Yac Kom “Luhngse Mwet Tuhlan Lom Oacna Kom Luhngse Kom Sifacna”?

“Kom fah luhngse mwet tuhlan lom oacna kom luhngse kom sifacna.”​—MATTHEW 22:39.

ON: 25, 36

KOM KUH IN TOHPOHKLAH?

Efuh kuh kuht enenuh in etahi luhngse luhn Jeova uh?

Fuhkah yohk srihpaciyen luhngse ke moul in pahyuck uh?

Mwet luhn God uh ahkkahlwemye fuhkah luhngse nuh sin mwet tuhlan laltahl uh?

1, 2. Ma suhmuhslah uh ahkkahlwemye fuhkah yohk srihpaciyen luhngse?

LUHNGSE pa ohiyac se ma wo emeet luhn Jeova God. (Sie John 4:16) Jesus Christ, suc God el oraclah meet liki ma nuhkewa sahyac, el wi pahpah tuhmwacl ke lusen yac billion inkuhsrao ac lotwelah luhpan luhngse luhn Jeova God. (Colossae 1:15) Jesus el ahkkahlwemye pac kain in luhngse se inge ke lusen moul lal inkuhsrao ac fin facluh. Pwacnacng kuht luhlahlfongi na pwacye lah Jeova ac Jesus ac fah kol kuht ke inkacnek suc ahkkahlwemye luhngse.

² Ke sie mwet tuh siyuck sel Jesus lah meac ma sap se ma yohk srihpac emeet uh, Jesus el fahk: “‘Kom fah luhngse Leum God lom ke insiom kewa, ke nguhnum kewa, ac ke nuhnkom kewa.’ Pa inge ma sap se ma yohk emeet ac yohk srihpac emeet. Ma sap se ahkluo yohk srihpac oacpacna ma se meet an: ‘Kom fah luhngse mwet tuhlan lom oacna kom luhngse kom sifacna.’”​—Matthew 22:37-39.

3. Suc “mwet tuhlan” lasr uh?

³ Arlacna yohk srihpac in ahkkahlwemye luhngse nuh sin mwet nuhkewa suc kuht fototo nuh se uh. Jesus el fahk muh kuht enenuh in luhngse Jeova ac oacyacpac mwet tuhlan lasr uh. Tuhsruhktuh, suc “mwet tuhlan” lasr uh? Kuht fin pahyuck, mwet tuhlan se lasr suc fototo emeet nuh sesr uh pa mukul tuhmwacsr kuh muhtwacn kiyacsr uh. Kuhtuh pac sin mwet tuhlan lasr uh pa mwet lili wiyacsr ke congregation ac mwet ma kuht ohsun nuh se ke orekma in luti uh. Ke mwe lutlut se inge, kuht ac etwacllah lah kuht ac ahkkahlwemye fuhkah luhngse nuh sin mwet tuhlan lasr uh.

AHKKAHLWEMYE LUHNGSE NUH SIN MUKUL KUH MUHTWACN KIYOM AN

4. Finne mwet uh sesuwohs, fuhkah moul in pahyuck ke pacl inge srackna kuh in insewowo?

⁴ Jeova el oracllah Adam ac Eve ac oracltahlweni nuh sie. Pa inge macruht se emeet fin facluh. God el ke eltahl in engankihn moul in pahyuck laltahl uh ac nwacklah facluh ke tuhlihk nahtuhltahl. (Genesis 1:27, 28) Tuhsruhktuh, tukun eltahl seahkos Jeova, moul in pahyuck laltahl uh muhsahllah ac mwet nuhkewa usrui ma kuluk ac misac seltahl. (Rome 5:12) Finne ohinge, moul in pahyuck ke pacl inge uh srackna kuh in insewowo. Ke Bible uh, oasr kahs in kahsruh nuh sin mukul tuhma ac muhtwacn kiyac sin Jeova, suc oraclah oakwuck in macruht uh.​—Riti Luo Timothy 3:16, 17.

