Mokul Nukewa, Ya Komwos Akos Kolyuk lun Kraist oana Sifwe?
“Sifwen mokul, Kraist.”—1 KORINT 11:3.
1. Mea akkalemye la Jeova el God su orala akwuk mwomwo?
“FWAL nu sum, Leum lasr a God lasr, tu kom in eis mwolanu a kaksak a ku, tu kom orala ma nukewa, a ke lungse lom elos on, a orekla tari,” Fwakyuk 4:11 el akkalemye. Meyen el orala ma nukewa, paenang Jeova God pa Fulatlana in kosrao a fwalu nufon a oasr ku lal fwin ma nukewa su el orala. Jeova “El tia God in oraru, a in misla” a ma inge ku in liyeyuk ke akwuk mwomwo el orala nu sin lipufan nukewa lal.—1 Korint 14:33; Isaia 6:1-3; Hibru 12:22, 23.
2, 3. (a) Su ma orekla se meet lun Jeova? (b) Mea kunokon lun Mwen se meet nutin God a mea kunokon lun Papa?
2 Meet liki God el orala kutena ma, el oasr tari ke lusen pal loeloes. Ma orekla se meet lal pa sie lipufan su eteyuk oana “Kas” meyen el pa met Kaskas lun Jeova. Lipufan se inge su pangpang pa kas pa inkanek lun God in orala ma nukewa saye. Tok, el tuku nu fwalu oana sie met sumwosmwos a el eteyuk oana Jisus Kraist.—Ridi Jon 1:1-3, 14.
3 Mea ma Simusla el akkalemye ke kunokon lun God a lun Mwen se meet natul nu sin sie sin sie? Ke kasru lun ku lun God, met sap Poul el akkalemye nu sesr: “A nga lungse tu komwos fwa etu, tu sifwen mokul Kraist; a sifwen mutan, mokul; a sifwen Kraist, God.” (1 Korint 11:3) Kraist el oasr ye kolyuk lun Papa tumal. Akwuk in oasr sie leum ku sifwe arlana yok sripe in oasr misla a oiya mwomwo inmasrlon lipufan a met nukewa. Aok lipufan se inge ‘su ma orekla saye nukewa orekla sel’ el enenu pa in akpusiselyel nu ke kolyuk lun God oana leum lal.—Kolosse 1:16.
4, 5. Mea pulakin a nunak lun Jisus ke kunokon lal nu sin Jeova?
4 Mea nunak lun Jisus ke orekma lal in akpusiselyel nu ke kolyuk lun God a ke el tuku nu fwalu? Ma Simusla el akkalemye: “Kraist Jisus su, ke el muta in luman God, tia nunku tu ma lal oana God sie ma in sukok. A el sifwana akpusiselyel, a nukomang luman sie met kulansap, tu el orekla in luman met. A ke konoiyukyak el oana sie met, el sifwana akpusiselyel, a el akos nu ke mise, aok, mise lun sak soko.”—Filippai 2:5-8, NW.
5 Pal nukewa, Jisus el akpusiselyel sifwana nu ke ma lungse lun Papa tumal. El fwak: “Nga koflanu sifwana oru kutena ma; . . . a nununku luk sumwosmwos, tu Nga tia suk ma lungse luk sifwana, a ma lungse lal su supeyume.” (Jon 5:30) “Nga oru pal e nu kemwa ma in akinsemwomwoyel,” el fwak pa. (Jon 8:29) Ke saflaiyen moul lal fwin fwalu, Jisus el fwak ke pre lal nu sin Papa tumal: “Nga nawekomla [“akfulatye kom,” NW] fwin fwalu, a aksafyela orekma se su kom ase nu sik in oru.” (Jon 17:4) Kalem la, Jisus el akilen a el insese a akos la God el fulat lukel oana sifwel.
Akosten nu sin Papa Sang Me Kasru Puspus nu sin Mwen
6. Oiya mwomwo puspus fuka Jisus el akkalemye?
6 Ke pal se el oasr fwin fwalu, Jisus el akkalemye oiya mwomwo puspus lal. Wekunang lungse yok su el akkalemye nu sin Papa tumal. “Nga lungsik Papa,” el fwak. (Jon 14:31) El akkalemye pa lungse yok lal nu sin metu. (Ridi Mattu 22:35-40.) Jisus el kulang a mwo, el tia upa nu selos ku patok met puspus inge in oru ma se ma elos srunga in oru. “Fwasru nu yuruk, komwos nu kemwa su orekma a fwuni,” el fwak, “a Nga fwa sot mongla nu sumwos. Eis srenenu luk nu fwomwos, a lutlut sik, tu Nga fwokpap a inse pusisel, a komwos fwa konoiyuk mongla in ngunumwos. Tu srenenu luk fusas, a me utuk luk mulalla.” (Mattu 11:28-30) Met matou a met fwusr nukewa su oana sipu, yokna nu selos su asor yok ke sripen ma upa puspus, elos eis me akkeye ke oiya mwomwo lun Jisus a kas mwomwo lal.
