Kasru Mokul Puspus in Kapkapek ke Ma Paye

“Ke pal se ingela kom fwa kwa met.”​—LUK 5:10.

1, 2. (a) Mea mokul puspus elos oru ke pal se elos longol Jisus sulkakin peng mwo? (b) Mea kut fwa lotela ke me lutlut se inge?

JISUS a met tumal lutlut elos kafofo in sulkakin peng mwo in an Galili. Sie len, elos sroang nu in oak soko a som nu ke sie an ma wangin met muta we. Tusruktu met puspus ukwelos a tukeni kasrusr fwin mes. Oasr mokul “tausin limekosr, tia oaoa mutan a tulik uh.” (Mattu 14:21, LSK) Ke siepa pal, sie u lulap tuku nu yurol Jisus meyen elos lungsel in akkeye mas lalos a elos lungse in long me luti lal. Inmasrlon u lulap se inge, oasr “tausin akosr mukul, sayen mutan a tulik.” (Mattu 15:38, LSK) Oasr mokul puspus su tuku nu yurol Jisus a elos lungse in lotela ma puspus ke ma el luti. Jisus el etu la oasr met puspus su fwa lulalfongi ke ma paye. Kut etu ma inge meyen tokin el orala mwenmwen in nekla kwa lun met tuma lutlut ke ik pukanten, Jisus el fwak nu sel Saimon, met tumal lutlut: “Ke pal se ingela kom fwa kwa met.” (Luk 5:10) Kalmen kas inge lal Jisus pa orekma lalos in sulkakin peng mwo oana sie nu ke orekma in patur. El ku in kasru met tumal lutlut in koneak met puspus su fwa eis ma paye, wekunang mokul puspus.

² Oasr pa mokul puspus ke pal inge su lungse peng mwo su kut fwakak nu selos. Elos engan kut in oru lutlut Baibel yurolos. (Mattu 5:3) Kutu mokul elos mutawauk in lutlut ke God tusruktu elos tia kapkapek ke ma paye. Fuka kut ku in kasrelos? Ke orekma in luti lal, Jisus el tia orekmakin siena inkanek nu sin mokul. Tusruktu el lungse in kasrelos meyen oasr kutu oiya su oru mokul in fosrnga ka. Ke me lutlut se inge, kut fwa lutlut ke oiya mwo su Jisus el kasru mokul puspus a ke inkanek su kut ku in etawel ka. Kut fwa sramsramkin ke oiya tolu: (1) fwin sie mokul el fosrnga ke mani, (2) fwin sie mokul el sangeng ke ma met puspus saye nunku, a (3) fwin sie mokul el nunku mu el tia arla mwo oana mokul puspus saye.

Fwin Sie Mokul el Fosrnga ke Mani

3, 4. (a) Mea mokul puspus elos nunku mu ma yok sripe? (b) Efu ku kutu mokul elos nunku mu mani a sie orekma mwo pa ma yok sripe liki in lulalfongi ke ma paye?

³ Sie mokul su oasr etauk yok ke Masap su itukyang nu sel Moses el fwak nu sin Jisus: “Met Luti nga ke fwasr tukum yen nukewa kom fwasr nu we.” Jisus el fwak nu sel la “Mwen nutin met wangin an sifwel on we.” Tusruktu Baibel el tia akkalemye fwin mokul se inge el ekla sie met tuma lutlut lun Jisus. Saap el fosrnga yok ke an se ma el fwa muta a ke ma el fwa mongo.​—Mattu 8:19, 20.

⁴ Mokul puspus elos nunku mu fwin oasr mani pukanten lalos a sie orekma mwomwo, ma inge yok sripe liki lutlutkin a in akos ma Baibel el luti. Lutlut yok ke college a sie orekma su yok molo pa ma yok sripe nu selos. Elos etu la elos enenu mani in moul len nukewa. Ke ma inge elos nunku mu mani a sie orekma mwo ku in kasrelos yok liki na in lutlut ke Baibel a in kawuk nu sin God. Saap elos lungse ma Baibel el luti, tusruktu “nunkalanu fwalu, a kutasrik lun me kasrup” tulokinyelos in tia eis lutlut yok ke God a in tia pa akos ma el fwak. (Mark 4:18, 19) Tusruktu Jisus el kasru met tuma lutlut lal in sulela ma yok sripe emeet, a kut ku in etawi me srikasrak lal.

