Kut Fwa Fwasr in Sumwos Lasr!
“A fono keik, Nga fwa fwasr in sumwos luk.”—SAM 26:11.
1, 2. Mea Job el fwak ke sumwos a oaru lal, a mea Job sapta 31 el akkalemye kel?
IN PAL meeta, ma puspus pauniyuki orekmakinyuk kain me paun su pangpang beam scale. Kain in me paun inge el orekla ke mwusra soko sripsripyuk infulwe, a oasr alu luo sripsripyuk pa ke mutaweye a saflaiyen mwusra soko inge. Ma nukewa su e fwa pauniyuk itukyang nu ke sie alu, a ke alu se saye oasr sie weight ka. Met kulansap lun God in pal meeta elos enenu in orekmakin me paun mwo a sumwos.—Soakas 11:1.
2 Ke pal se mokul mwo a oaru se inge su pangpang Job el sun me keok ke me akkoluk lal setan, el fwak: ‘Lela [Jeova] elan pauniyu in sie me paun sumwos, tu God lan etu sumwos luk.’ (Job 31:6) Ke ma inge, Job el akkalemye ke oiya puspus su ku in sang me srufwe nu sin sie met su oaru a paye. Tusruktu Job el tia putatyang nu ke kain in me srufwe nukewa su sikyak nu sel, oana ke kas lal akkalemye in Job sapta 31. Me srikasrak mwomwo lal ku in akkeye kut in oru a etawi pa ma el oru. A kut ku in fwak pa wi lulalfongi yok ke kas lal Devid, sie met sim lun sam inge: “A fono keik, nga fwa fwasr in sumwos luk.”—Sam 26:11.
3. Efu ku arlana yok sripe in akkalemye oaru nu sin God ke ma lulap a ma srisrik?
3 Fwinne Job el sun kain in me srufwe upa, el sruokye na oaru lal nu sin God. Saap kutu met elos fwak mu Job el sie me srikasrak mwomwo in sruokye pal nukewa sumwos a oaru lal ke pal se el sun kain me srufwe upa. Kut tia pulakin kain in me keok su oana ke ma Job el pulakin ku sun. Tusruktu, kut fwin lungse in akkalemye la kut sruokye sumwos a oaru lasr pal nukewa a kut sang kasru ke kolyuk fulatlanu lun Jeova, kut enenu in oaru ke ma lulap a ma srisrik. —Ridi Luk 16:10.
Oiyen Moul Nasnas a Sumwos Arlana Yok Sripe
4, 5. Oana sie met su sruokye oaru lal, oiya fuka Job el fwasr liki?
4 In sruokye na sumwos lasr nu sin Jeova, kut enenu in akos akwuk lal ke oiyen moul nasnas, oana ma Job el oru. El fwak: “Nga oru sie mwuleang yurin mutuk. Na fuka nga ku in ngetnget nu sin sie virgin? Insiuk fwin penyukla nu sin sie mutan, a nga kasriki sisken mutunoaoa in loom sin met tulan luk, na lela mutan kiuk in ilil nu sin siepa, a lela met ngia in on yurol.”—Job 31:1, 9, 10.
5 Job el lungse in sruokye sumwos a oaru lal nu sin God, paenang el fwasr liki in tia ngetnget nu sin sie mutan in tia purakak kena koluk lal nu sel. Oana sie mokul payuk, el tia akkalemye oiya a nunak fokfok nu sin sie mutan lolap, ku in orek ako ku fototo yurin mutan kiyen mokul saye. Ke Me Sramsram lal Fwin Eolu, Jisus el akkalemye kas in sensen ke kena koluk a nunak fokfok. Paye la ma el fwak inge el sie me lutlut yok sripe su met nukewa su sruokye oaru lalos enenu in esam pal nukewa.—Ridi Mattu 5:27, 28.
Nikmet Orekmakin Inkanek Kutasrik!
