Ya Kom Fwa Sruokye Oaru a Paye Lom Pal Nukewa?

“Nu ke pal nga mise nga fwa tia sisla sumwos luk liki yu!”​—JOB 27:5.

1, 2. Kut enenu in wi oru kain in orekma in musa fuka, a kusensiyuk puspus fuka kut fwa akuteye?

SRIKE nunku akmwoye ke kom liye sie plan ku sroal ke sie loom. Kom arulana kaksakin akwuk mwomwo ke design lun loom inge. Kom insemwomwo in nunku ke inkanek puspus fwin mu tari loom se inge fwa ku in kasre kom a sou lom. Tusruktu, ya kom fwa tia insese nu ka la akwuk nukewa inge a ma kom nunku ka el wangin sripe fwin kom tia musaela loom se inge, a kom tia muta lue, a karungin ma inge?

² Ke inkanek oapana inge, kut ku in nunku ke oiyen oaru a paye la el oana sie oiya mwomwo su ku in use ma mwo nu sesr a nu sin met nukewa su kut lungse. Tusruktu ku pa in wangin me kasru kut ku in eis ke oiyen oaru a paye lasr kut fwin nunku mukena ka a tia sruokye a orekmakin ma inge ke moul lasr. Ke pal inge, molin kofwen orekma in musa loom el arulana yokelik molo. (Luk 14:28, 29) Ke inkanek oinge, orekma lasr in akkeye oiyen oaru a paye eneneyuk pal nukewa, wekunang kafweang yok, su ke saflaiye oasr me insemwomwo yok kut ku in eis ka. Ke ma inge lela kut in akuteye kusensiyuk tolu inge: Fuka kut ku in oana sie met oaru a paye pal nukewa? Fuka kut ku in sruokye oiyen oaru a paye lasr oana met Kristian? Mea ku in orek fwin oasr pal met se el tia sruokye oiyen oaru a paye lal?

Fuka Kut Ku In Oana Sie Met Oaru a Paye?

3, 4. (a) Ke inkanek puspus fuka Jeova el kasre kut in akkeye oiyen oaru a paye lasr? (b) Kut akkeye fuka oiyen oaru a paye, oana ke me srikasrak mwomwo su Jisus el oru?

³ Oana ma kut akuteye tari ke me lutlut se meeta la Jeova el akfulatye kut ke el lela kut in oru sulela lasr kut fwin lungse in sie sin met su sruokye oiyen oaru a paye ku tia. Tusruktu, kut insemwomwo meyen el akola in kasre kut in oru sulela lasr ka. El luti kut in musai oiya mwomwo inge, a el ase nu sesr yokna ke ngun mutal lal, su kasre kut in orekmakin me luti nukewa lal. (Luk 11:13) Sayen ma inge el sang me kasru nu sin met puspus tu elos in karungin fototo mwomwo lalos nu sin God tu elos in fwufwasryesr ke oiyen oaru a paye.​—Soakas 2:7.

⁴ Jeova el luti kut fuka in sruokye oiyen oaru a paye lasr? Yok liki ma nukewa, el supwema Mwen nutal, Jisus, nu fwalu. Jisus el akos ke lusen moul lal nufon. “El akos nu ke mise.” (Filippai 2:8) Ke ma nukewa el oru, Jisus el akos Papa tumal in kosrao, fwinne ma inge arulana upa. “Tusruktu, tia ma lungse luk, a ma lungse lom, in orek,” el fwak nu sin Jeova. (Luk 22:42) Kais sie sesr enenu in siyuk sesr sifwana, ‘Ya Nga akkalemye pa oiyen akosten inge?’ Kafweang lasr in fwasr ke inkanek lun akosten ke inse a nunak sumwos, fwa kasre kut in sruokye oiyen oaru a paye lasr. Lela kut in nunku ke oiyen moul su akosten el yok sripe nu ka.

