Mutan Payuk, Efu Komwos Enenu in Akpusiselye Komwos nu sin Mokul Tumomwos?
“Sifwen mutan, mokul.”—1 KORINT 11:3.
1, 2. (a) Mea met sap Poul el simusla ke akwuk lun Jeova ke orekma in kol a ke akosten? (b) Kusensiyuk fuka kut fwa sramsramkin ke me lutlut inge?
JEOVA el oakiye akwuk mwo ke inkanek takla su met sap Poul el akkalemye ke el simusla “sifwen mokul, Kraist” a “sifwen Kraist, God.” (1 Korint 11:3) Me lutlut taria el akkalemye la Jisus el nunku ma inge oana sie kunokon mwomwo a sie me insemwomwo in akpusiselyel nu sin Sifwe lal, Jeova God, a sifwen mokul Kristian pa Kraist. Kraist el kulang, fwokpap, pakoten, a tia nukanten nu sin met. Mokul ke congregation elos enenu pa in akkalemye oiya inge nu sin met puspus, yokna nu sin mutan kiyelos.
2 Na fuka nu sin mutan? Su sifwelos? “Sifwen mutan, mokul,” Poul el simusla. Nunak fuka mutan elos enenu in akkalemye ke akwuk inge lun God? Ya akwuk inge srakna ku in orekmakin fwin mokul el tia alu nu sin Jeova? Ya akosten ke kolyuk lun mokul akkalemye la oasr ma eneneyuk nu sin mutan in misla na, a tia akkalemye nunak lal fwinne oasr sulela enenu in orek? Ke inkanek fuka sie mutan efwa kaksakinyuk?
“Nga Fwa Oru Nu Sel sie Met in Kasrel”
3, 4. Efu ku akwuk ke me kolyuk ke moul in payuk arlana yok sripe?
3 God el orala akwuk la su fwa kol sie sou. Tokin Adam el orekla, Jeova God el fwak: “Tia mwo tu met se inge in mukena muta. Nga fwa oru nu sel sie met in kasrel.” Tokin If el orekla, Adam el arlana engun in oasr sie met welul a met kasru paenang el fwak: “Ma inge sri in srik, a ikwe in ikuk.” (Genesis 2:18-24) Oasr fwinsrak mwomwo lal Adam a If in ekla papa a nine lun met sumwosmwos nukewa, su fwa muta ma patpat a eis me insemwomwo ke sie paredais fwin fwalu nufon.
4 Ke sripen orekma in lain lun papa a nine se meet kiyesr, ma mwomwo su sikyuk ke imae lun Eden tula. (Ridi Rom 5:12.) Tusruktu God el srakna nunku la mokul pa sifwen mutan. Fwin mokul payuk el orekmakin kolyuk lal ke inkanek sumwos a fwin mutan payuk el akpusiselye ke kolyuk lal, ma inge sang me kasru yok a me insemwomwo ke moul in payuk. Fwokin ma inge oana sie ke ma Jisus el pula ke el akosten nu sin Jeova, su Sifwe lal. Meet liki el moul fwin fwalu oana sie met, Jisus el ‘engun pal e nukewa ye mutun Jeova.’ (Soakas 8:30) Ke sripen sesumwos, mokul elos tia ku in akpayeye kunokon lalos oana sifwen sou ke inkanek su arlana sumwos. A mutan elos tia pa ku in akkalemye akosten lalos ke oiya su arlana sumwosmwos. Tusruktu, fwin mokul payuk a mutan payuk elos kafweang yok in oru ma elos ku in oru, akwuk inge kol nu ke insemwomwo lulap ke moul in payuk ke pal inge.
5. Efu ku mokul a mutan payuk elos enenu in filiye ke insielos kas in kai su koneyukyak in Rom 12:10?
5 Yok sripe nu ke moul in payuk mwomwo pa siyanyen se elos orekmakin kas in kasru lun Baibel inge nu sin met Kristian nukewa: “Ke lungse met lili komwos in lung nu sin sie sin sie. Ke sunakin, komwos in akfulatye sie sin sie.” (Rom 12:10) Oayepa, mokul payuk a mutan payuk elos enenu in kafweang yok in “kulang nu sin sie sin sie, ke mwo insiomwos, nunak munas nu sin sie sin sie.”—Efesus 4:32.
Fwin Mokul ku Mutan Payuk El Tia Kulansap nu sin Jeova
6, 7. Mea fwa sikyak fwin sie mutan Kristian el akkalemye oiyen fulpap a pusisel nu sin mokul tumal su tia kulansap nu sin Jeova?