6, 7. (a) In oana ke ma sikyuk nu sel Job, mea God el orekmakin in etu fwin kut sumwos a oaru? (b) Efu ku kut tia enenu in kutasrik a in kiapu met?
6 Kut tia ku in orekmakin inkanek kutasrik kut fwin lungse in sie sin met nukewa su nunkeyuk oana met sumwos a oaru. (Ridi Soakas 3:31-33.) Job el fwak: ‘Nga fwin fwufwasryesr yurin ma kikiap, a niuk sa nu ke kutasrik. Lela [Jeova] elan pauniyu in sie me paun sumwos, tu God lan etu sumwos luk.’ (Job 31:5, 6) Jeova el pauniye met nukewa ke “me paun sumwos.” Oana ke ma sikyuk nu sel Job, God el orekmakin akwuk sumwosmwos ke nununku sumwos lal in etu fwin kut sruokye oiyen oaru a sumwos lasr.
7 Kut fwin ekla sie met kutasrik, kut tia ku in sruokye sumwos a oaru lasr nu sin God. Met su sruokye oiyen oaru a sumwos elos “som liki ma lukma lun mekin” a elos tia “fwufwasryesr in kiapu” met. (2 Korint 4:1, 2) Tusruktu fuka fwin kut kutasrik ke kas ku orekma lasr, paenang oru met wiyesr in siyuk God ke me kasru? Paye la ma inge, tia mwo nu sesr! Met sim lun sam akkalemye kas inge ke on soko lal: “In keok luk nga pang nu sin Jeova, a el topuk yu. Tulala ngunik, O Jeova, liki ngoasro kikiap, a liki loa kutasrik.” (Sam 120:1, 2) Arlana mwo in esam la God el ku in tuni a etu oiya paye lasr, aok el ku in ‘srikeye inse a kidney lasr’ in etu fwin kut met su fwasr ke inkanek sumwos a paye—Sam 7:8, 9.
Akkalemye Me Srikasrak Mwomwo ke Oiya su Kom Oru nu sin Met Puspus
8. Oiya fuka Job el akkalemye nu sin met puspus?
8 Kut enenu in etawel Job, in kasre kut in sruokye oiyen oaru a sumwos lasr. Job el akkalemye ma sumwosmwos, pusisel, a el kulang a nunku ke met puspus. El fwak: “Nga fwin pilesru ma fwal nu sin met kulansap luk a mutan kulansap luk, ke elos akukuin yuruk, na mea nga fwa oru ke God el tuyuk? A ke el tuku, mea nga fwa topuk nu sel? Ya el su oreyula in inse el tia oral, ya tia siefwanna el su lumekutla in inse?”—Job 31:13-15.
9. Oiya fuka Job el akkalemye nu sin met kulansap nukewa lal, a fuka kut ku in etawi ma inge?
9 Kalem la, in len lal Job tia arlana pukanten akwuk in oru orekma in sang nununku nu ke legal case puspus lun metu. Oasr akwuk mwomwo in long a sang nununku ke cases lun metu, a oasr court in pal san su orekma pa a long ma upa lun met kulansap puspus. Job el akkalemye nununku sumwos a pakoten nu sin met kulansap nukewa lal. Kut fwin fwasr ke sumwos a oaru lasr, kut enenu in akkalemye kain in oiya inge, yokna kut fwin kulansap oana sie met elder ke congregation.
Akkalemye Oiya su Lungse in Sang Pal Nukewa, a Tia Oiyen Rapku
10, 11. (a) Kut etu fuka la Job el kulang a lungse in sang kasru? (b) Job 31:16-25 el akesmakinye kut ke kas in kai fuka ke ma Simusla?
10 Job el kulang a lungse in sang kasru, a tia nukanten a rapku. El fwak: “Nga fwin . . . oru mutun katinmas in okla, ku mongo ma nak mukefwanna, a elos su wanginla papa tumalos tia mongo ka . . . Nga fwin liye kutena tula ke enenu nuknuk . . . Nga fwin srukak pouk lainelos su wanginla papa tuma, tu nga liye me kasru luk in mutunoaoa, na lela fwinpisuk in putati liki an se, a pouk in koptelik liki sri.” A Job el tia sruokye sumwos a oaru lal fwin el a fwak nu sin gold: “Me insese luk!”—Job 31:16-25.