5. Efuh kuh yohk srihpen luhngse ke moul in pahyuck uh?

⁵ Bible uh ahkkahlwemye lah luhngse uh yohk srihpac nuh ke sie fototo wowo inmahsrlon mwet luo. Ma inge arlacna pwacye ke moul in pahyuck uh. Mwet sap Paul el ahkuhtweyac luhngse pwacye se inge ke el fahk: “Luhngse el mongfihsracsr ac kuhlwacng, luhngse el tiac sok, luhngse el tiac sifacna kohnkihn, el tiac inse fuhlwact; luhngse el tiac oruh ma suhfal, el tiac nuhnkuh kacl sifacna, el tiac sa in muhlat, el tiac okoaclah ma kuluk orek nuh sel. Luhngse el tiacna fuhleack; el luhlahlfongi ac finsrak ac muhtweng in pacl nuhkewa. Luhngse el tiacna wacngihnlac.” (Sie Corinth 13:4-8) Ke pacl se kuht nuhnkuh ke kahs lal Paul inge ac orekmakihn, kuht kuh in engankihn sie moul in pahyuck na insewowo.

6, 7. (a) Meac Bible uh fahk ke sifac uh? (b) Meac mukul Christian pahyuck se el enenuh in oruh nuh sin muhtwacn kiyacl?

⁶ Jeova el sulaclah tari lah suc sifen sucu uh. Paul el ahkuhtweyac: “Nga kena kowos in kahlwem kac lah Christ el sifen mukul nuhkewa, ac mukul tuhma el sifen muhtwacn kiacl, ac God el sifen Christ.” (Sie Corinth 11:3) Tuhsruhktuh Jeova el sapkihn mukul tuhma in oacna sifac wo se ac tiac suhlallacl nuh sin muhtwacn kiyacl uh. Jeova el sie sifac na kuhlwacng ac el tiac nuhnkuh kacl sifacna. Ke srihpac se inge, Jesus el suhnakihn kolyuck wo luhn God uh. El fahk: “Nga luhngse Pahpah.” (John 14:31) Fuhnuh Jeova el suhlallacl, Jesus el luhkuhn na tiac puhla ma inge.

⁷ Mukul pahyuck se el finne sifen muhtwacn kiyacl uh, Bible uh fahk lah el enenuh in ahkfuhlwactye muhtwacn kiyacl uh. (Sie Peter 3:7) El ac oruh fuhkah ma inge? El kuh in nuhnkuh yohk ke ma muhtwacn kiyacl uh enenuh ac suhnakihn sulaclah lal uh. Bible uh fahk: “Mukul tuhma, kowos in luhngse muhtwacn kiowos, oacna ke Christ el luhngse church [congregation] ac acsang moul lal kac.” (Ephesus 5:25) Ahok, Jesus el oacyacpac kihsackuhnacng moul lal nuh sin mwet tuhma lutlut lal uh. Ke pacl se sie mukul pahyuck el ahkkahlwemye luhngse oacna Jesus, ma inge ac oruh fihsracsr nuh sin muhtwacn kiyacl in luhngse el, suhnakuhnuhl ac ahkfuhlwactye sulaclah lal uh.​—Riti Titus 2:3-5.

LUHNGSE MWET LILI WIYOM

8. Meac kuht enenuh in puhla sin mwet lili wiyacsr uh?

⁸ Ke pacl inge, million sin mwet fin facluh nohfohn alu nuh sin Jeova. Mwet inge pa mwet lili wiyacsr uh. Fuhkah puhlakihn lasr nuh seltahl? Bible uh fahk: “Lwelah kuht in oruh wo nuh sin mwet nuhkewa, ac yohkna nuh selos suc mwet wiyacsr in luhlahlfongi.” (Galatia 6:10; riti Rome 12:10.) Mwet sap Peter el suhmuhslah ac fahk lah ‘ahkostwen lasr nuh ke ma pwacye’ uh enenuh in kahlwem ke ‘luhngse lasr nuh sin mwet lili wiyacsr.’ Peter el oacyacpac fahk nuh sin mwet Christian lili wiyacl uh: “Ac yohk liki ma nuhkewa, kowos in luhngse sie sin sie ke inse pwacye.”​—Sie Peter 1:22; 4:8.

9, 10. Meac oruh mwet luhn God uh in inse sefanna?