6 Fuka fwin mokul tumom ku mutan kiyom el tia sie met kulansap lun Jeova? Pal nukewa, mokul tuma pa tia sie met kulansap lun Jeova. Ke oiya se inge, oiya fuka mutan el enenu in akkalemye nu sel? Baibel el sang me top: “Ouyepa mutan kie, komwos in akos mokul tumomwos, tu, kutena fwin tia akos kas lun God, elos fwa kolyuk fwinne wangin kas ke oiyen mutan kielos, ke elos liye oiye mwo lomwos wikin sunak yok.”—1 Piter 3:1, 2, NW.
7 Kas lun God el fwak nu sin mutan payuk in akkalemye oiyen fulpap a pusisel nu sin mokul tumal su tia kulansap nu sin Jeova. Ella mwomwo lal ku in akkeyel in nunku la mea ma se inge su oral in akkalemye oiya mwomwo. Fwokin ma inge, mokul payuk el lungse in etu lulalfongi lun mutan kiyel su met Kristian a tok el lulalfongi ke ma paye.
8, 9. Mea sie mutan Kristian el ku in oru fwin mokul tumal su tia kulansap nu sin Jeova el tia oru kutena inkanek in etu ma paye fwinne mutan kiyel el akkalemye oiya mwo?
8 Na fuka fwin mokul tuma su tia kulansap nu sin Jeova el tia oru kutena inkanek in etu ma paye fwinne mutan kiyel el akkalemye oiya mwo? Baibel el akkeye mutan su kulansap nu sin Jeova in akkalemye oiyen met Kristian pal nukewa, tusruktu saap ma inge upa in orek. Ke sie me pupulyuk, kut rid in 1 Korint 13:4: “Lungse el mongfusrasr.” Ke ma inge, mutan Kristian el enenu in kafweang in akkalemye “pusisel nu kemwa, a fulpap, ke mongfusesr,” a akkalemye lungse elan ku in muteng a mongfusrasr ka. (Efesus 4:2) Ke kasru lun ku lun God, kut ku in akkalemye oiyen met Kristian fwinne ke ma upa puspus.
9 Poul el simusla: “Nga ku in oru ma nu kemwa in El su akkeyeyu.” (Filippai 4:13) Ku lun God oru mokul ku mutan Kristian payuk in oru ma puspus su luman upa in oru. Ke sie me pupulyuk, orekma upa lun sie selos ku in oru sie in topuk ku kaskas upa. Tusruktu, Baibel el fwak nu sin met Kristian nukewa: “Komwos tia sang ma koluk ke ma koluk nu sin sie met. . . . Tu simla tari: ‘Ma luk in foloksak; Leum [Jeova] el fwak, Nga fwa moli.’” (Rom 12:17-19) “Liaung tu wangin met in sang ma koluk ke ma koluk nu sin kutena met, a fwasr tokin ma mwo pal e nukewa nu sin sie sin sie, a nu sin met e nukewa.” Ke inkanek ouinge, 1 Tessalonika 5:15 el kai kut: “Liaung tu wangin met in sang ma koluk ke ma koluk nu sin kutena met, a fwasr tokin ma mwo pal e nukewa nu sin sie sin sie, a nu sin met e nukewa.” Oasr ma su kut tia ku in oru ke ku lasr sifwana, tusruktu kasru lun ngun mutal kut ku in oru ma inge. Arlana mwo la kut pre siyuk ke ku lun God in ase nu sesr ma su wangin yurosr!
10. Oiya fuka Jisus el akkalemye ke kas ku orekma su tia mwo lun met puspus saye?
10 Jisus el oakiye sie me srikasrak mwo ke sramsram lal nu sin met su fwak ku oru ma tia mwo nu sel. “Su ke kaskouyuk, a el tia sifwil kas kou. Su ke el keok el tia aksangeng, tu el sifwana esalang nu sel su nununku sumwos,” 1 Piter 2:23 el akkalemye. Kut eis me akkeye yok fwasr tokin me srikasrak mwomwo lal. Nikmet kasrkusrak ke oiya koluk lun met puspus saye. Meyen met Kristian nukewa elos eis me akkeye yok, in “fusrasr inse, fulpap in nunak, tia atopuki ke ma koluk, ku atopuki ke kas kou.”—1 Piter 3:8, 9.
Siyanyen su Tia Akkalemye Nunak Lalos nu sin Sie sin Sie?
11. Kunokon yok sripe fuka e fwa oasr pa yurin kutu mutan Kristian?
11 Ya orekma lun mutan in akpusiselyel nu ke kolyuk lun mokul tumal kalmekin la mutan el misla ke moul in payuk, tia ku in akkalemye nunak lal ke ma lun sou ku ke ma puspus saye? Mo, tia ouinge. Oasr kunokon puspus su Jeova el sang nu sin mokul, a nu sin mutan pa. Nunku ke kunokon mwomwo su oasr yurin met 144,000 in ekla togusra a met tol in kosrao ye kolyuk lun Kraist ke pal se el kol fwin fwalu inge! Kutu selos pa mutan. (Galetia 3:26-29) Kalem la, Jeova el sang nu sin mutan orekma saok ke akwuk lal ke ma puspus.
