Akkeye Lungse Su Tia Na Wanginla
‘Lungse el muteng in ma nukewa. Lungse el tia na wanginla.’—1 KORINT 13:7, 8.
1. (a) Fuka lungse el akkalemyeyuk pal nukewa? (b) Nu sin su a nu ke mea met puspus elos filiye lungse lalos ka?
MA PUKANTEN akkalemyeyuk ke sifwe se inge lungse. Kain in oiya se inge kaksakinyuk a lumeyukla nu ke kain in on puspus. Lungse el me enenu lun sie met. Tusruktu buk puspus a petsa puspus akkalemyeyuk pal nukewa me sramsram ke lungse ku love stories su tia sikyuk na paye su oana pihlenfong na, a oasr kain in me rid a petsa inge ke niyen kuka. Ne ouinge, lungse paye nu sin God a nu sin met tulan munasla na paye. Kut liye ke mutasr ke ma Baibel el palye ke len safla inge sikyuk. Met elos fwa “sifwana lungselos, elos fwa met lungse mani, . . . lungse me akengun yok liki lungse God.”—2 Timote 3:1-5.
2. Kas in sensen fuka Baibel el akkalemye ke lungse su tia mwo nu ke ma puspus?
2 Oasr ku lun met in akkalemye lungse, tusruktu Kas lun God sang kas in sensen nu sesr liki kain in sensen tia mwo ke ma puspus. A Baibel el akkalemye ke ma sikyuk ke pal se kain in lungse inge kapek ke insien sie met. (1 Timote 6:9, 10) Ya kom esam ke ma met sap Poul el simusla kel Dimas? Fwinne el asrouki nu sel Poul, tusruktu Dimas el som lukel meyen el lungse ma puspus lun fwalu. (2 Timote 4:10) A met sap Jon el akkalemye nu sin met Kristian nukewa in fwasr liki me sensen se inge. (Ridi 1 Jon 2:15, 16.) Kut fwin lungse fwalu a ke ma puspus su sa in wanginla a ke akwuk nukewa lal, ma inge el tia me akinsemwomwoye nu sin God su kulang a ke ma nukewa su tuku sel.
3. Kut sun kain in ma upa fuka? A kusensiyuk fuka sikyak?
3 Fwinne kut muta fwin fwalu, tusruktu kut tia ma lun fwalu. Ke ma inge, oasr ma upa nu sesr in fwasr liki kain in nunak su tia mwo ke lungse. Arlana yok sripe kut in tia lela kut sifwana in akkalemye ke kain in lungse su tia mwo ku nunku kesr sifwana. Ke ma inge, nu sin su kut enenu in akkeye a akkalemye lungse mwo a paye inge? Kain in me kasru fuka oru kut in akkeye lungse in muteng in ma nukewa a in tia na wanginla? Fuka inkanek inge ku in akinsemwomwoye kut ke pal inge a sang kasru nu ke pal fwasru lasr? Kut enenu me top fwal nu ke nunak lun God tu kut in eis me kasru su kut enenu.
Akkapye Lungse nu sin Jeova
4. Lungse lasr nu sin God el yokelik fuka?
4 In akkapye kalmekin in akola a akkeye kapkapak lun ma se. Nunku ke sie met ima su kafweang yok in akola fok a eokiye fute. El lulalfongi a sano la fute inge fwa kapkapak. (Hibru 6:7) Ke inkanek ouinge, lungse lasr nu sin God enenu in kapkapak. Mea eneneyuk tu lungse lasr nu sin God in yok a kapkapek? Kut enenu in kafweang in oru insiesr in oana fok mwo, su kut taknelik ka futen ma paye lun Togusrai. Kut ku in oru ma inge ke kut moniyuk in lutlutkin Kas lun God in akyokye etauk lasr kel. (Kolosse 1:10) Kafweang lasr in wi pal nukewa ke meeting nukewa lun congregation a sang me top fwa ku in kasre kut in akyokye etauk lasr. Ya kais sie sesr kafweang na paye in eis etauk yok?—Soakas 2:1-7.
5. (a) Kut ku in lutlut fuka ke oiya mwo puspus lun Jeova? (b) Mea kom ku in fwak ke nununku sumwos, lalmetmet, a ku lun God?