⁹ U se lasr fin facluh nohfohn inge siena. Efuh? Mweyen oasr luhngse yohk ac pwacye lasr nuh sin mwet lili wiyacsr uh. Yohk liki na, ke srihpen kuht luhngse Jeova ac kuht ahkos masap lal uh pwacnacng el kahsre kuht ke kuh se ma yohk liki kuh nuhkewa sahyac, pa nguhn muhtahl lal uh. Nguhn luhn God uh kahsre kuht in inse sefanna yurin mwet lili wiyacsr fin facluh nohfohn.​—Riti Sie John 4:20, 21.

¹⁰ Paul el lihksreni ahkkahlwemye yohk srihpaciyen luhngse inmahsrlon mwet lili wiyacsr uh ke el suhmuhslah ma inge: “Kowos enenuh in moulkihn pahkotwen, kuhlwacng, inse puhsisacl, mongfihsracsr, ac muhtweng. Ke pacl nuhkewa ma kuhtwena suwos oasr toasr la inmahsrlowos, kowos in muhtweng ac nuhnak muhnahs nuh sin sie sin sie oacna ke Leum el nuhnak muhnahs nuh suwos. Ac kowos in sang luhngse in kapreni ma inge nuhkewa in ma sefanna lac, mweyen luhngse pa yohk srihpac emeet.” (Colossae 3:12-14) Kuht arlacna srui yohk lah oasr luhngse, suc “ma sefanna lac,” inmahsrlosr finne kuht tuhkuh ke siena acn.

11. Meac akihlenyuck ke u luhn God?

¹¹ Luhngse pwacye ac inse sefanna luhn mwet kuhlwacnsap luhn Jeova uh pa oruh akihlenyuck eltahl oacna mwet suc wi ke alu pwacye. Jesus el fahk: “Kowos fin luhngse sie sin sie, na mwet nuhkewa ac fah etuh lah kowos mwet tumuk lutlut.” (John 13:34, 35) Mwet sap John el suhmuhslah pac: “Arulacna kahlwem eklac inmahsrlon tuhlihk nuhtin God ac tuhlihk nuhtin Devil. Kuhtwena mwet suc tiac oruh ma suwohs kuh tiac luhngse mwet wiyacl, el tiac tuhlihk nuhtin God. Pa inge mwe luti suc kowos lohng ke muhtwacwacack me, kuht enenuh in luhngse sie sin sie.” (Sie John 3:10, 11) Luhngse ac inse sefanna pa akihlenyac Mwet Loh luhn Jeova uh oacna mwet tuhma lutlut pwacye luhn Christ. Pa inge mwet suc God el orekmakihn in fahkwack pweng wo ke Tohkohsrahi nuh sin mwet fin facluh nohfohn.​—Matthew 24:14.

OREKENI “U NA LUHLAHP SE”

12, 13. Meac mwet ke “u na luhlahp se” oruh ke pacl inge, ac meac eltahl ac sun ke pacl na sa?

¹² Inkaiyen mwet kuhlwacnsap luhn Jeova ke pacl inge wi ke “u na luhlahp se,” suc tuhkuh ke kain in acn fin facluh ac eltahl ahkkahlwemye kahsruh laltahl nuh ke Tohkohsrahi uh. Eltahl “inge pa mwet suc painmoullac ke pacl in ahkkweok luhlahp. Elos ohllah nuknuk lalos ac ahkfasrfasrye ke srahn Lamb” ke eltahl ahkkahlwemye luhlahlfongi laltahl nuh ke mwe kihsac lal Jesus ke mwe lahngo. Mwet suc wi ke u luhlahp se inge luhngse Jeova ac Wen nahtuhl ac eltahl alu nuh sin Jeova “ke lwen ac fong.”​—Fwackyuk 7:9, 14, 15.