11 Kain in kas mwomwo inge akesmakinye kut ke kas lun met sap Jemes inge: “Me alu nasnas a tia fokfok ye mutun God a Papa tumasr pa inge: in fwasr nu yurin met mukaimtal a mutan katinmas ke ongoiyelos, a sifwana karunginkomyung in tia oasr tunum ke fwalu.” (Jemes 1:27) Kut ku in esam pa kas in sensen lun Jisus: “Sismouk, a liyekomwosyung liki rapku nu kemwa, tu moul lun met tia ke ma puspus ma lal.” Na Jisus el akkalemye ke sie me pupulyuk ke sie met kasrup tusruktu el rapku, su mise oana sie met su “tia kasrup nu sin God.” (Luk 12:15-21) In fwasr ke inkanek sumwos pal nukewa, kut tia enenu in lela kut in putatyang nu ke oiya koluk lun rapku. Oiyen rapku el oana sie nu ke orekma in alu nu ke me srulela meyen ma se su metu lungse na paye in eis ku in oru elan forla liki Jeova a ma inge ku in ekla oana sie ma srolela nu sel. (Kolosse 3:5) Oiyen sumwos a rapku tia ku in toeni nu sie.
Nikmet Som Liki Alu Paye
12, 13. Me srikasrak fuka Job el akkalemye in fwasr liki alu nu ke me srulela?
12 Met su fwasr ke inkanek sumwos tia som liki alu paye. Job el tia oru ouinge, meyen el fwak: “Nga fwin liye fwatu ke tolak, ku malem fwufwasryesr in saromrom, a insiuk penyuk in lukma, a oalik ngok pouk, ma se inge pa sie ma koluk fwal in kaiyuk yurin met nununku, tu nga nuna lafwekin God su in kosrao.”—Job 31:26-28.
13 Job el tia alu nu ke ma puspus su wangin moul la. Fwin insiel kufusyukla nu ke ma lukma ke sripen el ngetnget a liye ke ma puspus in kosrao, oana malem, a fwin ‘oalul ngok paul,’ saap el ‘throw kiss’ nu ke ma se su oana sie nu ke orekma in alu nu ke me sulela, el fwa ekla sie met su alu nu ke me srulela su lafwekin God. (Duteronomi 4:15, 19) In srukye sumwos a oaru lasr nu sin God, kut enenu in fwasr liki orekma in alu nu ke kain in me srulela nukewa.—Ridi 1 Jon 5:21.
Nik Kom Akkalemye Oiya su Lungse in Foloksak ku Oiyen Kutasrik
14. Efu kut ku in fwak la Job el srunga in orek foloksak?
14 Job el tia lungse in foloksak, ku sulallel. El etu la kain in oiya inge fwa akkalemye la el tia sie met su fwasr ke inkanek sumwos, meyen el fwak: “Nga fwin engan ke kunausla lun el su srunge yu, ku sifwana akfulatye yu ke ma koluk konoilak . . . , nga tia lela oalik in sitoela, ke siyuk moul lal ke sie me selnga.”—Job 31:29, 30.
15. Efu ku koluk in engan fwin ongoiye sikyuk nu sin sie met su srunge kut?
15 Job su sie met sumwomwos el tia insemwomwo fwin oasr ongoiye sikyuk nu sin met su srungel. Soakas el akkalemye ouinge: “Nikmet engun ke met lokwalok lom ikori; a nikmet lela insiom in engun ke el ekulyukla, saap Jeova el liye, a el tia insemwomwo ka, a el furokla mulat lal lukel.” (Soakas 24:17, 18) Ke sripen Jeova el ku in ridi insiesr, el etu fwin kut engan ke ongoiye lun met saye a paye la el tia insemwomwo ke kain in oiya inge. (Soakas 17:5) God el ku in kai kut ka, meyen el fwak: “Foloksak ma luk, a sifwil moli.”—Duteronomi 32:35.