7, 8. Ye Masap, mea mutan se inge el tia ku in oru? Tusruktu oiya fuka Jisus el akkalemye nu sel?
7 Nunku pa ke oiya mwo su Jisus el akkalemye nu sin mutan puspus. Ke me sramsram lun metu, mokul puspus elos akupaye mutan puspus. Aok, met kol lun alu fwin an Israel in pal meeta elos oru ma inge nu sin mutan Israel puspus. Tusruktu, Jisus el akkalemye sunak a oiya mwomwo nu sin mutan puspus. Oiya se inge arlana kalem ke ma el oru nu sin sie mutan su pulakin musen sra ke lusen yea 12. “El keok ke ma puspus” ke met ono puspus a el sisla mani lal nukewa in moli ono in akkeyella ke mas lal. Ne ouinge, mas lal “yokelik na.” Ye Masap, el fwak ke sie mutan su tia nasnas. Kutena met su kal mutan se inge el tia nasnas pa.—Livitikus 15:19, 25.
8 Ke pal se mutan se inge el long la Jisus el akkeyela met mas, el wi u lulap su raunella Jisus, a el fwak: “Nga fwin kalyena nuknuk lal, nga fwa kela.” Ke ma inge el kalye Jisus a el kela ke mas lal. Jisus el etu la mutan se inge el tia fwal in kal nuknuk lal. Ne ouinge, el tia mulat nu sel. A el kulang nu sel. Jisus el kalem ke pulakin lun mutan se inge ke el mas ke lusen yea puspus a el etu akilen la mutan se el enenu na paye kasru. Jisus el pakomutal, a el fwak nu sel: “An, lulalfongi lom ore kom in kela. Som in misla, a kela.”—Mark 5:25-34.
9. Ke pal se met tuma lutlut elos ikolye tulik srisrik in tuku nu yurol, mea Jisus el oru?
9 Tulik srisrik pa elos engun a tia sangeng fwin Jisus el muta yurolos. Ke pal se metu elos us tulik srisrik nu sel, met tuma lutlut lal tulokinyelos, meyen elos nunku mu Jisus el srunga tulik srisrik in tuku nu yurol. Tusruktu tia pa inge ma Jisus el nunku. Ma Simusla el akkalemye nu sesr: “A ke Jisus el liye, el arulana mulat, a fwak nu selos [met tuma lutlut]: ‘Lela tulik fwusr in tuku nu yuruk; nik komwos ikololosi, tu togusrai lun God ma lalos su ou elos.’” Oayepa, “el sruklalosyuk in paul, a akinsemwomwoyelos, ke el filiye paul nu fwelos.” Jisus el lela tulik srisrik puspus in tuku nu yurol; a el paingelos.—Mark 10:13-16.
10. Oiya mwomwo puspus su oasr yurin Jisus, fuka el lotela ma inge?
10 Jisus el akkeye fuka oiya mwomwo puspus su el akkalemye ke pal se el oasr fwin fwalu? Meet liki el tuku nu fwalu, el liye oiya mwomwo lun Papa tumal ke lusen pal loeloes a el lotela a etawi ma inge. (Ridi Soakas 8:22, 23, 30.) In kosrao, el liye inkanek mwo lun Jeova in oru kolyuk lal nu sin ma orekla nukewa Lal a el orekmakin pa ma inge. Fwin Jisus el tia akpusiselyel nu sin God, el tia ku in etawi oiya mwomwo se inge. El insemwomwo in akpusiselyel sifwana nu sin Papa tumal, a Jeova el engun ke Mwen natul ke el oru ma inge. Ke pal se el oasr fwin fwalu, Jisus el akkalemye pa oiya mwomwo puspus lun Papa tumal. Sie kunokon na mwomwo nu sesr in akpusiselye kut nu sin Kraist, su God el srusrngiye oana Leum ke Togusrai lal in kosrao!
Etawi Oiya Mwomwo lun Kraist
11. (a) Kut enenu in kafweang yok in etawi su? (b) Efu ku mokul nukewa ke congregation elos enenu na paye in etawi Kraist?