5, 6. (a) Devid el akkalemye fuka yok sripaiyen oaru a paye fwinne wangin met saye liye kut? (b) Met Kristian ke pal inge elos sun kain in me srifwe fuka nu ke oiyen oaru a paye ke elos mukena muta?

⁵ Kut enenu in akos Jeova fwinne ke pal se kut mukena muta. Devid el etu ke yok sripaiyen oaru a paye ke pal puspus el mukena muta. (Ridi Sam 101:2.) In oana sie Togusra, pal nukewa Devid el akkalemye oiyen moul lal nu sin metu. Paye la oasr pal su sun foko puspus, ku tausen puspus, sin met welul. (Srike liye Sam 26:12.) Arlana yok sripe in akkalemye oiyen oaru a paye ke pal oinge, meyen sie togusra el enenu in oakiye me srikasrak mwomwo ye mutun met nukewa. (Duteronomi 17:18, 19) Oinge, Devid el lotela la fwinne ke pal el mukena muta, ‘in loom sel,’ el srakna enenu in sruokye a fwasr ke oaru a paye lal. A fuka nu sesr?

⁶ In Sam 101:3, kut ku in liye kas lal Devid: “Nga fwa tia likiye ma sito ye mutuk.” Oasr pal puspus lasr in likiye ma sito ye mutasr, yokna kut fwin mukena muta. Ke sie me pupulyuk, orekmakinyen Internet kutu pal el ku in me sruf nu sin met puspus. Arlana fusrasr nu sin metu in srifweyuk in liye petsa fokfok ka, a kutupa ma fokfok saye. Ya oiya inge el sie orekma in akos God su sapkinyuk Devid el an simusla ke kas inge? Petsa fokfok el arlana sensen, ke sripen el purakak kena koluk, su ku in kunausla nunak mwo, kunausla akwuk lun payuk, a akkolukye met nukewa su orekmakin ma inge.​—Soakas 4:23; 2 Korint 7:1; 1 Tessalonika 4:3-5.

7. Kain in akwuk mwomwo fuka ku in kasre kut in sruokye oaru a paye kut fwin mukena muta?

⁷ Ke ma paye, wangin met kulansap lun Jeova el mukena muta. Meyen Papa tumasr in kosrao el karungin kut pal nukewa. (Ridi Sam 11:4.) Jeova el arlana insemwomwo ke pal se el liye la kom kutangla me sruf! Ke kom oru oinge, kom akos kas in sensen lun Jisus in Mattu 5:28. Ke oiya nukewa, lela kom in tia ngetang nu ke petsa fokfok nukewa su ku in srifwe kom la in oru ma koluk. Nikmet lela oiyen oaru a paye saoklana lom in wanginla ke sripen orekma fokfok su oana ke kut liye petsa fokfok ku ridi me rid fokfok!

8, 9. (a) Daniel a met kawuk tolu lal elos sun kain in me srifwe fuka nu ke oiyen oaru a paye lalos? (b) Fuka met Kristian fwusr ke pal inge elos akinsemwomwoye Jeova a met Kristian wiyelos?

⁸ Ke kut muta inmasrlon met selulalfongi, lela kut in sruokye pa oaru a paye lasr ke kut akos Jeova. Nunku kel Daniel a met kawuk tolu lal. Ke pal se elos srakna fwusr, elos utukla nu Babulon oana met sruo. In an ingo, elos muta inmasrlon met puspus su wangin etauk lalos kel Jeova. A met kol in an se inge sapkin met Hibru akosr inge in kang me mongo yuyu ma lain masap lun God. Met fwusr inge saap fusrasr selos in nunku mu ma inge tia koluk. Aok, papa a nine kiyelos, wi met matu a met tol elos tia ku in liye ma elos oru. Su ku in etu na paye ma elos oru? Jeova mukena pa ku in etu. Ke ma inge elos sulela in sruokye ku akos lalos nu sel fwinne oasr masap a me sensen nu selos.​—Daniel 1:3-9.

