Inkacnek Pucspucs Fuhkah Jeova El Ahkkahlwemye Luhngse Lal Nuh Sesr?

1. Meac mwet sap John el ahkkweye mwet Christian uh in nuhnkuh kac, ac efuh?

MWET sap John el ahkkweye kuht in nuhnkuh yohk ke luhngse yohk luhn Jeova nuh sesr uh. Sie John 3:1 fahk: “Liye luhpan luhngse luhn Pahpah nuh sesr!” Ke kuht muhta nuhnkuh ke luhpan luhngse luhn Jeova nuh sesr ac ke inkacnek ma el ahkkahlwemye luhngse lal nuh sesr uh, kuht fototoyang nuh sel ac kuht luhngse el yohk liki na meet ah.

2. Efuh kuh upac nuh sin kuhtuh mwet uh in kahlwem ke luhngse luhn God nuh seltahl uh?

² Mwe ahsor se lah oasr mwet suc tiac kahlwem kac lah fuhkah tuh God elan luhngse eltahl. Eltahl nuhnkuh muh God el tiac nuhnkuh ke mwet uh. Sahp eltahl luhlahlfongi muh God el orek masap na ac kai mwet suc tiac ahkos masap lal uh. Ke srihpen mwe luti kikiacp inge, oasr pac mwet suc nuhnkuh muh God el suhlallacl ac wacngihn mwet kuh in fototo nuh sel kuh luhngse el. Oasr pac mwet suc puhla muh God el luhngse mwet uh eltahl finne orekma kuluk. Tuhsruhktuh ke lutlut lom ke Bible, ma inge ac kahsre kom in etuh ma pwacye kacl Jeova. Kom etuh lah luhngse pa ohiyac se ma yohk emeet sel ac el suhpwacma Wen sefanna nahtuhl in molikomlac. (John 3:16; Sie John 4:8) Ac ke srihpen ma pucspucs ma sikyak ke moul lom uh, sahp ma inge oruh in upac nuh sum in kahlwem ke luhpan luhngse luhn Jeova nuh sum uh.

3. Meac ac kuh in kahsre kuht in kahlwem ke luhngse luhn Jeova nuh sesr uh?

³ Kuht enenuh in kahlwem kac meet lah Jeova pa orekuhtlac uh, tuh kuht in kahlwem ke luhngse lal nuh sesr uh. El pa use moul lasr uh. (Riti Psalm 100:3-5.) Pa inge srihpac se pwacnacng Bible uh fahk muh mukul se emeet ah “wen nuhtin God.” (Luke 3:38) Ac Jesus el luti kuht in pahngon Jeova “Pahpah tuhmwacsr suc inkuhsrao.” (Matthew 6:9) Pwacnacng Jeova el Pahpah se tuhmwacsr, ac el luhngse kuht oacna sie pahpah wowo suc luhngse tuhlihk nahtuhl.

4. (a) Jeova el Pahpah fuhkah se? (b) Meac kuht ac fah sramsramkihn ke mwe lutlut se inge ac mwe lutlut se tohkoh uh?

⁴ Nuh sin kuhtuh mwet uh, upac nuh seltahl in nuhnkuh ke sie pahpah ma ahkkahlwemye luhngse. Sahp eltahl esam muhkwena mwe ahsor yohk ma eltahl puhla ke pacl se ma eltahl srackna srihk ke srihpen pahpah tuhmwacltahl ah oruh kuluk nuh seltahl. Jeova el tiac kuh in oruh ohinge nuh sin tuhlihk nahtuhl uh. El pa Pahpah se ma wo emeet tuhmwacsr uh. (Psalm 27:10) El arlacna luhngse kuht ac el karihngihn kuht ke inkacnek pucspucs. Fin yohkwelihk luhngse ma kuht puhla sin Jeova uh, luhngse lasr nuh sel uh ac yohkwelihk pac. (James 4:8) Ke mwe lutlut se inge kuht ac sramsramkihn inkacnek ahkosr ma Jeova el ahkkahlwemye luhngse lal nuh sesr. Ac ke mwe lutlut se tohkoh uh, kuht ac liye inkacnek ahkosr ma kuht kuh in ahkkahlwemye luhngse lasr nuh sel uh.