5, 6. Mea kasrel Andru, Piter, Jemes, a Jon in oru sulela lalos la orekma fuka yok sripe emeet nu selos?

⁵ Andru a mokul wiyel se inge Saimon Piter elos met patur. Elos orekma welul Jon, mokul se wiyel inge pangpang Jemes, a Zebedee, papa tumalos. Orekma lalos inge in patur arlana mwo, oasr pa met orekma puspus lalos. (Mark 1:16-20) Ke pal se meet Andru a Jon long kel Jisus sin Jon Baptais, elos lulalfongi la Jisus pa Messaia. Andru el fwak nu sin tamulel se wiyel inge Saimon Piter kel Jisus, a saap Jon el fwak ma inge nu sin tamulel se wiyel inge Jemes. (Jon 1:29, 35-41) Ke lusen malem puspus tokin pal se inge, Jisus el sulkakin peng mwo in an Galili, Judea, a Samaria, a met tuma lutlut akosr inge welul. Tokin ma inge elos sifwilpa foloko nu ke business lalos in patur. Elos lungse in etela ma puspus su Jisus el luti, tusruktu in pal san elos tia nunku mu orekma in sulkakin peng mwo pa ma yok sripe emeet nu selos.

⁶ Tok, Jisus el sulel Piter a Andru in fwasr tokol a in orekma oana met patur met. Mea Piter a Andru elos oru? “Eltal filiye kwa laltal, a fwasr tukol.” Jemes a Jon oru pa ouinge. “Eltal fwasr liki oaku a papa tumaltal, a fwasr tukol.” (Mattu 4:18-22) Mea kasru mokul akosr inge in oru sulela lalos in sramtauk orekma in sulkakin peng mwo pal nukewa? Elos nunku akmwoye ke sulela lalos. Elos fwufwasryesr welul Jisus ke lusen malem kutu a elos longol ke el luti. Elos liye pa mwenmwen su el orala a ke oiyen moniyuk lal in oru ma sumwos. Elos liye la met puspus elos lungse na paye ma el luti. Ke sripen ma puspus su elos lotela, lulalfongi lalos nu sin Jeova fokoko liki meeta.

7. Kut ku in kasru fuka met lutlut Baibel in lotela in lulalfongi nu sin Jeova?

⁷ Fuka kut ku in etawel Jisus a kasru met puspus su kut luti Baibel in lutlut in lulalfongi nu sin Jeova? (Soakas 3:5, 6) Kut ku in kasrelos ke inkanek su kut luti. Ke pal se kut lutlut yurolos, kut ku in lotelos la Jeova el mwulela in akinsemwomwoye kut fwin kut suk meet Togusrai lal. (Ridi Malakai 3:10; Mattu 6:33.) Kut ku in orekmakin Baibel in akkalemye nu selos la Jeova el nunku a karungin met lal pal nukewa. Tusruktu lela kut in tia mwulkunla la kut ku in luti pa met puspus su kut lutlut Baibel nu se ke inkanek lun me srikasrak lasr sifwana. Ke pal se kut fwak nu sin met lutlut Baibel inge ke oiya mwomwo nukewa su Jeova el kasre kut, ma inge ku in kasrelos in lulalfongi pa nu sel. Kut ku in akkalemye pa nu selos experience puspus su simusyukla ke buk a magasin nutusr.a​—Liye footnote.

8. (a) Efu ku yok sripe nu sin sie met lutlut lun Baibel in “pulakin a liye tu Jeova el mwo”? (b) Kut ku in kasru fuka sie met lutlut Baibel in liye la Jeova el mwo?