12, 13. Sang me pupulyuk in akkalemye la mutan elos palye.
12 Ke sie me pupulyuk in pal lun Baibel, mutan elos palye. Joel 2:28, 29 el palye: “Nga fwa okoila ngunik fwin ikwe nu kemwa, a mwen nutumwos a an nutumwos fwa palye. . . . A nga fwa okoila pa ngunik in len ingo nu fwin met kulansap a nu fwin mutan kulansap.”
13 Met tuma lutlut 120 kutu su muta tukeni nu sie ke sie infwokil lung fwin an Jerusalem ke len in Pentecost 33 C.E. pa mutan wekunang mokul. Ku lun God putati nu ke u se inge nukewa. Ke ma inge Piter el ku in fwak ma met palu Joel el palye a orekmakin ma inge nu sin mokul a mutan. Piter el akkalemye: “A pa inge ma fwak kel Joel met palu. ‘A a fwa te oru in len safla,’ God el fwak, ‘Nga fwa okoila ngunik nu fwin ikwe nu kemwa; a mwen nutumwos a an nutumwos elos fwa palye . . . ; aok a nga fwa okoila ngunik nu fwin met kulansap luk a nu fwin mutan kulansap luk in len ingo, a elos fwa palye.’”—Orekma 2:16-18.
14. Kain in kunokon fuka oasr yurin mutan in fwakelik peng mwo a sang kasru nu ke alu paye?
14 In century se meet, oasr kunokon mwomwo lun mutan in wi pa fwakelik peng mwo a sang kasru nu ke alu paye. Elos luti nu sin met puspus ke Togusrai lun God a oru ma puspus in sang kasru nu ke orekma in luti. (Luk 8:1-3) Ke sie me pupulyuk, met sap Poul el pangon Phoebe ‘sie met luti lun congregation in Senkria.’ A ke el supala kas in paing nu sin met orekma welul, Poul el akkalemye inen mutan oaru puspus, wekunang “Traifina a Traifosa, mutan su orekma yok nu sin Leum.” El akkalemye pa “Persis met kulo, su orekma yok in Leum.”—Rom 16:1, 12.
15. Mea kunokon lun mutan in fwakelik me luti lun Kraist ke pal lasr inge?
15 Ke pal lasr inge, ip yok ke million itkosr kutu su luti peng mwo lun Togusrai lun God fwin fwalu nufon pa mutan ke kain in matwe nukewa. (Mattu 24:14) Sister puspus elos orekma oana pioneer, missionary, a kulansap in Bethel. Devid el on: “Leum [Jeova] el ase kas; mutan se sulkakinelik elos sie u lulap.” (Sam 68:11) Arlana paye kas inge! Jeova el aksaokye na paye kunokon lun mutan in sulkakin peng mwo a in akpayeye akwuk lal.
Mutan Luo Su Akkalemye Nunak Lalos
16, 17. Fuka me srikasrak lal Serah el akkalemye la mutan el tia misla na ke moul in payuk?
16 Fwin Jeova el sang nu sin mutan kunokon puspus, ya tia fwal nu sin mokul in siyuk mutan kiyelos meet liki elos oru sulela yok sripe lalos? Arlana mwo nu selos in oru ouinge. Ma Simusla el akkalemye ke ma sikyuk puspus su mutan el kaskas ku oru ma se fwinne mokul tumalos elos tia siyuk nunak lalos ka. Loang akmwoye ke me pupulyuk luo.
17 Mutan kiyel Ebream, Serah, el fwak nu sel pal nukewa in sisla mutan akluo kiyel a mwen natul ke sripen wangin sunak lalos. “A ma inge ma toasrlana ye mutal Ebream” tusruktu tia nu sin God. Jeova el fwak nu sel Ebream: “Nik kom lela ma inge in toasrlanu ye mutom meyen tulik se inge, a meyen met kulansap mutan lom, in ma nu kemwa Serah el fwak nu sum. Porongo pusral.” (Genesis 21:8-12) Ebream el akos Jeova, porongel Serah, a oru ma el siyuk sel.