JEOVA EL LUHNGSE KUHT AC ENGAN IN USE MA KUHT ENENUH

5. Meac God el sang nuh sin mwet nuhkewa uh?

⁵ Ke mwet sap Paul el tuh muhta fin acn Athens, Greece el akihlen lah arlacna puhkantwen ma sruhloaclah ac mwet in pacl sac luhlahlfongi muh god laltahl inge pa sang moul nuh seltahl uh. Pwacnacng el fahk nuh seltahl ke “God suc oraclah facluh ac ma nuhkewa loac uh.” El fahk lah God el “sang moul ac momong ac ma nuhkewa nuh sin mwet nuhkewa” ac “in El kuht moul, kuht mukuikui, ac kuht oasr.” (Orekma 17:24, 25, 28) Jeova el use nuh sesr ma nuhkewa ma kuht enenuh tuh kuht in moul ac engankihn moul lasr uh. Srihke nuhnkuh ke kuhtuh ma ma el use nuh sesr ke srihpen luhngse lal.

6. Acn fuhkah se Jeova el oraclah ac use nuh sesr inge? (Liye petsac se meet ke mwe lutlut inge.)

⁶ Ke sie mwe puhpuhlyuck, Jeova el oraclah acn na kahto se sesr inge. (Psalm 115:15, 16) Inmahsrlon planet nuhkewa ma el oraclah uh, facluh muhkwena siena. Scientist pucspucs lutlut ke inkuhsrao ac konwacack planet pucspucs pac sahyac, tuhsruhktuh wacngihn sie planet sahyac ma kuh in sang enenuh nuhkewa luhn mwet tuh eltahl in muhta kac. Jeova el tiac use muhkwena ma nuhkewa ma kuht enenuh tuh kuht in moul, tuhsruhktuh el oacyacpac oraclah facluh na kahto ac wo se kuht in muhta kac ac engankihn moul lasr. (Isaiah 45:18) Ke pacl se kuht muhta nuhnkuh ke acn se sesr ma Jeova, suc Pahpah tuhmwacsr el use nuh sesr inge, kuht puhla na pwacye luhpan luhngse lal nuh sesr uh.​—Riti Job 38:4, 7; Psalm 8:3-5.

7. Jeova el ahkkahlwemye luhngse pwacye lal nuh sesr fuhkah ke inkacnek ma el orekuhtlac kac uh?

⁷ Sie pac inkacnek ma Jeova el ahkkahlwemye luhngse lal nuh sesr uh pa ke el orekuhtlac ke sie inkacnek ma kuht ac kuh in etahel. (Genesis 1:27) Kalmen ma inge pa kuht kuh in puhla luhngse lal nuh sesr ac kuht ahkkahlwemye pac luhngse lasr nuh sel. El etuh lah pa inge ma ac oruh kuht in insewowo na pwacye uh. Ma na pwacye se lah, tuhlihk uh engan ke eltahl puhla luhngse luhn pahpah ac ninac kiyacltahl uh. Ac esam lah Jesus el luti kuht muh kuht ac fah engan kuht fin fototo nuh sin Pahpah tuhmwacsr, Jeova. (Matthew 5:3) El use nuh sesr “ma nuhkewa in ahkenganye kuht.” Ma na kahlwem se lah el arlac engan in use ma kuht enenuh uh ac el luhngse kuht na pwacye.​—Sie Timothy 6:17; Psalm 145:16.

