“Nik Kom Fungla nu ke Etauk Lom Sifwana”
“Lulalfongi Jeova ke insiom kemwa, a tia fungla nu ke etauk lom sifwana.”—SOAKAS 3:5.
1, 2. (a) Mea kutu ma upa su kut ku in sun? (b) Kut enenu in lulalfongi nu sin su ke pal kut sun oiya upa puspus, a ke kut oru sulela yok sripe, ku fwin kut lain me srufwe puspus? Efu?
MET su ma la company se su Cynthia el orekma ka el sisila kutu met orekma liki company lal.a Inge Cynthia el fosrngala meyen el ku pa in sisila liki orekma lal. Mea el fwa oru fwin ma inge sikyak? El ku in moli fuka ma el enenu in moli? Siepa sister inel pa Pamela, el lungse in som nu ke sie an su oasr ma enenu yok ke met fwakak peng mwo. Tusruktu ya el fwa som nu ke an se inge? Ma upa lal Samuel el siena kain. El liye petsa fokfok ke pal se el srakna tulik fwusr. Ke pal inge el yea 20 kutu, a el pulakin me srufwe upa in sifwilpa mutawauk in ngetang nu ke petsa fokfok. El ku in lain fuka kain in me srufwe upa se inge?
2 Kom fwin pulakin oiya upa puspus, ku kom lungse in oru sulela yok sripe, ku kom lain me srufwe puspus, kom lulalfongi nu sin su? Ya kom lulalfongi nu sum sifwana? Ku ya kom “filiye me utuk lom fwin Jeova”? (Sam 55:22) Baibel el akkalemye: “Mutun Jeova on nu sin met sumwosmwos, a srel igakla nu ke pang lalos.” (Sam 34:15) Ke ma inge arlana yok sripe kut in lulalfongi Jeova ke inse kewa lasr a in tia fungla nu ke etauk lasr sifwana!—Soakas 3:5.
3. (a) Mea kalmen in lulalfongi nu sin Jeova? (b) Efu ku kutu met elos fungla nu ke etauk lalos sifwana?
3 Kut akkalemye la kut lulalfongi Jeova ke inse kewa lasr kut fwin oru ma el siyuk sesr. Kut enenu in pre nu sel pal nukewa tu el fwa kasre kut a kol kut. Tusruktu met puspus elos nunku mu upa in lulalfongi nu sin Jeova. Ke sie me pupulyuk, oasr sie sister wiyesr su pangpang Lynn el fwak mu upa nu sel in lulalfongi na paye nu sin Jeova. Efu? El fwak: “Nga a papa tumuk tia liye sie sin sie, a nine kiyuk el tia karungin yu a tia nunku ke pulakin a ke ma enenu luk. Ke ma inge nga lotela in sifwana liyeyuyang.” Ke sripe se inge, upa nu sel in lulalfongi na paye nu sin kutena met. Kutu met elos fungla nu ke ku lalos sifwana a ke ma mwomwo su elos akpayeye ke moul lalos liki na in lulalfongi Jeova. Ke sie me pupulyuk, sie met elder su oasr experience yok saap lulalfongi na paye nu sel sifwana liki in pre nu sin God meet liki el oru ma puspus ke congregation.
4. Mea kut fwa lutlutkin ke me lutlut se inge?
4 Ke pal se kut pre nu sin Jeova in kasre kut, el tupan kut in kafweang na paye a akos kas in kolyuk lal. Kom etu fuka la ngea kom fwa lela Jeova in aksumwosye sie ma upa a ngea kom fwa srike in aksumwosye ma inge ke inkanek lom sifwana? Kut enenu in taran ke mea ke pal se kut oru sulela lasr? Efu ku pre arlana yok sripe ke kut kafweang in lain me srufwe puspus? Kut fwa sang me top nu ke kusensiyuk nukewa inge ke kut akuteye kutu me srikasrak in Baibel.
Ke Pal Se Kut Keok
5, 6. Mea Hezekaia el oru ke pal se Togusra lun an Assyria aksangengyel?