5 Ke inkanek lun Baibel, Jeova el akkalemye nu sesr oiya mwomwo lal. Kut fwin lutlutkin ma Simusla a in eis etauk mwomwo kel Jeova, kut ku in aksaokye na paye oiya mwomwo puspus lal, ke nununku sumwos, ku, lalmetmet, a yok liki nukewa ke lungse lal su wangin ma oana. Jeova el akkalemye nununku sumwos ke inkanek nukewa lal a ke masap sumwosmwos nukewa lal. (Duteronomi 32:4; Sam 19:7) Kut ku in orekmakin pal in nunku yok ke ma orekla puspus lun Jeova a kut in kaksakin lalmetmet yoklana lal. (Sam 104:24) Ma orekla puspus in kosrao el sang me akpayeye la Jeova pa Sropon ku yoklana su oasr pal nukewa a tia ku in munasla.—Isaia 40:26.
6. Fuka lungse lun God akkalemyeyuk nu sesr? A ma inge akkeye kom fuka?
6 Mea kut ku in fwak ke lungse, su oiya mwo se meet lun God? Ma inge sun yen nukewa a akkeye kut nukewa. El akkalemye ke kain in lungse inge ke el sang me lango in molela metu. (Ridi Rom 5:8.) God el orala me sang mwomwo inge nu sin met nukewa fwalu, tusruktu nu selos mukena su akkalemye pa lungse lalos nu sin God a lulalfongi nu sin Mwen natul fwa eis me insemwomwo ka. (Jon 3:16, 36) Orekma mwomwo lun God in kisekunul Jisus oana sie me kise lun lango nu ke ma koluk lasr oru kut in akkalemye lungse lasr nu sin God.
7, 8. (a) Mea eneneyuk nu sesr tu kut in akkalemye lungse nu sin God? (b) Met kulansap lun God elos akos masap lal fwinne elos sun ma upa fuka?
7 Kut ku in akkalemye fuka lungse lasr nu sin God in sang kulo nu ke ma nukewa su el oru nu sesr? Arlana yok sripe me top su oasr ke ma simusla: “Pa inge lungse lun God, tu kut in liaung masap lal; a masap lal tia toasr.” (1 Jon 5:3) Aok, lungse lun Jeova God el akkeye kut in akos masap nukewa lal. Pa inge sripe paenang kut sang ma lo ke inen God a ke Togusrai lal, su akkeye met puspus. Kafweang lasr in oru ma inge ke inse kewa lasr el sie me akpayeye la kut akos masap lun God ke nunak a inse paye lasr.—Mattu 12:34.
8 Met lili wiyesr fwin fwalu nufon elos kafweang in orekmakin masap nukewa lun God fwinne elos sun met puspus su tia insemwomwo in long a pulesru peng mwo lun Togusrai. Elos tia fuleak ke orekma mwomwo lalos in akpayeye orekma in luti lalos. (2 Timote 4:5) Ke inkanek oapana, kut akkeyeyuk in fwakak nu sin met puspus etauk ke God ke ku lasr kewa a in akos masap nukewa lal.
Efu ku Kut Lungse Jisus Kraist su Leum Lasr
9. Jisus el muteng ke mea, a fuka ma inge akinsemwomwoye kut?
9 Sayen lungse lasr nu sin God, oasr pa sripe puspus lasr paenang kut akkeye pa lungse lasr nu sin Mwen natul. Ke kut lotela ma puspus kel, lungse lasr nu sel yokyokelik fwinne kut tia liyel Jisus. (1 Piter 1:8) Mea kutu ma su Jisus el muteng ka? Ke el oru ma lungse lun Papa tumal, Jisus el srungeyuk ke wangin sripe, kalyaiyuk, metu elos kaskaskou nu sel, a el sun me keok ke sripen met puspus srunga el. (Ridi Jon 15:25.) Lungse lun Jisus nu sin Papa tumal akkeyel in muteng ke ma upa nukewa inge. A ke sripen lungse yok lal, mise lal orala me lango ku me molela nu sin met puspus.—Mattu 20:28.
10, 11. In fwal nu ke ma Jisus el oru nu sesr, mea kut lungse na paye in oru?
