Etahi Ohiyacn Puhlaik ac Liyactwen lal Jesus

1, 2. (a) Kuht ac eis fuhkah moul ma pahtpaht? (b) Meac kuh in kahsre kuht in tiac kuhflah liki fuhfahsryacsr lasr uh?

KE PACL se kuht eklac sie mwet Christian, ma inge oacpacna ke kuht muhtwacwack ke sie fuhfahsryacsr. Kuht fin oaru na nuh sin God, fuhfahsryacsr lasr uh ac mwe insewowo nuh sesr ac kuht kuh in eis moul ma pahtpaht. Jesus el fahk: “Kuhtwena mwet suc muhtweng nwe ke sahflah, el ac fah moul.” (Matthew 24:13) Ahok, in ahksahfyelah fuhfahsryacsr lasr uh, kuht enenuh in oaru nuh sin God nwe “ke sahflah,” pa ke sahflahiyen moul lasr kuh sahflahiyen oakwuck kuluk luhn facluh. Tuhsruhktuh kuht enenuh in taran kuht in tiac tuhlac kuh lohlah ke kuhtwena ma luhn facluh. (Sie John 2:15-17) Meac kuht kuh in oruh tuh kuht in tiac kuhflah liki fuhfahsryacsr lasr uh?

² Jesus el oakiyac mwe srihkasrak na wowo nuh sesr. Ke kuht lutlutkihn ma Bible uh sruhmuhn ke fuhfahsryacsr lal Jesus, kuh ke ohiyacn moul lal, kuht lotelah lah kain in mwet fuhkah se el uh. Ma inge ac mokle kuht pac in luhngse el ac in ahkkahlwemye luhlahlfongi lasr nuh sel. (Riti Sie Peter 1:8, 9.) Mwet sap Peter el fahk lah Jesus el oakiyac sie mwe srihkasrak nuh sesr tuh kuht in fahsr in falkacl. (Sie Peter 2:21) Ac kuht fin ukwe falkacl ahkwoyac, kuht ac muhtweng nwe ke sahflah.a (Liye footnote) Ke mwe lutlut meet ah, kuht lotelah inkacnek ma kuht kuh in etahi mwe srihkasrak lal Jesus ke ohiyacn inse puhsisacl ac pahkotwen lal. Ke mwe lutlut se inge, kuht ac lutlutkihn lah kuht ac etahi fuhkah mwe srihkasrak ke ohiyacn puhlaik ac liyactwen lal.

JESUS EL PUHLAIK

3. (a) Meac puhlaik? (b) Kuht ac ahkkahlwemye fuhkah ohiyac se inge?

³ Ohiyacn puhlaik uh sie puhlakihn suc kuh in ahkkweye kuht ac kahsre kuht in muhtweng ke ma upac pucspucs. Ohiyacn puhlaik uh kahsre kuht pac in tu na kuh ke ma suwohs. Ohiyac se inge kuh in kahsre kuht in muhtweng ac in oaru nuh sin God finne ke pacl upac. Sahngweng, finsrak, ac luhngse kuhpahsr nuh ke ohiyacn puhlaik. Fuhkah? Sahngweng lasr sin God in tiac ahktoasryacl ac oruh kuht in tiac lwelah sahngweng lasr sin mwet in ahkkulukye kuht. (Sie Samuel 11:7; Soakas 29:25) Finsrak pwacye lasr nuh sin Jeova, kahsre kuht in nuhnkuh yohk ke pacl fahsruh uh ac tiac ke ma upac lasr uh. (Psalm 62:5) Luhngse pwacye mokle kuht in ahkkahlwemye puhlaik finne kalyeiyuck kuht. (John 15:13) Kuht ahkkahlwemye puhlaik ke kuht luhlahlfongi in God ac etahi Wen nahtuhl.​—Psalm 28:7.