⁹ Fwin fwalu nufon, met fwusr lun Met Lo lun Jeova elos lungse pa in tu na ku ke lulalfongi lalos, elos sruokye ku masap lun God nu sin met Kristian a elos srunga in fuleak nu ke me akkoluk lun asrouki lalos. Pal nukewa komwos met fwusr kafweang in tia wi ke orekmakinyen ono koluk, orekma sulallel, kas kapatol, orekma lun kosro a kutupa orekma koluk, arulana mwo meyen ke inkanek inge kom akos Jeova. Pal nukewa kom tu na ku in oru oinge, kom sruokye oiyen oaru a paye lom. Aok ke sripe inge kom akinsemwomwoye kom sifwana, a kom akinsemwomwoye Jeova a met lili wiyom nukewa!​—Sam 110:3.

10. (a) Kain in nunak tia sumwos fuka ke orekma lun kosro oru kutu met fwusr in kunausla oiyen oaru a paye lalos? (b) Fuka oiyen oaru a paye el kasre kut in kaengla liki me sensen nu ke orekma lun kosro?

¹⁰ Kut enenu pa in akkalemye akosten lasr kut fwin asrouki nu sin mutan puspus ku mokul puspus. Kut etu la Kas lun God el sapkin kut in tia oru orekma lun kosro. Tusruktu, kut fwin tia taran fwa arulana fusrasr in lela akosten lasr in tula a suk in oru kain in orekma su tia mwo. Ke sie me pupulyuk, kutu met fwusr elos wi oru orekma lun kosro ke orekmakinyen oalulos ku kapulos ku kal ipin manolos su orekmakinyuk nu ke orekma in orek tulik. Elos nunku mu kain in orekma inge tia koluk ke sripen ma inge el tia “orekma lun kosro” na paye. Kain in met fwusr inge elos mwulkunla, ku elos pulesru akwuk lun masap inge, la kas su orekmakinyuk in Baibel ke orekma lun kosro el wekunang nu ke orekma koluk nukewa inge, su sie met el ku in sisila liki congregation.a Koluk liki na ma inge, elos pulesru ma eneneyuk in sruokye oiyen oaru a paye lalos. Ke sripen kut kafweang yok in karungin oiyen oaru a paye lasr, paenang kut tia suk ke inkanek su ku in kufusla nunak lasr in fwak mu wangin ma koluk ka. Kut tia enenu in srike in oru ma koluk fwinne kut tia eis me kai ka. Kut tia nunku mukena ke me kai su congregation el ku in oru nu sesr. A, kut enenu in nunku yok in oru ma nukewa su akinsemwomwoye Jeova, a kut kafweang in tia oru kutena ma su ku in aktoasryel. Aok kut tia srike in oru kutena ma koluk, a kut kafweang in fwasr liki ma koluk nukewa a kut “kaengla liki kosro.” (1 Korint 6:18) Ke ma inge kut akkalemye la kut kain in met se su sruokye oiyen oaru a paye.

Fuka Kut Ku In Sruokye Oiyen Oaru a Paye Lasr Pal Nukewa?

11. Efu ku kais sie orekma in akosten el yok sripe? Sang me pupulyuk.

¹¹ Kut akkeye oiyen oaru a paye lasr ke inkanek lun akosten, ke ma inge kut ku in sruokye oiyen oaru a paye lasr kut fwin muteng in fwasr ke inkanek lun akosten. Orekma in akos ke pal sefwanna saap el nunkeyuk mu tia yok sripe, el ma na srisrik. Tusruktu, orekma puspus lun akosten el oakiye a akkeye oiyen oaru a paye ke lusen pal loeloes. In pupulyukkin ma inge: Sie hollow block saap el nunkeyuk mu tia arulana yok sripe, tusruktu kut fwin filiye block puspus in tukeni nu sie ke an la, kut ku in musaela sie loom mwomwo. Ke ma inge, kut fwin tafwela na in oru orekma in akosten pal nukewa, kut ku in sruokye oiyen oaru a paye lasr.​—Luk 16:10.