¹³ Ke pacl na sa, God el ac fah kuhnahoslah facl kuluk se inge ke lwen in “ongaiyac luhlahp uh.” (Matthew 24:21; riti Jeremiah 25:32, 33.) Tuhsruhktuh Jeova el ac fah karuhnguhnwacng ac kol mwet kuhlwacnsap lal nuh ke facl sasuc uh mweyen el luhngse eltahl. In oacna ke el wuhlelah apkuhran nuh ke yac 2,000 somlah ah, “El ac fah elah sronin muhtahlos nuhkewa. Ac fah wacngihn misac, wacngihn ahsor kuh tuhng kuh kweok, mweyen ma nuhkewa meet ah wacngihnlac.” Yac kom rahrahlac in wi muhta ke Paradise tukun ma kuluk, mwe kweok ac misac wacngihnlac?​—Fwackyuk 21:4.

14. Fuhkah kapkapack luhn u luhlahp se inge?

¹⁴ Ke yac 1914 suc pa inge muhtwacwacyen lwen sahflah uh, tausin ekahsr na ke mwet kuhlwacnsap luhn God. U srihsrihk se ke mwet akmuhsralah inge mokleyuck ke srihpen luhngse laltahl nuh sin mwet tuhlan laltahl uh ac ke mwe kahsruh ke nguhn luhn God, eltahl som fahkwack pweng wo ke Tohkohsrahi eltahl finne sun ma upac. Meac sahflahiyen ma inge? Ke pacl inge, oasr u na luhlahp se ke mwet suc oasr finsrak la in moul ma pahtpaht fin facluh. Apkuhran nuh ke million oalkosr ke Mwet Loh luhn Jeova ke puhs liki congregation 115,400 fin facluh nohfohn ac pihsac inge srackna kap. Ke sie mwe puhpuhlyuck, puhs liki mwet lili 275,500 sasuc suc bacptaislac ke yac 2014. Kalmac pa mwet 5,300 bacptaislac ke kais sie wik.

15. Mihsenge, mwet pucspucs eltahl lohng fuhkah ke pweng wo uh?

¹⁵ Kuht arlacna fwefwelac ke pacl se kuht liye pihsen mwet suc wi lohng pweng wo ke Tohkohsrahi uh. Mihsenge, mwe rit nahtuhsr uh oreklac nuh ke kahs itfoko kuhtuh. Tower in San uh pa mackuhsin se ma puhs emeet kihtakatlah la fin facluh nohfohn. Puhs liki million luhmngaul luo ke mwe rit se inge printiyucklac ke kais sie mahlwem ac mackuhsin uh oreklac ke kahs 247. Ac puk in lutlut Bible se inge Mea Baibel el Luti Na Paye? luhngasyucklac ahluhkwelah kahs 250 kuhtuh. Ne ingena, puhs liki million luofoko ke mwe rit inge ma printiyucklac.

16. Meac se oruh u luhn Jeova uh tahfwelah na in kapkapack?

¹⁶ U lasr uh tahfwelah na in kapkapack ke srihpen luhlahlfongi lasr nuh sin God ac ke kuht eis Bible oacna Kahs lal. (Sie Thessalonica 2:13) Kuht tahfwelah in engankihn mwe insewowo sin Jeova me finne ke mwe lain ac ma upac ma Satan el oruh nuh sesr uh.​—Luo Corinth 4:4.

LUHNGSE MWET SAHYAC PACL NUHKEWA

17, 18. Meac Jeova el luhngse kuht in puhla sin mwet suc tiac alu nuh sel uh?

¹⁷ Kain in ohiyac luhn mwet nuh ke orekma in luti lasr uh. Kuhtuh mwet uh lohng kuht ac kuhtuh pac sruhnga pweng kuht us uh. Meac Jeova el ke kuht in puhlakihn sin mwet suc tiac alu nuh sel uh? Finne fuhkah ohiyen mwet sahyac uh nuh ke pweng kuht us uh, kuht ukwe kahs in kai luhn Bible uh. Ma inge fahk: “Pacl nuhkewa kowos in oruh sramsram lowos nuh selos in ahkinsewowoyaclos ac mwe puhrakack nuhnak lalos, ac kowos in ahkolah in topuk kuhtwena mwe siyuck lalos ke top fal ac suwohs.” (Colossae 4:6) Pacl nuhkewa kuht ahkuhtweyac luhlahlfongi lasr uh, kuht ke oruh ma inge “ke kahs fihsracsr ac ke suhnak” mweyen kuht luhngse mwet tuhlan lasr uh.​—Sie Peter 3:15,16.