4. Jesus el ahkkahlwemye fuhkah puhlaik lal ke el muhta in tempuhl? (Liye petsac se meet ke mwet lutlut se inge.)

⁴ Ke Jesus el srackna yac 12, el ahkkahlwemye puhlaik ke el muhta “in Tempuhl uh . . . inmahsrlon mwet luti.” (Riti Luke 2:41-47.) Yohk etwacack luhn mwet luti luhn alu inge ke Ma sap luhn God suc ituckyang nuh sel Moses, ac eltahl etuh pac facsin luhn mwet Jew. Facsin inge oruh upac in ahkos Ma Sap ah. Tuhsruhktuh, Jesus el tiac lwelah etwacack laltahl ah in tulokihnilyac ke sramsram uh. El tiac na sahngweng, a el nuh “kihsen siyuck” na nuh seltahl. Kihsen siyuck ma el siyuck ah, tiac kain in kihsen siyuck ma tuhlihk se ac nuhnkuh kac. Tuhsruhktuh, kuht kuh in petsacelah ke el pihrihk nuhnak luhn mwet ke kihsen siyuck lal ah ac oruh mwet luti inge in lohacng nuh sel. Ac fin mwet luti ah srihke in ahkfohsyaclack ke kihsen siyuck ma ac kuh in puhrakack akuckucin, ma eltahl oruh inge tiac fahlac wo. Mwet nuhkewa suc lohngohl, wekuhnacng mwet luti ah, “elos arlacna fwefwelac ke top lahlmwetmwet lal.” Ahok, Jesus el puhlaik in tu na kuh ke ma pwacye suc kuh in konweyuckyak ke Kahs luhn God!

5. Ke inkacnek fuhkah Jesus el ahkkahlwemye puhlaik ke orekma in luti lal uh?

⁵ Ke lusen pacl se el oruh orekma in luti lal, Jesus el ahkkahlwemye puhlaik ke inkacnek pucspucs. Ke sie mwe puhpuhlyuck, el fahkwack nuh sin mwet in pacl sac lah mwet kol ke alu ah kiacpweltahl ke mwe luti kikiacp laltahl ah. (Matthew 23:13-36) Oacyacpac, Jesus el tu na kuh ac tiac lwelah nuhnak luhn facluh in ahkkulukyacl. (John 16:33) El tahfwelah na in fahkwack peng wo finne oasr mwe lain. (John 5:15-18; 7:14) Pacl luo, el puhlaik in luhslah mwet nuhkewa ma ahkkulukye alu pwacye.​—Matthew 21:12, 13; John 2:14-17.

6. Jesus el ahkkahlwemye fuhkah ohiyacn puhlaik ke lwen sahflah se lal fin facluh?

⁶ Ingena, kuht tuni ohiyacn puhlaik lal Jesus ke lwen sahflah se lal fin facluh ah. Jesus el etuh ma ac fah sikyak nuh sel ke pacl se na Judas el tuhkahkuhnuhlwack. Finne ouinge, ke mwe ahkfuhlwact luhn mwet Jew pahngpahng Mongo in Ahluhkwelah, Jesus el fahk nuh sel Judas: “Ahksaye oruh ma kom oruh an.” (John 13:21-27) Na, ke imac Gethsemane, Jesus el puhlaik in sifacna fahkuhlwack nuh sin un mwet solse ma som in sruokilyac ah. Finne moul lal sifacna oasr ke mwe sensen, el karihngihn mwet tuhma lutlut lal ah ke el fahk nuh sin un mwet solse ah, “fuhlwelah mwet inge in som.” (John 18:1-8) Tok kuhtuh ke mwet nuhnuhnkuh fuhlwact luhn mwet Jew ah kihsen siyuck nuh sel, Jesus el puhlaik in fahk lah el pa Christ ac Wen nuhtin God. Jesus el tiac sahngweng, finne mwet tol fuhlwact el sukok srihpac in unilyac. (Mark 14:60-65) Jesus el sruokyac kuh oaru lal nuh sin God ac misac fin sahk soko. Pwacnacng meet liki momong sahflah lal, el wowoyak ac fahk: “Ahkpwacyeyuck tari!”​—John 19:28-30, New World Translation.

ETAHI OHIYACN PUHLAIK LAL JESUS

7. (a) Mwet fuhsr, meac kom puhla ke kom sie sin Mwet Loh luhn Jeova? (b) Kom ac ahkkahlwemye fuhkah lah kom puhlaik?

⁷ Kuht ac etahi fuhkah ohiyacn puhlaik lal Jesus? Ke acn in lutlut. Mwet fuhsr, kom ahkkahlwemye ohiyacn puhlaik ke kom fahk nuh sin tuhlihk lutlut wiyom ac mwet sahyac lah kom sie sin Mwet Loh luhn Jeova. Ke kom oruh ouinge, kom ahkkahlwemye lah kom engan in pahngpahng ke inen Jeova, finne kalmacn ma inge pa mwet sahyac uh isrucn kom. (Riti Psalm 86:12.) Sahp oasr mwet pahtok kom in luhlahlfongi lah pwacye mwetuh tuhkuh ke ma orahkrahk uh. Tuhsruhktuh kom kuh in luhlahlfongi lah pwacye ma Bible uh fahk ke ma oreklac nuhkewa. Kom kuh in orekmakihn mwe rit se inge, The Origin of Life—Five Questions Worth Asking in topuk mwet ma ke etuh “finsrak se suc oan in kowos.” (Sie Peter 3:15) Na kom ac fah insewowo in etuh lah kom puhlaik in tu na kuh ke ma pwacye in Bible!

