Mea Kut Lotela Kel Jisus

Ke Moul in Sou

Nunak fuka ke akwuk lun payuk oru sou in insemwomwo?

Moul in payuk el sie me kapur mutal. Ke pal se siyukyuk sel fwin mwo in divorce, Jisus el topuk a fwak: “Ya komwos sumwena rid, tu el su oralosla ke mutamwauk el oralos met mokul a met mutan a fwak, ‘Ke ma inge sie met el fwa fwasr liki papa a nine, a fwa fulyung nu sin mutan kiel, a eltal inge fwa ekla ikwe siefwanna’? A ou inge eltal tia sifwel luo, a ikwe siefwanna. Ke ma inge ma God el fwalseni, lela met in tia eselik. . . . El su fwa sisla mutan kiel, fwin tia ke kosro, a fwa mari siena, el orek kosro, a el su mari mutan sa ke el sisila, el orek kosro.” (Mattu 19:4-6, 9) Fwin siyanyen se elos akos kas in kai lun Jisus a elos oaru nu sin sie sin sie, met nukewa in sou elos pulakin misla a insemwomwo.

Efu ku lungse nu sin God oru moul in sou insemwomwo?

Jisus el fwak: “‘Kom fwa lungsum Jeova God lom ke insiom kemwa, a ke ngunum kemwa, a ke nunkom kemwa.’ Pa inge masap se yok a masap se meet.” A mea ma se akluo ke masap su yok? Jisus el fwak: “Kom fwa lungsum met tulan lom [wekunang met nukewa ke sou lom] oanu kom sifwana.” (Mattu 22:37-39) Ke ma inge key nu ke moul in sou insemwomwo pa in oasr sie fototo mwomwo nu sin God meyen lungse nu sel mokle kut in lungse sie sin sie.

Fuka mokul payuk a mutan payuk ku in oru sie sin sie in insemwomwo?

Mokul payuk oru mutan kiyelos in insemwomwo fwin elos etawi me srikasrak lun Jisus. Jisus el akkalemye lungse yok lal nu sin congregation, su pupulyukkin oana mutan kiel. (Efesus 5:25) Jisus el fwak: “Mwen nutin met el tia tuku tu met in kulansap nu sel, a tu lan kulansap nu selos.” (Mattu 20:28) Jisus el tia lungse in sapsap ku kou upa nu sin met nukewa ye me karungin lal tusruktu el me akkeye nu selos. (Mattu 11:28) Ke ma inge, mokul payuk elos enenu in orekmakin ku lalos ke sie inkanek kulang su akinsemwomwoye met nukewa su wi ke sou lal.

Mutan payuk nukewa elos ku in eis pa ma lane ke me srikasrak lal Jisus. “Sifwen Kraist, God,” Baibel el fwak. A oayepa akkalemye la “sifwen mutan, mokul.” (1 Korint 11:3) Jisus el tia nunku mu el tia ku in akpusiselyel nu sin God. Oasr sunak yok lal nu sin Papa tumal. “Nga oru pal e nukewa ma in akinsemwomwoyel,” Jisus el fwak. (Jon 8:29) Sie mutan su akpusiselyel nu ke kolyuk lun mokul tumal ke sripen lungse a sunak yok nu sin God el sang kasru yok in oru moul in sou lal in insemwomwo.

Mea papa a nine elos lotela ke nunak lun Jisus ke tulik?

Jisus el orekmakin pal nu sin tulik a el nunku yok ke nunak a pulakin lalos. Baibel el fwak: “A Jisus el pangnolosmu nu yurol, a fwak: ‘Lela tulik fwusr in fwasru nu yuruk.’” (Luk 18:15, 16) Ke kutu pal, metu elos kaskas kou a mulat nu sin kutu tulik mokul su kaskas ke lulalfongi lalos ke Jisus. Tusruktu Jisus el sang kas in kaksak nu sin tulik fwusr, a fwak nu sin met nukewa inge su mulat nu sin tulik fwusr: “Ya komwos sumwena rid, ‘Kom aksumwosye kaksak liki oalin tulik srisrik a tulik fwusr’?”​—Mattu 21:15, 16.

Mea tulik elos lotela kel Jisus?

Jisus el akkalemye me srikasrak mwo nu sin tulik la fuka elos ku in akkalemye insemwomwo lalos ke orekma nukewa in akfototoyelos nu sin God. Ke pal se ma el yea 12 matwe, el konealak “in tempel, muta in masrlon met luti, in longolos, a in siyuk selos.” Mea fwokin ma inge? “A elos nu kemwa su longol elos lut ke lalmetmet lal a topuk lal.” (Luk 2:42, 46, 47) Tusruktu, etauk lal Jisus el tia oral in inse fulat ku konkun. A, ma inge oral in akkalemye sunak nu sin papa a nine kiyel. Baibel el fwak: “El aksoltal.”​—Luk 2:51.

Ke kutupa me akuteye, srike liye sapta 14 lun buk se inge Mea Baibel el Luti Na Paye?a

[Foonote]