SIFAC KE KOLO | YAC SCIENCE EISLAC ACN LUHN BIBLE UH?

Science Tiac Kuh in Etuh Ma Nuhkewa

Ke kuhtuh pacl somlah ah, oasr puk pucspucs ma ahkuhtweyac ke nuhnak luhn mwet suc tiac luhlahlfongi muh oasr God. Puhs mwet luhngse in riti puk inge ac eltahl oraclah kain in mwe sramsram ac akuhkuhin pucspucs kac. Scientist se inge pahngpahng David Eagleman el suhmuhslah kac: “Kuhtuh sin mwet ma riti ma inge nuhnkuh muh scientist uh etuh ma nuhkewa.” El fahk pac: “Tuhsruhktuh, science na pwacye uh wo ac lwelah in oasr nuhnak sahyac luhn mwet ke orekma laltahl uh, suc oasr ma sasuc konweyuckyak pacl nuhkewa.”

Muhtwacwacack ke pacl meet ah nuh ke pacl inge, scientist na suhmaht eltahl konwacack top na wo nuh ke kihsen siyuck laltahl ke ma usrnguck pucspucs. Tuhsruhktuh kuhtuh seltahl tahfonglac ke orekma laltahl uh. Sie sin scientist ma lahlmwetmwet ac pwengpweng emeet pa Isaac Newton. El ahkuhtweyac lah fuhkah kuhiyacn gravity uh kahsruh fuhkah mukuikui luhn planet, itu ac galaxy nuhkewa. El pa mwet se emeet suc oraclah calculus, sie ip ke oacwac ma orekmakihnyuck nuh ke computer design, nuh ke inkacnek in sohksohk yen engyeng uh, ac nuh ke lutlut ke ma srihsrihk se inge pahngpahng nuclear physics. Tuhsruhktuh, Newton el oacyacpac lutlutkihn alchemy, sie ip ke science ma orekmakihn oakwuck ke mukuikui luhn planet, itu, faht ac mahlwem wekuhnacng kain in inkacnek kuh kain in ma sakihrihk ma orekmakihnyuck ke inkacnek mwenmwen in ekuhllah osra nuh ke kol.

Puhs liki yac 1,500 meet liki pacl lal Newton, sie mwet Greek pahngpahng Ptolemy el lutlut yohk ke ma pucspucs inkuhsrao orekmakihn muhtahl muhkwena. El konwacack planet pucspucs inkuhsrao ke fong ac el suhmaht in oraclah macp kac. Tuhsruhktuh el luhlahlfongi muh facluh oan infulwacn ma nuhkewa. Sie pac scientist pahngpahng Carl Sagan el suhmuhslah kacl Ptolemy: “Nuhnak se lal inge eklac ke lusen 1,500 yac, ac ma inge ahkpwacyeye lah sie mwet el finne lahlmwetmwet, ac kuh pac in tahfonglac na pwacye nuhnak lal uh.”

Ke pacl inge scientist pucspucs sun kain in ma upac inge ke orekma laltahl uh. Yac eltahl kuh in konwacack sie ahkuhtweyac wo ac suwohs ke ma nuhkewa inkuhsrao uh? Arlac fal in akihlenyuck kapkapack ma science uh oraclah ac ma wo nuhkewa ma inge use nuh sesr, tuhsruhktuh ne ohinge wo pac in esamyuck lah oasr ma science tiac kuh in oruh. Scientist se inge Paul Davies el akihlen ac fahk: “Pwacye lah kuh in tahfonglac mwe ahkuhtweyac nuh ke ma nuhkewa finne wo ac suwohs ma konweyuckyak kac uh”. Kahs inge ma na pwacye se: Mwet uh tiac kuh in etuh ac kahlwem na pwacye ke ma nuhkewa inkuhsrao ac facluh. Ke ma inge fin oasr ma fwackyuck ke kuhiyacn science in ahkuhtweyac ke ma pucspucs ma raunikuhtlac, wo kuht in esam lah tiac arlac pwacye ma luhlahlfongiyuck inge.