8. Meac srihpac tolu pwacnacng kuht enenuh in fahkwack ke puhlaik?

⁸ Ke orekma in luti lasr. Oacna mwet Christian pwacye, kuht enenuh in “puhlaik na in fahkwack ke Leum” Jeova. (Orekma 14:3) Efuh kuht kuh in fahkwack ke puhlaik? Ma se meet, kuht etuh lah ma kuht luti uh tuhkuh ke Bible. Pa inge ma pwacye uh. (John 17:17) Ma se ahkluo, kuht tuhkweni “orekma yurin God” ac el use ngun muhtahl lal in kahsre kuht. (Sie Corinth 3:9, BMK; Orekma 4:31) Ma se ahktolu, kuht luhngse Jeova ac mwet uh, pwacnacng kuht moniyuck in sang kuhiyacsr kewa in sruhmuhn pweng wo uh nuh sin mwet sahyac. (Matthew 22:37-39) Ke srihpen kuht puhlaik, kuht ac tiac tui in luti pweng wo uh. Kuht kacfweacng in luti ma pwacye uh nuh sin mwet ma lohsrlah kuh kiacpweyucklac sin mwet kol ke alu. (Luo Corinth 4:4) Ac kuht fah tahfwelah na in luti pweng wo, finne mwet uh sruhnga lohng pweng inge kuh kalyei kuht.​—Sie Thessalonica 2:1, 2.

9. Kuht ac ahkkahlwemye fuhkah puhlaik ke pacl se kuht sun ma upac?

⁹ Ke kuht sun mwe kweok. Ke kuht luhlahlfongi God, el ac fah ahkkweye luhlahlfongi lasr ac ahkpuhlaikye kuht finne kuht sun mwe kweok. Fin sie mwet suc kuht luhngse el misac, kuht arlacna ahsor, tuh kuht tiac fuhleack finsrak. Kuht luhlahlfongi lah “God suc kahsre kuht ac ahkwoye kuht,” el fah ahkkweye kuht. (Luo Corinth 1:3, 4; Sie Thessalonica 4:13) Kuht fin mas kuh kihneta, sahp kuht kweok kac, tuh kuht tiac eis kuhtwena oakwuck luhn ono suc ac ahktoasrye God. (Orekma 15:28, 29) Kuht fin inse toasr ke srihpen “insiacsr . . . ahkkulukye kuht,” kuht tiacna fuhleack. Kuht luhlahlfongi kacl Jeova suc “apkuhran nuh selos suc inse muhsahllah.”​—Sie John 3:19, 20; Psalm 34:18.

OHIYACN LIYACTWEN LAL JESUS

10. (a) Meac liyactwen? (b) Fuhkah ohiyacn liyactwen luhn sie mwet Christian ke sramsram ac orekma lal uh?

¹⁰ Ohiyacn liyactwen pa sie inkacnek lahlmwetmwet in akihlen ma wo ac ma kuluk, ac sulaclah in oruh ma wo uh. (Hebrew 5:14) Sie mwet Christian liyactwen el oruh sulaclah ma ac ahkkweye fototo lal nuh sin God. El sensenkihn kahs lal uh in tiac ahkngalye kuhtwena mwet. (Soakas 11:12, 13) El “mongfihsracsr.” (Soakas 14:29) El “oruh ma suwohs,” kalmac pa el oruh sulaclah wo nuh ke lusen moul lal nohfohn. (Soakas 15:21) Kuht ac lotelah fuhkah kuht in liyactwen? Kuht enenuh in lutlutkihn Kahs luhn God ac orekmakihn ma kuht lotelah uh. (Soakas 2:1-5, 10, 11) Kuht kuh pac in lutlut ac etahi mwe srihkasrak wo lal Jesus ke ohiyacn liyactwen.