12. Devid el akkalemye fuka me srikasrak mwomwo in sruokye oiyen oaru a paye ke pal se el sun orekma sesumwos?

¹² Oiyen oaru a paye lasr ku in liyeyuk na paye ke pal se kut muteng ke ma upa puspus, ke orekma koluk, a orekma sesumwos. Nunku ke ma simusla in Baibel su akkalemye ke ma sikyak nu sel Devid. Oana met fwusr, el sun me kalyai upa su tuku sin sie togusra su srusrngiyuki nu ke kunokon lun met kol ke inkanek sumwos lun Jeova. Tusruktu Togusra Soul el akwanginyela me insemwomwo lun Jeova a el arulana sok a lemta kel Devid, su God el insemwomwo kel. Ne oinge, Soul el srakna oru orekma lal oana sie togusra ke lusen kutu pal a el orekmakin met meun lun Israel in ukwe a akkolukyel Devid. Jeova el lela orekma sesumwos inge in on ke lusen kutu yea. Ya Devid el toasr a mulat sin God? Ya el nunku mu wanginla sripe lal in tafwela in muteng? Mo el tia nunku oinge. A, el sruokye nunak mwomwo lal a sunak nu sel Soul oana met akmusrala lun God, a el srunga in foloksak nu sel Soul ke pal se su oasr pal mwomwo lal in oru ma inge.​—1 Samuel 24:2-7.

13. Fuka kut ku in sruokye oiyen oaru a paye lasr fwin oasr met lili su aktukulkulye ku aktoasrye kut?

¹³ Arulana mwo me srikasrak lal Devid nu sesr ke pal inge! Kut wi ke congregation lun met sesumwos fwin fwalu nufon, su saap oasr met su wi ka ku in oru ma koluk nu sesr ku elos ku in ekla met koluk a seoaru. Aok, kut akinsemwomwoyeyuk in moul ke sie pal su met kulansap nukewa lun Jeova elos fwa tia akkolukyeyuk. (Isaia 54:17) Tusruktu, oiya fuka kut fwa akkalemye fwin oasr sie met su aktukulkulye kut ku aktoasrye kut? Kut fwin sruokye inse toasr nu sin sie met lili, oiyen oaru a paye lasr nu sin God ku in sensenkinyuk na paye. Ella koluk lun met puspus el tia enenu in oru kut in toasr nu sin God ku oru kut in som liki oiyen oaru a paye lasr. (Sam 119:165) Kafweang lasr in muteng fwin oasr ma upa puspus fwa kasre kut in sruokye oiyen oaru a paye lasr.

14. Oiya fuka akkalemyeyuk sin met lili nukewa su sruokye oiyen oaru a paye lalos nu ke me aksumwos nu ke akwuk a me luti lasr?

¹⁴ Kut ku pa in sruokye oiyen oaru a paye lasr ke kut fwasr liki in suk ma tafongla lun met lili wiyesr pal nukewa, ku fwin kut kafweang in tia loang ke ma koluk lalos. Kalmen ma inge pa kut oaru nu sin Jeova. El akinsemwomwoye met kulansap nukewa lal yokna ke pal inge. Alu paye el akfulatyeyuk na paye ke pal inge fwin fwalu nufon. (Isaia 2:2-4) Fwin oasr me aksumwos su orek nu ke me akuteye ke fus in Baibel ku ke oreyen ma puspus, kut fwa engankin a lungse in eis a orekmakin ma inge. Kut insemwomwo in liye me akpayeye nu ka la etauk ke ma paye ke kas lun God el srakna yokyokelik. (Soakas 4:18) Fwin upa nu sesr in kalem ke sie me aksumwos, kut enenu in siyuk sin Jeova in kasre kut in eis kalem a etauk mwomwo ka. Ke pal inge, kut muteng in akos pal nukewa, a kut sruokye oiyen oaru a paye lasr.