18. Kain in orekma yok sripe fuka Abigail el oru?
18 Nunku pa kel Abigail, mutan kiyel Nebal. Ke pal se Devid el kaengla liki Togusra Soul, el muta ke imwen aktuktuk fototo nu ke un kosro natul Nebal. Devid el tia eis kutena ma ke ma puspus lun met kasrup se inge, a el a met lal karungunang ma lal. Tusruktu, Nebal el “kou a likkeke in orekma lal,” a el “kaskaskou” nu sin met lal Devid. El sie “met lusrongten,” a ‘lalfon on yurol.’ Ke met lal Devid elos siyuk ke sunak kutu me mongo, Nebal el srunga in sang me kasru. Mea Abigail el oru ke el long ke ma sikyuk inge? El akola me mongo puspus a el tia fwak ma inge nu sel Nebal, el “silaklak, a eis lof in bred luofoko, a luo sufwa in wain, a sip lumko akola tari, a limekosr srikasrak in korn manman, a siefok ungen grep pao, a luofoko kek in fig pao” a sang ma inge nukewa nu sel Devid a nu sin met lal. Ya Abigail el oru ma sumwos? “Jeova el unilye Nebal, a el mise,” Baibel el akkalemye. Tok Devid el payuk nu sel Abigail.—1 Samuel 25:3, 14-19, 23-25, 38-42.
‘Mutan Su Fwal in Kaksakinyuk’
19, 20. Mea oru sie mutan elan fwal in eis kaksak?
19 Ma Simusla el kaksakin mutan payuk su oru ma nukewa ke inkanek lun Jeova. Buk lun Baibel inge Soakas el kaksakin “mutan fwal,” a fwak: “Tu molol yok liki eot rubi. Insien mokul tumal lulalfongel, a el tia enenu ma laesla. El oru mwo nu sel, a tia koluk in len in moul lal nukewa.” Sayen ma inge, “el ikasla oalul ke lalmetmet, a masap lun kulang on fwin loal. El arulana liaung inkanek lun met in loom sel, a el tia kang me mongo lun alsrangesr. Tulik natul tuyuk, a pangnol me insemwomwo; mokul tumal pa, a el kaksakunul.”—Soakas 31:10-12, 26-28.
20 Mea oru sie mutan elan fwal in eis kaksak? “Kulang me kutasrik, a oasku ma lusrongten, a sie mutan su sangeng sin Jeova, el fwa kaksakinyuk,” Soakas 31:30 el akkalemye. Wekunang nu ke sangeng sin Jeova pa me eneneyuk in akpusiselye sifwana nu sin met su Jeova el sulela ke kunokon in kol. “Sifwen mutan, mokul,” oana “sifwen mokul Kraist,” a sifwen Kraist, God.”—1 Korint 11:3.
Kom Akkalemye Kulo ke Me Sang lun God
21, 22. (a) Sripe mwo puspus fuka oasr yurin met Kristian payuk nukewa in sang kulo ke akwuk lun payuk su me sang lun God? (b) Efu ku kut enenu in akkalemye sunak nu ke akwuk lun Jeova ke ku a me kolyuk?
21 Oasr sripe puspus lun met Kristian nukewa su payuk in akkalemye kulo nu sin God! Elos ku in sruokye paultal a tukeni fwasr oana siyanyen se su insemwomwo. Elos sang kulo yok ke me sang lun God ke akwuk mwo ke moul in payuk meyen ma inge orala pal mwomwo nu selos in akfwalye moul lalos a tukeni fwufwasyesr wi Jeova. (Rut 1:9; Maika 6:8) Jeova, su orala akwuk lun payuk, el etu na paye ma eneneyuk nu ke insemwomwo lun moul in payuk. Oru ma nukewa ke inkanek lal, a ‘engun lun Jeova fwa ku lomwos,’ fwinne kut muta ke fwal koluk inge.—Niemaia 8:10.
22 Sie mokul Kristian payuk su lungse mutan kiyel oana el lungsel sifwana fwa akkalemye lungse a kulang ke orekma in kol lal. Fusrasr nu sin mokul in akkalemye lungse nu sin mutan kiyel su kulansap nu sin Jeova, ke sripen el akos kolyuk lal a akkalemye sunak yok nu sel. Yok sripe liki nukewa, me srikasrak mwomwo ke moul in payuk lalos fwa akfulatye Jeova God lasr.
Ya Kom Esam?
• Mea akwuk lun Jeova ke orekma in kol lun sifwe a in akos ma inge?
• Efu ku mokul ku mutan payuk elos enenu in akfulatye sie sin sie?
• Oiya fuka mutan su kulansap nu sin Jeova el enenu in akkalemye nu sin mokul tumal su tia kulansap nu sin Jeova?
• Efu ku mokul payuk elos enenu in siyuk mutan kiyelos meet liki elos oru sulela yok sripe lalos?
[Petsac ke sra 9]
Pre el ku in kasru sie mutan Kristian payuk in akkalemye oiya mwo lun God
[Petsac ke sra 10]
Jeova el aksaokye kunokon lun mutan in fwakelik ma lun Togusrai