11. Jesus el ahkkahlwemye fuhkah ohiyacn liyactwen ke sramsram lal?

¹¹ Jesus el ahkkahlwemye ohiyacn liyactwen ke ma nuhkewa el fahk ac oruh. Ke sramsram lal. Ke Jesus el luti pweng wo, el orekmakihn kahs kuhlwacng ma mwet lohngohl uh ac fwefwelac sel kac. (Matthew 7:28; Luke 4:22) El kwacna riti kuh orekmakihn Kahs luhn God ke sramsram lal uh. El etuh na pwacye ma suhmuhslah ma fal el in orekmakihn ke kain in ohiyac nuhkewa. (Matthew 4:4, 7, 10; 12:1-5; Luke 4:16-21) Oacyacpac, mwet suc lohngohl Jesus ke pacl se el ahkuhtweyac Ma Suhmuhslah uh, kahs lal uh mokle insiacltahl. Tukun el sifwil moulyak, Jesus el sramsram nuh sin mwet tuhmal lutlut luo suc fahsr in som nuh acn Emmaus. El ahkutweyac nuh seltahl ma suhmuhslah nuhkewa ma sruhmuhn kacl. Tok, mwet tuhmal lutlut inge fahk: “Yac insiacsr tiac fucsrfucsryak ke engan, oacna sie e tayak in kuht, ke el sramsram nuh sesr inkacnek uh ac ahkuhtweyac nuh sesr ke Ma Suhmuhslah?”​—Luke 24:27, 32.

12, 13. Mwe srihkasrak fuhkah ahkkahlwemye lah Jesus el mongfihsracsr ac nuhnak lal uh wo?

¹² Ke ohiyacl ac puhlakihn lal. Ohiyacn liyactwen lal Jesus kahsrel in “mongfihsracsr.” (Soakas 16:32) El kuh in kutong puhlakihn lal, mweyen el “fakpacp.” (Matthew 11:29) Pacl nuhkewa Jesus el ahkkahlwemye ohiyacn muhtweng nuh sin mwet tuhma lutlut lal, finne ke pacl eltahl tahfonglac. (Mark 14:34-38; Luke 22:24-27) Ac el muhtweng ac mislac finne ke pacl ma orek kuluk nuh sel.​—Sie Peter 2:23.

¹³ Liyactwen lal Jesus kahsrel pac tuh nuhnak lal uh in wo. Jesus el kahlwem ke Ma Sap suc ituckyang nuh sel Moses, ac ma inge pa kahsrel ke ohiyac ma el ahkkahlwemye nuh sin mwet uh. Ke sie mwe puhpuhlyuck, nuhnkuh ke muhtwacn se ma “maskihn mihsen srah.” (Riti Mark 5:25-34.) Muhtwacn sac fahsryak inmahsrlon un mwet uh, kahlyac nuknuk lal Jesus ah, ac onweyucklac. Fal nuh ke Ma Sap, muhtwacn se inge tiac nwacsnwacs, pwacnacng el tiac kuh in kahl kuhtwena mwet. (Leviticus 15:25-27) Tuhsruhktuh, Jesus el tiac na kohu nuh sel, a el ahkkahlwemye “pahkotwen ac inse pwacye,” ke srihpen el etuh lah ohiyac inge yohk srihpac liki na in fahsr fal nuh ke Ma Sap. (Matthew 23:23) Jesus el fahk nuh sel ke inkacnek kuhlwacng: “Acn nuhtihk, luhlahlfongi lom oruh kom kwelac. Som in mislac mweyen kom kwelac liki mas lom an.” Mwe srihkasrak na wo se ke liyactwen lal Jesus moklel in ahkkahlwemye ohiyacn kuhlwacng!

14. (a) Meac Jesus el sulaclah in oruh? (b) El oruh fuhkah el in lohacng na nuh ke orekma in luti lal ah?

¹⁴ Ke ohiyacn moul lal. Jesus el ahkkahlwemye liyactwen ke inkacnek el moulkihn moul lal. El sulaclah muh orekma in luti pweng wo uh pa orekma se ma yohk srihpac emeet in moul lal. (Luke 4:43) Oacyacpac, ma nuhkewa suc Jesus el sulaclah ah kahsrel in lohacng nuh ke orekma inge ac in ahksahfyelah ma kunacl uh. Ke sie mwe puhpuhlyuck, el sulaclah sie moul wo ac tiac nuhnkuh ke ma luhn facluh, a elan orekmakihn pacl ac kuh lal nuh ke orekma in luti uh. (Luke 9:58) El etuh lah yohk srihpac in ahkpahye mwet sahyac tuh eltahl in tahfwelah na oruh orekma se inge tukun el misac. (Luke 10:1-12; John 14:12) Ac el wuhlelah nuh sin mwet tuhma lutlut lal lah el ac kahsreltahl ke orekma in luti se inge, “nwe ke sahflahiyen oackwuck pucspucs luhn facluh.”​—Matthew 28:19, 20, NW.

