Ya Kom Oru Me Srikasrak in Akkalemye Sunak Nu sin Met Lili Nukewa?

“Ke lungse met lili komwos in lung nu sin sie sin sie. Ke sunakin, komwos in akfulatye sie sin sie.”—ROM 12:10.

1, 2. (a) Kas in kaifwe fuka Poul el simusla nu sin met lili in an Rom? (b) Kusensiyuk puspus fuka kut fwa lutlutkin?

KE LETA lal nu sin met Rom, met sap Poul el akkalemye ke yok sripaiyen orekma lasr oana met Kristian in akkalemye lungse nu sin met lili nukewa ke congregation. El akesmakinye kut la lungse lasr enenu in paye a in “tia kutasrik.” El akkalemye pa in “lungse met lili” a el simusla pa la kain in lungse inge enenu in akkalemyeyuk ke inkanek mwo a paye.—Rom 12:9, 10a.

² Aok, pulakin mwomwo lasr eneneyuk nu ke lungse lasr nu sin met lili, tusruktu oasr pa ma eneneyuk yok sayen ma inge. Kain in pulakin mwomwo inge enenu in akkalemyeyuk ke inkanek lun orekma. Aok, wangin kutena met ku in etu ke lungse a pulakin mwomwo lasr fwin kut tia akkalemye ma inge ke kutu inkanek. Ke ma inge, Poul el fwak pa kas in kaifwe inge: “Ke sunakin, komwos in akfulatye sie sin sie.” (Rom 12:10b) Mea eneneyuk in akkalemye sunak? Efu ku yok sripe in akkalemye me srikasrak mwo in akkalemye sunak nu sin met lili wiyesr? Kut ku in oru fuka ma inge?

Mea Eneneyuk in Akkalemye Sunak?

3. Kalme fuka lun kas se inge “sunak” orekmakinyuk in Baibel ke kas Hibru a kas Grik?

³ Kas Hibru su lungasyukla nu ke kas se inge “sunak” el kalmekin la kut in nunku ke sie met la el arlana yok sripe. Sie met su sunakinyuk kalmekin la el sie met su arlana yok sripe. Kas Hibru lun kas sepana inge lungasyukla pa in ma Simusla ke pal puspus oana “mwolana,” su akkalemye pa ke saokiyen sie met su akfulatyeyuk ku sunakinyuk. (Genesis 45:13) Kas Grik su lungasyukla nu ke “sunak” in Baibel el kalmekin nu ke akfulatye, yok sripe, arlana saok. (Luk 14:10) Aok, met nukewa su kut akkalemye sunak nu selos elos arlana saok, a yok sripe nu sesr.

4, 5. Mea ma eneneyuk in akkalemye sunak nu sin met puspus saye? Sang me pupulyuk.

⁴ Mea eneneyuk nu ke orekma in sunakin met puspus? Fwin oasr nunak mwomwo lom nu sin met puspus kom ku in akkalemye akfulat nu selos. Nunak lom ke met puspus ku in oru kom in akkalemye oiya paye lom nu selos. Ke kas saye, ma se meet kut enenu in nunku ke met lili wiyesr wi sunak lasr, a tokin ma inge kut ku in akkalemye sunak nu selos.

⁵ Na fuka sie met Kristian el ku in akkalemye sunak paye nu sin met lili fwin ma inge tia tuku ke insiel? (3 Jon 9, 10) In oana ke saku su ku in kapek a ku pa in yokelik fwin ma inge okala ke fok mwo, ke inkanek oapana inge, sunak lasr ku in paye a oan nu tok fwin ma inge oasr ke insiesr. Fwin sunak su kut akkalemye nu sin met puspus el tia ma tuku ke insiesr, sunak lasr inge fwa munasla a wanginla, in oana ke okan saku kapek ke fok koluk. Ke ma inge, Poul el mutawauk ke kas in kaifwe ke kas inge su arlana kalem: “Lela lungse in tia kutasrik.”—Rom 12:9; ridi 1 Piter 1:22.

Akkalemye Sunak Nu Selos su Orekla “ke Luman God”

6, 7. Efu ku kut enenu in akkalemye sunak nu sin met puspus?

⁶ Ke sripen sunak lasr su tuku ke insiesr el arlana yok sripe nu sesr kut in akkalemye sunak paye nu sin met puspus, paenang kut enenu in esam pal nukewa ke sripe puspus su oasr ke ma Simusla la kut in sunakin met lili nukewa ke congregation lasr. Ke ma inge, lela kut in nunku akwoye ke sripe luo inge.