16. Fwinne kut tia kasrup, kut ku in akkalemye fuka oiyen kulang?
16 Job el kulang. (Job 31:31, 32) Fwinne kut tia kasrup, kut ku in “fwasr tokin ma kulang.” (Rom 12:13) Kut ku in sang mongo mulala nu sin met saye, esam la “me mongo ke maasrik, yen lungse on we, mwo liki soko kao fat wi srunga.” (Soakas 15:17) In wi mongo yurin met lili wiyesr su sruokye oaru lalos, fwinne mongo mulala na, tusruktu oasr lungse akkalemyeyuk nu sin sie sin sie ku in sropon me insemwomwo a me akkeye.
17. Efu ku kut in tia srike in mwukunla ma koluk upa lasr?
17 Paye la sie me akkeye lulalfongi in engunkin orekma kulang lal Job, meyen pa inge oiya paye lal a el tia sie met su orek luma mukena. El tia oana met koluk su utyuk nu ke congregation in century se meet a elos lungse in ‘kaksakin met puspus meyen elos lungse in akinsemwomwoyelos sifwana ka.’ (Jud 3, 4, 16) Job el tia pa afunye ma tafongla lal ku ‘mwukunla metal,’ ke sripen el sangeng mu metu elos e fwa pulesrel fwin elos long a etu ka. El lungse God elan tuni el, a el inse mulala in fwakak kutena ma koluk lal. (Job 31:33-37) Kut fwin orek ma koluk upa, lela kut in tia nunku in mwukunla kain in orekma koluk inge, meyen kut nunku mu kut fwin mwukunla ma inge e fwa tia akkolukye inesr. Kut ku in akkalemye fuka la kut kafweang in sruokye sumwos a oaru lasr pal nukewa? Ke inkanek in akilen ma koluk lasr, auliyuk, suk me kasru in akkeye lulalfongi, a oru ma nukewa kut ku in oru in aksumwosye ma tafongla su kut oru.—Soakas 28:13; Jemes 5:13-15.
Sie Met su Sruokye Oaru a Sumwos lal Oasr ke Trial in Court
18, 19. (a) Efu kut ku in fwak la Job el tia akkolukye kutena met? (b) Mea Job el inse mulala in oru fwin oasr me akpayeye la oasr ma koluk lal?
18 Job el oaru, sumwos a oasr nunak mwomwo lal. Ke ma inge, el ku in fwak: “Fwal sik fwin wowoyuk lain yu, a luf we tukeni tung; nga fwin kangla fwako we ke wangin mani, ku oru tu elos su se fwal sa in mise, lela kokol in kapak aolla witu a tenerak in aolla barli.” (Job 31:38-40) Job el tia sruokye an sin met puspus saye, a el tia akkolukye met orekma. In oana Job, kut enenu in srukye pal nukewa sumwos a oaru lasr nu sin Jeova ke ma lulap a ma srisrik.
19 Ye mutun met kawuk tolu lal, welulang mokul fwusr se inge pangpang Eleu, Job el kaskas ke inkanek el moulkin. Job el suli kutena met fwin oasr ma koluk elos ku in koneak ke moul lal, a elos in file case lalos nu in court, in sang me lain ke inkanek in moul lal su, ke kas in pupulyuk el simusla moul lal ke sie papu a el signiye ‘inel’ nu ka. Fwin oasr me akpayeye la oasr ma koluk lal Job, el inse mulala in eis me kai upa. Ke ma inge el sang case lal a sano nununku lun court fulatlanu lun God. Pa inge ‘saflaiyen kas lal Job.’—Job 31:35, 40.
Kom Ku In Srukye Na Sumwos a Oaru Lom
20, 21. (a) Efu ku Job el ku in sruokye oaru lal? (b) Kut ku in akkeye fuka lungse lasr nu sin God?