⁸ Oasr pa ma eneneyuk saye in oasr lulalfongi fokoko lun met lutlut Baibel, liki na in ridi a long la fuka Jeova el akinsemwomwoye met puspus saye lal. El enenu in pulakin, ku liye, ke moul lal sifwana la Jeova el mwo. Sam 34:8 akkalemye ouinge: “O pulakin a liye tu Jeova el mwo, insemwomwo met se su eis nien moul lal in el.” Kut ku in kasru fuka sie met lutlut Baibel in liye la Jeova el mwo? Na fuka fwin oasr ma upa lun sie met lutlut ke mani? Saap el srike pa in sisla oiya koluk lal, oana orekmakin paip, sritel mani, ku nimnim alukela ma fwal. (Soakas 23:20, 21; 2 Korint 7:1; 1 Timote 6:10) Kut ku in lotel in pre nu sin God in kasrel in sisla orekma koluk lal. Ke pal se moul lal mwola, el fwa liye la Jeova el mwo. Tokin ma inge kut ku in akkeyel in oru meet ke moul lal orekma in alu nu sin Jeova. Kut ku in lotel la el enenu in lutlutkin Baibel wik nukewa a akola nu ke miting nukewa lun congregation a wi ka. Ke pal se met lutlut el liye la Jeova el akinsemwomwoye kafweang lal, lulalfongi lal fwa akkeyeyuk, a el fwa tila nununkala yok ke ma puspus, oana ke mani.

Fwin Sie Mokul el Sangeng ke Ma Met Puspus Saye Nunku

9, 10. (a) Efu ku Nikodimus a Josef lun Arimetea tia fwak nu sin met saye la elos met tuma lutlut lun Jisus? (b) Efu ku kutu mokul ke pal inge elos sangeng in fwasr tukol Jisus?

⁹ Kutu mokul elos fosrnga ke ma met puspus saye nunku kelos, ke sripe inge elos tia ku in ekla met tuma lutlut lun Jisus. Ke sie me pupulyuk, Nikodimus a Josef lun Arimetia elos tia fwak nu sin met saye la eltal met tuma lutlut lun Jisus meyen elos sangeng ke ma met Ju saye fwa fwak ku oru nu selos. (Jon 3:1, 2; 19:38) Oasr sripe paenang eltal sangeng. Met kol puspus lun alu eltal srunga na paye Jisus a kutena met su lulalfongi nu sel sisila liki imwen lolngok.​—Jon 9:22.

¹⁰ Ke kutu an ke pal inge, saap upa nu sin sie mokul in akkalemye la el lungse in eis etauk ke God, ke Baibel, ku ke alu. Met welul ke orekma, kawuk lal, met in sou lal saap elos sufwanul ku srike in oru ma upa puspus nu sel. Ke an saye, sie me sensen nu sin sie met in fwak nu sin met saye puspus la el lungse in ekulla alu lal. A sie mokul su wi ke military, ke politics, ku fwin oasr mwal lulap lal in an se ma el muta we ku in akkolukyeyuk sin met saye puspus fwin el kaskas ke alu. Ke sie me pupulyuk, oasr sie mokul fwin an Germany el fwak ouinge: “Ma komwos Met Lo fwakak nu sin met ke Baibel pa paye. Tusruktu fwin nga wi alu lun Met Lo misenge, lutu met nukewa fwa etu ka. Mea met ke niyen orekma, met tulan luk, a met ke u se su nga a sou luk wi, elos fwa nunku? Nga tia ku in muteng ka.”

11. Jisus el kasru fuka met tumal lutlut in tia sangeng ke ma met saye puspus nunku kelos?

¹¹ Met tuma lutlut lun Jisus elos akkalemye pulaik. Tusruktu kutupal elos sangeng ke ma met saye puspus nunku kelos. (Mark 14:50, 66-72) Jisus el kasru fuka met tuma lutlut lal in kapkapek ke ma paye fwinne metu lainelos? Jisus el kasrelos in akola nu ke me lain su fwa sikyak nu selos. El fwak: “Insemwomwo komwos, ke met elos fwa srunge komwos, a ke elos fwa srikomwosla lukelos, a angon komwos, a sisla emwos oana ma koluk, ke Mwen nutin met.” (Luk 6:22) El sensenkakin met tuma lutlut lal la elos fwa sun me lain. Tusruktu el fwak nu selos la me lain inge orek ke sripen “Mwen nutin met.” A el akesmakinyelos la God fwa karunginelos pal nukewa fwin elos siyuk sel ke kasru a ku. (Luk 12:4-12) Jisus el suli pa met puspus su mutawauk in fwasr tukol in wi asrouki yurin met tumal lutlut a in met kawuk lalos.​—Mark 10:29, 30.