¹⁸ Finne mwet uh foloyak kuh sruhnga lohng pweng kuht us uh, kuht srackna ahkkahlwemye luhngse nuh sin mwet tuhlan lasr inge ac etahi mwe srihkasrak lal Jesus uh. Ke pacl se ma “mwet uh fahk kahs in ahkkulukyacl, el tiac topkohlos ke kahs kuluk,” a Jesus el luhlahlfongi Jeova. (Sie Peter 2:23) Pwacnacng ke pacl nuhkewa, kuht enenuh in ahkkahlwemye ohiyen inse puhsisacl ac orekmakihn kahs in kahsruh inge: “Nimet fohlohkihn ma kuluk ke ma kuluk kuh sang kahs kuluk in lain kahs kuluk. A kowos in fohlohkihn ke kahs in ahkinsewowoye.”​—Sie Peter 3:8, 9.

19. Ohiyac fuhkah kuht enenuh in ahkkahlwemye nuh sin mwet lokoalok lasr uh?

¹⁹ Ohiyen inse puhsisacl ac kahsre kuht in ahkos kahs in kahsruh na yohk srihpac ma Jesus el ahkkahlwemye inge. El ahkuhtweyac: “Kowos lohng tuh fwack tari, ‘Luhngse mwet tuhlan lom, ac sruhnga mwet lokoalok lom.’ Ac inge nga fahk nuh suwos: Luhngse mwet lokoalok lowos ac pre kaclos suc kalyei kowos, tuh kowos fah kuh in pahngpahng tuhlihk nuhtin Pahpah tomowos suc inkuhsrao. Tuh El oruh kalmen faht lal uh in sreyac mwet kuluk ac mwet wo oacna sie, ac El sang pac af nuh fin mwet suwohs ac mwet sesuwohs.” (Matthew 5:43-45) In oacna mwet kuhlwacnsap luhn God, kuht enenuh in luhngse mwet lokoalok lasr uh finne fuhkah ohiyacltahl nuh sesr.

20. Kuht etuh fuhkah lah luhngse nuh sin God ac nuh sin mwet tuhlan lasr uh ac fah nwacklah facluh nohfohn? (Liye petsac se meet ke mwe lutlut inge.)

²⁰ Ke pacl nuhkewa, kuht enenuh in ahkkahlwemye luhngse nuh sin Jeova ac nuh sin mwet tuhlan lasr uh. Mwet uh finne lain kuht ac sruhnga pweng ma kuht us uh, kuht srackna kahsreltahl ke pacl eltahl enenuh kahsruh. Mwet sap Paul el suhmuhslah ma inge: “Kowos in tiac soemoul nuh sin kuhtwena mwet, soemoul sefanna ma oasr yuruwos pa luhngse sie sin sie. El suc luhngse mwet ngiac el ahkfalye Ma Sap lal Moses. Ma sap uh fahk: ‘Nik kom kosro; nik kom ahkmas; nik kom pihsrapasr; nik kom rahpkuh’ ma inge nuhkewa, ac kuhtwena ma sap sahyac, tuhkweni oan ye ma sap sefanna: ‘Kom fah luhngse mwet tuhlan lom oacna ke kom luhngse kom sifacna.’ Kom fin luhngse sie mwet, kom ac tiacna orekma kuluk nuh sel; ke ma inge luhngse el mwe ahkfalye nohfohn ma sapkihnyuck in Ma Sap uh.” (Rome 13:8-10) Finne facl kuluk suc kolyuck sel Satan inge wacngihn inse sefanna kac ac nwacnwaclah ke orekma suhlallacl, mwet kuhlwacnsap luhn God uh ahkkahlwemye luhngse pwacey nuh sin mwet tuhlan laltahl uh. (Sie John 5:19) Tukun Jeova el kuhnahosuhllah Satan ac demon lal uh wi facl kuluk se inge, luhngse pa ac nwacklah facluh nohfohn uh. Mwe insewowo na yohk se pa inge ke mwet nuhkewa fin facluh luhngse God ac mwet tuhlan laltahl uh!