5 Baibel el akkalemye ke Togusra Hezekaia lun an Juda: “El fulyung nu sin Jeova. El tia kufla liki in fwasr tukol, a el liaung masap lal, su Jeova el sapkin nu sel Moses.” Togusra Hezekaia el lulalfongi Jeova, God lun Israel. (2 Togusra 18:5, 6) Oasr pal, Togusra Senakerib lun an Assyria a un met meun ku lal elos sruokye kutu siti lun an Juda, a el lungse pa in sruokye an Jerusalem. Ke ma inge Togusra Senakerib el supwela un met meun lal nu Jerusalem a supwella Rabseka a met tutafpo luo lal in oru kas in akkoluk nu sin met nukewa lun an Jerusalem a aksangengyelos. Mea Hezekaia el oru? Hezekaia el utyuk nu in tempul lun Jeova a el pre nu sel ouinge: “O Jeova God lasr, molikutla inge, nga kaifwe nu sum, liki in paul, tu togusrai nukewa fwin fwalu fwa etu tu kom, Jeova kom mukena God.”—2 Togusra 19:14-19.
6 Hezekaia el siyuk kasru sin Jeova, a el oru pa kutu ma ke ma upa inge. Ke sie me pupulyuk, meet liki el som nu in tempul in pre, el fwak nu sin met nukewa lal in tia topuk nu ke kas in akkoluk lal Rabseka. Hezekaia el supwela pa kutu sin met lal nu sin met palu Isaia in siyuk ke kas in kasru lal ka. (2 Togusra 18:36; 19:1, 2) A Hezekaia el oru mukena ma nukewa su el etu la a fwa akinsemwomwoye Jeova. El tia srike in eis kasru sin an Ijipt ku sin mutunfwal saye. El etu la Jeova el srunga elan oru ma inge. Paye la Hezekaia el tia fungla nu ke etauk lal sifwana. El lulalfongi Jeova. Tokin sie lipufan lun Jeova uniye met 185,000 sin met meun lal Senakerib, togusra se inge a met meun lal elos folokla nu in an Nineve.—2 Togusra 19:35, 36.
7. Me akkeye fuka kut ku in eis ke pre lal Hanna a Jona?
7 Pa inge me pupulyuk luo pa saye. Hanna, mutan kiyel Elkana sie met Livai, el arlana asor meyen el tia ku in orek tulik ke sripen el mutan talap se. Ne ouinge el fungla nu sin Jeova a el pre nu sel ke oiyen moul lal inge. (1 Samuel 1:9-11, 18) Jona, sie met palu el tia akos Jeova a okomyukla sin ik lulap soko. Tusruktu Jona el pre: “Meyen ongoiye luk nga pang nu sin Jeova, a el topuk nu sik. Nga pang liki insien Hedis a kom long pusrek.” A Jeova el molella Jona. (Jona 2:1, 2, 10) Sie me akkeye nu sesr in etu la fwinne kut sun oiya su arlana upa, kut ku in pre nu sin Jeova a siyuk sel in kasre kut.—Ridi Sam 55:1, 16.
8, 9. Mea ma yok sripe nu sel Hezekaia, Hanna, a Jona ke pal se elos pre? Mea kut ku in lotela ke me srikasrak lalos?
8 Me srikasrak lal Hezekaia, Hanna, a Jona ku in kasre kut in eis kalem ke ma su kut enenu in siyuk ke pre ke pal se kut pulakin me keok. Met tolu inge elos pulakin keok ke sripen ma upa su sikyak nu selos, ne ouinge pre lalos akkalemye nu sesr la elos tia nunku kelos sifwana a ke ma upa lalos mukena. Ma yok sripe emeet nu selos pa in akfulatye inen God, in alu nu sel ke inkanek sumwos, a in oru ma el siyuk selos. Hezekaia el asor ke sripen metu elos akkolukye en God. Hanna el lungse na paye mwen natul tusruktu el mwulela nu sin Jeova la el fwa sang tulik mokul natul inge nu sel in kulansap ke loom nuknuk in alu in an Shailo. A Jona el fwak: “Nga fwa moli ma nga mwulela ka.”—Jona 2:9.