⁷ Tia oana sie ke ma orekla nukewa fwin fwalu, metu elos orekla ke “luman God.” (Jemes 3:9) Ke ma inge, oasr yurosr kain in oiya mwomwo lun God oana lungse, lalmetmet, a nununku sumwos. Loang akmwoye nu ka la mea pa kut eis sin God su orekutla. Met sim lun sam el fwak: “O Jeova . . . , kom filiye mwolana lom yetun kosrao! . . . Tu kom orala [metu] . . . a sonolang ke mwolana a sunak.” (Sam 8:1, 4, 5; 104:1)a God el sang nu sin metu oiyen sunak, a mwolana. Ke ma inge, kut fwin akkalemye sunak nu sin sie met, kut akilen la Jeova pa Sropon sunak a mwolana lun metu. Inge, fwin oasr sripe mwomwo lasr in akkalemye sunak nu sin met nukewa, kut enenu in akkalemye sunak yokna nu sin met lili wiyesr!—Jon 3:16; Galetia 6:10.

Kut Nukewa Oana Sie Sou

8, 9. Poul el akkalemye sripe fuka met Kristian in oasr sunak paye lalos nu sin met lili wiyelos?

⁸ Poul el simusla siepa sripe mwomwo paenang kut akkalemye sunak nu sin sie sin sie. Meet liki el sang kas in kaifwe in akkalemye sunak, el simusla: “Ke lungse met lili komwos lung sie sin sie.” Kas Grik su lungasyukla oana “lung” kalmekin nu ke me kapur fokoko su oru met nukewa ke sou in oasr inse sefwanna a in kasru sie sin sie. Ke ma inge, ke Poul el orekmakin kas se inge, el akkalemye yok la fototo nu sin sie sin sie lun met lili ke congregation enenu in fokoko a oana sie ke fototo lun sie sou mwomwo. (Rom 12:5) Sayen ma inge, esam pa la Poul el simusla kas inge nu sin met Kristian akmusrala, a elos nukewa nutla oana tulik nutin Papa sepana, Jeova. Ke ma inge elos nukewa oana sie sou su arlana fototo nu sin sie sin sie. Paye la, met Kristian akmusrala in len lal Poul oasr sripe mwomwo lalos in akkalemye sunak nu sin sie sin sie. Kain in oiya se inge oasr pa inmasrlon met Kristian akmusrala nukewa ke pal inge.

⁹ Na fuka nu sin met lili su wi ke u lun “sip ngie”? (Jon 10:16) Aok elos soenna nutla sin God oana tulik natul, ne ouinge elos ku in panglolos sie sin sie brother a sister meyen elos orala sie sou lun met Kristian su oasr inse sefwanna lalos yen nukewa fwalu nufon. (1 Piter 2:17; 5:9) Ke ma inge, fwin met lili su wi ke u lun sip ngie elos etu kalme paye ke pal nukewa elos pangon sie sin sie “brother” ku “sister,” oasr pa sripe mwo lalos in akkalemye sunak paye su tuku ke insielos nu sin met lili wiyelos.—Ridi 1 Piter 3:8.

Efu ku Yok Sripe in Akkalemye Sunak?

10, 11. Efu ku yok sripe in oasr sunak yurosr a in akkalemye ma inge nu sin met lili?

¹⁰ Efu ku yok sripe in akkalemye sunak su tuku ke inse paye? Ke sripe se inge: Kut fwin akkalemye sunak nu sin met lili wiyesr, kut sang kasru yok nu ke inse sefwanna lun met nukewa ke congregation a in akkeyelos.

¹¹ Paye la, kut akilen la fototo mwomwo nu sin Jeova a kasru su tuku ke ku lal pa sropon me akkeye yok su kut ku in eis oana met Kristian paye. (Sam 36:7; Jon 14:26) Ke pal sepana inge, ke pal se met lili wiyesr elos akkalemye la elos aksaokye kut, kut akkeyeyuk ka. (Soakas 25:11) Kut engun a akkeyeyuk fwin oasr sie met su fwak ma mwomwo nu sesr a akkalemye sunak nu sesr. Orekma lalos inge ase nu sesr me akkeye tu kut in ku in tafwela in fwufwasryesr ke inkanek lun moul wi engun yok. Wangin alolo ka la kom pula pa kain in pulakin mwomwo inge.

12. Fuka kais sie sesr ku in sang kasru in akkeye lungse paye a insemwomwo ke congregation?

¹² Inge, ke sripen Jeova el etu la mutawauk ke pal se kut isusla oasr tari ma eneneyuk lasr in eis sunak, paenang ke inkanek lun Kas lal el kaifwe kut in “lungse na paye in sunakin a akfulatye sie sin sie.” (Rom 12:10, Today’s English Version; ridi Mattu 7:12.) Met Kristian nukewa su orekmakin kas in kasru inge ke insielos sang kasru nu ke u lun met lili in oasr lungse paye a insemwomwo inmasrlolos. Ke ma inge, mwo kut in siyuk kusensiyuk se inge nu sesr sifwana, ‘Ngea pal safla su Nga akkalemye ke kas a orekma sunak paye luk nu sin sie brother ku sister ke congregation?’—Rom 13:8.