Ke kahs inge, Bible uh ahkkahlwemye ma wolacna pucspucs ke ma nuhkewa suc raunikuhtlac: “Tuhsruhktuh ma inge ahkkahlwemye kuhtuh srihsrihk na kuhiyacl. Mahmah na lal uh pa kuht lohng inge.” (Job 26:14) Arlacna yohk ac puhs ma mwet uh tiac kuh in etuh ac kahlwem kac. Kahs lal mwet sap Paul ma sihmihsyucklac apkuhran nuh ke yac 2,000 somlah inge srackna pwacye nwe ke pacl inge: “Fuhkah luhpan kasrpen luhngkuhlwacng luhn God! Fuhkah loaliyacn lahlmwetmwet ac etwacack lal! Suc kuh in ahkuhtweyac oakwuck lal? Suc kuh in kahlwem ke inkacnek lal?”—Rome 11:33.

[Mwe ahkuhtweyac srihsrihk ke sra 7]

Kahlwem lah Bible uh kuh in acse ma pucspucs ma science tiac kuh in acse nuh sesr

[Pohk ke sra 7]

Kahsruh Ma Science Tiac Kuh in Use

Science uh acse etwacack ke ma pucspucs. Ke ohiyac sahyac, Bible uh acse kahs in kahsruh ac kahs in luti ma kahsre kuht in fototo nuh sin mwet sahyac ac in moulkihn moul engan ac mislac. Liye mwe puhpuhlyuck pucspucs tohkoh inge:

Inkacnek in Kutongyac Orekma in Ahkmas

In suhnakihn moul

“Nik kom ahkmas.”​—Exodus 20:13.

“Kuhtwena mwet suc srunga mwet wiyacl, el sie mwet ahkmas.” ​—Sie John 3:15.

Ahkkahlwemye ac tahfwelah in orek mislac

“Forla liki ma kuluk ac oruh ma wo; sang insiowos nohfohn in suk moul mislac.”​—Psalm 34:14.

“Ac fahko luhn suwohswohs eoki tari in mislac nuh selos suc orek mislac.”​—James 3:18.

Koase orekma suhlallacl

‘[Jeova] El srihke na kewa mwet wo ac mwet kuluk; ac El arulacna koase mwet suc luhngse oruh ma suhlallacl.’​—Psalm 11:5.

“Nimet mwel ma luhn mwet suhlallacl, kuh nuhnkeack in oruh oacna elos oruh, mweyen LEUM GOD El sruhnga mwet orekma kuluk.”​—Soakas 3:31, 32.

Insewowo luhn Sucu

Ahkos pahpah ac ninac

“Tuhlihk srihsrihk, kowos in ahkos pahpah tuhmowos ac ninac kiyowos, mweyen kowos ma luhn Leum, ac ma inge suwohs. ‘Ahkfuhlwactye pahpah tuhmom ac ninac kiyom’ pa ma sap se meet ma oasr wuhleacng kac, fahk muh: ‘Tuh in wo nuh sum ac moul lom ac fah loes fin facluh.’”​—Ephesus 6:1-3.

Luti tuhlihk nuhtum ke inkacnek suwohs

“A kowos, pahpah tuhma, kowos in tiac ahngon tuhlihk nuhtuwos nuh ke mulat; a kowos in oakoakelos in kai ac kaiyuck luhn Leum [“Jeova,” NW].”​—Ephesus 6:4, BMK.

“Kowos in tiac kahs kohu nuh sin tuhlihk nuhtuwos pacl nuhkewa, tuh elos ac muh sahngwenglah ac fuhleack in oruh kuhtwena ma.”​—Colossae 3:21.

Luhngse ac ahkkahlwemye sunak nuh sin mukul tuhmom kuh muhtwacn kiyom

“Kais sie mukul tuhma elan luhngse muhtwacn kiyacl oacna el sifacna, ac kais sie muhtwacn kiyac elan ahkfuhlwactye mukul tuhmwacl.”—Ephesus 5:33.

Karihngihnyen ma oreklac nuhkewa

Nuh sin mwet ma ahkfohkfohkye ma pucspucs fin acn Israel in pacl meet ah, Bible uh ahkkahlwemye: “Mwet uh ahktahekyelah facluh . . . Mwet facluh elos eis mwactan orekma lalos.” (Isaiah 24:5, 6) God el ac fah nuhnuhnkuh ac kai mwet ma kuhnahoslah acn uh. El ac fah “kuhnahoslah mwet suc kuhnahoslah facluh.” (Fwackyuk 11:18) Eltahl ac fah nuhnuhnkweyuck fal nuh ke orekma kuluk laltahl uh.