9 Kut fwin pre ke me kasru ke sripen kut sun sie ma upa, kut enenu in nunku ke sripe puspus lasr paenang kut pre. Ya kut pre mukena ke me top nu ke ma upa lasr sifwana? Ku ya kut esam Jeova a akwuk lal ke pre lasr? Ke pal se kut pulakin me keok, kut ku in fosrnga na paye ke ma upa lasr sifwana, paenang kut tila nunku ke akwuk lun Jeova a orekma lasr in alu nu sel la pa inge ma yok sripe emeet ke moul lasr. Kut fwin pre nu sin Jeova ke kasru, kut enenu in esam in pre in akmutalye inel a in akfulatye kolyuk fulatlana lal. Kut fwin esam ma inge nukewa ke pre lasr, ma inge fwa kasre kut in oasr sie nunak mwomwo fwinne kut tia eis me kasru su kut lungse. Kutupal Jeova el topuk pre lasr ke el ase nu sesr ku tu kut in ku in muteng ke ma upa lasr. Oasr pal el tia sa in eisla ma upa.—Ridi Isaia 40:29; Filippai 4:13.
Ke Pal Se Kut Oru Sulela Lasr
10, 11. Mea Jiosafat el oru ke pal se el enenu in oru sie sulela upa?
10 Fuka kom ku in orala sulela yok sripe ke moul lom? Ya kom sulela meet ma kom lungse in sikyak a tokin ma inge kom siyuk sin Jeova in oru ma inge in sikyak ke oiya su kom lungse? Jiosafat, sie togusra lun an Juda, el sie me srikasrak mwomwo lun sie met su oru sie sulela ke inkanek sumwos. Oasr pal met Moab a met Ammon mutawauk in orek meun lain mutunfwal Juda. Tusruktu met Juda tia arla fokoko in lainelos. Ke ma inge mea Jiosafat el oru?
11 Baibel el akkalemye: “A Jiosafat el sangeng, a el esalang in suk Jeova.” In akkalemye la ma sikyak inge arlana upa, el fwak nu sin met Juda nukewa in tia mongo ke lusen sie pal a el oru metu in tukeni nu sie in siyuk ke kasru lun Jeova ka. A el tuyuk inmasrlon met lun Juda a Jerusalem a el pre ouinge: “O God lasr, ya kom fwa tia nununkalos? Tu wangin ku yurosr lain u lulap se inge su tuku in lain kut; a kut tia etu ma kut in oru, a mutasr nget nu sum.” God paye el long pre lal Jiosafat, a El meun kelos a molelosla. (2 Kronikel 20:3-12, 17) Kut fwin enenu in oru sie sulela yok sripe, yokna fwin sulela lasr inge oasr ma ku in oru nu ke fototo lasr nu sin Jeova, kut enenu in lulalfongi nu sel a tia ke etauk lasr sifwana.
12, 13. Ke pal se kut oru sulela, mea kut ku in lotela ke me srikasrak lal Togusra Devid?
12 Mea kut enenu in oru fwin oasr ma upa lasr su kut nunku mu fusrasr in aksumwosye? Saap kut nunku mu kut ku in sa koneak me top nu ka meyen kut sun tari kain in oiya se inge in pal somla. Me srikasrak lal Togusra Devid kasre kut in etu ke ma kut enenu in oru ke oiya puspus inge. Ke pal se met Amalek elos orek meun nu sin met ke siti lun Ziklag, elos eis mutan puspus kiyel Devid a tulik puspus natul, wi pa met puspus lal. Devid el pre nu sin Jeova a siyuk ouinge: “Ya fwal nga in som ukwe mwet su aklokoalokye kut?” Jeova el topuk: “Aok, ukwalos, kom a fwa sruokolosi a kom fwa molela mwet ma sruu.” Devid el akos, a el sifwilpa eis ma nukewa su met Amalek elos usla.—1 Samuel 30:7-9, 18-20, Leng Sasu ke Kas Kosrae.