12. Kut ku in kasru fuka sie met lutlut Baibel in tia sangeng ke ma met saye puspus nunku kel?

¹² Kut enenu pa in kasru met lutlut Baibel in tia sangeng ke ma met saye nunku kelos. Sie inkanek kut ku in oru ma inge pa in kasru met lutlut in etu ke ma el enenu in oru fwin metu lainul. (Jon 15:19) Ke sie me pupulyuk, met welul orekma a met saye puspus saap tia insese ke lulalfongi sasu lal, ku oasr kusensiyuk lalos ke ma puspus su el lulalfongi ka. Kut ku in kasrel in akola sie me top fusrasr tuku ke Baibel. Kut ku in orek kawuk nu sel, a kut ku in akkalemyel nu sin met lili puspus ke congregation. Saap el a kutu sin brother wiyesr oasr oiya su oana sie ma sikyak nu selos, ku oana sie ma elos lungse in oru, a elos ku in kawuk nu sin sie sin sie. Yok sripe in lotel in pre pal nukewa su tuku ke insiel. Ma inge fwa kasrel in kawuk lun God. Jeova el fwa oana sie eot ku a sie niyen molela nu sel, ke ma inge el fwa tia sangeng ke ma metu nunku kel.​—Ridi Sam 94:21-23; Jemes 4:8.

Fwin Sie Mokul el Nunku Mu El Tia Arla Mwo Oana Mokul Puspus Saye

13. Efu ku kutu mokul elos sulela in tia eis ma paye?

¹³ Kutu mokul saap nunku mu elos tia ku in oru ma mokul saye ke congregation ku in oru. Saap elos tia ku in rid mwo, ku elos nunku mu elos tia ku in akuteye mwo ma oan ke nunak lalos. Saap elos mwekin, ku elos tia lungse in sramsram ke ma elos lulalfongi ka nu sin met puspus saye. Ke sripe inge upa nu selos in lutlut, in sang me top ke pal in miting, a in sulkakin peng mwo nu sin met puspus. Sie brother el akuteye la ke pal se el fwusr, orekma in sulkakin peng mwo arlana upa nu sel in oru. El fwak la el som nu ke srungul lun loomu, orek luma mu el tongtong, a tokin ma inge el som liki loom se a el fwinsrak mu wangin met longol ku liyel. El fwak: “Fwin nga nunku in som nu ke sie loom nu ke sie loom ma inge oreyu in pulakin mas.”

14. Efu ku met tuma lutlut lun Jisus tia ku in akkeyela sie tulik mokul su akkolukyeyuk sin sie lipufan koluk?

¹⁴ Nunku ke pulakin lun met tuma lutlut lun Jisus ke pal se elos tia ku in akkeyela sie tulik mokul su akkolukyeyuk sin sie lipufan koluk. Saap elos nunku mu elos tia ku in oru ma Jisus el lungselos in oru. Papa tuman tulik mokul se inge el tuku nu yurol Jisus a fwak: “Leum se, pakomuta wen nutik, el musen pulkoa, a pal se a tuyang nu sel u arulana upa, oru el kwana putatyang nu in e u, ku nu inkof u; Nga tu usalu nu yurin mwet tomom lutlut, tu elos koflana akkeyalla.” Ke pal se Jisus el sisila lipufan koluk se, tulik mokul se kela ke mas lal. Tok met tumal lutlut elos tuku nu yurol Jisus a siyuk sel: “Efu kut ku kofla lusla demon sa?” Jisus el fwak nu selos: “Meyen srikla lulalfongi lomwos. Paye nga fwak nu sumwos, lulalfongi lowos fwin oana luman futen mustad se, komwos a ku in fwak nu sin eol soko inge, ‘Fasrot liki an se inge nu ingo,’ na a som, kowos a ku in oru kutena ma.” (Mattu 17:14-20, LSK ) Sie met su oasr lulalfongi nu sin Jeova fwa ku in oru ma puspus su nunkeyuk mu tia ku in oru. Tusruktu fwin el lulalfongi ke ku lal sifwana, el fwa tia ku in akpayeye orekma, a el ku in pulakin mu el tia arla mwo, el sufwal in kulansap nu sin Jeova.