ETAHI OHIYACN LIYACTWEN LAL JESUS

15. Kuht ac ahkkahlwemye fuhkah ohiyacn liyactwen ke sramsram lasr uh?

¹⁵ Kuht ac etahi fuhkah ohiyacn liyactwen lal Jesus? Ke sramsram lasr. Ke kuht sramsram nuh sin mwet lili wiyacsr uh, kuht orekmakihn kahs ma ac muhsaheack ac tiac ahkmuhnahsyacltahl. (Ephesus 4:29) Ke kuht sramsram nuh sin mwet sahyac ke Tohkohsrahi luhn God, kahs lasr uh enenuh in “ahkinsewowoyaclos ac mwe puhrakack nuhnak lalos.” (Colossae 4:6) Kuht kwacfeacng in akihlen mwe enenuh ac nuhnak luhn mwet, na kuht sulaclah kahs lasr ke kuht sramsram nuh seltahl. Kuht fin orekmakihn kahs kuhlwacng, mwet uh ac luhngse in lohng, ac pweng ma kuht us uh sun insiacltahl. Oacyacpac, ke kuht ahkuhtweyac luhlahlfongi lasr uh, kuht srihke in orekmakihn Bible uh pacl nuhkewa kuht kuh, mweyen Kahs luhn God oasr kuh kac. Kuht etuh lah pweng ke Bible uh kuh liki kuhtwena ma kuht kuh in fahk.​—Hebrew 4:12.

16, 17. (a) Kuht ac ahkkahlwemye fuhkah lah kuht tiac sa in kasrkuhsrak ac kuht nuhnkaclah wo ma uh?(b) Kuht ac kwacfeacng fuhkah ke orekma in luti lasr uh?

¹⁶ Ke ohiyacsr ac puhlakihn lasr. Ohiyacn liyactwen kahsre kuht in leumi puhlakihn lasr uh ke kuht muhta ye mwe srihfe, ac kahsre kuht in “tiac sa in kasrkuhsrak.” (James 1:19) Ke pacl se mwet uh ahkngalye kuht ke ma eltahl fahk, kuht srihke in kahlwem kac lah efuh eltahl fahk kuh oruh ma inge. Ke kuht oruh ouinge, fihsracsr nuh sesr in sang nuhnak muhnahs ac tiac kasrkuhsrak seltahl. (Soakas 19:11) Ohiyacn liyactwen kuh pac in kahsre kuht in nuhnkaclah wo ma uh. Kuht tiac suk mwet lili wiyacsr uh in suwohswohs, a kuht esam lah sahp oasr ma upac laltahl ma kuht tiac etuh na pwacye. Kuht engan in lohng nuhnak laltahl. Ac fin kuh, kuht tiac kwacfe in ukweyuck luhngse lasr uh.​—Philippi 4:5.

¹⁷ Ke inkacnek kuht moulkihn moul lasr. Kuht etuh lah orekma in luti pweng wo uh pa kunohkohn se ma wo emeet ma oasr yohrohsr uh. Pwacnacng, kuht ke sulaclah ma ac kahsre kuht in kwacfeacng ke orekma in luti lasr uh. Kuht sulaclah in Jeova pa ma emeet ke moul lasr. Kuht moulkihn moul wo suc tiac nuhnkaclah na ke ma luhn facluh, tuh kuht sang pacl ac kuh lasr kewa nuh ke orekma in luti pweng wo, meet liki sahflah uh tuhkuh.​—Matthew 6:33; 24:14.

18. (a) Kuht ac tahfwelah fuhkah ke fuhfahsryacsr lasr nuh ke moul ma pahtpaht? (b) Meac kom kwacfeacng in oruh?

¹⁸ Mwe engan na yohk se in lutlutkihn kuhtuh sin ohiyac wowo lal Jesus inge. Srihke nuhnkuh luhpan woiyac kuht fin lutlutkihn ohiyac sahyac lal ac in eis etwacack ke kuhtuh pac inkacnek kuht kuh in oacna el. Pwacnacng kuht kwacfeacng in etahel Jesus. Ke kuht oruh ma inge, kuht tahfwelah na ke fuhfahsryacsr lasr nuh ke moul ma pahtpaht ac kuht fah fototo nuh sin Jeova.