Kut Nukewa Enenu in Oru Me Srikasrak in Akkalemye Sunak

13. (a) Su e fwa oru me srikasrak in akkalemye sunak? (b) Kas lal Poul in Rom 1:7 el akkalemye mea?

¹³ Su e fwa oru me srikasrak in akkalemye sunak? Ke leta lal nu sin met Hibru, Poul el akkalemye met Kristian elder oana “met kol lomwos.” (Hibru 13:17) Aok, met elder elos kol kain in orekma mwomwo puspus. Ne ouinge, oana met seperd ke congregation, elos enenu in kol a oru me srikasrak in akfulatye met lili, wekunang met elder saye nukewa. Ke sie me pupulyuk, fwin met elder elos oru meeting lalos in sramsramkin ma enenu nukewa lun congregation, elos akkalemye sunak nu sin sie sin sie ke elos loang akmwoye ke kas lun kais sie selos. Sayen ma inge, elos akkalemye sunak ke elos aksaokye nunak a kas lun met elder nukewa ke pal se elos oru sie sulela mwomwo. (Orekma 15:6-15) Tusruktu, kut enenu pa in esam la leta lal Poul nu sin met Kristian fwin an Rom el tia ma nu sin met elder mukena a nu sin met lili nukewa ke congregation. (Rom 1:7) A ke kutupa oiya, kas in kaifwe se inge in oru me srikasrak in akkalemye sunak arlana fwal nu sesr nukewa ke pal inge.

14. (a) Sang me pupulyuk ke ma tia oana sie inmasrlon orekma in akkalemye sunak a in oru me srikasrak in akkalemye sunak nu sin sie sin sie. (b) Kusensiyuk fuka kut enenu in siyuk?

¹⁴ Nunku akmwoye pa ke siepa oiya ke kas in kasru lal Poul. El kaifwe met lili fwin an Rom elos in akkalemye sunak a elos enenu pa in oru me srikasrak in akkalemye sunak nu sin sie sin sie. Efu ku ma inge arlana yok sripe? Srike nunku ke me pupulyuk se inge. Ya sie met luti el fwa akkeye tulik lutlut su etu tari in rid a sim? Mo. A, met luti el e fwa kasru tulik lutlut elos in akmwoye inkanek lalos in rid. Ke inkanek oapana inge, lungse lasr nu sin sie sin sie, su akkeye kut in akkalemye sunak, pa me akul arlana kalem lun met Kristian paye. (Jon 13:35) Tusruktu, in oana ke tulik lutlut su etu tari in rid a in sim elos ku in kapkapek yok ke elos akmwoye inkanek lalos in rid, ke inkanek oana sie kut ku pa in kapkapek kut fwin oru me srikasrak in akkalemye sunak. (1 Tessalonika 4:9, 10) Kunokon mwomwo se inge etukyang nu sin kais sie sesr. Ya kom orekmakin pal in akkalemye sunak nu sin met lili puspus ke congregation lom?

Sunakin ‘Met Pusisel’

15, 16. (a) Nu sin su kut enenu pa in tia mwulkunla in akkalemye sunak nu se, a efu? (b) Mea ku in akkalemye ke sunak su oan ke insiesr nu sin met lili nukewa wiyesr?

¹⁵ Su ka ke congregation kut tia enenu in mwulkunla in akkalemye sunak nu se? Kas lun God el akkalemye: “El su pakomuta met sekasrup [“met pusisel,” NW] sangwun nu sin Jeova, a orekma mwo lal El fwa sifwil moli nu sel.” (Soakas 19:17) Fuka akwuk mwomwo su oasr ke kas inge ku in kasre kut ke kut kafweang in oru me srikasrak in akkalemye sunak?

¹⁶ Kom a fwa insese ka la oasr met puspus su lungse in akkalemye sunak nu sin met kol lalos, tusruktu met inge elos tia akkalemye sunak nu sin met puspus su elos nunku mu srik lukelos ku pusisel lukelos. Tusruktu, Jeova el tia ouinge. El fwak: “Elos su sunakin yu Nga fwa sunakin.” (1 Samuel 2:30; Sam 113:5-7) Jeova el akkalemye sunak nu selos nukewa su kulansapul a akfulatyel. El tia pulesru ‘met pusisel.’ (Ridi Isaia 57:15; 2 Kronikel 16:9) Aok, kut lungse in etawi Jeova. Ke ma inge, kut fwin lungse in etu la fuka orekma lasr in akkalemye sunak nu sin met puspus, kut enenu in siyuk sesr sifwana, la ‘Oiya fuka Nga akkalemye nu selos su tia orekma oana sie met kol ku met liaung, a wangin kunokon yok lalos ke congregation?’ (Jon 13:14, 15) Me top lom nu ke kusensiyuk se inge e fwa akkalemye ke oiyen sunak lasr su oan ke insiesr nu sin met puspus saye.—Ridi Filippai 2:3, 4.