15, 16. Kut ku in kasru fuka sie met lutlut Baibel su pulakin mu el tia ku in kulansapu Jeova oana met puspus saye ku in oru?

¹⁵ Fwin sie met lutlut Baibel el pula mu el tia ku in kulansapu Jeova a met saye puspus, kut ku in akkeyel in tia nunku ke ku lal sifwana, a elan lulalfongi la Jeova el fwa kasrel. Piter el simusla: “Ke ma inge komwos in sifwana akfulpapye komwos ye po ku lun God, tu el fwa akfulatye komwos in pal fwal; a komwos in likiye nu kemwa sensen lomwos nu Fwel, tu el karungin komwos.” (1 Piter 5:6, 7) Kut enenu in kasru sie met lutlut in lungse Jeova a in oasr kena lal tu God in kol moul lal. Kalmen ma inge pa el enenu in lungse ma el lotela ke Baibel a akkalemye “fwako lun ku lun God” ke moul lal. (Galatia 5:22, 23, NW.) El enenu pa in aksaokye pre. (Filippai 4:6, 7) A el kalem la God pa sang nu sel oiyen pulaik a ku in oru ma el siyuk sel.​—Ridi 2 Korint 4:7.

¹⁶ Kutu sin met lutlut enenu kasru in akmwoye ku lalos in rid a in kaskas. Kutu elos ku in pulakin mu elos tia arlana fwal in kulansap nu sin Jeova ke sripen ma koluk su elos orala meet liki elos eis etauk kel. Ke oiya nukewa inge, kut ku in kasru sie met lutlut ke kut akkalemye lungse nu sel a in mongfusrasr nu sel. Jisus el fwak: “Met ku elos tia enenu met ono, a met mas mukena.”​—Mattu 9:12.

Kasru Mokul Puspus in Lutlut Kel Jeova

17, 18. (a) Kut ku in sramsram fuka nu sin mokul puspus nu ke orekma lasr in sulkakin peng mwo? (b) Mea kut fwa lutlutkin ke me lutlut toko?

¹⁷ Baibel mukena akkalemye ke kas mwo su ku in oru metu in engun na paye, a kut lungse in kasru mokul puspus in eis a lulalfongi ka. (2 Timote 3:16, 17) Fuka kut ku in koneak mokul puspus ke orekma lasr in sulkakin peng mwo? Kut ku in srike in fwakak peng mwo ke eku, ke tafun len tok ke saflaiyen wiku, ku ke pal in holiday su mokul puspus saap muta na in loom selos. A fwin ku, kut ku in siyuk in sramsram nu sin mokul ke sou. Fwin fwal, kut ku in sang ma lo nu sin mokul puspus ke niyen orekma. Kutu sin mutan wiyesr ke congregation elos payuk nu sin mokul su tia Met Lo, a kut ku in srike in kasru mokul inge in akkeye lungse lalos ke ma paye.

¹⁸ Kut lungse in kasru met puspus in etu ma paye. Met puspus su suk ke ma paye elos fwa long ke kas mwomwo su kut fwakak nu selos. Kut enenu in mongfusrasr a kafweang in kasru met nukewa su lungse in etu ma paye. Tusruktu mea ku in kasru mokul puspus su baptais tari in oasr kena lalos in karungin kunokon puspus ke congregation? Me lutlut toko fwa sang me top nu ke kusensiyuk se inge.

[Footnote]

Mea Me Top Lom?

• Kut ku in kasru fuka mokul puspus in sulela la mea ma yok sripe emeet ke moul?

• Kut ku in kasru fuka met lutlut Baibel in tia sangeng ke ma metu nunku kelos?

• Kut ku in kasru fuka sie met su pulakin mu el tia ku in kulansapu Jeova oana ke ma met puspus oru?

[Petsac ke sra 17]

Ya kom kafweang in akkalemye peng mwo nu sin mokul puspus?

[Petsac ke sra 18]

Kom ku in kasru fuka met lutlut Baibel lom in akola nu ke me srufwe puspus?