Fuka Fwin Sie Met Lili el Tia Sruokye Oiyen Oaru a Paye Lal?

15. Su mukena ku in eisla oiyen oaru a paye lom?

¹⁵ Kusensiyuk inge el oru kut in nunku yok ka. Oana ke ma kut lotela ke me lutlut se meeta, oiyen oaru a paye el arulana yok sripe. Fwin oiya inge wangin yurosr, wangin fototo mwomwo lasr nu sin Jeova a wangin fwinsrak paye lasr. Lela kut in esam ke ma inge pal nukewa: Oasr met sefwanna in kosrao a fwin fwalu su ku in eisla oiyen oaru a paye lom. Met se inge pa kom sifwana. Job el arulana kalem ke ma paye inge. El fwak: “Nu ke pal nga mise nga fwa tia sisla sumwos luk liki yu!” (Job 27:5) Fwin oasr yurom kain in oiya a nunak oinge a fwin kom kafweang in fototo nu sin Jeova pal nukewa, ma inge fwa ku in kasre kom in sruokye oiyen oaru a paye lom.​—Jemes 4:8.

16, 17. (a) Fwin sie met el orala ma koluk upa, mea inkanek koluk su ku in sikyak ku orek? (b) Piya inkanek sumwos in orek?

¹⁶ Ne oinge, oasr kutu su tia kutangla in sruokye oiyen oaru a paye lalos. Oana ke ma sikyak in pal meeta ke met sap elos srakna moul, oasr kutu met Kristian ke pal inge elos oru ma koluk upa ke pal puspus. Fwin ma inge sikyak nu sum, ya wanginla kutena kain in fwinsrak lom? Mo tia oinge. Mea ku in orek? Ma se meet lela kut in akuteye ma se su tia eneneyuk in orek. Oasr oiya lun met su lungse in mwukunla ma koluk ye mutun papa a nine kiyelos, nu sin met lili, ku nu sin met elder. Tusruktu, Baibel el akesmakinye kut: “El su afwunye ma koluk lal fwa tia kapkapek, a el su fwakak a fwasr liki fwa eis kulang.” (Soakas 28:13) Elos su suk in mwukunla ma koluk lalos elos tafongla na paye, meyen wangin kutena ma su elos ku in mwukunla ye mutun God. (Ridi Hibru 4:13.) Oasr kutu su srike in moulkin moul luo, kalme pa elos orek luma na la elos kulansap nu sin Jeova a ke pal senpana elos oru ma koluk. Kain in inkanek in moul inge el wangin ke oiyen oaru a paye ka, paye la met oinge, su moulkin kain moul luo, el tula liki oiyen oaru a paye lal. Jeova el tia insemwomwo ke orekma in alu lun met puspus su mwukunla ma koluk upa lalos. Aok, kain in oiya koluk inge su orek luma na mu elos mwo el akkasrkusrakyel mukena.​—Soakas 21:27; Isaia 1:11-16.

¹⁷ Oasr masap lun Baibel su arulana kalem la mea sie met Kristian el enenu in oru fwin el orala ma koluk upa. Pa inge pal in suk kasru lun met Kristian elder. Jeova el srusrngiye met elder la elos pa ku in sang kasru nu sin met lili puspus su munas ke lulalfongi lalos ke sripen elos oru ma koluk. (Ridi Jemes 5:14.) Nikmet lela sangeng lom ke me kai ku me aksumwos in oru in tia akmwoyela fototo mwomwo lom nu sin God. Aok, in oana ke kas in pupulyuk, ya sie met lalmetmet el tia eis me fwakfuk, ku el srunga laslas ke sripen ma inge ngal na paye fwinne el etu la mas lal el sensen na paye nu ke moul lal?​—Hibru 12:11.

18, 19. (a) Fuka me srikasrak lal Devid el akkalemye la oiyen oaru a paye el ku in sifwil akmwoyeyuk? (b) Mea sulela lom nu ke oiyen oaru a paye lom?