JEOVA EL LUTI KUHT KE MA PWACYE

8. Efuh kuh kuht ke Jeova elan luti kuht?

⁸ Pahpah pucspucs luhngse tuhlihk nahtuhltahl ac tiac luhngse eltahl in kiacpweyucklac. Tuhsruhktuh, ke pacl inge puhs sin pahpah ac ninac ma tiac orekmakihn oakwuck suwohs luhn Bible uh ke ma wo ac ma kuluk. Pwacnacng eltahl tiac kuh in kol tuhlihk nahtuhltahl inge ke inkacnek suwohs ac inkaiyen pacl uh ma inge kol nuh ke mwe ahsor ac fohs ke sucu. (Soakas 14:12) Tuhsruhktuh, Jeova el sang nuh sin tuhlihk nahtuhl uh inkacnek in kolyuck se ma wo emeet, mweyen el “God luhn ma pwacye.” (Psalm 31:5, BMK) El engan in luti kuht ke ma pwacye kacl uh. El oacyacpac luti kuht inkacnek wo in alu nuh sel ac inkacnek se ma wo emeet in moulkihn ke moul lasr uh. (Riti Psalm 43:3.) Pwacnacng, meac Jeova el luti kuht kac ma ahkkahlwemye luhpan luhngse lal nuh sesr?

9, 10. (a) Efuh kuh Jeova el fahkwack ma pwacye kacl uh nuh sesr? (b) Meac el luti kuht ke oakwuck lal nuh sesr uh?

⁹ Ma se meet, Jeova el fahkwack ma pwacye kacl uh nuh sesr. El ke kuht in etwacllah na pwacye. (James 4:8) Pwacnacng el ahkkahlwemye inel nuh sesr. Inel sihmlac in Bible puhs liki kuhtwena ine sahyac. Jeova el oacyacpac fahk nuh sesr lah el kain in God fuhkah se. Ke pacl se kuht liye ma nuhkewa ma el oraclah uh, kuht etuh lah el arlacna kuh ac lahlmwetmwet. (Rome 1:20) Ac ke pacl se kuht riti Bible uh, kuht etwaclah luhpan nuhnuhnkuh suwohs ac luhngse lal nuh sesr. Ke kuht etwacllah Jeova ac ke ohiyac wowo lal uh, kuht ac puhla lah kuht fototoyang na pwacye nuh sel.

¹⁰ Jeova el luti pac nuh sesr ke oakwuck lal uh. El fahk nuh sesr lah kuht mwet in sucu lal uh. El ahkuhtweyac pac ma el ke kuht in oruh tuh kuht in tuhkweni orekma in mislac yurin mwet nuhkewa in sucu lal uh. Bible uh ahkkahlwemye kahlwem lah God el tiac orekuhtlac tuh kuht in oruh sulaclah lasr sifacna nuh ke ma wo ac ma kuluk. (Jeremiah 10:23) Jeova el etuh ma ac wo emeet nuh sesr uh. Kuht kuh in engankihn moul mislac ac insewowo, kuht fin ahkpuhsisaclye kuht ye kolyuck lal ac el muhkwena kuht ahkos. Jeova el luti nuh sesr ke ma pwacye ac yohk srihpac inge mweyen el luhngse kuht.

11. Meac Pahpah tuhmwacsr el fahkwack nuh sesr ke pacl fahsruh uh?

¹¹ Sie pahpah na kuhlwacng ac luhngse el nuhnkuh yohk ke moul luhn tuhlihk nahtuhl nuh ke pacl fahsruh uh. El ke eltahl in engankihn sie moul na wowo. Tuhsruhktuh sie mwe ahsor pa inge mweyen inkaiyen mwet ke pacl inge eltahl fosrngahlah ke ma ac sikyak ke pacl fahsruh uh ac puhs seltahl sislah pacl yohk laltahl in orekma ac suk ma pucspucs ma ac tiac oan nwe tok. (Psalm 90:10) Pwacye lah kuht arlacna engan ke srihpen Pahpah tuhmwacsr, Jeova, el luti kuht ke inkacnek wo in moulkihn moul insewowo ac el wuhlelah pac nuh sesr ke sie moul wolacna ke pacl fahsruh uh!