10 Orekma mwomwo lun Jisus el akkeye kut in oru pa ma mwo nu sel. Ke kut nunku ke ma Kraist el oru nu sesr, lungse lasr nu sel yokyokelik. Oana met kulansap lal, kut enenu in orala akwuk mwo in akkeye a akkalemye pal nukewa lungse paye in kasre kut in muteng in akpayeye masap lal in sang ma lo ke Togusrai a in oru met tuma lutlut.—Mattu 28:19, 20.
11 Kut lungse in akkalemye kulo lasr ke lungse lun Kraist nu sin met nukewa, paenang kut ke aksafyela kunokon lasr meet liki safla e tuku. (Ridi 2 Korint 5:14, 15.) Lungse su Kraist el akkalemye arlana yok sripe nu ke orekma lal in akpayeye akwuk lun God nu sin metu. A ke me srikasrak su Kraist el likiye nu sesr kut in etawi kasru kais sie sesr in akpayeye ma kunesr nu ke akwuk lun God. Ke ma inge oasr ma eneneyuk sesr in akkeye lungse lasr nu sin God ke inkanek yok. (Mattu 22:37) Kut fwin orekmakin ma Jisus el luti a in akos masap nukewa lal, kut akkalemye la kut lungse el a kut lungse na paye in sang kasru nu ke kolyuk lun God fwinne oasr ma upa su sikyak, oana ke ma Jisus el oru.—Jon 14:23, 24; 15:10.
Kafweang in Akpayeye Inkanek Mwo lun Lungse
12. Mea kalmen kas lal Poul inge “sie inkanek mwo liki”?
12 Met sap Poul el etawi Kraist pal nukewa. Ke sripen el fwasr tokin Kraist, paenang oasr sukosok lal Poul in sramsram ke el kaifwe met lili Kristian nukewa in etawel pa. (1 Korint 11:1) Poul el kaifwe met Kristian nukewa fwin an Korint in akkalemye moniyuk lalos pal nukewa in suk ke me sang puspus lun ngun mutal lun God su oasr in century se meet. Kain in me sang inge pa in akkeyela mas a in kaskas ke loa, tusruktu Poul el akkalemye nu selos la oasr ma saye su arlana yok sripe elos enenu in suk. In 1 Korint 12:13, el akuteye ouinge: “A sie inkanek mwo liki nga fwakak nu sumwos.” Fus toko puspus akkalemye la inkanek mwo liki inge pa inkanek lun lungse. Ke oiya fuka el mwo liki? Poul el orekmakin sie me pupulyuk nu ke kalmeyen kas lal. (Ridi 1 Korint 13:1-3.) Fwin oasr yurol oiya mwomwo puspus a ku in oru ma mwolana puspus tusruktu wangin lungse yurol, ya el yok sripe? Mo tia! Ke kasru lun ngun lun God, el akuteye ma paye inge. Sie me lutlut na mwomwo pa el akuteye inge su kut ku in orekmakin pa ke pal inge!
13. (a) Mea yeartext lasr nu ke yea 2010? (b) Ke oiya fuka lungse el tia wanginla?
13 Ma se tok u su Poul el akuteye nu sesr pa ke kalmeyen lungse. (Ridi 1 Korint 13:4-8.) Ingena, lela kom in tuni kom sifwana fwin kom akpayeye ma eneneyuk nukewa in akkalemye lungse. Loang akmwoye nu ke fus 7 a ke pulo kas se meet ke fus 8: ‘Lungse el muteng in ma nukewa. Lungse el tia na wanginla,’ a pa inge yeartext lasr nu ke yea 2010. Loang nu ke fus 8, Poul el fwak la me sang lun ngun, wekunang orekma in palye a kaskas ke loa, su orekmakinyuk ke mutaweyen congregation lun met Kristian, e fwa tui a wanginla. Ma inge aksafyeyukla tari. Tusruktu lungse el oasr pal nukewa. Jeova el tingtingi ke lungse, a el moul pal nukewa. Ke ma inge lungse el tia na wanginla, ku safla. Ma inge fwa oasr nu tok ma patpat oana oiya mwomwo lun God lasr su moul pal nukewa, aok ma patpat.—1 Jon 4:8.