11 Met nukewa ke congregation, yokna mokul nukewa, elos enenu in kafweang in etawi oiya mwomwo lun Kraist. Oana ke ma Baibel el akkalemye tari: “Sifwen mokul nukewa Kraist.” In oana Kraist el etawi God paye, su leum ku Sifwel, mokul Kristian nukewa elos enenu pa in etawi Kraist, su sifwe a leum lalos. Ke pal se el ekla met Kristian, met sap Poul el oru ma inge. “Komwos in met etawi yu, oana nga ouyepa met etawi Kraist,” el kaifwe met Kristian nukewa. (1 Korint 11:1) A met sap Piter el fwak: “Tu pangonyuk kut nu ke ma inge, tu Kraist el oayepa keok keyumwos, a likiye nu sumwos sie srikasrak, tu komwos in fwasr in fwalkel.” (1 Piter 2:21) Kas in kaifwe inge in etawi Kraist arlana fwal nu sin mokul nukewa ke siepa sripe mwomwo. Elos fwa ku in kulansap oana met elder a ministerial servant ke congregation. Jisus el insemwomwo yok in etawi Jeova, mokul Kristian nukewa elos enenu pa in insemwomwo in etawi Kraist a oiya mwomwo lal.
12, 13. Oiya fuka met elder elos enenu in akkalemye nu sin met Kristian nukewa su oana sip su oasr ye me karungin lalos?
12 Oasr ma eneneyuk nu sin met elder ke congregation in lutlut in oana Kraist. Piter el sang kas in kaifwe inge nu sin met elder nukewa: “Komwos in kiteung u lun God in maslomwos, a karungnulosyung in tia sranges, a ke lungse lomwos; fwal nu ke lungse lun God; a tia pa insien mani in moli, a ke insiomwos kena oru; a tia pa akfulatye komwos in leum fwin ma likiye nu sumwos, a komwos in sifwana ore komwos me srikasrak nu sin u.” (1 Piter 5:1-3) Met Kristian elder elos tia enenu in kou a mulat nu sin congregation, ku tia nunku kelos sifwana. Elos kafweang in akkalemye lungse, nunak sumwos, inse pusisel, a kulang nu sin met lili nukewa su oana sip ye kolyuk a karungin lalos.
13 Met elder nukewa su liaung congregation elos met sesumwos pa, a elos enenu pa in akilen a esam ma inge pal nukewa. (Rom 3:23) Ke ma inge elos enenu in kafweang in lutlut kel Jisus a etawi lungse lal. Elos enenu in nunku yok ke inkanek su God a Jisus eltal oru nu sin met kulansap nukewa lal a in kafweang in etawi elos. Met sap Piter el akkeye kut: “Komwos nu kemwa in loseni kapinsiomwos ke fulpap, in kulansupu sie sin sie, tu God el sinukin met su fulang, a el sang lungkulang nu sin met fulpap.”—1 Piter 5:5.
14. Nu ke oiya fuka met elder elos enenu in akkalemye sunak nu sin met puspus saye?
14 Ke orekma lalos nu sin u lun God, met liaung ke congregation elos enenu in akkalemye oiya mwomwo puspus. Rom 12:10 el akkalemye: “Ke lungse met lili komwos in lung nu sin sie sin sie. Ke sunakin, komwos in akfulatye sie sin sie.” Met elder a ministerial servant nukewa elos akkalemye sunak nu sin sie sin sie. Oana ke oiya mwomwo lun met Kristian nukewa, met elder a ministerial servant elos ‘tia oru kutena ma ke akukuin ku ke konkun lusrongten, a ke inse pusisel lela kais sie in nunku tu met ngia mwo lukelos.’ (Filippai 2:3) Met liaung nukewa elos akkalemye a nunku ke met puspus saye oana fulat lukelos. Fwin elos oru ma inge, met liaung inge elos orekmakin kas in kasru lal Poul: “Na mwo tu kut su ku in eis munas lalos su tia ku, a tia akinsemwomwoye kut sifwana. Lela kut nu kemwa in akinsemwomwoye met tulan in ma mwo in musailosyuk. Tu Kraist oayepa el tia akinsemwomwoyel sifwana.”—Rom 15:1-3.