JEOVA EL KAHSRUH AC KAI TUHLIHK NATUHL UH

12. Jeova el kai ac kahsrel Cain ac Baruch fuhkah?

¹² Ke pacl se ma Jeova el liye lah Cain el ac apkuhran na in oruh sie ma kuluk, el srihke in kahsrel ke El siyuck sel ohinge: “Efuh kuh kom kasrkuhsrak? Efuh kom sroasrol? Kom fuhnuh oruh ma wo, kom luhkuhn isracsr na.” (Genesis 4:6, 7) Cain el tiac eis kahsruh sin Jeova a ke sahflahiyac ah el sun mwe kweok upac. (Genesis 4:11-13) Oasr sie pac pacl ma Jeova el akihlen lah nuhnak kuluk lal Baruck inge oruh el tohtohlah ac inse toasr. Pwacnacng Jeova el fahk nuh sel Baruch lah nuhnak lal ah kuluk ac el enenuh in ekuhllah. Baruch el lohng kahs in kai luhn Jeova, ac ma inge molwellah.​—Jeremiah 45:2-5.

13. Meac mwet kuhlwacnsap oaru luhn Jeova eltahl lotwelah ke ma upac laltahl uh?

¹³ Jeova el kahsre kuht ac kai kuht mweyen el luhngse kuht. El tiac ahksuwohsye kuht muhkwena ke pacl ma enenweyuck, tuhsruhk el oacyacpac ahkpahye kuht. (Hebrew 12:6) Pacl puhs kuht riti in Bible ke mwet kuhlwacnsap oaru ma Jeova el ahkpahye in eklac mwet wo. Ke sie mwe puhpuhlyuck, Joseph, Moses ac David nohfohn na sun ma upac. Ke ma upac ma eltahl sun inge, Jeova el nuhna weluhltahl na. Ac ma nuhkewa eltahl lotwelah ke pacl upac inge, kahsreltahl ke pacl se Jeova el sang kunohkohn na yohk nuh seltahl uh. In oacna ma kuht riti ke Bible ke mwe kahsruh luhn Jeova in ahkkweye ac ahkpahye mwet lal uh, kuht puhla na pwacye lah Jeova el arlacna luhngse kuht.​—Riti Soakas 3:11, 12.

14. Jeova el srackna ahkkahlwemye luhngse lal nuh sesr uh fuhkah kuht finne oraclah sie ma kuluk?

¹⁴ Finne nuh ke pacl ma kuht oraclah ma kuluk uh, Jeova el srackna ahkkahlwemye luhngse lal uh nuh sesr. Kuht fin orekma fal nuh ke kahs in kai lal ac auliyak, el ac kuh in nuhnak muhnahs nuh sesr. “El . . . sa in nuhnak muhnahs.” (Isaiah 55:7) Meac kalmen ma inge? Kahs lal David ke nuhnak muhnahs luhn Jeova uh ahkkahlwemye nuh sesr lah Pahpah na pahkotwen se pa tuhmwacsr inge. “El nuhnak muhnahs ke ma kuluk luhk nuhkewa ac ahkkweyelah mas luhk nuhkewa. El moliyuclac liki misac ac ahkinsewowoyeyuc ke luhngse ac pahkotwen. El uslah ma kuluk lasr loes liki kuht, oacna lusen kuhtuhlacp lac nwe rohtoh.” (Psalm 103:3, 4, 12) Jeova el kai ac kahsre kuht ke inkacnek pucspucs. Yac kom sa in ekuhllah ma enenweyuck in eklac sum uh? Esam pacl nuhkewa lah Jeova el kai kuht mweyen el luhngse kuht.​—Psalm 30:5.

JEOVA EL KARIHNGIHN KUHT

15. Meac pac sie inkacnek ma Jeova el ahkkahlwemye luhngse lal uh nuh sesr?

¹⁵ Sie pahpah na luhngse el ac karihngihn sucu lal uh liki kuhtwena mwe sensen. Pa inge ma Jeova, suc Pahpah tuhmwacsr el oruh nuh sesr. Mwet sihm luhn psalm el fahk ma inge kacl Jeova: “El karihngihn moul luhn mwet lal. El moleloslac liki kuh luhn mwet kuluk.” (Psalm 97:10) Srihke nuhnkuh ke ma se inge: In oacna ke kom sa in karihngihn motom ke srihpen ma inge sacohk sum, Jeova el oacyacpac sa in karihngihn mwet lal mweyen eltahl sacohk sel.​—Riti Zechariah 2:8.a

16, 17. Jeova el karihngihn mwet lal in pacl meet ah ac ke pacl inge fuhkah?