20 Job el ku in srukye na sumwos a oaru lal meyen el lungse God, a Jeova el lungsel a kasrel. Job el fwak: “Kom ase nu sik moul a lungkulang; a liaung lom me karunganang ngunik.” (Job 10:12) Sayen ma inge, Job el akkalemye lungse nu sin met puspus saye, el akilen la kutena met su tia akkalemye lungkulang nu sin met puspus el tila akkalemye sangeng mwomwo nu sel su Ku liki Ku. (Job 6:14) Met nukewa su fwasr ke inkanek sumwos elos lungse God a met tulan lalos.—Mattu 22:37-40.
21 Kut ku in akkeye lungse lasr nu sin God kut fwin rid Kas lal len nukewa a sifwilpa nunku yok ke ma akkalemye kel. Ke pre lasr, kut ku in kaksakin Jeova a sang kulo nu sel ke kulang a ke orekma mwomwo nukewa lal nu sesr. (Filippai 4:6, 7) Kut ku in wi yuk on nu sin Jeova a eis ma lane yok ke asrouki mwomwo lasr yurin met kulansap nukewa lal. (Hibru 10:23-25) Oayepa, lungse lasr nu sin God e fwa yokyokelik pal nukewa ke kut wi ke orekma in luti a in “fwakak lango lal.” (Sam 96:1-3) Ke inkanek inge, kut ku in sruokye oaru lasr, oana met sim lun sam el oru, a akkalemye kas inge ke on soko lal: “A mwo nu sik in kalukyang nu sin God. Nga sulela Jeova God tu lan nien molela luk.”—Sam 73:28.
22, 23. In oana met kulansap su akfulatye kolyuk fulatlanu lun Jeova, fuka orekma lasr el oana sie nu sin met kulansap oaru puspus in pal meeta?
22 Ke lusen century puspus, Jeova el sang kain in kunokon puspus nu sin met kulansap lal su sruokye oaru lalos nu sel. Noa el orala oak a el “sie met luti lun sumwosmwos.” (2 Piter 2:5) Josua el kol met Israel nu ke Fwal su God el mwulela nu selos, tusruktu sripe yok paenang el ku in akpayeye ma inge pa ke sripen el rid “buk in masap . . . len a fong” a el orekmakin ma inge ke moul lal. (Josua 1:7, 8) Met Kristian in century se meet elos oru met tuma lutlut a tukeni nu sie pal nukewa in lutlutkin ma Simusla.—Mattu 28:19, 20.
23 Kut akfulatye kolyuk fulatlanu lun Jeova a kut sruokye oaru lasr ke inkanek lun orekma lasr in sulkakin ma sumwosmwos, in oru met tuma lutlut, a in orekmakin kas in kasru lun ma Simusla, a ke pal su kut tukeni nu sie yurin met lili wiyesr ke pal in meeting, assembly nukewa, a toeni lulap lasr. Kain in orekma mwomwo inge kasre kut in pulaik, fokoko ke lulalfongi lasr, a in eis me insemwomwo yok ke orekma lasr in oru ma lungse lun God. Ma inge tia upa nu sesr meyen Papa tumasr in kosrao a Mwen natul elos kasre kut pal nukewa. (Duteronomi 30:11-14; 1 Togusra 8:57) Sayen ma inge, oasr kasru yok lun u sin “met lili wiyesr nukewa,” su fwasr pa ke oaru a paye, a akfulatye pa Jeova oana Leum Fulatlanu lalos.—1 Piter 2:17.
Kom E Topuk Fuka?
• Mea nunak lasr ke akwuk fulat lun Jeova ke oiyen moul nasnas?
• Oiya mwomwo puspus fuka lal Job kom lungse na paye?
• In oana ke ma akkalemyeyuk in Job 31:29-37, oiya fuka Job el akkalemye?
• Efu ku kut ku in sruokye pa oaru a paye lasr nu sin God?
[Petsac ke sra 24]
Kut ku in sruokye oaru a paye lasr!