13 Tokin kutupal su met Amalek elos tuku in orek meun in an Ziklag, met Filistia elos meuni pa met Israel. Devid el sifwilpa siyuk sin Jeova la mea el fwa oru. God el fwak nu sel me top arlana kalem inge: “Utyuk, tu paye nga fwa sot met Filistia nu in poum.” (2 Samuel 5:18, 19) Tia pat tokin ma inge, met Filistia elos sifwil orek meun nu sel Devid. Mea Devid el fwa oru ke pal se inge? El ku in nunku mu el etu tari ma el fwa oru meyen oiya inge sikyak tari nu sel pal luo. El ku in oru sulela in lain met lokwalok lun God. Tusruktu Devid el tia lulalfongi nu sel sifwana a ke kutangla su el eis in pal somla. Ke ma inge el sifwilpa pre nu sin Jeova. Ke pal se inge Jeova el sang topuk nu sel tusruktu siena liki ma meeta. Kalem la Devid el insemwomwo ke sripen el sifwilpa siyuk sin Jeova ke me kasru! (2 Samuel 5:22, 23) Saap kut nunku mu kutu ke ma upa fusrasr in akwanginyela, tusruktu kut enenu in taran in tia lulalfongi nu sesr sifwana a ke ma sikyak tari nu sesr in pal somla.—Ridi Jeremaia 10:23.
14. Mea kut ku in lotela ke ma simusla kel Josua a ke met Gibeon?
14 Kut ku in oru ma tafongla ke sripen oiyen sesumwos lasr. Ke ma inge, kut nukewa, fwinne kut met elder su oasr experience yok tari, enenu in tia mulkunla in siyuk sin Jeova ke kasru a in kol kut ke kut oru sulela puspus. Josua a met matu lun an Israel elos tia siyuk sin Jeova ke kas in kolyuk ke pal se met Gibeon elos tuku in siyuk sel Josua in tia lain a orek meun nu selos. Fwinne met Gibeon inge elos tuku ke siti lun Gibeon su oasr yen apkuran, elos orek lumalos mu elos tuku yen loesla me. Josua a met matu elos tia siyuk sin Jeova ke kas in kasru, a elos insese nu sin sie sin sie in tia lain met Gibeon inge. Paye Jeova el tia pulesru mwuleang su elos orala. Tusruktu el oru tu me sramsram se inge in simusyukla in Baibel tu kut in etu la Josua a met matu puspus inge elos tia siyuk sin Jeova ke kasru. Kut enenu in siyuk pal nukewa sin Jeova in kasre kut meet liki kut oru sulela lasr.—Josua 9:3-6, 14, 15.
Ke Pal Se Kut Kafweang in Lain Me Srufwe Puspus
15. Efu ku pre yok sripe in kasre kut in lain me srufwe?
15 Ke sripen kut nukewa oru ma koluk, kut enenu in oru ke ku lasr kewa in lain kena koluk lasr. (Rom 7:21-25) Tusruktu kut ku in kutangla in lain kena koluk inge. Fuka? Jisus el fwak nu sin met tumal lutlut la elos enenu in pre ke kasru in lain me srufwe. (Ridi Luk 22:40.) Fwinne kut pre, saap srakna oasr yurosr kena ku nunak tia mwo. Fwin ouinge, kut enenu in kafweang in “siyuk sin God” ke lalmetmet a etauk in kasre kut in lain me srufwe puspus. Baibel el akkalemye nu sesr la God el sang lalmetmet “nu sin met nukewa yokna, a el tia mulat.” (Jemes 1:5) Jemes el akkalemye nu sesr kutupa ma su ku in akkeye kut in lain kena koluk lasr. El fwak la sie met ku in “soloeni met elder lun congregation; a elos in pre kel a mwoswella ke oil in en Jeova. A pre lun lulalfongi fwa akkeyela met mas se.”—Jemes 5:14, 15, New World Translation.