Lungse el Muteng in Ma Nukewa
14, 15. (a) Fuka lungse el ku in kasre kut in muteng ke ma upa puspus? (b) Efu ku sie brother fwusr wiyesr el tia fuleak lungse lal nu sin God?
14 Mea kasru met Kristian in muteng fwinne oasr me srufwe puspus, me keok a kain in ma upa nukewa su elos pulakin ke moul lalos? Ma se su kasrelos pa lungse paye nu sin met nukewa. Kain in lungse inge oasr kalme yok liki na in sang ma saok lasr. Ma inge oru kut in sruokye oiyen oaru lasr a fwin eneneyuk nu ke na kut mise ke sripen orekma in kulansap lasr nu sin Kraist. (Luk 9:24, 25) Nunku akmwoye ke oiyen oaru lun Met Lo puspus su sisila nu in prison a pulakin keok ke kalpous, a orekma upa ke pal in Meun Lulap II a tokin pal se inge.
15 Oana ke ma sikyak nu sel Wilhelm, sie Met Lo fwusr in an Germany. El tia fuleak lulalfongi lal, a el sruokye paye a oaru lal ke pal se el anwuki sin un met meun lun met Nazi. El akkalemye kas safla lal ke sie leta nu sin sou lal: “Yok liki nukewa kut enenu in lungse God, in oana ke Leum lasr Jisus Kraist el sapkin kut in oru. Kut fwin tu na ku, el fwa akinsemwomwoye kut.” Tokin pal se inge, sie sin sou lal el simusla kas inge, su akkalemyeyuk ke sie me lutlut ke Tauer in San: “Ke lusen pal in ma upa, oana sie sou kut akpayeye pal nukewa la lungse lasr nu sin God pa ma yok sripe se meet ke moul lasr.” Pa inge oiya mwomwo su akkalemyeyuk pa sin met lili puspus wiyesr ke pal inge su oasr ke niyen prison fwin an Armenia, an Eritrea, an South Korea, a kutupa an saye. Brother nukewa inge elos sruokye oaru lalos in akkalemye lungse lalos nu sin Jeova.
16. Met lili wiyesr fwin an Malawi elos muteng ke mea?
16 In an puspus, oasr kain in me srufwe puspus su srike lulalfongi a oiyen muteng lun met lili wiyesr. Ke lusen yea 26 Met Lo lun Jeova fwin an Malawi elos muteng ke masap lun guferment in tia oru kutena orekma in alu nu sin God, oasr me kalyai upa, kutupa orekma tia mwo nu selos. Tusruktu kafweang lalos in muteng akinsemwomwoyeyuk. Ke pal se me kalyai sikyak, oasr 18,000 Met Lo in an se inge. Tokin yea tolngoul piselos ekla pal luo, oasr ke 38,393. Kain in oiya mwomwo inge sikyak pa ke an saye puspus.
17. Ma upa fuka kutu sin met lili su met in sou lalos tia wi ke lulalfongi elos sun? A efu ku elos ku in muteng ke me lain lun sou lalos?
17 Me kalyai upa su orek sin met lokwalok nukewa nu sin met kulansap lun God el arlana upa. Tusruktu fwin me lain nu sin met Kristian puspus tuku sin met in sou lalos sifwana, ma inge upa liki. Meyen orekma in lain lun met in sou ku in oru me akasor yok nu ke nunak a pulakin lun sie met Kristian. Ya Jisus el tia palye la ma inge ku in sikyak? Aok, a oasr met Kristian puspus pulakin ke moul lalos la kas lun Jisus inge el arlana paye. (Mattu 10:35, 36) Met fwusr elos muteng ke me lain lun papa a nine kiyelos su tia wi lulalfongi. Kutu met fwusr sapkinyuk in som liki loom selos, ne ouinge Met Lo Kristian wiyelos kasrelos a paing met fwusr inge nu in loom selos. Oasr kutupa met Kristian su met in sou lalos srungelosla. Mea kasru met lili nukewa inge in muteng ke orekma tia mwo inge? Aok, lungse lalos nu sin u lun met lili, a yok liki nukewa lungse paye lalos nu sin Jeova a nu sin Mwen natul kasrelos in muteng.—1 Piter 1:22; 1 Jon 4:21.