¹⁸ Ya oasr fwinsrak in akkeyela na paye? Ya oiyen oaru a paye el ku in sifwil akmwoyeyuk fwin ma inge tula tari? Lela kut in sifwilpa nunku ke me srikasrak lal Devid. El orala ma koluk upa. El liye a oasr nunak in rapkui mutan kiyen sie mokul, el orek kosro nu sel, a el orala akwuk tu mokul tuman mutan se inge in anwuki ke meun. Aok, arulana upa in nunku kel Devid in pal sa la el sie met oaru a paye. Ne oinge ya wanginla kutena kain in fwinsrak lal? Devid el enenu me kai upa a el eis ma inge. Ke ma inge, ke sripen el auliyuk na paye paenang Jeova el sang nunak munas nu sel. Oasr ma Devid el lotela ke me kai inge a el sifwilpa akmwoye oiyen oaru a paye lal ke el kafweang in akos God a el muteng ke me kai inge. Moul lal Devid el me srikasrak nu ke kas su kut ku in ridi ka in Soakas 24:16: “Tu sie met sumwosmwos ikori pal itkosr, a sifwil tuyuk.” Mea fwokin ma inge? Nunku ke ma Jeova el fwak nu sel Solomon ke pal se Devid el mise tari. (Ridi 1 Togusra 9:4.) God el esamul Devid oana sie met oaru a paye. Paye la, Jeova el ku in aknasnasye sie met koluk su auliyuk liki tun a ma fokfok lun ma koluk upa.​—Isaia 1:18.

¹⁹ Aok, kom ku in sie met su oaru a paye ke kom akkalemye akosten lom nu sin God ke sripen lungse paye lom nu sel. Kafweang in muteng, a fwin oasr ma koluk upa sikyak, kom srike in akkalemye la kom auliyuk na paye ka. Aok arulana saok oiyen oaru a paye lasr! Lela kais sie sesr in oru sulela mwomwo oana Devid: “A fono keik Nga fwa fwasr in sumwos luk.”​—Sam 26:11.

[Footnote]

Kom E Topuk Fuka?

• Fuka kom ku in akkalemye la kom sie met su sruokye oiyen oaru a paye?

• Ke inkanek puspus fuka kom ku in sruokye oiyen oaru a paye lom?

• Fuka kom ku in sifwilpa akmwoye oiyen oaru a paye lom?

[Box on page 20]

‘SIE OREKMA MWO NA PAYE PA INGE IN ORU’

Sie mutan su putete ke malem limekosr el fwak kas inge ke oiyen kulang a oaru lun sie mutan su el nukin. El muta ke sie sto kukakin coffee, a tokin ao puspus ke el som liki ke sto su kukakin coffee el etauk la el mwulkunla wallet se lal we. Oasr $2,000 ke wallet lal, a lupan mani se inge el yok liki lupan mani su el us pal nukewa. “Nga arulanu asor ka,” el fwak nu sin met su orekma ke sie newspaper. Tusruktu, oasr sie mutan fwusr su koneak wallet se lal inge a el sulaklak in suk la su met se la wallet se inge. El tia ku in koneak la su met se ma la ma inge, paenang el usla ma inge nu ke an lun police, a tok policeman elos koneak mutan se su ma la wallet se. “Ma el oru inge el sie orekma su arlana mwo a fwal in orek,” mutan se inge el akkalemye ke kas in kulo lal inge. Efu ku mutan fwusr se inge el kafweang yok in folokonla lupan mani se inge? Newspaper se inge el akkalemye la ke sripen el sie sin Met Lo lun Jeova, el “akkalemye oiyen oaru a paye inge ke sripen oiya mwomwo a akwuk sumwos su el lotela ke alu lal inge.”

[Picture on page 21]

Met fwusr elos ku in sruokye oiyen oaru a paye lalos fwin oasr me srifwe

[Picture on page 22]

Oasr pal Devid el tula liki oiyen oaru a paye lal, tusruktu el sifwilpa akmwoyela ma inge