelah kac uh. Kuht lotwelah in Matthew 25:31-33 lah Jesus pa oruh orekma in nuhnuhnkuh mwet uh. El ac fah oruh ma inge ke pacl in ongaiyac luhlahp uh. In pacl sacn, mwet nuhkewa suc ac fah nuhnuhnkweyuck oacna sheep ac fah moullac, ac mwet suc ac fah nuhnuhnkweyuck oacna goat ac fah kuhnausyucklac.

Pwacnacng, meac kuht lotwelah ke aruhruhma lal Ezekiel uh? Pa inge mwe lutlut lihmekohsr ma kuht kuh in lotwelah kac:

1. Meet liki na kuhnanuclac luhn acn Jerusalem, Ezekiel, Jeremiah ac Isaiah, eltahl sang kahs in sensen nuh sin mwet uh ke ma ac tuhfah sikyak nuh ke siti se inge. Eltahl oacna mwet topang. Ke pacl inge, Jeova el orekmakihn u srihsrihk ke mwet akmuhsralah inge in luti mwet lal uh ac sang kahs in sensen nuh sin mwet sahyac meet liki lwen in ongaiyac luhlahp uh tuhkuh. Pwacye lah mwet luhn God nuhkewa, eltahl wi ke orekma in fahkwack uh.​—Matthew 24:45-47.

2. Ezekiel el tiac wi sang mwe akucl ke mwet suc ac wi moullac uh. Ac ma inge oacpacna nuh sin mwet kuhlwacnsap luhn God ke pacl inge. Eltahl fahkwack muhkwena nuh sin mwet sahyac ac sensenkuhnuhltahl ke ma ac fah sikyak ke pacl fahsruh uh. Orekma in luti inge fin facluh nohfohn orek ke kahsruh luhn lipufacn.​—Fwackyuk 14:6.

3. Wacngihn mwe akucl fin motonsron mwet nuhkewa suc moullac in pacl lal Ezekiel. Ke pacl inge, wacngihn pac mwe akucl luhn mwet ma ac fah wi moullac. Meac mwet uh enenuh in oruh in moullac liki ongaiyac luhlahp uh? Ke pacl se ma eltahl lohng kahs in sensen, eltahl enenuh in etahel Christ, wuhlelah moul laltahl nuh sin God, ac sang kahsruh nuh sin mwet lili wiyacn Christ ke inkacnek in luti pweng wo. (Matthew 25:35-40) Ke pacl in ongaiyac luhlahp uh, mwet inge nuhkewa ac fah akihlenyucki, kalmac pa eltahl ac fah sollac in wi mouliyucklac.

4. Jesus Christ pa mukul se ma us mwe neinyuck ink luhn mwet sihm sac. Ke pacl in ongaiyac luhlahp uh, Jesus el ac fah akihlenyac u luhlahp sac ke el nuhnuhnkwacltahl oacna sheep. Eltahl ac kuh in wi moul ma pahtpaht fin facluh.​—Matthew 25:34, 46.b

5. Ke pacl inge, mukul ohnkohsr suc us kuhfwen mwe mweun laltahl uh, luhmweyuck nuh ke lipufacn nuhkewa inkuhsrao ma kolyuck sel Jesus. Ke pacl na sa, eltahl ac fah kuhnahoslah mwet kuluk ac ma kuluk nuhkewa.​—Ezekiel 10:2, 6, 7; Fwackyuk 19:11-21.

Mwe lutlut ma kuht lotwelah ke aruhruhma se inge uh kahsre kuht in luhlahlfongi lah Jeova el ac tiac kuhnahoslah mwet suwohs uh ke pacl se el ac kuhnahoslah mwet kuluk nuhkewa. (Luo Peter 2:9; 3:9) Mwe lutlut ma kuht lotwelah inge ahkacsmakihnye kuht lah orekma in luti lasr ke pacl inge uh arlacna yohk srihpac. Mwet nuhkewa enenuh in lohng kahs in sensen inge meet liki sahflah uh tuhkuh!​—Matthew 24:14.