18. Ke inkanek fuka lungse su muteng in ma nukewa el sie me kasru yok nu sin met Kristian payuk nukewa?
18 Oasr pa oiya puspus ke moul su enenu in akkalemye kain in lungse su ku in muteng ke ma nukewa. Ke moul lun mokul a mutan su payuk, lungse ku in kasrelos in akos kas lun Jisus inge: “Ma God el fwalseni, lela met in tia eselik.” (Mattu 19:6) Fwin elos pulakin “keok in ikwe,” siyanyen Kristian elos enenu in akesmakinyelos la Jeova el wi ke moul in payuk lalos. (1 Korint 7:28) Baibel el akkalemye la ‘lungse el muteng in ma nukewa,’ a sie mokul a mutan payuk su orekmakin oiya mwomwo inge ku in kasrelos in fototo nu sin sie sin sie a in karungin moul in payuk lalos in mwo pal nukewa.—Kolosse 3:14.
19. Mea sikyak nu sin met kulansap lun God tokin kusrusr a paka sikyak?
19 Lungse el kasre kut in muteng in ma nukewa ke pal su oasr ongoiye puspus sikyak. Pa inge ma sikyak ke pal se oasr kusrusr lulap sikyak fwin an Peru a ke pal se paka fokoko inge pangpang Katrina el kunausla loom puspus fwin an United States. Met lili wiyesr puspus su muta fwin an inge tula loom selos a ma saok puspus lalos ke pal se ongoiye inge sikyak. Lungse el mokle met lili nukewa ke u lasr in sang me kasru, a oasr met lili puspus su lungse in wi ke orekma in sifwil musai loom selos a in akmwoye Kingdom Hall puspus. Kain in orekma mwomwo inge sang me akpayeye ke lungse paye lun met lili wiyesr a nunak mwomwo lalos nu sin sie sin sie pal nukewa a ke kutena ma upa su sikyak.—Jon 13:34, 35; 1 Piter 2:17.
Lungse El Tia na Wanginla
20, 21. (a) Efu ku lungse el arlana saok? (b) Efu ku kom lungse na paye in orekmakin inkanek lun lungse?
20 Inmasrlon met lun Jeova ke pal inge, kut ku in liye la arlana mwo in orekmakin inkanek mwomwo lun lungse. Paye la, ma inge arlana mwo nu ke oiya a ma sikyak nukewa. Pa inge sripe paenang tokin met sap Poul el akuteye la me sang lun ngun lun God el wanginla a congregation lun met Kristian el kapkapek tari, su ku in pupulyukkin nu ke sie met matou a tila tulik srisrik, el fwak kas inge in 1 Korint 13:13: “A inge on lalalfongi, fwinsrak, a lungse, ma tolu inge; a ma yok selos lungse!”
21 Ke ma inge, ma puspus su kut lulalfongi ka fwa akpayeyuk a ke sripe se inge lulalfongi fwa aksafyela. A fwinsrak ke mwulela nukewa su kut lungse na paye in liye in akpayeyuk fwa tia sifwil eneneyuk tokin ma nukewa aksasuyeyuk tari. Na fuka ke lungse? Ma inge fwa tia wanginla, ku aksafyela. Ma inge fwa oan pal nukewa. Ke fwinsrak lasr ke moul ma patpat, kut fwa ku in liye a eis etauk yok ke oiya puspus ke lungse lun God. Ke inkanek in oru ma lungse lun God a kom kafweang in akkalemye lungse paye su fwa tia wanginla, kom ku in moul ma patpat.—1 Jon 2:17.
Kom E Topuk Fuka?
• Efu ku kut enenu in karungin kut liki lungse su tia mwo?
• Lungse el ku in kasre kut in muteng ke mea?
• Ke oiya fuka lungse el tia na wanginla?
[Blurb on page 31]
Yeartext nu ke 2010 fwa: ‘Lungse el muteng in ma nukewa. Lungse el tia na wanginla.’—1 Korint 13:7, 8.
[Picture on page 29]
Lungse nu sin God akkeye kut in sang ma lo
[Picture on page 30]
Lungse mwomwo el kasru met lili wiyesr fwin an Malawi in muteng me kalyai puspus