¹⁶ Sie inkacnek ma Jeova el karihngihn mwet lal in pacl meet ah ac ke pacl inge uh pa ke lipufacn lal. (Psalm 91:11) Oasr lipufacn se tuh onelah solse 185,000 luhn acn Assyria ke fong sefanna ac el molwelah pac mwet luhn God. (Luo Tokosra 19:35) Ke pacl luhn mwet sap in pacl meet ah, lipufacn pa molwellah Peter, Paul ac kuhtuh pac sahyac liki presin. (Orekma 5:18-20; 12:6-11) Ke pacl inge, tuh oasr mweun na upac se ke sie muhtuhnfacl fin ac Africa. Muhtuhnfacl se inge arlacna fohs ke srihpen acnwuck, pihsrapasr, sruhinkuh, ac ahkmas fin acn we. Finne wacngihn mwet lili ma misac, puhs seltahl wacngihnlac ma nuhkewa laltahl. Tuhsruhktuh, eltahl nuhkewa puhla luhngse luhn Jeova ac eltahl etuh lah el karuhnguhnuhltahl. Finne nuh ke ma na upac ma sonoltahl inge, eltahl srackna engan. Ke pacl se ma sie mukul lili suc suhpweyucklac sin mwet kuhlwacnsap oaru ac lahlmwetmwet el som muhtwacta yohrohltahl ac siyuck lah eltahl fuhkah, na eltahl fahk, “Kuloh nuh sin Jeova, wona ma nuhkewa!”

¹⁷ Pwacye, kuhtuh sin mwet kuhlwacnsap luhn God uh, oacna mwet tuhma lutlut Stephen ac kuhtuh pac mwet sahyac ma oacna el, eltahl misac ke srihpen oaru laltahl. Tiac pacl nuhkewa Jeova el tulokihn ma kuluk uh in tiac sikyak. Tuhsruhktuh, el karihngihn mwet lal uh oacna sie u ke el sang kahs in sensen nuh seltahl ke kain in inkacnek pucspucs ma Satan el orekmakihn in sang kiacpweltahllah. (Ephesus 6:10-12) Kuht kuh in konwacack kahs in sensen inge nuhkewa ke Bible ac ke mwe rit pucspucs ma tuhkuh ke u luhn Jeova uh. Ke sie mwe puhpuhlyuck, kuht lotwelah mwe sensen ke orekmakihnyen internet, luhngse mani ac ke orekma in kosro ac ahkmas ma oan ke petsac, puk kuh mwe ahkengan pucspucs. Kahlwem lah Jeova el luhngse kuht ac el ke karihngihn kuht.

MWE ENGAN NA YOHK

18. Meac puhlakihn lom ke luhngse luhn Jeova nuh sum uh?

¹⁸ Ke Moses el nuhnkuh ke yac pucspucs ma el kuhlwacnsuhpuh Jeova, el luhlahlfongi na pwacye lah Jeova el luhngse el. Moses el fahk: “Nwekkuhtlac ke luhngse kawihl lom ke kais sie lututacng. Tuh kuht fah kuh in on ac insewowo in moul lasr nohfohn.” (Psalm 90:14) Sie mwe insewowo na yohk nuh sesr ke kuht kahlwem kac ac puhla luhngse luhn Jeova nuh sesr. Ma inge oruh kuht in arlacna engan! Kuht puhla oacpacna ma mwet sap John el fahk inge: “Liye luhpan luhngse luhn Pahpah nuh sesr! Luhngse lal uh arlacna yohk.”​—Sie John 3:1.