Kut Akkalemye Sunak ke Kut Orekmakin Pal Lasr

17. Mea inkanek yok su kut ku in oru me srikasrak mwo in akkalemye sunak, a efu?

¹⁷ Mea inkanek yok su kut ku in oru me srikasrak in akkalemye sunak nu sin met lili nukewa ke congregation? Ke inkanek lun kafweang lasr in orekmakin pal lasr nu sin met lili puspus. Efu ku ouinge? Oana met Kristian, kut arlana kafofo ke moul lasr, a kut orekmakin pal yok lasr in akpayeye orekma yok sripe nukewa lasr ke congregation. Aok, paye la kut nunku ke pal lasr oana ma su arlana yok sripe. Ke ma inge, kut akilen la kut in tia siyuk sin met lili wiyesr in orekmakin pal yok lalos nu sesr. Oayepa, kut aksaokye fwin met lili ke congregation elos kalem ka la elos tia pana siyuk sesr in orekmakin pal yok lasr nu selos.

18. Fuka kut ku in akkalemye la kut lungse na paye in orekmakin pal lasr nu sin met lili wiyesr?

¹⁸ Tusruktu, kut akilen pa (yokna nu selos su kulansap oana met liaung ke congregation) la fwin kut lungse in tui ke kutena orekma lasr tu kut in orekmakin pal lasr nu sin met lili wiyesr ma inge akkalemye la kut sunakin elos. Ke inkanek fuka? Kut fwin tui ke orekma nukewa lasr in orekmakin pal lasr nu sin met lili wiyesr, in oana ke kas in pupulyuk, kut fwak nu selos, ‘Kom arlana saok nu sik, a yok sripe Ngan orekmakin pal luk nu sum liki na Ngan tafwela in oru orekma luk.’ (Mark 6:30-34) Ke inkanek saye, fwin kut srunga in tui ke orekma lasr a kut in orekmakin pal lasr nu sin met lili wiyesr, kut ku in oru elos in nunku mu elos tia yok sripe nu sesr. Aok, kut nukewa kalem ka la oasr pal kut tia ku in tui ke sie orekma su kut oru. Tusruktu, kut fwin lungse in orekmakin pal lasr, ku kut srunga in sang pal nu selos, ku in akkalemye ke lupan sunak lasr su oasr ke insiesr nu sin met lili wiyesr nukewa.—1 Korint 10:24.

Lela Kut in Akpayeye la Kut Lungse in Oru Me Srikasrak

19. Mea pa inkanek saye su kut ku in akkalemye sunak nu sin met lili wiyesr?

¹⁹ Oasr inkanek puspus saye su kut ku in akkalemye sunak nu sin met lili wiyesr. Ke sie me pupulyuk, kut fwin orekmakin pal lasr nu selos kut enenu pa in loang akmwoye nu selos. Aok, Jeova el akkalemye pa me srikasrak mwomwo ka. Met sim lun sam inge, Devid el fwak: “Mutun Jeova on nu sin met sumwosmwos, a srel igakla nu ke pang lalos.” (Sam 34:15) Kut kafweang in etawi Jeova ke kut loang akmwoye nu sin met lili wiyesr, yokna nu selos su tuku nu yurosr a siyuk ke kasru. Kut fwin oru ma inge, kut akkalemye sunak nu selos.

20. Kas in esmakin fuka ke orekma in akkalemye sunak kut enenu in esam pal nukewa?

²⁰ In oana ke ma kut lutlutkin tari, kut lungse in esam pal nukewa la efu kut enenu in akkalemye sunak paye su oan ke insiesr nu sin met lili wiyesr. Oayepa, kut suk ke pal mwomwo tu kut in oru me srikasrak in akkalemye sunak nu sin met nukewa, wekunang met pusisel nukewa. Kut fwin orekmakin inkanek nukewa inge, kut fwa akkeye me kapur lun lungse oana met lili a inse sefwanna lun congregation. Ke ma inge, lela kut nukewa in kafweang in akkalemye sunak a yok liki nukewa kut in oru me srikasrak in akkalemye sunak nu sin sie sin sie. Ya kom lungse na paye in oru ouinge?

[Footnote]

Ya Kom Esam?

• Mea ma eneneyuk in akkalemye sunak nu sin met puspus saye?

• Sripe puspus fuka oasr yurosr paenang kut sunakin met lili wiyesr?

• Efu ku yok sripe in akkalemye sunak nu sin sie sin sie?

• Ke inkanek puspus fuka kut ku in akkalemye sunak nu sin met lili wiyesr?