16, 17. Ke pal se kut enenu me kasru in lain me srufwe, ngea pal mwo emeet in pre?
16 Kut tia ku in kutangla in lain me srufwe kut fwin tia pre nu sin God. Tusruktu kut enenu in esam in pre ke pal fwal. Nunku akmwoye ke ma sikyak nu sin sie mokul fwusr su akkalemyeyuk in Soakas 7:6-23. Sie eku el fwasr ke soko inkanek su el etu la oasr sie mutan kosro muta we. Mutan se inge el suli mokul fwusr se inge in ilyuk nu in loom sel. El tia ku in lain me srufwe se inge, a el fwasr tokol, oana soko ox som nu ke anwuki. Efu ku mokul fwusr se inge el som nu ke inkaneku? Baibel el akkalemye la “wangin lalmetmet lal.” Saap arlana upa nu sel in lain kena koluk lal. (Soakas 7:7) Ngea pal mwo a fwal nu sin mokul se inge in pre? Aok, mwo fwin el pre ke pal se mutan se inge el kaskas nu sel. Tusruktu pal mwo emeet elan pre pa ke pal se meet el nunku in fwasr ke inkanek soko inge.
17 Ke pal inge, saap sie mokul el kafweang yok in tia ngetang nu ke petsa fokfok. Tusruktu na mea fwin el ikasla Internet sites su el etu la oasr kain in video a petsa fokfok akkalemyeyuk ka? Oiya se inge el oapana nu sin mokul fwusr in Soakas sapta 7. Ma inge el oana in fwasr ke soko inkanek su oasr me sensen puspus. Kut enenu in pre siyuk ke kasru lun Jeova in lain me srufwe in ngetang nu ke petsa fokfok. Kut fwin pulakin kena koluk in liye petsa fokfok, kut enenu in tui a pre meet liki kut liye Internet sites su kut etu la arlana sensen.
18, 19. (a) Efu ku upa in lain me srufwe? Kut ku in kutangla fuka in lain me srufwe? (b) Mea kom lungse in akpayeye?
18 Tia fusrasr in lain me srufwe ku oiya koluk. Met sap Poul el fwak: “A nga liye siena lo in laak, su meuni nu ke lo lun nunkuk, a nga sruo ka ye ma sap lun ma koluk su on in laak.” Ke ma inge, “ma mwo su [kut] lungse [kut] tia oru; a ma koluk su [kut] tia lungse, ma inge [kut] oru.” (Rom 7:18-21, 23) Kut enenu in pre ke inse kewa lasr ke pal se oasr nunak koluk ku me srufwe su ilyuk nu ke nunak lasr in kasre kut in kutangla in lain me srufwe. Tokin ma inge kut enenu in kafweang in fwasr liki ma koluk puspus inge. Esam la “wangin me srifwe nu sumwos, a me srifwe na su met elos ku ka.” Ke kasru lun Jeova, kut ku in sruokye oaru lasr nu sel.—1 Korint 10:13.
19 Pre el sie me sang na mwomwo su ku in kasre kut ke pal se kut sun kain in oiya upa puspus, a ke pal se kut oru sulela yok sripe, ku kut fwin lain me srufwe puspus. Kut fwin pre nu sin Jeova, kut akkalemye la kut lulalfongi nu sel. Kut enenu pa in kafweang in siyuk sin God ke ku lal in kasre kut a akkeye kut. (Luk 11:9-13) Lela kut in lulalfongi nu sin Jeova pal nukewa a tia fungla nu ke etauk lasr sifwana.
[Footnote]
a Inen met ikulyukla.
Ya Kom Esam?
• Mea kom lotela kel Hezekaia, Hanna, a Jona ke oiya mwo in lulalfongi nu sin Jeova?
• Fuka me srikasrak lal Devid a Josua akkalemye nu sesr la kut enenu in taran ke kut oru sulela puspus?
• Ngea pal mwo a fwal in pre in lain me srufwe?
[Petsac ke sra 6]
Ngea pal mwo a fwal in pre in lain me srufwe?