‘Akkalemye Sunak nu sin Mutan Kiyomwos’
15. Oiya fuka mokul payuk nukewa enenu in akkalemye nu sin mutan kiyelos?
15 Inge, nunku ke kas in kasru su Piter el simusla nu sin mokul payuk nukewa. El simusla: “Komwos mokul tuma, in ouyepa, muta yurin mutan kiomwos oana ke lalmetmet, a akfulatye mutan, oana alu munas liki komwos.” (1 Piter 3:7) Kalmen kas inge in akfulatye sie met pa in aksaokyel na paye a akkalemye sunak nu sel. Ke ma inge, kom e fwa loang akmwoye ke nunak, ma enenu, a ma lungse lun met se inge a lela ma lungse lun met se inge in orek fwin wangin kutena akwuk mwomwo ku in lainyuk. Pa inge oiya mwo sie mokul payuk el enenu in akkalemye nu sin mutan kiyel.
16. Kas in sensen fuka Baibel el akkalemye nu sin mokul payuk ke orekma lalos in akfulatye mutan kiyelos?
16 Ke pal se el fwak nu sin mokul payuk nukewa in akfulatye mutan kiyelos, Piter el akkalemye pa kas in sensen se inge: “Tu in wangin ma kutongye pre lomwos.” (1 Piter 3:7) Fus se inge akkalemye kalem ke nunak lun Jeova ke oiya su mokul el akkalemye nu sin mutan kiyel. Fwin el tia akkalemye sunak a oiya mwo nu sel, ma inge ku in tulokinye pre lal. Sayen ma inge, ya mutan payuk elos tia insemwomwo a akkalemye pa oiya mwomwo fwin mokul tumalos akfulatyelos?
17. Mokul el akkalemye fuka lungse nu sin mutan kiyel?
17 Ke ma eneneyuk nu sin mokul in akkalemye lungse nu sin mutan kiyel, Kas lun God el fwak kas inge: “Ouinge mwo tu mokul tuma elos in lungse pa mutan kielos sifwana oana manolos sifwana. . . . Tu wangin met srunga ikwel sifwana; a el oakoakel a saokel, oana Kraist el oru ouyepa ke congregation . . . Lela komwos nu kemwa in oru ouyepa, tu sie in lungse mutan kiel oana el sifwana.” (Efesus 5:28, 29, 33, NW) Nu ke oiya fuka mokul elos akkalemye lungse nu sin mutan kiyelos? Poul el simusla kas inge: “Mokul tuma, komwos in lungse mutan kiomwos, oana Kraist el ouyepa lungse congregation, a sifwana esalang ka.” (Efesus 5:25, NW) Aok, sie mokul payuk el enenu in akkalemye lungse a fwinne ke pal su el enenu in sang moul lal in kasru mutan kiyel, oana ma Kraist el oru nu sin met puspus. Fwin sie mokul Kristian el kulang, mwo, lungse in loang akmwoye ke ma enenu lal, tia sruwusr nu sel, arlana fusrasr nu sin mutan kiyel in akpusiselyel ke kolyuk lal.
18. Me kasru fuka mokul elos ku in eis in karungin kunokon nu ke moul in payuk lalos?
18 Ya orekma mwo in akfulatye mutan ke inkanek inge el upa na paye in orek sin mokul payuk? Mo, Jeova el tia siyuk selos in oru ma se su elos tia ku in oru. Sayen ma inge, met nukewa su alu nu sin Jeova elos ku in siyuk pal nukewa ke ku su fokoko emeet in kosrao a fwalu, pa inge ku lun God. Jisus Kraist el fwak: “Na komwos met koluk fwin etu fuka in sang me sang mwo nu sin tulik nutumwos, fuka yokeyen Papa tumomwos su in kosrao, el fwa sang ngun mutal nu selos su siyuk sel!” (Luk 11:13) Ke pre lalos, mokul payuk elos ku in siyuk ke ku lun God, a Jeova el fwa kasrelos in akkalemye oiya mwomwo nu sin met puspus, wekunang mutan kiyelos.—Ridi Orekma 5:32.
19. Mea kut fwa lutlutkin ke me lutlut toko?
19 Aok, oasr kunokon yok lun mokul in lutlut in akpusiselyelos nu sin Kraist a etawi inkanek mwo in kol. Tusruktu fuka nu sin mutan nukewa, yokna nu sin mutan payuk? Me lutlut toko fwa akkalemye la nunak fuka elos akkalemye ke kunokon lalos ke akwuk lun Jeova.
Ya Kom Esam?
• Oiya mwomwo puspus fuka lun Jisus kut enenu in etawi?
• Oiya fuka met elder elos akkalemye nu sin met lili puspus su oana sipu?
• Oiya fuka mokul payuk enenu in akkalemye nu sin mutan kiyel?
[Petsac ke sra 4]
Etawi Jisus ke orekma in akfulatye met puspus